ಪನ್ನೀರಸೆಲ್ವಂ ಪರವಾಗಿ ಮದ್ರಾಸ್ ಹೈಕೋರ್ಟ್ ತೀರ್ಪು, ಎಐಎಡಿಎಂಕೆ ಜನರಲ್ ಕೌನ್ಸಿಲ್ ಸಭೆ ನಡೆಸಲು ಆದೇಶ

ಚೆನ್ನೈ: ಅಖಿಲ ಭಾರತ ಅಣ್ಣಾ ದ್ರಾವಿಡ ಮುನ್ನೇತ್ರ ಕಳಗಂ (ಎಐಎಡಿಎಂಕೆ) ಸಾಮಾನ್ಯ ಮಂಡಳಿ ಸಭೆಗೆ ಸಂಬಂಧಿಸಿದ ಪ್ರಕರಣದಲ್ಲಿ ಮದ್ರಾಸ್ ಹೈಕೋರ್ಟ್, ಓ ಪನ್ನೀರಸೆಲ್ವಂ (ಒಪಿಎಸ್) ಪರವಾಗಿ ತೀರ್ಪು ನೀಡಿದೆ. ಜಸ್ಟಿಸ್ ಜಿ ಜಯಚಂದ್ರನ್ ಅವರು ಜೂನ್ 23ರಂತೆಯೇ ಎಐಎಡಿಎಂಕೆ ಯಥಾಸ್ಥಿತಿ ಮುಂದುವರಿಯುತ್ತದೆ ಎಂದು ತೀರ್ಪು ನೀಡಿದರು ಹಾಗೂ ಅವರು ಹೊಸದಾಗಿ ಸಾಮಾನ್ಯ ಮಂಡಳಿ ಸಭೆ ನಡೆಸಲು ಆದೇಶ ಹೊರಡಿಸಿದರು.
ಜೂನ್ 23 ರಂತೆ ಎಐಎಡಿಎಂಕೆಯ ಸ್ಥಿತಿ ಮುಂದುವರಿಯಬೇಕು. ಸಂಯೋಜಕರು ಮತ್ತು ಜಂಟಿ ಸಂಯೋಜಕರ ಒಪ್ಪಿಗೆಯಿಲ್ಲದೆ ಸಾಮಾನ್ಯ ಕೌನ್ಸಿಲ್ ಸಭೆ ನಡೆಸುವಂತಿಲ್ಲ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
ಆರಂಭದಲ್ಲಿ ನ್ಯಾಯಮೂರ್ತಿ ಕೃಷ್ಣನ್ ರಾಮಸಾಮಿ ಅವರು ವಿಚಾರಣೆ ನಡೆಸುತ್ತಿದ್ದ ಪ್ರಕರಣವನ್ನು ನ್ಯಾಯಮೂರ್ತಿ ಜಿ ಜಯಚಂದ್ರನ್ ಅವರ ಪೀಠಕ್ಕೆ ಬದಲಾಯಿಸಲಾಯಿತು. ಒ ಪನ್ನೀರಸೆಲ್ವಂ ಅವರ ವಕೀಲರು ನ್ಯಾಯಾಧೀಶರ ಬದಲಾವಣೆಗೆ ಮನವಿ ಮಾಡಿದ ನಂತರ ಇದನ್ನು ಮಾಡಲಾಗಿದೆ.

ನ್ಯಾಯಾಧೀಶರ ಬದಲಾವಣೆಯ ಮನವಿಯು ನ್ಯಾಯಾಲಯಕ್ಕೆ ಸರಿಯಾಗಿ ಹೋಗಲಿಲ್ಲ. ನ್ಯಾಯ ವ್ಯವಸ್ಥೆಯಲ್ಲಿ ನಂಬಿಕೆ ಇಲ್ಲ ಎಂದು ಒಪಿಎಸ್ ಅವರನ್ನು ನ್ಯಾಯಾಲಯ ಟೀಕಿಸಿತ್ತು. ಬಳಿಕ ಒಪಿಎಸ್ ತಂಡ ಕ್ಷಮೆ ಯಾಚಿಸಿತ್ತು.
ಆದರೆ ನ್ಯಾಯಾಧೀಶರ ಬದಲಾವಣೆಯನ್ನು ಜಾರಿಗೆ ತರಲಾಯಿತು ಮತ್ತು ನ್ಯಾಯಮೂರ್ತಿ ಜಯಚಂದ್ರ ಅವರು ಕಳೆದ ವಾರ ಎರಡೂ ಕಡೆಯವರ ವಾದವನ್ನೇ ಆಲಿಸಿದ್ದರು ಹಾಗೂ ಆದೇಶಗಳನ್ನು ಕಾಯ್ದಿರಿಸಿದ್ದರು.
ಜುಲೈ 11 ರಂದು ನಡೆದ ಸಾಮಾನ್ಯ ಮಂಡಳಿ ಸಭೆ ಅಸಿಂಧು ಎಂದು ಪನ್ನೀರಸೆಲ್ವಂ ಪರ ವಕೀಲರು ವಾದಿಸಿದ್ದಾರೆ. ಸಮನ್ವಯಾಧಿಕಾರಿಗಳು ಮತ್ತು ಜಂಟಿ ಸಮನ್ವಯಾಧಿಕಾರಿಗಳ ಹುದ್ದೆಗಳನ್ನು ರದ್ದುಗೊಳಿಸಿದರೆ, ಉಭಯ ನಾಯಕತ್ವದಿಂದ ನೇಮಕಗೊಂಡ ಜಿಸಿ ಸದಸ್ಯರು ಎಐಎಡಿಎಂಕೆಯಲ್ಲಿ ಸ್ಥಾನಗಳಲ್ಲಿ ಮುಂದುವರೆಯಲು ಹೇಗೆ ಸಾಧ್ಯ ಎಂದು ಅವರು ಪ್ರಶ್ನಿಸಿದ್ದಾರೆ.

ಜೂನ್ 23 ರಂದು ಪ್ರೆಸಿಡಿಯಂ ಅಧ್ಯಕ್ಷರ ಬಗ್ಗೆ ನಿರ್ಣಯ ಕೈಗೊಳ್ಳುವ ಮೊದಲೇ ಪನ್ನೀರಸೆಲ್ವಂ ಆವರಣದಿಂದ ನಿರ್ಗಮಿಸಿರುವುದು ಸ್ಪಷ್ಟವಾಗಿದೆ ಎಂದು ಅವರು ವಾದ ಮಂಡಿಸಿದರು. ಉಪನಿಯಮದ ಪ್ರಕಾರ ಸಭೆಗೆ ಸಂಯೋಜಕರ ಒಪ್ಪಿಗೆ ಅಗತ್ಯವಿದೆ ಎಂದು ವಕೀಲರು ವಾದಿಸಿದರು.
ಎಡಪ್ಪಾಡಿ ಪಳನಿಸ್ವಾಮಿ (ಇಪಿಎಸ್) ತಂಡವು ಈ ವಾದಗಳಿಗೆ ಪ್ರತಿಯಾಗಿ 2,500 ಕೌನ್ಸಿಲ್ ಸದಸ್ಯರು ಇಪಿಎಸ್ ಅವರಿಗೆ ಹಂಗಾಮಿ ಪ್ರಧಾನ ಕಾರ್ಯದರ್ಶಿಯಾಗಿ ಮತ ಹಾಕಿದ್ದಾರೆ ಮತ್ತು ನಾಲ್ಕು ತಿಂಗಳೊಳಗೆ ಚುನಾವಣೆ ನಡೆಸಲಾಗುವುದು ಎಂದು ಹೇಳಿದರು.
ಇದೀಗ ಮದ್ರಾಸ್ ಹೈಕೋರ್ಟ್‌ನ ನ್ಯಾಯಮೂರ್ತಿ ಜಿ ಜಯಚಂದ್ರನ್ ಅವರು ಜೂನ್ 23 ರಂದು ಇದ್ದಂತೆಯೇ ಎಐಎಡಿಎಂಕೆಯ ಯಥಾಸ್ಥಿತಿ ಮುಂದುವರಿಯಬೇಕು ಎಂದು ಆದೇಶಿಸಿದ್ದಾರೆ ಮತ್ತು ಹೊಸದಾಗಿ ಸಾಮಾನ್ಯ ಮಂಡಳಿ ಸಭೆ ನಡೆಸಲು ಆದೇಶ ಹೊರಡಿಸಿದ್ದಾರೆ.