ಮತ್ತೊಂದು ಗಡಿಯಾಚೆಗಿನ ಪ್ರೇಮಕಥೆಯಲ್ಲಿ, ಶ್ರೀಲಂಕಾದ ಯುವತಿಯೊಬ್ಬಳು ಆಂಧ್ರಪ್ರದೇಶದ ತನ್ನ ಆರು ವರ್ಷದಿಂದ ಫೇಸ್ಬುಕ್ ಸ್ನೇಹಿತನಾಗಿರುವವನನ್ನು ಮದುವೆಯಾಗಲು ಭಾರತಕ್ಕೆ ಬಂದಿದ್ದಾಳೆ.
ಶ್ರೀಲಂಕಾದ 25 ವರ್ಷದ ಯುವತಿ ಶಿವಕುಮಾರಿ ವಿಘ್ನೇಶ್ವರಿ ಜುಲೈ 20 ರಂದು ವಿ ಕೋಟಾದ ದೇವಸ್ಥಾನದಲ್ಲಿ ತನ್ನ ಫೇಸ್ಬುಕ್ ಸ್ನೇಹಿತ ಲಕ್ಷ್ಮಣ (28) ರೊಂದಿಗೆ ಮದುವೆಯಾಗಿದ್ದಾಳೆ ಎಂದು ವರದಿಯಾಗಿದೆ.
2017 ರಲ್ಲಿ ಫೇಸ್‌ಬುಕ್‌ನಲ್ಲಿ ಮೊದಲ ಬಾರಿಗೆ ಪರಿಚಯವಾದ ನಂತರ ಇವರಿಬ್ಬರ ಪ್ರೇಮ ಪ್ರಯಾಣ ಪ್ರಾರಂಭವಾಯಿತು. ವರ್ಷಗಳ ಆನ್‌ಲೈನ್ ಸ್ನೇಹದ ನಂತರ, ಪ್ರವಾಸಿ ವೀಸಾದಲ್ಲಿ ಭಾರತಕ್ಕೆ ಆಗಮಿಸಿದ ಶಿವಕುಮಾರಿ ವಿಘ್ನೇಶ್ವರಿ, ಲಕ್ಷ್ಮಣ ಅವರನ್ನು ವೈಯಕ್ತಿಕವಾಗಿ ಭೇಟಿ ಮಾಡಲು ಜುಲೈ 8 ರಂದು ಆಂಧ್ರಪ್ರದೇಶದ ಚಿತ್ತೂರಿಗೆ ಪ್ರಯಾಣಿಸಲು ನಿರ್ಧರಿಸಿದ್ದಾಳೆ.
ಲಕ್ಷ್ಮಣ ಅವಳನ್ನು ಚೆನ್ನೈನಲ್ಲಿ ಬರಮಾಡಿಕೊಂಡಿದ್ದಾರೆ ಮತ್ತು ನಂತರ ಅವಳನ್ನು ತನ್ನ ಮನೆಗೆ ಕರೆದುಕೊಂಡು ಬಂದಿದ್ದಾರೆ. ಲಕ್ಷ್ಮಣ ನಂತರ ಕುಟುಂಬದ ಆಶೀರ್ವಾದ ಪಡೆದು ಅವಳನ್ನು ದೇವಸ್ಥಾನದಲ್ಲಿ ಶಾಸ್ತ್ರೋಕ್ತವಾಗಿ ಮದುವೆಯಾಗಿದ್ದಾರೆ.
ಇವರಿಬ್ಬರ ಮದುವೆಯ ಸುದ್ದಿ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆದ ನಂತರ ದಂಪತಿ ಮೇಲೆ ಕಾನೂನು ಕ್ರಮ ಕೈಗೊಳ್ಳಲು ಅಧಿಕಾರಿಗಳಿಗೆ ಸೂಚಿಸಲಾಯಿತು. ವಲಸೆ ನಿಯಮಾವಳಿಗಳ ಅನುಸಾರವಾಗಿ ಕಾರ್ಯನಿರ್ವಹಿಸಿದ ಚಿತ್ತೂರು ಜಿಲ್ಲಾ ಪೊಲೀಸರು ಶಿವಕುಮಾರಿ ವಿಘ್ನೇಶ್ವರಿಗೆ ನೋಟಿಸ್ ಜಾರಿ ಮಾಡಿದ್ದು, ವೀಸಾ ಅವಧಿ ಮುಗಿಯುವ ಮುನ್ನವೇ ದೇಶ ತೊರೆಯುವಂತೆ ಅಥವಾ ವಿಸ್ತರಣೆಗೆ ಅರ್ಜಿ ಸಲ್ಲಿಸುವಂತೆ ಸೂಚಿಸಿದ್ದಾರೆ. ವಿಘ್ನೇಶ್ವರಿ ಅವರ ಪ್ರವಾಸಿ ವೀಸಾ ಆಗಸ್ಟ್ 15 ರಂದು ಮುಕ್ತಾಯಗೊಳ್ಳಲಿದೆ.
ವಿಘ್ನೇಶ್ವರಿ ಶಾಶ್ವತವಾಗಿ ಭಾರತದಲ್ಲಿ ಉಳಿಯುವ ಮತ್ತು ತನ್ನ ಪತಿಯೊಂದಿಗೆ ವಾಸಿಸುವ ಇಂಗಿತ ವ್ಯಕ್ತಪಡಿಸಿದ್ದಾಳೆ. ಭಾರತೀಯ ಪೌರತ್ವವನ್ನು ಕೋರಿ ಹಾಗೂ ಸಹಾಯಕ್ಕಾಗಿ ಆಕೆ ಭಾರತ ಸರ್ಕಾರಕ್ಕೆ ಮನವಿ ಮಾಡಿದ್ದಾಳೆ. ಭಾರತೀಯ ಪೌರತ್ವ ಪಡೆಯುವ ವಿಧಾನ ಮತ್ತು ಮಾನದಂಡಗಳ ಬಗ್ಗೆ ವಿಘ್ನೇಶ್ವರಿಗೆ ತಿಳಿಸಲಾಗಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ವೈ. ರಿಶಾಂತ ರೆಡ್ಡಿ ಹೇಳಿದ್ದಾರೆ. ಭಾರತೀಯ ಪ್ರಜೆಯೊಂದಿಗಿನ ವಿವಾಹದ ಆಧಾರದ ಮೇಲೆ ಆಕೆ ವೀಸಾದ ವಿಸ್ತರಣೆ ಪಡೆಯುವ ಸಾಧ್ಯತೆಯಿದೆ ಎಂದು ಅವರು ಹೇಳಿದ್ದಾರೆ.
ಭವಿಷ್ಯದಲ್ಲಿ ಉದ್ಭವಿಸಬಹುದಾದ ಸಂಭಾವ್ಯ ಕಾನೂನು ಸಂಕೀರ್ಣತೆಗಳ ಬೆಳಕಿನಲ್ಲಿ, ಪೊಲೀಸರು ದಂಪತಿಗೆ ಕೆಲವು ಸಲಹೆಗಳನ್ನು ನೀಡಿದ್ದು, ತಮ್ಮ ಮದುವೆಯನ್ನು ಔಪಚಾರಿಕವಾಗಿ ನೋಂದಾಯಿಸಲು ಶಿವಕುಮಾರಿ ವಿಘ್ನೇಶ್ವರಿ ಮತ್ತು ಲಕ್ಷ್ಮಣ ಅವರಿಗೆ ಸಲಹೆ ನೀಡಿದ್ದಾರೆ ಎಂದು ವರದಿಯಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ