ಬಿಹಾರ ವಿಧಾನ ಪರಿಷತ್‌ ಚುನಾವಣೆ: 24 ಸ್ಥಾನಗಳಲ್ಲಿ 13ರಲ್ಲಿ ಗೆದ್ದ ಎನ್‌ಡಿಎ, ನಾಲ್ವರು ಪಕ್ಷೇತರರು ಆಯ್ಕೆ

ಪಾಟ್ನಾ: ಗುರುವಾರ ನಡೆದ ಬಿಹಾರ ವಿಧಾನ ಪರಿಷತ್ತಿನ ಚುನಾವಣೆಯಲ್ಲಿ ಆಡಳಿತಾರೂಢ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ (ಎನ್‌ಡಿಎ) ಸ್ಪರ್ಧಿಸಿದ್ದ 24 ಸ್ಥಾನಗಳ ಪೈಕಿ 13 ಸ್ಥಾನಗಳನ್ನು ಗೆದ್ದುಕೊಂಡಿದೆ.
ವಿರೋಧ ಪಕ್ಷವಾದ ರಾಷ್ಟ್ರೀಯ ಜನತಾ ದಳ (ಆರ್‌ಜೆಡಿ) ಕೇವಲ ಆರು ಸ್ಥಾನಗಳನ್ನು ಹಾಗೂ ಸ್ವತಂತ್ರ ಅಭ್ಯರ್ಥಿಗಳು ನಾಲ್ಕು ಸ್ಥಾನಗಳನ್ನು ಪಡೆದುಕೊಂಡರೆ, ಕಾಂಗ್ರೆಸ್ ಕೇವಲ ಒಂದು ಸ್ಥಾನದಲ್ಲಿ ಗೆಲುವು ಸಾಧಿಸಿದೆ.
ಬಿಜೆಪಿ, ಜನತಾ ದಳ (ಯುನೈಟೆಡ್) ಮತ್ತು ರಾಷ್ಟ್ರೀಯ ಲೋಕ ಜನಶಕ್ತಿ ಪಕ್ಷ ರಾಜ್ಯದಲ್ಲಿ ವಿಧಾನ ಪರಿಷತ್ತಿನ ಚುನಾವಣೆಯಲ್ಲಿ ಸ್ಪರ್ಧಿಸಲು ಮೈತ್ರಿ ಮಾಡಿಕೊಂಡಿದ್ದವು. ಬಿಜೆಪಿ 12 ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿತ್ತು, ಜನತಾ ದಳ (ಯುನೈಟೆಡ್) -11 ಮತ್ತು ರಾಷ್ಟ್ರೀಯ ಲೋಕ ಜನಶಕ್ತಿ ಪಕ್ಷ- 1 ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿತ್ತು.
ಎನ್‌ಡಿಎ ಗೆದ್ದಿರುವ 13 ಸ್ಥಾನಗಳಲ್ಲಿ ಬಿಜೆಪಿ 7, ಜೆಡಿಯು 5 ಮತ್ತು ಆರ್‌ಎಲ್‌ಜೆಪಿ 1 ಸ್ಥಾನ ಪಡೆದುಕೊಂಡಿದೆ.

ಜಾತಿ ಸಮೀಕರಣ
ಬಿಹಾರದ ಚುನಾವಣೆಯಲ್ಲಿ ಜಾತಿಯು ಯಾವಾಗಲೂ ಪ್ರಮುಖ ಪಾತ್ರವನ್ನು ವಹಿಸಿದೆ, ಇದು ಈ ವರ್ಷದ ಚುನಾವಣೆಯಲ್ಲಿಯೂ ಮುಂಚೂಣಿಗೆ ಬಂದಿದೆ.
ಬಿಹಾರ ಎಂಎಲ್‌ಸಿ ಚುನಾವಣೆಯಲ್ಲಿ ಭೂಮಿಹಾರ್ ಮತ್ತು ರಜಪೂತ ಜಾತಿಗೆ ಸೇರಿದ ಅಭ್ಯರ್ಥಿಗಳು ಗರಿಷ್ಠ ಸ್ಥಾನಗಳನ್ನು ಗೆದ್ದಿದ್ದಾರೆ. 24 ಸ್ಥಾನಗಳ ಪೈಕಿ ಭೂಮಿಹಾರ್ ಸಮುದಾಯದಿಂದ ಆರು ಅಭ್ಯರ್ಥಿಗಳು ಮತ್ತು ರಜಪೂತ ಸಮುದಾಯದಿಂದ ಆರು ಅಭ್ಯರ್ಥಿಗಳು ಗೆದ್ದಿದ್ದಾರೆ.
ಪಾಟ್ನಾದಿಂದ ಕಾರ್ತಿಕೇಯ ಕುಮಾರ್ (ಆರ್‌ಜೆಡಿ), ಗೋಪಾಲ್‌ಗಂಜ್‌ನಿಂದ ರಾಜೀವ್ ಕುಮಾರ್ (ಬಿಜೆಪಿ), ರಾಜೀವ್ ಕುಮಾರ್ (ಕಾಂಗ್ರೆಸ್) ಬೇಗುಸರಾಯ್ ಮುಂತಾದ ವಿಜೇತ ಅಭ್ಯರ್ಥಿಗಳು ಭೂಮಿಹಾರ್ ಸಮಾಜಕ್ಕೆ ಸೇರಿದವರು.

ಓದಿರಿ :-   ಶಿವಲಿಂಗ ಎಂಬುದು 'ತಮಾಷೆ' ವಿಷಯವಲ್ಲ : ʼಉದಾರವಾದಿʼ ಕಾಂಗ್ರೆಸ್‌ ನಾಯಕರ ಟೀಕಿಸಿದ ಕಾಂಗ್ರೆಸ್ಸಿನ ಪ್ರಮೋದ್ ಕೃಷ್ಣಂ

ಔರಂಗಾಬಾದ್, ರೋಹ್ತಾಸ್, ಭಾಗಲ್ಪುರ್, ಪೂರ್ವ ಚಂಪಾರಣ್, ಸಹರ್ಸಾ ಮತ್ತು ಮುಜಾಫರ್‌ಪುರದಲ್ಲಿ ರಜಪೂತ ಸಮಾಜದ ಅಭ್ಯರ್ಥಿಗಳು ಪ್ರಧಾನವಾಗಿ ಗೆದ್ದಿದ್ದಾರೆ.
ವೈಶಾಲಿ, ನಾವಡ, ನಳಂದ, ಮಧುಬನಿ ಮತ್ತು ಗಯಾದಲ್ಲಿ ಯಾದವ ಸಮುದಾಯದ ಅಭ್ಯರ್ಥಿಗಳು ಗೆಲುವು ಸಾಧಿಸಿದ್ದಾರೆ. ವೈಶ್ಯ ಸಮುದಾಯದ ಅಭ್ಯರ್ಥಿಗಳು ಆರು ಜಿಲ್ಲೆಗಳಲ್ಲಿ ಗೆಲುವು ಸಾಧಿಸಿದ್ದಾರೆ. ಏತನ್ಮಧ್ಯೆ, 24 ಸ್ಥಾನಗಳಲ್ಲಿ ಒಬ್ಬನೇ ಒಬ್ಬ ಮುಸ್ಲಿಂ ಅಥವಾ ದಲಿತ ಅಭ್ಯರ್ಥಿ ಗೆಲ್ಲಲಿಲ್ಲ.
ಸುಮಾರು 1.32 ಲಕ್ಷ ಮತದಾರರು 534 ಮತಗಟ್ಟೆಗಳಲ್ಲಿ 185 ಅಭ್ಯರ್ಥಿಗಳ ಭವಿಷ್ಯವನ್ನು ನಿರ್ಧರಿಸಿದ್ದಾರೆ.

ಮೇಲಿನ ಸುದ್ದಿಗೆ ರೇಟಿಂಗ್ ನೀಡಿ

5 / 5. ಒಟ್ಟು ವೋಟುಗಳು 1

advertisement

ನಿಮ್ಮ ಕಾಮೆಂಟ್ ಬರೆಯಿರಿ