ನವದೆಹಲಿ: ಐದು ವರ್ಷಗಳ ಹಿಂದೆ ಸೆಕ್ಟರ್ ರೆಗ್ಯುಲೇಟರ್ ಟ್ರಾಯ್ (Trai) ಶಿಫಾರಸಿನ ಆಧಾರದ ಮೇಲೆ ದೂರಸಂಪರ್ಕ ಇಲಾಖೆ (DoT) ವೊಡಾಫೋನ್ ಐಡಿಯಾ ಮೇಲೆ 2,000 ಕೋಟಿ ರೂ. ಮತ್ತು ಭಾರ್ತಿ ಏರ್ಟೆಲ್ ಮೇಲೆ 1,050 ಕೋಟಿ ರೂ.ಗಳ ದಂಡ ವಿಧಿಸಿದೆ ಎಂದು ಮೂಲಗಳು ತಿಳಿಸಿವೆ.
ಟೆಲಿಕಾಂ ಆಪರೇಟರ್‌ಗಳಿಗೆ ಪೆನಾಲ್ಟಿ ಪಾವತಿಸಲು ಡಿಒಟಿ ((DoT) ಮೂರು ವಾರಗಳ ಕಾಲಾವಕಾಶ ನೀಡಿದೆ ಎಂದು ಮೂಲಗಳು ತಿಳಿಸಿದೆ. ಗುರುವಾರದಂದು ಈ ಸಂಬಂಧ ಕಂಪೆನಿಗಳಿಗೆ ಡಿಮ್ಯಾಂಡ್ ನೋಟಿಸ್ ನೀಡಲಾಗಿದೆ ಎಂದು ವರದಿಗಳು ತಿಳಿಸಿವೆ.
ಭಾರ್ತಿ ಏರ್ಟೆಲ್ ವಕ್ತಾರರನ್ನು ಮಾಧ್ಯಮದವರು ಸಂಪರ್ಕಿಸಿದಾಗ, 2016ರಲ್ಲಿ ಟ್ರಾಯ್ ಮಾಡಿದ ಶಿಫಾರಸುಗಳ ಆಧಾರದ ಮೇಲೆ ಅನಿಯಂತ್ರಿತ ಮತ್ತು ಅನ್ಯಾಯದ ಬೇಡಿಕೆ ಇಟ್ಟಿರುವುದರಿಂದ ನಾವು ತೀವ್ರವಾಗಿ ನಿರಾಸೆಗೊಂಡಿದ್ದೇವೆ. ಇದು ಹೊಸ ಆಪರೇಟರ್‌ಗೆ ಪರಸ್ಪರ ಸಂಪರ್ಕ ಮಟ್ಟದ ನಿಬಂಧನೆಗಳಿಗೆ ಸಂಬಂಧಿಸಿದೆ. ಈ ಆರೋಪಗಳು ಕ್ಷುಲ್ಲಕ ಮತ್ತು ಉದ್ದೇಶಪೂರಿತ ಎಂದು ಅವರು ಹೇಳಿದ್ದಾರೆ.
ಭಾರತಿ ಏರ್ಟೆಲ್ ಉನ್ನತ ಗುಣಮಟ್ಟದ ಅನುಸರಣೆ ನಿರ್ವಹಣೆ ಬಗ್ಗೆ ಹೆಮ್ಮೆ ಪಡುತ್ತದೆ ಮತ್ತು ಯಾವಾಗಲೂ ದೇಶದ ಕಾನೂನನ್ನು ಅನುಸರಿಸುತ್ತಿದೆ. ನಾವು ಬೇಡಿಕೆಯನ್ನು ಪ್ರಶ್ನಿಸುತ್ತೇವೆ ಮತ್ತು ಕಾನೂನು ಆಯ್ಕೆಗಳನ್ನು ಅನುಸರಿಸುತ್ತೇವೆ ಎಂದು ಅವರು ತಿಳಿಸಿದ್ದಾರೆ. ಈ ಬಗ್ಗೆ ವೊಡಾಫೋನ್ ಐಡಿಯಾದಿಂದ ಯಾವುದೇ ತಕ್ಷಣದ ಪ್ರತಿಕ್ರಿಯೆ ದೊರಕಿಲ್ಲ.
ಅಕ್ಟೋಬರ್ 2016 ರಲ್ಲಿ, ಟೆಲಿಕಾಂ ನಿಯಂತ್ರಣ ಪ್ರಾಧಿಕಾರವು(Trai) ರಿಲಯನ್ಸ್ ಜಿಯೋಗೆ ಇಂಟರ್-ಕನೆಕ್ಟಿವಿಟಿಯನ್ನು ನಿರಾಕರಿಸಿದ ಆರೋಪದ ಮೇಲೆ ಏರ್ಟೆಲ್, ವೊಡಾಫೋನ್ ಮತ್ತು ಐಡಿಯಾ (ಈಗ ವಿಲೀನಗೊಂಡಿರುವ) ಮೇಲೆ ಒಟ್ಟು 3,050 ಕೋಟಿ ರೂ.ಗಳ ದಂಡ ವಿಧಿಸಲು ಶಿಫಾರಸು ಮಾಡಿತ್ತು.
ಆ ಸಮಯದಲ್ಲಿ ನಿಯಂತ್ರಕರು ಟೆಲಿಕಾಂ ಪರವಾನಗಿಗಳನ್ನು ರದ್ದುಗೊಳಿಸಲು ಶಿಫಾರಸು ಮಾಡುವುದನ್ನು ನಿಲ್ಲಿಸಿದರು, ಇದು ಗಮನಾರ್ಹ ಗ್ರಾಹಕರ ಅನಾನುಕೂಲತೆಗೆ ಕಾರಣವಾಗಬಹುದು ಎಂಬ ಕಾರಣಕ್ಕೆ ಮಾಡಿಲ್ಲ ಎಂದು ಅವರು ಹೇಳಿದ್ದಾರೆ.
ರಿಲಯನ್ಸ್ ಜಿಯೊ ದೂರಿನ ಮೇಲೆ ಟ್ರಾಯ್ (Trai) ಶಿಫಾರಸ್ಸು ಬಂದಿದ್ದು, ಅದರ ನೆಟ್ವರ್ಕಿನಲ್ಲಿ 75 ಪ್ರತಿಶತದಷ್ಟು ಕರೆಗಳು ವಿಫಲವಾಗುತ್ತಿವೆ. ಅದಕ್ಕೆ ಪಾಯಿಂಟ್ಸ್ ಆಫ್ ಇಂಟರ್ಫೇಸ್ (points of interface, PoIs) ಅಗತ್ಯ ಪ್ರಮಾಣದಲ್ಲಿ ಬಿಡುಗಡೆ ಮಾಡದಿರುವುದೇ ಕಾರಣ ಎಂದು ರಿಲಯನ್ಸ್ ಜಿಯೋ ದೂರು ನೀಡಿತ್ತು.
ಡಿಜಿಟಲ್ ಸಂವಹನ ಆಯೋಗ (Digital Communications Commission) ಟೆಲಿಕಾಂ ಇಲಾಖೆಯ ಅತ್ಯುನ್ನತ ನಿರ್ಧಾರ ತೆಗೆದುಕೊಳ್ಳುವ ಸಂಸ್ಥೆ, ಜುಲೈ 2019 ರಲ್ಲಿ ಸಂಚಿತ ದಂಡವನ್ನು ಅನುಮೋದಿಸಿತು.
ನಿಮ್ಮ ಕಾಮೆಂಟ್ ಬರೆಯಿರಿ