ಭೋಪಾಲ್: ಕೆಲವೇ ಸೆಕೆಂಡುಗಳ ರೋಮಾಂಚನಕ್ಕಾಗಿ ಮಾಡಿದ ಸಾಹಸವೊಂದು ಒಂದು ಕುಟುಂಬದ ಮೂವರನ್ನು ಬಲಿಪಡೆದಿದೆ. ಮಧ್ಯಪ್ರದೇಶದ ಮೌಗಂಜ್ ಜಿಲ್ಲೆಯಲ್ಲಿ ನಡೆದ ಈ ಭೀಕರ ರಸ್ತೆ ಅಪಘಾತದ ದೃಶ್ಯಗಳು ಮೊಬೈಲ್ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ನೋಡುವವರ ಎದೆ ನಡುಗಿಸುವಂತಿದೆ.
ಒಂದೇ ಬೈಕ್ನಲ್ಲಿ ಸವಾರಿ ಮಾಡುತ್ತಿದ್ದ ಮೂವರು ಯುವಕರು ಅತಿ ವೇಗವಾಗಿ ಚಲಿಸುತ್ತಾ, ರಸ್ತೆಯಲ್ಲಿ ಸರ್ಕಸ್ ಮಾಡಲು ಮುಂದಾಗಿದ್ದಾರೆ. ಇವರ ಈ ಸಾಹಸವನ್ನು ಇವರದೇ ಸ್ನೇಹಿತರು ಮತ್ತೊಂದು ಬೈಕ್ನಲ್ಲಿ ಹಿಂಬಾಲಿಸುತ್ತಾ ವಿಡಿಯೋ ಚಿತ್ರೀಕರಿಸುತ್ತಿದ್ದರು. ಎರಡು ಬೈಕ್ಗಳ ನಡುವೆ ಒಬ್ಬರನ್ನೊಬ್ಬರು ಓವರ್ಟೇಕ್ ಮಾಡುವ ಸ್ಪರ್ಧೆ ಏರ್ಪಟ್ಟಿತ್ತು. ಅಚ್ಚರಿಯ ವಿಷಯವೆಂದರೆ, ವಿಡಿಯೋದಲ್ಲಿ ಒಬ್ಬ ಸವಾರ ಪಿಸ್ತೂಲ್ ಹಿಡಿದಿರುವುದು ಕೂಡ ಕಂಡುಬಂದಿದೆ.
ಅಪಘಾತದ ಭೀಕರ ಕ್ಷಣಗಳು
ವೇಗವಾಗಿ ಚಲಿಸುತ್ತಿದ್ದ ಯುವಕರ ಬೈಕ್ ಮುಂದಿದ್ದ ಟ್ರಕ್ ಒಂದನ್ನು ಓವರ್ಟೇಕ್ ಮಾಡಲು ಪ್ರಯತ್ನಿಸಿದೆ. ಅದೇ ಸಮಯದಲ್ಲಿ ಎದುರುಗಡೆ ಇಟ್ಟಿಗೆಗಳನ್ನು ತುಂಬಿದ್ದ ಟ್ರಾಲಿಯೊಂದು ಕಾಣಿಸಿಕೊಂಡಿದೆ. ಬೈಕ್ ಅತಿ ವೇಗದಲ್ಲಿದ್ದ ಕಾರಣ ಸವಾರನಿಗೆ ನಿಯಂತ್ರಣ ತಪ್ಪಿ, ಬೈಕ್ ನೇರವಾಗಿ ಟ್ರಾಲಿಯ ಹಿಂಭಾಗಕ್ಕೆ ಬಲವಾಗಿ ಅಪ್ಪಳಿಸಿದೆ.
ಈ ಭೀಕರ ಡಿಕ್ಕಿಯ ರಭಸಕ್ಕೆ ಬೈಕ್ನಲ್ಲಿದ್ದ ಮೂವರೂ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.
ಮೃತರನ್ನು ಒಂದೇ ಕುಟುಂಬದ ಉಪ್ಲಕ್ಷ ಕೋಲ್, ಅಮ್ರಿಶ ಕೋಲ್ ಮತ್ತು ಹೇಮರಾಜ ಕೋಲ್ ಎಂದು ಗುರುತಿಸಲಾಗಿದೆ.
ಇವರ ಸಾಹಸವನ್ನು ವಿಡಿಯೋ ಮಾಡುತ್ತಾ ಹಿಂಬಾಲಿಸುತ್ತಿದ್ದ ಎರಡನೇ ಬೈಕ್ನಲ್ಲಿದ್ದ ಪ್ರಶಾಂತ ಮತ್ತು ಪ್ರದೀಪ ದ್ವಿವೇದಿ ಎಂಬವರಿಗೂ ಗಂಭೀರ ಗಾಯಗಳಾಗಿದ್ದು, ಪ್ರಸ್ತುತ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.
ರಸ್ತೆಯಲ್ಲಿ ಅತಿ ವೇಗ ಮತ್ತು ವಿಡಿಯೋ ಚಿತ್ರೀಕರಣದಂತಹ ಹುಚ್ಚಾಟಗಳು ಕೆಲವೊಮ್ಮೆ ಇಡೀ ಕುಟುಂಬಕ್ಕೆ ಎಂದಿಗೂ ಮರೆಯದ ನೋವನ್ನು ನೀಡುತ್ತವೆ ಎಂಬುದಕ್ಕೆ ಇದು ಸಾಕ್ಷಿಯಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ