ಮುಜಾಫರ್ ನಗರ: ಭಜನೆ ಹಾಡಿದ್ದಕ್ಕಾಗಿ ವಿವಾದಕ್ಕೆ ಸಿಲುಕಿದ್ದ ಮುಸ್ಲಿಂ ಗಾಯಕಿಯ 17 ವರ್ಷದ ಸಹೋದರನನ್ನು ಅಪರಿಚಿತ ದುಷ್ಕರ್ಮಿಗಳು ಚಾಕುವಿನಿಂದ ಇರಿದು ಕೊಂದಿದ್ದಾರೆ ಎಂದು ಪೊಲೀಸರು ಭಾನುವಾರ ತಿಳಿಸಿದ್ದಾರೆ. ಕೊಲೆ ಮಾಡಿದವರಿಗಾಗಿ ಶೋಧ ಕಾರ್ಯ ಮುಂದುವರಿದಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಶನಿವಾರ ರಾತ್ರಿ ಈ ಘಟನೆ ನಡೆದಿದೆ ಎಂದು ಹೇಳಲಾಗುತ್ತಿದೆ. ಮೃತನನ್ನು 17 ವರ್ಷದ ಖುರ್ಷಿದ್ ಎಂದು ಗುರುತಿಸಲಾಗಿದೆ. ಆತನನ್ನು ಇರಿದು ಕೊಲ್ಲಲಾಯಿತು. ಮೃತ ಖುರ್ಷಿದ್ ಮುಸ್ಲಿಂ ಗಾಯಕ ಫರ್ಮಾನಿ ನಾಜ್ ಅವರ ಸೋದರ ಸಂಬಂಧಿ ಎಂದು ಪೊಲೀಸ್ ವರಿಷ್ಠಾಧಿಕಾರಿ (ಗ್ರಾಮೀಣ) ಅತುಲ್ ಶ್ರೀವಾಸ್ತವ ಭಾನುವಾರ ತಿಳಿಸಿದ್ದಾರೆ. ಮೃತರ ಸಹೋದರಿ ಫರ್ಮಾನಿ ನಾಜ್ ಕಳೆದ ವರ್ಷ ಭಗವಾನ್ ಶಿವನ ‘ಹರ್-ಹರ್ ಶಂಭು’ ಎಂಬ ಭಜನೆ ಹಾಡಿದ್ದರು, ಅದು ಬಹಳ ಜನಪ್ರಿಯವಾಗಿತ್ತು.
ರತನ್‌ಪುರಿಯ ಮೊಹಮ್ಮದ್‌ಪುರ ಮಾಫಿ ಗ್ರಾಮದಲ್ಲಿ ಶನಿವಾರ ರಾತ್ರಿ ಈ ಘಟನೆ ನಡೆದಿದೆ. ಅಪರಿಚಿತ ಹಲ್ಲೆಕೋರರ ವಿರುದ್ಧ ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕ್ರಮ ಜರುಗಿಸಲಾಗುತ್ತಿದೆ.
ಮಾಹಿತಿ ಪ್ರಕಾರ, ಖುರ್ಷಿದ್ ಗ್ರಾಮದಲ್ಲಿ ವಾಸಿಸುತ್ತಿದ್ದಾಗ ಕೂಲಿ ಕೆಲಸ ಮಾಡುತ್ತಿದ್ದ. ಘಟನೆ ನಡೆದ ದಿನ ರಾತ್ರಿ ಊಟ ಮುಗಿಸಿ ತಡರಾತ್ರಿ ಮನೆಯಿಂದ ಹೊರ ಬಂದಿದ್ದರು. ಅಷ್ಟರಲ್ಲಿ ರತನ್‌ಪುರಿ ಕಡೆಯಿಂದ ಬರುತ್ತಿದ್ದ ಮೂವರು ಬೈಕ್‌ ಸವಾರರು ಆತನನ್ನು ತಡೆದರು. ಖುರ್ಷಿದ್ ಮತ್ತು ದಾಳಿಕೋರರು ಸ್ವಲ್ಪ ಸಮಯದವರೆಗೆ ಜಗಳವಾಡಿದರು, ನಂತರ ದುಷ್ಕರ್ಮಿಗಳು ಫರ್ಮಾನಿ ಅವರ ಸಹೋದರನನ್ನು ಕೊಂದರು.
ಮುಜಾಫರ್‌ನಗರದ ನಿವಾಸಿ ಫರ್ಮಾನಿ ನಾಜ್ ಅವರು ಭಗವಾನ್ ಶಿವನನ್ನು ಸ್ತುತಿಸುವ ‘ಹರ್ ಹರ್ ಶಂಭು’ ಎಂಬ ಭಜನೆ ಹಾಡಿದ್ದಾರೆ, ಇದನ್ನು ಶರಿಯಾ ವಿರುದ್ಧ ಮತ್ತು ಹರಾಮ್ ಎಂದು ದೇವಬಂದ್‌ನ ಧರ್ಮಗುರುಗಳು ಹೇಳಿದ್ದಾರೆ. ಇದಾದ ನಂತರ ಫರ್ಮಾನಿ ನಾಜ್ ಗಾಯಕರಿಗೆ ಧರ್ಮವಿಲ್ಲ ಎಂದು ತಾವು ಹಾಡಿದ್ದನ್ನು ಸಮರ್ಥಿಸಿಕೊಂಡಿದ್ದರು. ಫರ್ಮಾನಿ ನಾಜ್ ಅವರ ಯೂಟ್ಯೂಬ್ ಚಾನೆಲ್‌ನಲ್ಲಿ 45 ಲಕ್ಷಕ್ಕಿಂತಲೂ ಹೆಚ್ಚು ಚಂದಾದಾರರಿದ್ದಾರೆ. ಅವರು ‘ಇಂಡಿಯನ್ ಐಡಲ್’ ರಿಯಾಲಿಟಿ ಶೋನ 12 ನೇ ಸೀಸನ್‌ನಲ್ಲಿ ಸಹ ಭಾಗವಹಿಸಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ