ಬಾರಾಮತಿ: 8 ತಿಂಗಳ ಮಗು ಇದ್ದಕ್ಕಿದ್ದಂತೆ ತಾಯಿಯ ಹಾಲು ಕುಡಿಯುವುದನ್ನು ನಿಲ್ಲಿಸಿದರೆ ಅದು ಸಾಮಾನ್ಯ ಸಂಗತಿಯಲ್ಲ. ಮಹಾರಾಷ್ಟ್ರದ ಪುಣೆ ಪಕ್ಕದ ಬಾರಾಮತಿಯಲ್ಲಿ 8 ತಿಂಗಳ ಮಗುವಿಗೆ ಇದೇ ಸಂಭವಿಸಿದೆ. ಇದ್ದಕ್ಕಿದ್ದಂತೆ ಈ ಮಗು ಎದೆ ಹಾಲು ಕುಡಿಯುವುದನ್ನು ನಿಲ್ಲಿಸಿದೆ. ಅಲ್ಲದೆ ಇತರ ಆಹಾರ ಸೇವನೆಯನ್ನೂ ಮಾಡದೆ ಹಸಿವಿನಿಂದ ಒಂದೇ ಸಮನೆ ಅಳುತ್ತಿತ್ತು. ಜೊತೆಗೆ ನೋವಿನಿಂದ ಬಳಲುತ್ತಿತ್ತು. ಇದಾದ ಬಳಿಕ ಆತನ ಪೋಷಕರೂ ಆತಂಕಗೊಂಡು ಮಗುವನ್ನು ಆಸ್ಪತ್ರೆಗೆ ಕರೆದೊಯ್ದರು. ನಂತರ ಅದಕ್ಕೆ ಕಾರಣ ತಿಳಿದು ಆಘಾತಕ್ಕೊಳಗಾದರು. ಮಗುವಿನ ವೈದ್ಯಕೀಯ ವರದಿ ನೋಡಿದ ಅವರು ಬೆಚ್ಚಿಬಿದ್ದರು.
ಶಿಶುಗಳಲ್ಲಿನ ಸಣ್ಣ ಬದಲಾವಣೆಗಳೂ ಸಹ ಗಂಭೀರವಾದ ಪರಿಣಾಮ ಬೀರುತ್ತವೆ. ಹೀಗಾಗಿ ಅವರಲ್ಲಿರುವ ಪ್ರತಿಯೊಂದು ಬದಲಾವಣೆಯತ್ತಲೂ ಪೋಷಕರು ಗಮನ ಹರಿಸಬೇಕು. ಮಗು ಹಾಲು ಕುಡಿಯದಿದ್ದರೆ ಹೊಟ್ಟೆ ತುಂಬಿದೆ, ಹೊಟ್ಟೆಯಲ್ಲಿ ಗ್ಯಾಸ್ ಇದೆ ಎಂದುಕೊಂಡು ನಿರ್ಲಕ್ಷಿಸಬಾರದು ಎಂಬುದಕ್ಕೆ ಈ ಘಟನೆ ಉತ್ತಮ ನಿದರ್ಶನ.
ಈ ಮಗುವಿಗೆ ಉಸಿರಾಟದ ತೊಂದರೆ ಎದುರಿಸಿತು. ಇದ್ದಕ್ಕಿದ್ದಂತೆ ಹಾಲು ಕುಡಿಯುವುದನ್ನು ನಿಲ್ಲಿಸಿತು. ಆ ನಂತರ, ಪೋಷಕರು ಮಕ್ಕಳ ತಜ್ಞರಾದ ಡಾ. ಸೌರವ್ ಮುತಾ ಅವರ ಬಳಿ ಕರೆದೊಯ್ದರು. ಅವರು ಕೆಲವು ವೈದ್ಯಕೀಯ ಪರೀಕ್ಷೆಗಳ ನಂತರ ಮಾಡಿದ ಎಕ್ಸ್-ರೇ ವರದಿಯು ಆಘಾತಕಾರಿ ವಿಷಯವನ್ನು ಬಹಿರಂಗಪಡಿಸಿತು. ಈ ಮಗುವಿನ ಗಂಟಲಲ್ಲಿ ಕಾಲುಂಗುರ ಸಿಕ್ಕಿಕೊಂಡಿರುವುದು ಕಂಡುಬಂತು. ಈ ಪುಟ್ಟ ಮಗು ಆಟವಾಡುತ್ತಿದ್ದಾಗ ಅಕಸ್ಮಾತ್‌ ತಾಯಿಯ ಕಾಲುಂಗುರ ನುಂಗಿ ಬಿಟ್ಟಿದೆ. ಕೆಲವು ದಿನಗಳವರೆಗೆ ಯಾರೂ ಇದನ್ನು ಗಮನಿಸಲೇ ಇಲ್ಲ. ಅದು ವಿಪರೀತಕ್ಕೆ ಹೋದ ನಂತರ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ.
ವೈದ್ಯರು ಕೂಡಲೇ ಮಗುವನ್ನು ನಿಂಬಾಳ್ಕರ್ ಆಸ್ಪತ್ರೆಗೆ ಕಳುಹಿಸಿದ್ದಾರೆ. ಅಲ್ಲಿ ಡಾ. ಸೌರಭ್ ನಿಂಬಾಳ್ಕರ್ ಅವರು ಮಗುವಿಗೆ ಶಸ್ತ್ರಚಿಕಿತ್ಸೆ ನಡೆಸಬೇಕಾಯಿತು. ಮಗುವಿನ ಗಂಟಲಿನಲ್ಲಿ ಸಿಕ್ಕಿಹಾಕಿಕೊಂಡಿದ್ದ ಉಂಗುರವನ್ನು ದೂರದರ್ಶಕವನ್ನು ಬಳಸಿ ಬೇರ್ಪಡಿಸಿದರು ಮತ್ತು ಈಗ ಮಗುವಿನ ಸ್ಥಿತಿ ಸ್ಥಿರವಾಗಿದೆ.
ಈ ಹಿಂದೆ ಜಾರ್ಖಂಡ್‌ನಲ್ಲೂ 6 ತಿಂಗಳ ಮಗು ಪ್ಲಾಸ್ಟಿಕ್ ಬಲ್ಬ್ ನುಂಗಿತ್ತು. ಈ ಪುಟ್ಟ ಹುಡುಗಿಯ ಹೆಸರು ಪ್ರಿಯಾ ಕುಮಾರಿ. ಆಟವಾಡುತ್ತಿದ್ದಾಗ ಆಕಸ್ಮಿಕವಾಗಿ ಎರಡು ಇಂಚಿನ ಪ್ಲಾಸ್ಟಿಕ್ ಬಲ್ಬ್ ನುಂಗಿ ಬಿಟ್ಟಿತ್ತು. ಅದು ಅವಳ ಕುತ್ತಿಗೆಗೆ ಹೋಗಿ ಸಿಕ್ಕಿಹಾಕಿಕೊಂಡಿತು. ಕೊರಳಲ್ಲಿ ಪ್ಲಾಸ್ಟಿಕ್ ಬಲ್ಬ್ ಅಂಟಿಕೊಂಡಿದ್ದರಿಂದ ಬಾಲಕಿಗೆ ತುಂಬಾ ತೊಂದರೆಯಾಗತೊಡಗಿತು. ಅವಳು ಜೋರಾಗಿ ಅಳಲು ಪ್ರಾರಂಭಿಸಿದಳು. ಆರಂಭದಲ್ಲಿ ಬಾಲಕಿಯ ಬಾಯಿಗೆ ಸಿಲುಕಿದ್ದ ಬಲ್ಬ್ ಅನ್ನು ಮನೆಯವರು ತಾವೇ ತೆಗೆಯಲು ಯತ್ನಿಸಿದರಾದರೂ ಯಾರಿಂದಲೂ ಸಾಧ್ಯವಾಗಲಿಲ್ಲ. ಇದಾದ ಬಳಿಕ ಮನೆಯವರು ಆಕೆಯನ್ನು ಕೂಡಲೇ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಇಲ್ಲಿ ಬಾಲಕಿಯ ಗಂಟಲಲ್ಲಿ ಸಿಲುಕಿದ್ದ ಬಲ್ಬ್ ತೆಗೆಯಲು ವೈದ್ಯರ ತಂಡ ಇನ್ನಿಲ್ಲದ ಕಸರತ್ತು ನಡೆಸಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ