ಪೋರ್ಟಲ್‌ನಲ್ಲಿ ವಕ್ಫ್ ಆಸ್ತಿಗಳ ನೋಂದಣಿಗೆ ಗಡುವು ವಿಸ್ತರಣೆಗೆ ಸುಪ್ರೀಂ ಕೋರ್ಟ್ ನಕಾರ

ನವದೆಹಲಿ:  ವಕ್ಫ್ (ತಿದ್ದುಪಡಿ) ಕಾಯಿದೆ, 2025ರ ಅಡಿಯಲ್ಲಿ ವಕ್ಫ್ ಆಸ್ತಿಗಳ ನೋಂದಣಿಗೆ ನೀಡಲಾಗಿದ್ದ ಕಾಲಾವಧಿಯನ್ನು ವಿಸ್ತರಿಸಲು ಸುಪ್ರೀಂ ಕೋರ್ಟ್ ಸೋಮವಾರ ನಿರಾಕರಿಸಿದೆ.

ನ್ಯಾಯಮೂರ್ತಿಗಳಾದ ದೀಪಂಕರ್ ದತ್ತಾ ಮತ್ತು ಎ.ಜಿ. ಮಸಿಹ್ ಅವರಿದ್ದ ನ್ಯಾಯಪೀಠವು, ಕಾಯಿದೆಯ ಸೆಕ್ಷನ್ 3ಬಿ ಅಡಿಯಲ್ಲಿ ಆಸ್ತಿಗಳನ್ನು ನೋಂದಾಯಿಸಲು ಬಯಸುವವರು ಕಾನೂನಿನ ಪ್ರಕಾರ ಕಾಲಾವಧಿ ವಿಸ್ತರಣೆಗಾಗಿ ವಕ್ಫ್ ಟ್ರಿಬ್ಯೂನಲ್ (ನ್ಯಾಯಮಂಡಳಿ) ಅನ್ನು ಸಂಪರ್ಕಿಸಬೇಕು ಎಂದು ಅಭಿಪ್ರಾಯಪಟ್ಟಿದೆ.

ನ್ಯಾಯಾಲಯವು ಕಾಲಾವಧಿ ವಿಸ್ತರಣೆಗೆ ಸಂಬಂಧಿಸಿದಂತೆ ಸಾಮಾನ್ಯ ನಿರ್ದೇಶನ ನೀಡಲು ನಿರಾಕರಿಸಿತು. “ನಾವು 3ಬಿ ಷರತ್ತನ್ನು ನೋಡಿದ್ದೇವೆ. ಅದು ಬಹಳ ಸ್ಪಷ್ಟವಾಗಿದೆ. ನೀವು ಟ್ರಿಬ್ಯೂನಲ್ ಮೊರೆ ಹೋಗಿ ಎಂದು ನ್ಯಾಯಪೀಠ ಹೇಳಿದೆ.

ವಕ್ಫ್ ಆಸ್ತಿಗಳ ಆನ್‌ಲೈನ್ ನೋಂದಣಿಗಾಗಿ ಪ್ರಾರಂಭಿಸಲಾದ ಉಮೀದ್‌ (Unified Waqf Management, Empowerment, Efficiency, and Development) ಪೋರ್ಟಲ್‌ನಲ್ಲಿನ ಸಮಸ್ಯೆಗಳನ್ನು ಪರಿಶೀಲಿಸಲು ಸುಪ್ರೀಂ ಕೋರ್ಟ್ ನಿರಾಕರಿಸಿತು.

ತಿದ್ದುಪಡಿ ಮಾಡಿದ ಕಾನೂನು ಜಾರಿಗೆ ಬಂದಾಗಿನಿಂದ ಎಲ್ಲ ವಕ್ಫ್ ಆಸ್ತಿಗಳ ಕಡ್ಡಾಯ ನೋಂದಣಿಗೆ ಆರು ತಿಂಗಳ ಗಡುವು ನೀಡಲಾಗಿತ್ತು, ಇದು ಈ ವಾರಾಂತ್ಯಕ್ಕೆ ಮುಕ್ತಾಯಗೊಳ್ಳಲಿದೆ. ಆನ್‌ಲೈನ್ ನೋಂದಣಿಗಾಗಿ ಕೇಂದ್ರ ಸರ್ಕಾರವು ಉಮೀದ್‌ (UMEED) ಪೋರ್ಟಲ್ ಅನ್ನು ಪ್ರಾರಂಭಿಸಿದೆ.

 ಆಲ್ ಇಂಡಿಯಾ ಮಜ್ಲಿಸ್-ಎ-ಇತ್ತೆಹಾದುಲ್ ಮುಸ್ಲಿಮೀನ್ (AIMIM) ಮುಖ್ಯಸ್ಥ ಮತ್ತು ಲೋಕಸಭಾ ಸದಸ್ಯ ಅಸಾದುದ್ದೀನ್ ಓವೈಸಿ ಸೇರಿದಂತೆ ಹಲವು ಅರ್ಜಿದಾರರು ನೋಂದಣಿಗೆ ಕಾಲಾವಧಿ ವಿಸ್ತರಣೆ ಕೋರಿ ನ್ಯಾಯಾಲಯದ ಮೊರೆ ಹೋಗಿದ್ದರು.

 ಅರ್ಜಿದಾರರ ಪರ ವಾದ ಮಂಡಿಸಿದ ಹಿರಿಯ ವಕೀಲರಾದ ಅಭಿಷೇಕ್ ಮನು ಸಿಂಘ್ವಿ ಅವರು, ಸಮಯದ ಕೊರತೆಯಿಂದಾಗಿ ಪೂರ್ಣಪ್ರಮಾಣದ ಅನುಸರಣೆ ಸಾಧ್ಯವಾಗದಿರಬಹುದು ಎಂದು ಹೇಳಿದರು. ಇದಕ್ಕೆ ಪ್ರತಿಕ್ರಿಯಿಸಿದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ,  ನೋಂದಣಿ 1929 ರಿಂದ ಅಸ್ತಿತ್ವದಲ್ಲಿದೆ ಎಂದು ಸಲ್ಲಿಸಿದರು. ಅರ್ಜಿದಾರರು ಸೆಕ್ಷನ್ 3B ಯ ತಿದ್ದುಪಡಿಯನ್ನು ಬಯಸುತ್ತಿದ್ದಾರೆ, ಅದರ ಅಡಿಯಲ್ಲಿ ಸಮಯದ ಮಿತಿಯನ್ನು ಶಾಸನಬದ್ಧವಾಗಿ ನಿಗದಿಪಡಿಸಲಾಗಿದೆ ಎಂದು ಅವರು ಹೇಳಿದರು.

ಸಿಬಲ್ ಅವರು ಉಮೀದ್‌ (UMEED) ಪೋರ್ಟಲ್‌ನಲ್ಲಿನ ತಾಂತ್ರಿಕ ದೋಷಗಳನ್ನು ಸಹ ನ್ಯಾಯಪೀಠದ ಗಮನಕ್ಕೆ ತಂದರು. ಆದರೆ, ನ್ಯಾಯಾಲಯವು “ಪೋರ್ಟಲ್ ಕಾರ್ಯನಿರ್ವಹಿಸುತ್ತಿದೆ ಎಂದು ಸಾಲಿಸಿಟರ್ ಜನರಲ್ ಹೇಳುತ್ತಿದ್ದಾರೆ ಮತ್ತು ನೀವು ಅದನ್ನು ನಿರಾಕರಿಸುತ್ತೀರಿ. ನೀವು ಸಾಕ್ಷ್ಯಗಳನ್ನು ಒದಗಿಸಬೇಕು. ವಿಸ್ತರಣೆಗೆ ಸಂಬಂಧಿಸಿದಂತೆ, ನೀವು ಯಾವಾಗಲೂ ಟ್ರಿಬ್ಯೂನಲ್ ಅನ್ನು ಸಂಪರ್ಕಿಸಬಹುದು ಮತ್ತು ಕಾರಣ ನೀಡಬಹುದು,” ಎಂದು ಹೇಳಿತು.

ವಕ್ಫ್ ಮಂಡಳಿಗಳೊಂದಿಗೆ ನೋಂದಾಯಿತ ಆಸ್ತಿಗಳ ವಿವರಗಳು ಈಗಾಗಲೇ ಇವೆ ಮತ್ತು ಎಲ್ಲ ಆಸ್ತಿಗಳಿಗೆ ಮ್ಯುತವಲ್ಲಿಗಳಿಲ್ಲ. ಆರು ತಿಂಗಳ ಕಾಲಾವಧಿಯಲ್ಲಿ ಇಡೀ ನೋಂದಣಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲು ಸಾಧ್ಯವಿಲ್ಲ ಎಂದು ಇತರ ಹಿರಿಯ ವಕೀಲರು ವಾದಿಸಿದರು. ಆದರೆ, ನ್ಯಾಯಾಲಯವು “ಅದು ಟ್ರಿಬ್ಯೂನಲ್‌ನ ಸಮಸ್ಯೆ. ಸದ್ಯಕ್ಕೆ, ನಾವು ಏನನ್ನೂ ಮಾಡಲು ಸಾಧ್ಯವಿಲ್ಲ,” ಎಂದು ಹೇಳಿ ಅರ್ಜಿಯನ್ನು ವಿಲೇವಾರಿ ಮಾಡಿತು.