ವಾಷಿಂಗ್ಟನ್‌: ಅಮೆರಿಕ ಪ್ರವಾಸದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿ (PM Narendra Modi) ಅಮೆರಿಕ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್ (Kamala Harris), ಆಸ್ಟ್ರೇಲಿಯಾ ಪ್ರಧಾನಿ ಸ್ಕಾಟ್ ಮಾರಿಸನ್, ಜಪಾನ್ ಪ್ರಧಾನಿ ಯೋಶಿಹಿದೆ ಸುಗಾರನ್ನು ಭೇಟಿಯಾಗಿದ್ದಾರೆ. ಮೋದಿಯವರು ಕಮಲಾ ಹ್ಯಾರಿಸ್, ಯೋಶಿಹಿದೆ ಸುಗಾ ಮತ್ತು ಸ್ಕಾಟ್ ಮಾರಿಸನ್ ಅವರಿಗೆ ಉಡುಗೊರೆಗಳನ್ನೂ ನೀಡಿದ್ದಾರೆ. ಅದರಲ್ಲೂ ಭಾರತೀಯ ಮೂಲದವರಾದ ಅಮೆರಿಕ ಉಪಾಧ್ಯಕ್ಷೆ ಕಮಲಾ ಹ್ಯಾರಿಸ್ ಅವರಿಗೆ ನೀಡಿದ ಉಡುಗೊರೆ ವಿಶೇಷ ಮಹತ್ವ ಪಡೆದಿದೆ.
ಕಮಲಾ ಹ್ಯಾರಿಸ್ ತಾಯಿಯ ಊರು ತಮಿಳುನಾಡಿನ ತುಳಸೇಂದ್ರಪುರಂ. ಇವರ ತಾತ ಪಿ.ವಿ.ಗೋಪಾಲನ್ ಸರ್ಕಾರಿ ಉದ್ಯೋಗಿಯಾಗಿದ್ದು, ಬ್ರಿಟಿಷರ ಆಡಳಿತ ಕಾಲದಲ್ಲಿ ಭಾರತದಲ್ಲಿ ವಿವಿಧ ಮಹತ್ವದ ಹುದ್ದೆಗಳನ್ನು ನಿಭಾಯಿಸಿದ್ದರು. ಈಗ ಪ್ರಧಾನಿ ನರೇಂದ್ರ ಮೋದಿಯವರು ಕಮಲಾ ಹ್ಯಾರಿಸ್ ಅವರ ಅಜ್ಜ ಪಿ.ವಿ.ಗೋಪಾಲನ್ ಅವರನ್ನು ಸ್ಮರಿಸುವಂಥ ಭಾವನಾತ್ಮಕ ಉಡುಗೊರೆಯೊಂದನ್ನು ಕಮಲಾ ಅವರಿಗೆ ನೀಡಿದ್ದಾರೆ. ತಾತ ಗೋಪಾಲನ್ರಿಗೆ ಸಂಬಂಧಪಟ್ಟ ಹಳೇ ಅಧಿಸೂಚನೆಗಳ ಪ್ರತಿಯನ್ನು ಮರದ ಕರಕುಶಲ ಫ್ರೇಮ್ನಲ್ಲಿ ಹಾಕಿ ಮೊಮ್ಮಗಳು ಕಮಲಾ ಹ್ಯಾರಿಸ್ಗೆ ನೀಡಿದ್ದಾರೆ.
ಕೇಂದ್ರ ಸರ್ಕಾರದಲ್ಲಿ ಉದ್ಯೋಗದಲ್ಲಿದ್ದ ಪಿ.ವಿ.ಗೋಪಾಲನ್ ಜಂಟಿ ಕಾರ್ಯದರ್ಶಿಯಾಗಿದ್ದರು. 1966 ರಲ್ಲಿ ಪಿ.ವಿ.ಗೋಪಾಲನ್ ಅವರನ್ನು ಜಾಂಬಿಯಾದ ನಿರಾಶ್ರಿತರ ಪರಿಹಾರ ಕ್ರಮಗಳನ್ನು ಕೈಗೊಳ್ಳಲು ಭಾರತ ಸರ್ಕಾರದಿಂದ ನೇಮಿಸಲಾಗಿತ್ತು. ಅದುವರೆಗೂ ಪಿ.ವಿ.ಗೋಪಾಲನ್ ಕೇಂದ್ರ ಸರ್ಕಾರದ ಕಾರ್ಮಿಕ, ಉದ್ಯೋಗ ಮತ್ತು ಪುನರ್ ವಸತಿ ಇಲಾಖೆಯ ಜಂಟಿ ಕಾರ್ಯದರ್ಶಿಯಾಗಿದ್ದರು. ಈ ಬಗ್ಗೆ ವರ್ಗಾವಣೆಯ ಅಧಿಸೂಚನೆಯಲ್ಲಿ ಉಲ್ಲೇಖಿಸಲಾಗಿದೆ. ಇದನ್ನು ಈಗ ಕಮಲಾ ಹ್ಯಾರಿಸ್ ಗೆ ಗಿಫ್ಟ್ ಆಗಿ ಪ್ರಧಾನಿ ಮೋದಿ ನೀಡಿದ್ದಾರೆ. ಇದರೊಂದಿಗೆ ವಾರಾಣಸಿಯ ಪ್ರಸಿದ್ಧ ಕ್ರಾಫ್ಟ್ ಎನ್ನಿಸಿರುವ ಗುಲಾಬಿ ಮೀನಾಕಾರಿ (ಬೆಳ್ಳಿ ಗುಲಾಬಿ ಮೀನಾಕ್ಷಿ) ಚೆಸ್ ಸೆಟ್ನ್ನೂ ಕೂಡ ಗಿಫ್ಟ್ ಆಗಿ ಕೊಟ್ಟಿದ್ದಾರೆ. ವಾರಾಣಸಿ ಸೊಬಗನ್ನು ಬಿಂಬಿಸುವ ಈ ಚೆಸ್ ಸೆಟ್ನಲ್ಲಿ ಕರಕುಶಲತೆಯ ಕೌಶಲ್ಯ ಎದ್ದು ಕಾಣುವಂತಿದೆ.
ಆಸ್ಟ್ರೇಲಿಯಾ, ಜಪಾನ್ ಪ್ರಧಾನಿಗಳಿಗೂ ಗಿಫ್ಟ್ ನೀಡಿದ ಮೋದಿ..:
ಪ್ರಧಾನಿ ನರೇಂದ್ರ ಮೋದಿ ಆಸ್ಟ್ರೇಲಿಯಾದ ಪ್ರಧಾನಿ ಸ್ಕಾಟ್ ಮಾರಿಸನ್ಗೆ ಬೆಳ್ಳಿ ಗುಲಾಬಿ ಮೀನಾಕಾರಿ (ಬೆಳ್ಳಿ ಗುಲಾಬಿ ಮೀನಾಕ್ಷಿ) ಹಡಗಿನ ಕ್ರಾಫ್ಟ್ನ್ನು ಉಡುಗೊರೆ ನೀಡಿದ್ದಾರೆ. ಇದೂ ಕೂಡ ಕಾಶಿಯ ಕಲಾ ವಿಶೇಷದ ಪ್ರತೀಕವಾಗಿದೆ. ಜಪಾನ್ ಪ್ರಧಾನಿ ಯೋಶಿಹಿದೆ ಅವರಿಗೆ ಬುದ್ಧನ ಶ್ರೀಗಂಧದ ಪ್ರತಿಮೆಯನ್ನು ನೀಡಿದ್ದಾರೆ. ನೀಡಲಾದ ಎಲ್ಲ ಉಡುಗೋರೆಗಳೂ ಕಾಶಿಯನ್ನೇ ಪ್ರತಿಬಿಂಬಿಸುತ್ತವೆ. ವಾರಾಣಸಿ ಭಾರತದ ಪವಿತ್ರ ತಾಣವಾಗಿದ್ದು, ಜಗತ್ತಿನ ಹಳೇ ನಗರಗಳಲ್ಲಿ ಒಂದಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ