ನವದೆಹಲಿ: ಅಜೀಮ್ ಪ್ರೇಮಜಿ ವಿರುದ್ಧ 70ಕ್ಕೂ ಹೆಚ್ಚು ಪ್ರಕರಣಗಳನ್ನು ದಾಖಲಿಸಿದ ವ್ಯಕ್ತಿಯ ಹಿಂದಿನ ನಡವಳಿಕೆಯನ್ನ ಕ್ಷಮಿಸಲು ಅಜೀಮ್ ಪ್ರೇಮಜಿ ಒಪ್ಪಿಕೊಂಡಿದ್ದು, ಅವರ ಈ ನಿರ್ಧಾರವನ್ನು ಸುಪ್ರೀಂ ಕೋರ್ಟ್ ಶ್ಲಾಘಿಸಿದೆ.
ಅಜೀಮ್ ಪ್ರೇಮಜಿ ಅವರು ಈ ವಿಷಯದ ಬಗ್ಗೆ ರಚನಾತ್ಮಕ ದೃಷ್ಟಿಕೋನ ಹೊಂದಿದ್ದು, ತಮ್ಮ ವಿರುದ್ಧ ಪ್ರಕರಣ ದಾಖಲಿಸಿದ ಆರ್. ಸುಬ್ರಮಣಿಯನ್ ಅವರ ನಡವಳಿಕೆ ಕ್ಷಮಿಸಲು ಒಪ್ಪಿಕೊಂಡಿದ್ದಾರೆ. ಇದನ್ನು ಗಮನಿಸಲು ನಮಗೆ ಸಂತೋಷವಾಗಿದೆ. ಆರ್. ಸುಬ್ರಮಣಿಯನ್ ಅವರು ಎದುರಿಸಿದ ಆರ್ಥಿಕ ಸಮಸ್ಯೆಗಳ ಹಿನ್ನೆಲೆಯಲ್ಲಿ ಮತ್ತು ಪ್ರೇಮಜಿ ಅವರ ಸಮೂಹ ಕಂಪನಿಗಳಿಗೆ ಅವರಿಂದ ಬಾಕಿ ಇರುವ ಮೊತ್ತಗಳ ಬಗ್ಗೆ ಸಹಾನುಭೂತಿ ದೃಷ್ಟಿಕೋನದಿಂದ ನೋಡಲು ಒಪ್ಪಿಕೊಂಡಿದ್ದಾರೆ ಎಂದು ನ್ಯಾಯಮೂರ್ತಿಗಳಾದ ಸಂಜಯ್ ಕಿಶನ್ ಕೌಲ್ ಮತ್ತು ಎಂ.ಎಂ. ಸುಂದರೇಶ ಅವರನ್ನೊಳಗೊಂಡ ಪೀಠ ಶ್ಲಾಘಿಸಿದೆ ಎಂದು ಲೈವ್‌ ಲಾ ವರದಿ ಮಾಡಿದೆ.
ನಿರ್ದಿಷ್ಟ ಪರಿಸ್ಥಿತಿಯ ವಾಸ್ತವತೆಯನ್ನ ನೋಡಲು ಪಕ್ಷಗಳು ಸಿದ್ಧರಿರುವವರೆಗೂ ಅಸಾಧ್ಯವಾದುದು ಯಾವುದೂ ಇಲ್ಲ ಎಂಬುದನ್ನು ಪ್ರಸ್ತುತ ವಿಚಾರಣೆಗಳು ತೋರಿಸಿವೆ. ಆರ್. ಸುಬ್ರಮಣಿಯನ್ ಅವರು ತಮ್ಮ ಹಿಂದಿನ ನಡವಳಿಕೆಗೆ ಪಶ್ಚಾತ್ತಾಪ ಪಡುತ್ತಿದ್ದು, ತಮ್ಮ ಜೀವನದಲ್ಲಿ ಹೊಸ ಅಧ್ಯಾಯ ಪ್ರಾರಂಭಿಸಲು ಬಯಸುತ್ತಾರೆ ಎಂದು ನ್ಯಾಯಪೀಠ ಹೇಳಿದೆ.
ಹಿರಿಯ ವಕೀಲ ಮುಕುಲ್ ರೋಹಟಗಿ ಅವರು ಆರ್. ಸುಬ್ರಮಣಿಯನ್ ಅವರ ನಡವಳಿಕೆಯ ಬಗ್ಗೆ ಹೆಚ್ಚು ಸಹಾನುಭೂತಿಯಿಂದ ಅಭಿಪ್ರಾಯ ತೆಗೆದುಕೊಳ್ಳುವಂತೆ ಮತ್ತು ಎಲ್ಲಾ ಸಮಸ್ಯೆಗಳನ್ನ ಕೊನೆಗೊಳಿಸುವಂತೆ ಪ್ರೇಮಜಿ ಅವರ ಮನವೊಲಿಸಿದ್ದಾರೆ. ಇದಕ್ಕೆ ಅವರು ಒಪ್ಪಿಕೊಂಡಿದ್ದು, ದಾವೆಯ ಬ್ಯಾರೇಜ್ ಎದುರಿಸುತ್ತಿರುವ ಸುಬ್ರಮಣಿಯನ್ ಅವರು ತಮ್ಮ ಹಿಂದಿನ ನಡವಳಿಕೆಗಾಗಿ ಕ್ಷಮೆಯಾಚಿಸಬೇಕು ಎಂಬ ಷರತ್ತು ಹಾಕಿದ್ದರು.
ಮೇಲ್ಮನವಿದಾರರಾದ ಪ್ರೇಮಜಿ ಮತ್ತು ಅವರ ಸಮೂಹದ ವಿರುದ್ಧ ನ್ಯಾಯಾಲಯಗಳು, ನ್ಯಾಯಮಂಡಳಿಗಳು ಮತ್ತು ಶಾಸನಬದ್ಧ ಪ್ರಾಧಿಕಾರಗಳ ಮುಂದೆ ಬಾಕಿ ಇರುವ ವಿವಿಧ ವಿಚಾರಣೆಗಳನ್ನ ಹಿಂತೆಗೆದುಕೊಳ್ಳುವ ಭರವಸೆಯನ್ನ ಸುಬ್ರಮಣಿಯನ್ ನೀಡಿದ್ದಾರೆ.
ಕರ್ನಾಟಕ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ಪ್ರೇಮಜಿ ಕಳೆದ ವರ್ಷ ಸುಪ್ರೀಂ ಕೋರ್ಟ್‌ನ ಮೊರೆ ಹೋಗಿದ್ದರು. ವಿಚಾರಣಾ ನ್ಯಾಯಾಲಯವು ತಮ್ಮ ವಿರುದ್ಧ ನೀಡಿದ್ದ ಸಮನ್ಸ್ ರದ್ದುಗೊಳಿಸುವಂತೆ ಮಾಡಿದ್ದ ಅವರ ಮನವಿಯನ್ನು ಕರ್ನಾಟಕ ಹೈಕೋರ್ಟ್ ತಿರಸ್ಕರಿಸಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ