ಜೈಲು ದಾಳಿ ವೇಳೆ ಅಧಿಕಾರಿಗಳು ಐಷಾರಾಮಿ ಚಪ್ಪಲಿ, ಜೀನ್ಸ್ ವಶಪಡಿಸಿಕೊಂಡ ನಂತರ ಕುಖ್ಯಾತ ಆರೋಪಿ ಸುಕೇಶ ಕಣ್ಣೀರು

ನವದೆಹಲಿ: ಮಂಡೋಲಿ ಜೈಲಿನಲ್ಲಿರುವ ಬಂಧಿತನಾಗಿರುವ ಸುಕೇಶ ಚಂದ್ರಶೇಖರ ಸೆಲ್‌ಗೆ ಜೈಲು ಅಧಿಕಾರಿಗಳು ದಾಳಿ ನಡೆಸಿ ಅವರ ಕೆಲವು ಅತ್ಯಮೂಲ್ಯ ಸೊತ್ತುಗಳನ್ನು ವಶಪಡಿಸಿಕೊಂಡಿದ್ದು, ಬಂಧಿತ ಸುಕೇಶ್ ಚಂದ್ರಶೇಖರ ಕಟುವಾಗಿ ಕಣ್ಣೀರಿಟ್ಟಿದ್ದಾರೆ.
ದಿನಾಂಕವಿಲ್ಲದ ತುಣುಕಿನಲ್ಲಿ, ಅಧಿಕಾರಿಗಳು ಆತನ ಬೀರು ಮತ್ತು ಇತರ ಸಾಮಾನುಗಳನ್ನು ತಪಾಸಣೆ ಮಾಡುತ್ತಿರುವಾಗ ಸುಕೇಶ ತನ್ನ ಜೈಲಿನ ಕೊಠಡಿಯೊಳಗೆ ಬದಿಗೆ ನಿಂತಿರುವುದನ್ನು ಕಾಣಬಹುದು. ತಂಡದಲ್ಲಿ ತಿಹಾರ್ ಜೈಲರ್ ದೀಪಕ್ ಶರ್ಮಾ, ಉಪ ಅಧೀಕ್ಷಕ ಜೈ ಸಿಂಗ್ ಮತ್ತು ಕೇಂದ್ರ ಭದ್ರತಾ ಪಡೆಗಳ ಸಿಬ್ಬಂದಿ ಇದ್ದರು.
ವರದಿಗಳ ಪ್ರಕಾರ, ತಂಡವು ಸುಕೇಶ ಸೆಲ್‌ನಿಂದ ರೂ 1.5 ಲಕ್ಷ ಮೌಲ್ಯದ ಗುಸ್ಸಿ ಚಪ್ಪಲಿಗಳು ಮತ್ತು 80,000 ರೂ.ಗಳ ಮೌಲ್ಯದ ಎರಡು ಜೀನ್ಸ್ ಅನ್ನು ವಶಪಡಿಸಿಕೊಂಡಿದ್ದಾರೆ. ಜೈಲು ಅಧಿಕಾರಿಗಳು ಹೊರಟುಹೋದ ನಂತರ, ಆತ ಕಣ್ಣೀರು ಒರೆಸಿಕೊಳ್ಳುವುದನ್ನು ವೀಡಿಯೊದಲ್ಲಿ ನೋಡಬಹುದು.

ಕೈದಿಗಳು ತಮ್ಮ ಸೆಲ್‌ಗಳಲ್ಲಿ ಶಸ್ತ್ರಾಸ್ತ್ರಗಳು, ಮೊಬೈಲ್ ಫೋನ್‌ಗಳು ಅಥವಾ ಮಾದಕ ದ್ರವ್ಯಗಳಂತಹ ಯಾವುದೇ ನಿಷಿದ್ಧ ವಸ್ತುಗಳನ್ನು ಹೊಂದಿಲ್ಲವೆಂದು ಖಚಿತಪಡಿಸಿಕೊಳ್ಳಲು ಜೈಲಿನ ಅಧಿಕಾರಿಗಳು ವಾಡಿಕೆಯಂತೆ ಅನಿರೀಕ್ಷಿತ ತಪಾಸಣೆಗಳನ್ನು ನಡೆಸುತ್ತಾರೆ.
ಮೂಲತಃ ಹೆಚ್ಚಿನ ಭದ್ರತೆಯ ತಿಹಾರ್ ಜೈಲಿನಲ್ಲಿದ್ದ ಸುಕೇಶ ಚಂದ್ರಶೇಖರ ಮತ್ತು ಪತ್ನಿ ಲೀನಾ ಪಾಲ್ ಅವರನ್ನು ಆಗಸ್ಟ್ 2022 ರಲ್ಲಿ ಮಂಡೋಲಿ ಜೈಲಿಗೆ ಸ್ಥಳಾಂತರಿಸಲಾಯಿತು, ಅವರು ತಮ್ಮ ಜೀವಕ್ಕೆ ಬೆದರಿಕೆಯನ್ನು ಉಲ್ಲೇಖಿಸಿ ದೆಹಲಿಯ ಹೊರಗಿನ ಜೈಲಿಗೆ ವರ್ಗಾಯಿಸುವಂತೆ ಸುಪ್ರೀಂ ಕೋರ್ಟ್‌ಗೆ ಮನವಿ ಮಾಡಿದ್ದರು.

ಸುಕೇಶ ಹಲವರ ಬಳಿ ಹಣ ವಸೂಲಿ ಮತ್ತು ಸುಲಿಗೆ ಮಾಡಿದ ಆರೋಪದ ಮೇಲೆ ಜೈಲು ಸೇರಿದ್ದಾನೆ. ತಿಹಾರ್ ಜೈಲಿನಲ್ಲಿದ್ದಾಗ, ಜೈಲಿನ ಉನ್ನತ ಅಧಿಕಾರಿಗಳು ಸುಲಿಗೆ ದಂಧೆ ನಡೆಸುತ್ತಿದ್ದಾರೆ ಮತ್ತು ತಮ್ಮಿಂದ ಕೋಟಿಗಟ್ಟಲೆ ಲಂಚ ಸ್ವೀಕರಿಸಿದ್ದಾರೆ ಎಂದು ಆರೋಪಿಸಿದ್ದ.