ಹಿರಿಯ ನಟಿ ಸುಲೋಚನಾ ಲಾಟ್ಕರ್ ಮುಂಬೈನಲ್ಲಿ ನಿಧನ

ಮುಂಬೈ: ಖ್ಯಾತ ನಟಿ ಸುಲೋಚನಾ ಲಾಟ್ಕರ್ ಅವರು ಇಲ್ಲಿನ ಆಸ್ಪತ್ರೆಯಲ್ಲಿ ಭಾನುವಾರ ನಿಧನರಾಗಿದ್ದಾರೆ ಎಂದು ಅವರ ಮೊಮ್ಮಗ ಪರಾಗ್ ಅಜಗಾಂವ್ಕರ ಖಚಿತಪಡಿಸಿದ್ದಾರೆ. ಅವರಿಗೆ 94 ವರ್ಷ ವಯಸ್ಸಾಗಿತ್ತು.
ಮರಾಠಿ ಮತ್ತು ಹಿಂದಿ ಚಿತ್ರರಂಗದ ಪ್ರಸಿದ್ಧ ನಟಿ ಸುಲೋಚನಾ ಲಾಟ್ಕರ್ ಅವರು 1940ರ ದಶಕದಲ್ಲಿ ತಮ್ಮ ವೃತ್ತಿಜೀವನವನ್ನು ಪ್ರಾರಂಭಿಸಿದರು ಮತ್ತು 250 ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ.ಅವರು ಮೂಲತಃ ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿ ತಾಲೂಕಿನ ಕಡಕಾಳತಾದವರು.
ಅವರನ್ನು ಮೇ 8 ರಂದು ದಾದರ್‌ನ ಶುಶ್ರೂಷಾ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ದೀರ್ಘಕಾಲದ ಅನಾರೋಗ್ಯದ ಕಾರಣ ಅವರು ಆಸ್ಪತ್ರೆಯಲ್ಲಿ ಸಂಜೆ 6:30 ರ ಸುಮಾರಿಗೆ ನಿಧನರಾದರು. ಅವರು ಉಸಿರಾಟದ ಸೋಂಕನ್ನು ಹೊಂದಿದ್ದರು ಮತ್ತು ಮೇ 8 ರಂದು ಅವರನ್ನು ದಾಖಲಿಸಲಾಯಿತು ಎಂದು ಪರಾಗ್ ತಿಳಿಸಿದರು. ಅವರು ತಮ್ಮ ಮಗಳು ಕಾಂಚನ್ ಘಾನೇಕರ್ ಅವರನ್ನು ಅಗಲಿದ್ದಾರೆ.
ಮರಾಠಿಯಲ್ಲಿ “ಸಸುರ್ವಾಸ್”, “ವಾಹಿನಿಚ್ಯಾ ಬಾಂಗ್ಡಿಯಾ” ಮತ್ತು “ಧಕ್ತಿ ಜೌ” ಮತ್ತು “ಆಯೆ ದಿನ್ ಬಹರ್ ಕೆ”, “ಗೋರಾ ಔರ್ ಕಾಲ”, “ದೇವರ್”, “ತಲಾಶ್” ಮತ್ತು “ಆಜಾದ್” ಅವರ ಕೆಲವು ಗಮನಾರ್ಹ ಚಲನಚಿತ್ರಗಳು.
ಬಾಲಿವುಡ್‌ನಲ್ಲಿ, ಸುನಿಲ್ ದತ್, ದೇವ್ ಆನಂದ್, ರಾಜೇಶ್ ಖನ್ನಾ, ದಿಲೀಪ್ ಕುಮಾರ್ ಮತ್ತು ಅಮಿತಾಭ್ ಬಚ್ಚನ್ ಸೇರಿದಂತೆ 1960, 1970 ಮತ್ತು 1980 ರ ದಶಕದ ಪ್ರಮುಖ ನಟರ ತಾಯಿಯ ಪಾತ್ರವನ್ನು ನಿರ್ವಹಿಸಿದ್ದರು.
“ಹೀರಾ”, “ರೇಷ್ಮಾ ಔರ್ ಶೇರಾ”, “ಜಾನಿ ದುಷ್ಮನ್”, “ಜಬ್ ಪ್ಯಾರ್ ಕಿಸೀ ಹೋತಾ ಹೈ”, “ಜಾನ್ನಿ ಮೇರಾ ನಾಮ್”, “ಕಟಿ ಪತಂಗ್”, ಮೇರೆ ಜೀವನ ಸಾಥಿ”, “ಪ್ರೇಮ್ ನಗರ್ ಮತ್ತು “ಭೋಲಾ ಭಾಲಾ ” ಮುಂತಾದ ಹಿಂದಿ ಬ್ಲಾಕ್‌ಬಸ್ಟರ್ ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ. ಲಾಟ್ಕರ್ ಅವರಿಗೆ 1999 ರಲ್ಲಿ ಪದ್ಮಶ್ರೀ ಪ್ರಶಸ್ತಿ ನೀಡಿ ಗೌರವಿಸಲಾಯಿತು.