ಲಕ್ನೋ : ದೀಪಾವಳಿ ಹಬ್ಬಕ್ಕೆ ಬೋನಸ್ ಕೊಟ್ಟಿಲ್ಲ ಎಂದು ಟೋಲ್ ಸಂಗ್ರಹಿಸದೇ ವಾಹನಗಳನ್ನು ಫ್ರೀ ಬಿಟ್ಟು ಟೋಲ್ ಸಿಬ್ಬಂದಿ ಮುಷ್ಕರ ನಡೆಸಿದ ಘಟನೆ ಆಗ್ರಾ-ಲಕ್ನೋ ಎಕ್ಸ್‌ಪ್ರೆಸ್‌ ವೇನಲ್ಲಿ ನಡೆದಿದೆ.
ದೀಪಾವಳಿ ಬೋನಸ್ ನೀಡಲು ಕಂಪನಿಯು ನಿರಾಕರಿಸಿದ ನಂತರ, ನೌಕರರು ಮುಷ್ಕರ ನಡೆಸಿದರು ಮತ್ತು ಗೇಟ್‌ಗಳನ್ನು ತೆರೆದು ವಾಹನಗಳ ಉಚಿತ ಸಂಚಾರಕ್ಕೆ ಅವಕಾಶ ಮಾಡಿಕೊಟ್ಟ ಪರಿಣಾಮ, ಭಾನುವಾರ ಆಗ್ರಾ-ಲಕ್ನೋ ಎಕ್ಸ್‌ಪ್ರೆಸ್‌ವೇಯಲ್ಲಿನ ಫತೇಹಾಬಾದ್ ಟೋಲ್ ಪ್ಲಾಜಾವನ್ನು ಸಾವಿರಾರು ವಾಹನಗಳು ಯಾವುದೇ ಶುಲ್ಕವಿಲ್ಲದೆ ದಾಟಿವೆ ಎಂದು ವರದಿಯಾಗಿದೆ.
ಸ್ಥಳದಿಂದ ಲಭ್ಯವಾದ ದೃಶ್ಯಾವಳಿಗಳಲ್ಲಿ, ವಾಹನಗಳು ಟೋಲ್ ಕಟ್ಟದೆ ಮುಂದೆ ಹೋಗಿರುವುದು ಕಂಡುಬಂದಿದೆ. ಈ ಹಿಂದೆ ಎಂದೂ ನಡೆಯದ ಈ ಘಟನೆಯಿಂದಾಗಿ ಕೇಂದ್ರ ಸರ್ಕಾರಕ್ಕೆ ಲಕ್ಷಾಂತರ ರೂಪಾಯಿ ನಷ್ಟವಾಗಿದೆ ಎಂದು ಅಂದಾಜಿಸಲಾಗಿದೆ.
ಈ ಎಕ್ಸ್‌ಪ್ರೆಸ್‌ವೇ ಉತ್ತರ ಪ್ರದೇಶದ ಒಂದು ಪ್ರಮುಖ ಸಂಚಾರ ಮಾರ್ಗವಾಗಿದ್ದು, ಆಗ್ರಾ ಮತ್ತು ಲಕ್ನೋ ನಡುವೆ ನೇರ ಸಂಪರ್ಕವನ್ನು ಒದಗಿಸುತ್ತದೆ. ಇದು ಯಮುನಾ ಎಕ್ಸ್‌ಪ್ರೆಸ್‌ವೇ ಮೂಲಕ ದೆಹಲಿ ಮತ್ತು ರಾಷ್ಟ್ರೀಯ ರಾಜಧಾನಿ ಪ್ರದೇಶ (NCR) ವನ್ನೂ ಸಂಪರ್ಕಿಸುತ್ತದೆ.
“ನಾನು ಕಳೆದ ಒಂದು ವರ್ಷದಿಂದ ಈ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದೇನೆ, ಆದರೆ ಅವರು ನಮಗೆ ಯಾವುದೇ ಬೋನಸ್ ನೀಡಿಲ್ಲ. ನಾವು ತುಂಬಾ ಕಷ್ಟಪಟ್ಟು ಕೆಲಸ ಮಾಡುತ್ತಿದ್ದೇವೆ, ಆದರೆ ನಮ್ಮ ಸಂಬಳವನ್ನೂ ಸಮಯಕ್ಕೆ ಸರಿಯಾಗಿ ನೀಡುವುದಿಲ್ಲ. ನಮಗೆ ಬೋನಸ್ ನೀಡುವುದಿಲ್ಲ, ಬದಲಿಗೆ ಸಿಬ್ಬಂದಿಯನ್ನು ಬದಲಾಯಿಸುತ್ತೇವೆ ಎಂದು ಕಂಪನಿ ಈಗ ಹೇಳುತ್ತಿದೆ,” ಎಂದು ಪ್ರತಿಭಟನಾ ನಿರತ ಉದ್ಯೋಗಿಯೊಬ್ಬರು ತಿಳಿಸಿದ್ದಾರೆ.
ಈ ನೌಕರರು ಶ್ರೀ ಸಾಯಿ (Shrisai) ಮತ್ತು ದಾತಾರ (Datar) ಕಂಪನಿಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ. ದೀಪಾವಳಿ ಹಬ್ಬದ ಸಂದರ್ಭದಲ್ಲಿ ಬೋನಸ್ ಅನ್ನು ಕಳೆದ ವಾರವೇ ತಮ್ಮ ಬ್ಯಾಂಕ್ ಖಾತೆಗಳಿಗೆ ಜಮಾ ಮಾಡುವುದಾಗಿ ಭರವಸೆ ನೀಡಲಾಗಿತ್ತು, ಆದರೆ ಇದು ನಡೆದಿಲ್ಲ ಎಂದು ಕೆಲವು ಉದ್ಯೋಗಿಗಳು ಆರೋಪಿಸಿದ್ದಾರೆ.
ಕೋಪಗೊಂಡ ನೌಕರರು ಭಾನುವಾರ ರಾತ್ರಿ ಟೋಲ್ ಬೂತ್‌ನ ಬೂಮ್ ಬ್ಯಾರಿಯರ್ ಅನ್ನು ತೆರೆದು ಮುಷ್ಕರ ನಡೆಸಿದರು. ಅಧಿಕಾರಿಗಳು ಬೋನಸ್ ನೀಡುವ ಭರವಸೆ ನೀಡಿದ ನಂತರ, ಸುಮಾರು 10 ಗಂಟೆಗಳ ಕಾಲ ನಡೆದ ಈ ಪ್ರತಿಭಟನೆಯನ್ನು ಹಿಂಪಡೆಯಲಾಯಿತು.
ನಿಮ್ಮ ಕಾಮೆಂಟ್ ಬರೆಯಿರಿ