ನವದೆಹಲಿ: ಚೀನಾ ವೀಸಾ ಹಗರಣದಲ್ಲಿ ಜಾರಿ ನಿರ್ದೇಶನಾಲಯ ದಾಖಲಿಸಿರುವ ಪ್ರಕರಣದಲ್ಲಿ ನಿರೀಕ್ಷಣಾ ಜಾಮೀನು ಕೋರಿ ಕಾಂಗ್ರೆಸ್ ಸಂಸದ ಕಾರ್ತಿ ಚಿದಂಬರಂ ಶನಿವಾರ ದೆಹಲಿ ಹೈಕೋರ್ಟ್‌ಗೆ ಅರ್ಜಿ ಸಲ್ಲಿಸಿದ್ದಾರೆ.
ಈ ಅರ್ಜಿಯನ್ನು ಸೋಮವಾರ ವಿಚಾರಣೆಗೆ ಪಟ್ಟಿ ಮಾಡುವ ಸಾಧ್ಯತೆ ಇದೆ. ಅವರ ಹಿಂದಿನ ಮನವಿಯನ್ನು ದೆಹಲಿಯ ವಿಶೇಷ ನ್ಯಾಯಾಲಯವು ಶುಕ್ರವಾರ ನಿರಾಕರಿಸಿತು.ವಿಚಾರಣಾ ನ್ಯಾಯಾಲಯವು ಕಾರ್ತಿ ಚಿದಂಬರಂ ಮತ್ತು ಇತರ ಇಬ್ಬರಿಗೆ ಪರಿಹಾರವನ್ನು ನಿರಾಕರಿಸಿತು, ಅಪರಾಧವು ಅತ್ಯಂತ ಗಂಭೀರ ಸ್ವರೂಪದ್ದಾಗಿದೆ ಎಂದು ಹೇಳಿದೆ.
ನಿರೀಕ್ಷಣಾ ಜಾಮೀನು ಅರ್ಜಿಯ ವಿಚಾರಣೆಯ ಸಂದರ್ಭದಲ್ಲಿ ಆರೋಪಿಗಳಿಗೆ ನೀಡಲಾಗಿದ್ದ ಬಂಧನದಿಂದ ಮಧ್ಯಂತರ ರಕ್ಷಣೆಯನ್ನೂ ನ್ಯಾಯಾಲಯ ತೆರವು ಮಾಡಿತ್ತು. ತನಿಖಾಧಿಕಾರಿಯು ಅವರನ್ನು ಕರೆದಾಗ ಅವರು ತನಿಖೆಗೆ ಹಾಜರಾಗುವಂತೆ ಕೋರ್ಟ್‌ ಅವರಿಗೆ ನಿರ್ದೇಶಿಸಿದೆ.
ಕಾರ್ತಿ ಚಿದಂಬರಂ ಅವರು 263 ಚೀನಿ ಪ್ರಜೆಗಳ ವೀಸಾಗೆ ಅನುಕೂಲ ಮಾಡಿಕೊಡುವ ಸಲುವಾಗಿ ಪಂಜಾಬ್ ಮೂಲದ ಸಂಸ್ಥೆಯೊಂದರಿಂದ ತಮ್ಮ ಸಹವರ್ತಿ ಮೂಲಕ 50 ಲಕ್ಷ ರೂಪಾಯಿ ಲಂಚ ಪಡೆದ ಆರೋಪ ಎದುರಿಸುತ್ತಿದ್ದಾರೆ. ಆಪಾದಿತ ಈ ಕೃತ್ಯ ನಡೆಸಿದಾಗ ಅವರ ತಂದೆ ಪಿ.ಚಿದಂಬರಂ ಕೇಂದ್ರ ಗೃಹ ಸಚಿವರಾಗಿದ್ದರು.
ಆದರೆ, ತನ್ನ ತಂದೆಯೇ ಕೇಂದ್ರೀಯ ಸಂಸ್ಥೆಗಳ ನಿಜವಾದ ಗುರಿ ಎಂದು ಕಾರ್ತಿ ಚಿದಂಬರಂ ಸಮರ್ಥಿಸಿಕೊಂಡಿದ್ದಾರೆ. ಸರ್ಕಾರದ ಪ್ರಮುಖ ಟೀಕಾಕಾರರಾಗಿರುವ ನನ್ನ ತಂದೆಯನ್ನು ಗುರಿಯಾಗಿಸಲು ಅವರು ಬಯಸುತ್ತಿದ್ದಾರೆ ಮತ್ತು ಅವರ ವಾದಗಳನ್ನು ಎದುರಿಸಲು ಸಾಧ್ಯವಾಗದ ಕಾರಣ ಅವರು ನನ್ನ ಹಿಂದೆ ಬೀಳುತ್ತಿದ್ದಾರೆ ಎಂದು ಕಾಂಗ್ರೆಸ್ ಸಂಸದರು ಹೇಳಿದರು.
ನಿಮ್ಮ ಕಾಮೆಂಟ್ ಬರೆಯಿರಿ