ಗೃಹಬಳಕೆಯ ಎಲ್‌ಪಿಜಿ ಸಿಲಿಂಡರ್ ದರ ಹೆಚ್ಚಳ

ನವದೆಹಲಿ: ಮಧ್ಯಪ್ರಾಚ್ಯದಲ್ಲಿ ಮುಂದುವರಿದಿರುವ ಇರಾನ್‌-ಅಮೆರಿಕ ಯುದ್ಧವು ಜಾಗತಿಕ ಪೆಟ್ರೋಲ್‌, ಡೀಸೆಲ್‌ ಹಾಗೂ ಎಲ್‌ಪಿಜಿ ಅನಿಲದ ಮೇಲೆ ನಿರಂತರ ಪರಿಣಾಮ ಬೀರುತ್ತಿರುವುದರಿಂದ, ದೇಶೀಯ ಎಲ್‌ಪಿಜಿ (LPG) ದರವನ್ನು ಮೂರು ತಿಂಗಳಲ್ಲಿ ಎರಡನೇ ಬಾರಿಗೆ ಹೆಚ್ಚಿಸಲಾಗಿದೆ. ಈ ಬಾರಿ ಪ್ರತಿ ಸಿಲಿಂಡರ್ ಬೆಲೆಯಲ್ಲಿ 29 ರೂಪಾಯಿ ಏರಿಕೆ ಮಾಡಲಾಗಿದ್ದು, ಭಾನುವಾರದಿಂದಲೇ ಇದು ಜಾರಿಗೆ ಬಂದಿದೆ.

ದೆಹಲಿ: 942 ರೂ.  (ಹಳೆಯ ದರ: 913 ರೂ. )

ಮುಂಬೈ: 941.40 ರೂ. (ಹಳೆಯ ದರ: 912.50 ರೂ.)

ಕೋಲ್ಕತಾ: 968  ರೂ. (ಹಳೆಯ ದರ: 939 ರೂ.)

ಚೆನ್ನೈ: 957.50 ರೂ. (ಹಳೆಯ ದರ: 928.50 ರೂ.)

ಬೆಂಗಳೂರು: 944.50 ರೂ. (ಹಳೆಯ ದರ: 915.50 ರೂ.)

ಪಾಟ್ನಾ: 1031.50 ರೂ. (ಹಳೆಯ ದರ: 1002.50 ರೂ.)

ಹೈದರಾಬಾದ್: 996 ರೂ. (ಹಳೆಯ ದರ: 967 ರೂ.)

ಲಕ್ನೋ: 980 ರೂ. (ಹಳೆಯ ದರ: 951 ರೂ.)

ಜೈಪುರ: 945.50 ರೂ.  (ಹಳೆಯ ದರ: 916.50  ರೂ. )

ಸರ್ಕಾರಿ ಸ್ವಾಮ್ಯದ ತೈಲ ಮಾರುಕಟ್ಟೆ ಕಂಪನಿಗಳಿಗಾಗುತ್ತಿದ್ದ ನಷ್ಟವನ್ನು ಭಾಗಶಃ ಸರಿದೂಗಿಸುವ ಸಲುವಾಗಿ ಈ ಹೆಚ್ಚಳ ಮಾಡಲಾಗಿದೆ ಎಂದು ತಿಳಿಸಲಾಗಿದೆ. ಇದಕ್ಕೂ ಮುನ್ನ ಮಾರ್ಚ್ 7 ರಂದು ಸಿಲಿಂಡರ್ ಬೆಲೆಯನ್ನು 60 ರೂಪಾಯಿಗಳಷ್ಟು ಹೆಚ್ಚಿಸಲಾಗಿತ್ತು.

ಪೆಟ್ರೋಲಿಯಂ ಸಚಿವಾಲಯದ ಪ್ರಕಟಣೆಯ ಪ್ರಕಾರ, ‘ಪ್ರಧಾನ ಮಂತ್ರಿ ಉಜ್ವಲ ಯೋಜನೆ’ (PMUY) ಅಡಿಯಲ್ಲಿ ಭಾರತೀಯ ಕುಟುಂಬಗಳು ಅತ್ಯಂತ ಕಡಿಮೆ ದರದಲ್ಲಿ ಅಡುಗೆ ಅನಿಲವನ್ನು ಖರೀದಿಸಲು ಸಾಧ್ಯವಾಗುತ್ತಿದೆ. ಅಷ್ಟೇ ಅಲ್ಲದೆ, ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಕೆನಡಾದಂತಹ ಮುಂದುವರಿದ ಆರ್ಥಿಕತೆ ಹೊಂದಿರುವ ದೇಶಗಳಿಗಿಂತಲೂ ಭಾರತದಲ್ಲಿನ  ಅಡುಗೆ ಅನಿಲ ದರ ತೀರಾ ಕಡಿಮೆಯಾಗಿದೆ. ಪ್ರಸ್ತುತ 14.2 ಕಿಲೋಗ್ರಾಂ ತೂಕದ ಒಂದು ಸಿಲಿಂಡರ್ ಪೂರೈಸಲು ತಗಲುವ ವೆಚ್ಚ ಸುಮಾರು 1,600 ರಿಂದ 1,700 ರೂಪಾಯಿಗಳಿಗೆ ಏರಿಕೆಯಾಗಿದೆ ಎಂದು ಅದು ತಿಳಿಸಿದೆ.

“ಜಾಗತಿಕ ಮಟ್ಟದ ಅಡೆತಡೆಗಳ ನಡುವೆಯೂ, ಹಾರ್ಮುಜ್ ಜಲಸಂಧಿಯ (Strait of Hormuz) ಮೂಲಕ ತನ್ನ ಇಂಧನ ಸರಕುಗಳ ಸಾಗಣೆಯನ್ನು ನಿರಂತರವಾಗಿ ಕಾಯ್ದುಕೊಂಡ ಮತ್ತು ಯಾವುದೇ ಪೆಟ್ರೋಲಿಯಂ ಉತ್ಪನ್ನಗಳ ಕೊರತೆಯಾಗದಂತೆ ನೋಡಿಕೊಂಡ ಕೆಲವೇ ಕೆಲವು ದೇಶಗಳಲ್ಲಿ ಭಾರತವೂ ಒಂದಾಗಿದೆ.

ತೈಲ ಮಾರುಕಟ್ಟೆ ಕಂಪನಿಗಳು ಕಳೆದ ಪೂರ್ಣ ವರ್ಷದಲ್ಲಿ ದೇಶೀಯ ಎಲ್‌ಪಿಜಿ ಮೇಲೆ ಅಂದಾಜು 60,000 ಕೋಟಿ ರೂಪಾಯಿಗಳಷ್ಟು ನಷ್ಟವನ್ನು ಭರಿಸಿವೆ (ಈ ನಷ್ಟ ಅದಕ್ಕೂ ಹಿಂದಿನ ವರ್ಷ 41,338 ಕೋಟಿ ರೂಪಾಯಿಗಳಷ್ಟಿತ್ತು). ಇದಕ್ಕೆ ಪರಿಹಾರವಾಗಿ ಕೇಂದ್ರ ಸಚಿವ ಸಂಪುಟವು 30,000 ಕೋಟಿ ರೂಪಾಯಿಗಳ ನೆರವನ್ನು ಅನುಮೋದಿಸಿದೆ. ಅಲ್ಲದೆ, ಸಬ್ಸಿಡಿಯು ನೇರವಾಗಿ 10.35 ಕೋಟಿಗೂ ಹೆಚ್ಚು ಉಜ್ವಲ ಸಂಪರ್ಕದಾರರನ್ನು ತಲುಪುತ್ತಿದೆ” ಎಂದು ಸಚಿವಾಲಯದ ಪ್ರಕಟಣೆ ತಿಳಿಸಿದೆ.

ಇದಲ್ಲದೆ, ಮೇ ತಿಂಗಳ ಮಧ್ಯಭಾಗದಿಂದ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆಗಳನ್ನು ಲೀಟರ್‌ಗೆ ಒಟ್ಟಾರೆಯಾಗಿ 7.50 ರೂಪಾಯಿಗಳಷ್ಟು ಹೆಚ್ಚಿಸಲಾಗಿದ್ದರೆ, ಸಿಎನ್‌ಜಿ (CNG) ದರವನ್ನು ಪ್ರತಿ ಕಿಲೋಗ್ರಾಂಗೆ ಸುಮಾರು 6 ರೂಪಾಯಿಗಳಷ್ಟು ಏರಿಕೆ ಮಾಡಲಾಗಿದೆ.