ನವದೆಹಲಿ: ಶ್ರೀನಗರ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಾಡಿಕೆಯ ತಪಾಸಣೆಯ ವೇಳೆ, ನಿಷೇಧಿತ ಸ್ಯಾಟಲೈಟ್ ಟ್ರ್ಯಾಕಿಂಗ್ ಸಾಧನವನ್ನು (Satellite tracking device) ಹೊಂದಿದ್ದ ಇಬ್ಬರು ವ್ಯಕ್ತಿಗಳನ್ನು ಭದ್ರತಾ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಈ ಘಟನೆ ನಡೆದ ಕೂಡಲೇ ಅಧಿಕಾರಿಗಳು ಕಾರ್ಯಪ್ರವೃತ್ತರಾಗಿದ್ದು, ಹೆಚ್ಚಿನ ತನಿಖೆಗಾಗಿ ಇಬ್ಬರನ್ನೂ ಪೊಲೀಸರಿಗೆ ಒಪ್ಪಿಸಿದ್ದಾರೆ.
ವಶಕ್ಕೆ ಪಡೆದವರಲ್ಲಿ ಒಬ್ಬರನ್ನು ಅಮೆರಿಕದ ಮೊಂಟಾನಾ ನಿವಾಸಿಯಾದ ಜೆಫ್ರಿ ಸ್ಕಾಟ್ (Jeoffery Scot) ಎಂದು ಗುರುತಿಸಲಾಗಿದೆ. ಸ್ಕಾಟ್ ಅವರ ಲಗೇಜ್ನಲ್ಲಿ ಗಾರ್ಮಿನ್ (Garmin) ಕಂಪನಿಯ ಸ್ಯಾಟಲೈಟ್ ಕಮ್ಯುನಿಕೇಟರ್ ಸಾಧನ ಪತ್ತೆಯಾಗಿದೆ. ಬಂಧನದ ಸಮಯದಲ್ಲಿ ಅವರೊಂದಿಗೆ ಸ್ಥಳೀಯ ವ್ಯಕ್ತಿಯೊಬ್ಬರು ಇದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಭಾರತದಲ್ಲಿ ಸ್ಯಾಟಲೈಟ್ ಸಾಧನಗಳ ಬಳಕೆಗೆ ಕಟ್ಟುನಿಟ್ಟಿನ ನಿಯಮ
ಭಾರತದಲ್ಲಿ ಸ್ಯಾಟಲೈಟ್ ಸಂವಹನ ಸಾಧನಗಳ ಬಳಕೆಯನ್ನು ಕಟ್ಟುನಿಟ್ಟಾಗಿ ನಿಯಂತ್ರಿಸಲಾಗುತ್ತದೆ ಎಂದು ಅಧಿಕಾರಿಗಳು ಪುನರುಚ್ಚರಿಸಿದ್ದಾರೆ. ಥುರಾಯ (Thuraya) ಮತ್ತು ಇರಿಡಿಯಮ್ (Iridium) ಫೋನ್ಗಳಂತಹ ಸಾಧನಗಳನ್ನು ಸರ್ಕಾರದ ಪೂರ್ವಾನುಮತಿ ಇಲ್ಲದೆ ಸಾಗಿಸುವಂತಿಲ್ಲ ಅಥವಾ ಬಳಸುವಂತಿಲ್ಲ.
ಭಾರತೀಯ ಟೆಲಿಗ್ರಾಫ್ ಕಾಯ್ದೆಯ ಅಡಿಯಲ್ಲಿ, ಅನಧಿಕೃತವಾಗಿ ಇಂತಹ ಸಾಧನಗಳನ್ನು ಹೊಂದಿರುವುದು ಬಂಧನ, ಸಾಧನಗಳ ವಶಪಡಿಸಿಕೊಳ್ಳುವಿಕೆ ಅಥವಾ ಜೈಲು ಶಿಕ್ಷೆಗೆ ಕಾರಣವಾಗಬಹುದು.
ಪ್ರವಾಸಿಗರು ಇಂತಹ ಸಾಧನಗಳನ್ನು ದೇಶದೊಳಗೆ ತರುವ ಮೊದಲು ದೂರಸಂಪರ್ಕ ಇಲಾಖೆಯಿಂದ (DoT) ಲಿಖಿತ ಅನುಮತಿಯನ್ನು ಪಡೆಯುವುದು ಕಡ್ಡಾಯವಾಗಿದೆ.
ಇಂತಹ ಘಟನೆಗಳು ಇದೇ ಮೊದಲಲ್ಲ. ಕಳೆದ ವರ್ಷ ಮೇ ತಿಂಗಳಲ್ಲಿ ಪುದುಚೇರಿ ವಿಮಾನ ನಿಲ್ದಾಣದಲ್ಲಿ ಇಂತಹದ್ದೇ ಸಾಧನವನ್ನು ಹೊಂದಿದ್ದ ಅಮೆರಿಕ ಮೂಲದ ವೈದ್ಯರೊಬ್ಬರನ್ನು ತಡೆಹಿಡಿಯಲಾಗಿತ್ತು. ಇದಲ್ಲದೆ ಚೀನಾ ಮತ್ತು ಯುನೈಟೆಡ್ ಕಿಂಗ್ಡಮ್ನ ಪ್ರಜೆಗಳೂ ಸಹ ಅನಧಿಕೃತ ಸ್ಯಾಟಲೈಟ್ ಉಪಕರಣಗಳನ್ನು ಹೊಂದಿದ್ದಕ್ಕಾಗಿ ಈ ಹಿಂದೆ ಬಂಧನಕ್ಕೊಳಗಾಗಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ