ಉದಯ್‌ಪುರ: ಬಿಜೆಪಿಯ ನೂಪುರ ಶರ್ಮಾ ಅವರನ್ನು ಬೆಂಬಲಿಸಿ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿದ ಕಾರಣಕ್ಕೆ ಟೈಲರ್‌ ಆಗಿದ್ದ ಕನ್ಹಯ್ಯಾ ಲಾಲ್ ಅವರನ್ನು ಹಾಡಹಗಲೇ ಇಬ್ಬರು ಭೀಕರವಾಗಿ ಹತ್ಯೆಗೈದು ನಂತರ ಸಾಮಾಜಿಕ ಮಾಧ್ಯಮದಲ್ಲಿ ವೀಡಿಯೊವನ್ನು ಪೋಸ್ಟ್ ಮಾಡಿದ್ದಾರೆ ಹಾಗೂ ಇಸ್ಲಾಂ ಧರ್ಮಕ್ಕೆ ಮಾಡಿದ ಅವಮಾನಕ್ಕೆ ಪ್ರತೀಕಾರ ತೀರಿಸಿಕೊಳ್ಳುತ್ತಿರುವುದಾಗಿ ಹೇಳಿದ್ದಾರೆ. ಅಮಾನತುಗೊಂಡ ಬಿಜೆಪಿ ನಾಯಕ ನೂಪುರ್ ಶರ್ಮಾ ಅವರು ಪ್ರವಾದಿ ವಿರುದ್ಧ ಮಾಡಿದ ಹೇಳಿಕೆಗಳನ್ನು ಪರೋಕ್ಷವಾಗಿ ಉಲ್ಲೇಖಿಸಿದ್ದಾರೆ.
ಕನ್ಹಯ್ಯಾ ಲಾಲ್ ದೂರು ದಾಖಲಿಸಿದ್ದರು:
ಮೃತ ಕನ್ಹಯ್ಯಾ ಲಾಲ್ ಜೂನ್ 15 ರಂದು ಪೊಲೀಸರಿಗೆ ಸಮಾಜಘಾತುಕರು ಬೆದರಿಕೆ ಹಾಕುತ್ತಿದ್ದಾರೆ ಎಂದು ಆರೋಪಿಸಿ ದೂರು ನೀಡಿದ್ದರು, ಆದರೆ ಪೊಲೀಸರು ಕಾರ್ಯನಿರ್ವಹಿಸಲಿಲ್ಲ ಎಂದು ಕನ್ಹಯ್ಯಾ ಲಾಲ್ ಕುಟುಂಬ ಸದಸ್ಯರು ಆರೋಪಿಸಿದ್ದಾರೆ. ಅವರು ತಮ್ಮ ಜೀವ ಭಯದಿಂದ ಆರು ದಿನಗಳಿಂದ ತನ್ನ ಅಂಗಡಿಯನ್ನು ತೆರೆಯಲಿಲ್ಲ. ಆದರೆ, ಮಂಗಳವಾರ ಅಂಗಡಿ ತೆರೆದಾಗ ತಲೆ ಕಡಿದು ಕೊಲೆ ಮಾಡಲಾಗಿದೆ. ಅವರ ದೂರಿನ ಮೇರೆಗೆ ಪೊಲೀಸರು ಸರಿಯಾದ ಸಮಯಕ್ಕೆ ಕ್ರಮ ಕೈಗೊಂಡಿದ್ದರೆ, ಅವರು ಇಂದು ಬದುಕುತ್ತಿದ್ದರು. ನೂಪುರ್ ಶರ್ಮಾ ಅವರನ್ನು ಬೆಂಬಲಿಸಿ ಸಾಮಾಜಿಕ ಮಾಧ್ಯಮ ಪೋಸ್ಟ್ ಮಾಡಿದ ನಂತರ ಅವರಿಗೆ ಬೆದರಿಕೆಗಳು ಬರುತ್ತಿತ್ತು. ವಾಸ್ತವವಾಗಿ, ಕನ್ಹಯ್ಯಾ ಲಾಲ್ ಅವರು ಕೊಲ್ಲಲ್ಪಡುವ ಭಯದಲ್ಲಿದ್ದರು ಎಂದು ಅವರ ಕುಟುಂಬ ಸದಸ್ಯರು ಹೇಳಿದರು.
ಜೂನ್ 15 ರಂದು ಪೊಲೀಸರಿಗೆ ನೀಡಿದ ದೂರಿನಲ್ಲಿ, “ಸುಮಾರು 6 ದಿನಗಳ ಹಿಂದೆ ನನ್ನ ಮಗ ತನ್ನ ಮೊಬೈಲ್ ಫೋನ್‌ನಲ್ಲಿ ಆಟವಾಡುತ್ತಿದ್ದಾಗ ಏನೋ ಪೋಸ್ಟ್ ಮಾಡಿದ್ದಾನೆ. ನನಗೆ ಅದರ ಬಗ್ಗೆ ತಿಳಿದಿರಲಿಲ್ಲ. ಎರಡು ದಿನಗಳ ನಂತರ ಇಬ್ಬರು ನನ್ನ ಅಂಗಡಿಗೆ ಬಂದರು. ಅವರು ಹೇಳಿದರು – ನಿಮ್ಮ ಮೊಬೈಲ್‌ನಿಂದ ಆಕ್ಷೇಪಾರ್ಹ ಪೋಸ್ಟ್ ಮಾಡಲಾಗಿದೆ. ನನಗೆ ಮೊಬೈಲ್ ಆಪರೇಟ್ ಮಾಡುವುದು ಗೊತ್ತಿಲ್ಲ ಎಂದು ಹೇಳಿದೆ. ನನ್ನ ಮಗು ಅದರಲ್ಲಿ ಆಟಗಳನ್ನು ಆಡುತ್ತದೆ. ಅದು ತಪ್ಪಾಗಿ ಸಂಭವಿಸಿರಬಹುದು. ಇದಾದ ಬಳಿಕ ಪೋಸ್ಟ್ ಕೂಡ ಡಿಲೀಟ್ ಆಗಿದೆ. ಮತ್ತೆ ಮಾಡಬೇಡಿ ಎಂದು ಹೇಳಿದ್ದರು.
ನಂತರ ಕನ್ಹಯ್ಯಾ ವಿರುದ್ಧ ಎಫ್‌ಐಆರ್ ದಾಖಲಿಸಿದ ನಂತರ ಜೂನ್ 11 ರಂದು ಧನ್ಮಂಡಿ ಪೊಲೀಸ್ ಠಾಣೆಗೆ ಬರುವಂತೆ ತಿಳಿಸಲಾಗಿತ್ತು.
ಕನ್ಹಯ್ಯ ಪೊಲೀಸ್ ಠಾಣೆಯನ್ನು ತಲುಪಿದಾಗ, ಪೊಲೀಸರು ಅವರನ್ನು ಬಂಧಿಸಿದರು ಆದರೆ ಅದೇ ದಿನ ಅವರಿಗೆ ಜಾಮೀನು ನೀಡಲಾಯಿತು.ಎಎಸ್‌ಐ ಭನ್ವರಲಾಲ್ ನೇತೃತ್ವದಲ್ಲಿ ಉಭಯ ಪಕ್ಷಗಳ ನಡುವೆ ರಾಜಿ ಒಪ್ಪಂದ ನಡೆದಿದೆ ಎನ್ನಲಾಗಿದೆ.
ಇದಾದ ನಂತರವೂ ಬೆದರಿಕೆಗಳು ಮುಂದುವರಿದಾಗ ಕನ್ಹಯ್ಯ ಪೊಲೀಸರಿಗೆ ದೂರು ನೀಡಿದರೂ ಪೊಲೀಸರು ಗಂಭೀರವಾಗಿ ಪರಿಗಣಿಸಿರಲಿಲ್ಲ.
ಕನ್ಹಯ್ಯಾ ಲಾಲ್ ಪ್ರಕಾರ, ದೂರು ನೀಡಿದ ನೆರೆಹೊರೆಯವರೊಂದಿಗೆ ಇತರ ಐದು ಜನರು ಸೇರಿಕೊಂಡ ನಂತರ ಅವರ ಅಂಗಡಿಯನ್ನು ರೆಕಾರ್ಡ್ ಮಾಡುತ್ತಿದ್ದರು. ಈ ವ್ಯಕ್ತಿ ಎಲ್ಲಿಯಾದರೂ ಕಂಡರೆ ಕೊಲೆ ಮಾಡುವುದಾಗಿ ನಿರಂತರವಾಗಿ ಬೆದರಿಕೆ ಹಾಕುತ್ತಿದ್ದರು.
ತನಗೆ ವಾಟ್ಸ್‌ಆ್ಯಪ್ ಕರೆಗಳಲ್ಲಿ ಬೆದರಿಕೆಗಳು ಬರುತ್ತಿವೆ ಎಂದು ಕನ್ಹಯ್ಯಾ ಲಾಲ್ ಹೇಳಿ ಪೊಲೀಸ್ ಠಾಣೆಗೆ ದೂರು ನೀಡಿದರು ಆದರೆ ಎಎಸ್‌ಐ ಗಮನ ಹರಿಸಲಿಲ್ಲ ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ.
ಕರ್ತವ್ಯದಲ್ಲಿ ನಿರ್ಲಕ್ಷ್ಯ ತೋರಿದ ಹಿನ್ನೆಲೆಯಲ್ಲಿ ಭನ್ವರಲಾಲ್ ಅವರನ್ನು ಮಂಗಳವಾರ ಅಮಾನತುಗೊಳಿಸಲಾಗಿತ್ತು. ಮತ್ತೊಬ್ಬ ಪೊಲೀಸರ ಪಾತ್ರದ ಬಗ್ಗೆಯೂ ತನಿಖೆ ನಡೆಯುತ್ತಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ