ಚೀನಾ-ಪಾಕಿಸ್ತಾನ ಗಮನದಲ್ಲಿಟ್ಟು ರಕ್ಷಣಾ ಬಜೆಟ್ 13%ಕ್ಕಿಂತ ಹೆಚ್ಚು ಏರಿಕೆ

ನವದೆಹಲಿ: ದೇಶದ ರಾಷ್ಟ್ರೀಯ ಭದ್ರತೆಗೆ ಪ್ರಮುಖ ಒತ್ತು ನೀಡುವ ನಿಟ್ಟಿನಲ್ಲಿ, ಪ್ರಧಾನಿ ನರೇಂದ್ರ ಮೋದಿ ಸರ್ಕಾರವು 2023-24 ರ ಆರ್ಥಿಕ ವರ್ಷಕ್ಕೆ ರಕ್ಷಣಾ ಬಜೆಟ್ ಅನ್ನು ಸುಮಾರು 13%ರಷ್ಟು ಹೆಚ್ಚಳ ಮಾಡಿದೆ. ಅಂದರೆ ರಕ್ಷಣಾ ಬಜೆಟ್‌ ಅನ್ನು 5.93 ಲಕ್ಷ ಕೋಟಿ ರೂ.ಗಳಿಗೆ ಹೆಚ್ಚಿಸಿದೆ. ಚೀನಾ ಮತ್ತು ಪಾಕಿಸ್ತಾನದಿಂದ ಹೆಚ್ಚುತ್ತಿರುವ ಬೆದರಿಕೆಗಳನ್ನು ಗಮನದಲ್ಲಿಟ್ಟುಕೊಂಡು ಈ ಹೆಚ್ಚಳ ಮಾಡಲಾಗಿದೆ.
2022-23 ರಲ್ಲಿ ರಕ್ಷಣೆಗೆ ಬಜೆಟ್‌ನಲ್ಲಿ 5.25 ಲಕ್ಷ ಕೋಟಿ ರೂ.ಗಳನ್ನು ನೀಡಲಾಗಿತ್ತು. ಕಳೆದ ಹಲವಾರು ಬಜೆಟ್‌ಗಳಿಗೆ ಹೋಲಿಸಿದರೆ ರಕ್ಷಣಾ ಬಜೆಟ್ ಗಮನಾರ್ಹ ಏರಿಕೆ ಕಂಡಿದ್ದರೂ, ಹೆಚ್ಚುತ್ತಿರುವ ಚೀನಾದ ಆಕ್ರಮಣದಿಂದಾಗಿ ಹಿಮಾಲಯದಲ್ಲಿ ಗಡಿ ಮೂಲಸೌಕರ್ಯವನ್ನು ಬಲಪಡಿಸುವ ಬಗ್ಗೆ ಹೆಚ್ಚಿನ ಗಮನ ನೀಡಲಾಗಿದ್ದರೂ ಸಹ ಸರ್ಕಾರದ ಹೆಚ್ಚು ಪ್ರಚಾರದ ಆಧುನೀಕರಣ ಕಾರ್ಯಕ್ರಮವು ಹೆಚ್ಚಿನ ಪ್ರಮಾಣದಲ್ಲಿ ಏರಿಕೆ ಕಾಣಲಿಲ್ಲ.
5.93 ಲಕ್ಷ ಕೋಟಿ ರೂ.ಗಳ ಒಟ್ಟಾರೆ ಹಂಚಿಕೆಯಲ್ಲಿ, ಬಂಡವಾಳದ ವೆಚ್ಚವು 1.62 ಲಕ್ಷ ಕೋಟಿ ರೂ.ಗಳಷ್ಟಿದೆ, ಕಳೆದ ವರ್ಷದ 1.52 ಲಕ್ಷ ಕೋಟಿಗೆ ಹೋಲಿಸಿದರೆ ಸುಮಾರು ಶೇಕಡ 10 ರಷ್ಟು ಹೆಚ್ಚಳವಾಗಿದೆ. ಜಲಾಂತರ್ಗಾಮಿಗಳು, ಶಸ್ತ್ರಸಜ್ಜಿತ ಡ್ರೋನ್‌ಗಳು, ಬಂದೂಕುಗಳು, ಟ್ಯಾಂಕ್‌ಗಳು ಮತ್ತು ಇತರ ಯುದ್ಧನೌಕೆಗಳು, ಯುದ್ಧ ವಿಮಾನಗಳಂತಹ ಹೊಸ ಮತ್ತು ಆಧುನಿಕ ಶಸ್ತ್ರಾಸ್ತ್ರಗಳನ್ನು ಸಂಗ್ರಹಿಸಲು ಉದ್ದೇಶಿಸಲಾಗಿದೆ.

ರಕ್ಷಣಾ ಸಚಿವಾಲಯವು ಗಡಿ ಪ್ರದೇಶಗಳಲ್ಲಿ, ವಿಶೇಷವಾಗಿ ಉತ್ತರದ ಗಡಿಗಳಲ್ಲಿ ಮೂಲಸೌಕರ್ಯವನ್ನು ಬಲಪಡಿಸಲು ಬದ್ಧವಾಗಿದೆ. ಅದರಂತೆ, 2022-23ರ ಹಣಕಾಸು ವರ್ಷದಲ್ಲಿ 3,500 ಕೋಟಿ ರೂ.ಗಳಿಗೆ ಹೋಲಿಸಿದರೆ 2023-24ರ ಆರ್ಥಿಕ ವರ್ಷದಲ್ಲಿ 5,000 ಕೋಟಿ ರೂ.ಗಳು ಅಂದರೆ 43% ರಷ್ಟು ಬಾರ್ಡರ್ ರೋಡ್ಸ್ ಆರ್ಗನೈಸೇಷನ್ (BRO) ಬಂಡವಾಳದ ಬಜೆಟ್ ಹೆಚ್ಚಾಗಿದೆ ಎಂದು ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಟ್ವೀಟ್ ಮಾಡಿದ್ದಾರೆ.
ಸಶಸ್ತ್ರ ಪಡೆಗಳು “ಯಾವುದೇ ಸಂದರ್ಭವನ್ನು ಎದುರಿಸಲು ಸಿದ್ಧರಾಗಿರಬೇಕು” ಎಂದು ಸಚಿವಾಲಯ ಹೇಳಿದೆ. ಆದ್ದರಿಂದ, 2022-23 ರ ಬಜೆಟ್ ಅಂದಾಜುಗಳಲ್ಲಿ (ಬಿಇ) 62,431 ಕೋಟಿ ರೂಪಾಯಿಗಳಿಂದ ಸಂಬಳೇತರ ಆದಾಯದ ವೆಚ್ಚವನ್ನು ಈ ಬಜೆಟ್‌ನಲ್ಲಿ 90,000 ಕೋಟಿಗೆ ಹೆಚ್ಚಿಸಲಾಗಿದೆ ಎಂದು ಅದು ಹೇಳಿದೆ. 2023-24 ರಲ್ಲಿ, 44% ಜಿಗಿತ ಕಂಡಿದೆ.

2023-24ರ ಆರ್ಥಿಕ ಬಜೆಟ್‌ನಲ್ಲಿ ರಕ್ಷಣಾ ಪಿಂಚಣಿಗಾಗಿಯೇ ಪ್ರತ್ಯೇಕ 1,38,205 ಕೋಟಿ ರೂ. ಗಳನ್ನು ತೆಗೆದಿರಸಲಾಗಿದೆ. ಪಿಂಚಣಿ ವೆಚ್ಚ ಸೇರಿದಂತೆ ಒಟ್ಟು ಹಣಕಾಸು ವೆಚ್ಚ 4,22,162 ಕೋಟಿ ರೂ.ಗಳಾಗಿವೆ
ಕಳೆದೆರಡು ವರ್ಷಗಳಲ್ಲಿ ಸರ್ಕಾರವು ‘ಆತ್ಮನಿರ್ಭರ ಭಾರತ’ ಯೋಜನೆಯಡಿ ರಕ್ಷಣಾ ವಸ್ತುಗಳ ಸ್ವದೇಶಿ ಉತ್ಪಾದನೆಗೆ ಹೆಚ್ಚಿನ ಒತ್ತು ನೀಡಿದ್ದು, ಕ್ರಮೇಣ ಆಮದು ಕಡಿಮೆ ಮಾಡಿ ರಫ್ತಿನತ್ತ ಹೆಚ್ಚು ಗಮನ ಹರಿಸಿದೆ.
ಯುದ್ಧ ವಿಮಾನಗಳು, ವಿಮಾನವಾಹಕ ನೌಕೆಗಳು, ಮುಖ್ಯ ಯುದ್ಧ ಟ್ಯಾಂಕ್‌ಗಳು ಮತ್ತು ದಾಳಿ ಹೆಲಿಕಾಪ್ಟರ್‌ಗಳನ್ನು ತಯಾರಿಸುವ ಮೂಲಕ ರಕ್ಷಣಾ ಉತ್ಪಾದನೆಯನ್ನು 2022 ರಲ್ಲಿ $ 12 ಶತಕೋಟಿಯಿಂದ 2025 ರ ವೇಳೆಗೆ $ 22 ಶತಕೋಟಿಗೆ ಹೆಚ್ಚಿಸಲು ಭಾರತವು ಕೆಲಸ ಮಾಡುತ್ತಿದೆ ಎಂದು ಈ ಹಿಂದೆ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಹೇಳಿದ್ದರು.