ಬೆಂಗಳೂರು: ಅತಿದೊಡ್ಡ ಜಾಗತಿಕ ಇ-ಕಾಮರ್ಸ್ ಕಂಪನಿ ಅಮೆಜಾನ್ ಕೆನಡಾದ ತನ್ನ ಆನ್ಲೈನ್ ಶಾಪಿಂಗ್ ವೆಬ್ಸೈಟ್ನಲ್ಲಿ ಕನ್ನಡ ಧ್ವಜದ ಚಿತ್ರ, ಅಶೋಕ ಚಕ್ರದ ಲಾಂಛನವಿರುವ ಮಹಿಳೆಯರ ಒಳ ಉಡುಪುಗಳನ್ನು ಮಾರಾಟಕ್ಕಿಟ್ಟ ಕಾರಣಕ್ಕೆ ಆಕ್ರೋಶ ವ್ಯಕ್ತವಾದ ಹಿನ್ನೆಲೆಯಲ್ಲಿ ಕ್ಷಮೆಯಾಚಿಸಿದೆ.
ಈಗ ಆ ಚಿತ್ರವನ್ನು ತನ್ನ ಸೈಟ್ನಿಂದ ತೆಗೆದುಹಾಕಿರುವ ಅಮೆಜಾನ್ ಅದರ ಬದಲಾಗಿ ಬೇರೆ ಚಿತ್ರ ಹಾಕಿದೆ. ಆದರೆ, ಹೊಸ ಚಿತ್ರದಲ್ಲಿರುವ ಒಳ ಉಡುಪಿನ ವಿವರಣೆಯಲ್ಲಿ ಕರ್ನಾಟಕ ಫ್ಲಾಗ್ ಡಿಸೈನ್ನ ಒಳ ಉಡುಪು ಎಂಬುದನ್ನು ಮಾತ್ರ ಹಾಗೆಯೇ ಇಟ್ಟಿದೆ.
ವಿಮೆನ್ಸ್ ಫ್ಲ್ಯಾಗ್ ಆಫ್ ಕರ್ನಾಟಕ ಒರಿಜಿನಲ್ ಡಿಸೈನ್ ಎಂಬ ಹೆಸರಿನಲ್ಲಿ ಈ ಬಿಕಿನಿಯನ್ನು ಮಾರಾಟ ಮಾಡಲಾಗುತ್ತಿತ್ತು. ಇದಕ್ಕೆ ಸಾಮಾಜಿಕ ಜಾಲತಾಣದಲ್ಲಿ ವ್ಯಾಪಕ ವಿರೋಧ ವ್ಯಕ್ತವಾಗಿತ್ತು. ಕರ್ನಾಟಕದ ಫ್ಲಾಗ್ ಡಿಸೈನ್ನ ಪ್ರಾಡಕ್ಟ್ ಎಂದು ನಮೂದಿಸಲ್ಪಟ್ಟಿದ್ದ ಕನ್ನಡ ಧ್ವಜವಿರುವ ಮಹಿಳೆಯರ ಒಳಉಡುಪುಗಳನ್ನು ಸೇಲ್ ಮಾಡುತ್ತಿರುವುದಕ್ಕೆ ಅಮೆಜಾನಿಗೆ ಟ್ಯಾಗ್ ಮಾಡಿ ವಿರೋಧಿಸಲಾಗಿತ್ತು.
ಈ ಬಗ್ಗೆ ರಾಜ್ಯದ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಚಿವ ಅರವಿಂದ ಲಿಂಬಾವಳಿ ಕೂಡ ಆಕ್ರೋಶ ಹೊರಹಾಕಿ ಅಮೆಜಾನ್ ಸಂಸ್ಥೆ ವಿರುದ್ಧ ಕಾನೂನು ಕ್ರಮಗಳನ್ನು ಕೈಗೊಳ್ಳಲಾಗುವುದು ಎಂದು ಹೇಳಿದ್ದರು.
ಈ ಬಗ್ಗೆ ಟ್ವೀಟ್ ಕೂಡ ಮಾಡಿದ್ದ ಅರವಿಂದ ಲಿಂಬಾವಳಿ, ಇತ್ತೀಚೆಗಷ್ಟೆ ನಾವು ಗೂಗಲ್ನಿಂದ ಅವಮಾನ ಎದುರಿಸಿದ್ದೆವು. ಈಗ ಅಮೆಜಾನ್ನಿಂದ ನ್ನಡ ಧ್ವಜಕ್ಕೆ ಅವಮಾನವಾಗಿದೆ. ನಮ್ಮ ಗಮನಕ್ಕೆ ಬಂದಿದೆ. ಬಹುರಾಷ್ಟ್ರೀಯ ಕಂಪನಿಗಳು ಪದೇಪದೆ ಈ ರೀತಿ ಕನ್ನಡಕ್ಕೆ ಅವಮಾನ ಮಾಡುವುದನ್ನು ನಿಲ್ಲಿಸಬೇಕು. ಕನ್ನಡಿಗರ ಭಾವನೆಗಳಿಗೆ ಧಕ್ಕೆ ತರುವ ಕೆಲಸವನ್ನು ಯಾವ ಕಂಪನಿಯೂ ಮಾಡಬಾರದು. ಅಮೆಜಾನ್ ಕನ್ನಡಿಗರ ಕ್ಷಮೆ ಕೇಳಬೇಕು. ಇಲ್ಲದಿದ್ದರೆ ಕಾನೂನು ಕ್ರಮ ಕೈಗೊಳ್ಳುತ್ತೇವೆ ಎಂದು ಸಚಿವ ಅರವಿಂದ ಲಿಂಬಾವಳಿ ಟ್ವಿಟ್ಟರ್ನಲ್ಲಿ ಅಮೆಜಾನ್ಗೆ ಟ್ಯಾಗ್ ಮಾಡಿ ಟ್ವೀಟ್ ಮಾಡಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ