ಕೋಝಿಕ್ಕೋಡ್‌ : ಕೇರಳದ ಕೋಝಿಕ್ಕೋಡಿನ ತೃತೀಯಲಿಂಗಿ ದಂಪತಿ ಜಹಾದ್ ಮತ್ತು ಜಿಯಾ ಪಾವಲ್ ಮಗುವಿಗೆ ತಂದೆ-ತಾಯಿಯಾಗುತ್ತಿದ್ದಾರೆ. ಅವರು ಮಾರ್ಚ್‌ನಲ್ಲಿ ಮಗುವನ್ನು ನಿರೀಕ್ಷಿಸುತ್ತಿರುವುದಾಗಿ ಪ್ರಕಟಿಸಿದ್ದಾರೆ. ಇದು ಬಹುಶಃ ದೇಶದಲ್ಲಿ ತೃತೀಯ ಲಿಂಗಿಯ ಮೊದಲ ಗರ್ಭಧಾರಣೆಯಾಗಿದೆ.
ಮೂರು ವರ್ಷಗಳಿಂದ ಒಟ್ಟಿಗೆ ವಾಸಿಸುತ್ತಿರುವ ತೃತೀಯ ಲಿಂಗಿ ದಂಪತಿ ಸಂತೋಷದ ಸುದ್ದಿಯನ್ನು Instagramನಲ್ಲಿ ಹಂಚಿಕೊಂಡಿದ್ದಾರೆ. ಜಿಯಾ ಪಾವಲ್ ಅವರು ತಮ್ಮ ಸಂಗಾತಿ ಜಹಾದ್ ಈಗ ಎಂಟು ತಿಂಗಳ ಗರ್ಭಿಣಿ ಎಂದು ಘೋಷಿಸಿದರು. ದಂಪತಿ ಈಗ ತಮ್ಮ ಮೊದಲ ಮಗುವನ್ನು ಮಾರ್ಚ್‌ನಲ್ಲಿ ನಿರೀಕ್ಷಿಸುತ್ತಿದ್ದಾರೆ, ಇದು ಭಾರತದಲ್ಲಿನ ಟ್ರಾನ್ಸ್‌ಜೆಂಡರ್ ಸಮುದಾಯದಲ್ಲಿ ಮೊದಲನೆಯದು ಎಂದು ವರದಿಯಾಗಿದೆ.
ಜಿಯಾ ಪುರುಷನಾಗಿ ಜನಿಸಿದರು ಹಾಗೂ ಮಹಿಳೆಯಾಗಿ ಬದಲಾದರು. ಮತ್ತು ಜಹದ್ ಮಹಿಳೆಯಾಗಿ ಜನಿಸಿ ಪುರುಷನಾಗಿ ರೂಪಾಂತರಗೊಂಡರು. ಅವರಿಬ್ಬರೂ ತಮ್ಮ ಲಿಂಗ ಬದಲಾವಣೆಯಾಗುತ್ತಿರುವುದನ್ನು ಅರಿತುಕೊಂಡ ನಂತರ ತಮ್ಮ ಪ್ರೌಢಾವಸ್ಥೆಯಲ್ಲಿ ತಮ್ಮ ತಮ್ಮ ಕುಟುಂಬವನ್ನು ತೊರೆದರು.
ನಾನು ತಾಯಿಯಾಗುವ ನನ್ನ ಕನಸನ್ನು ಮತ್ತು ಅವನು ತಂದೆಯಾಗುವ ಕನಸನ್ನು ನನಸಾಗಿಸಿಕೊಳ್ಳಲಿದ್ದೇವೆ. ಎಂಟು ತಿಂಗಳ ವಯಸ್ಸಿನ ಭ್ರೂಣವು ಈಗ ಜಹಾದ್ ಹೊಟ್ಟೆಯಲ್ಲಿದೆ, ನಮಗೆ ತಿಳಿದುಬಂದ ಪ್ರಕಾರ, ಇದು ಭಾರತದಲ್ಲಿ ಮೊದಲ ಟ್ರಾನ್ಸ್ ಮ್ಯಾನ್‌ನ ಗರ್ಭಧಾರಣೆಯಾಗಿದೆ ಎಂದು ಪಾವಲ್ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಬರೆದಿದ್ದಾರೆ.
“ನಾನು ಜನ್ಮತಃ ಅಥವಾ ನನ್ನ ದೇಹದಿಂದ ಹೆಣ್ಣಲ್ಲದಿದ್ದರೂ, ಮಗು ನನ್ನನ್ನು ‘ಅಮ್ಮ’ ಎಂದು ಕರೆಯುವುದನ್ನು ಕೇಳುವ ಕನಸು ಇತ್ತು … ಜಹಾದ್ ತಂದೆಯಾಗುವ ಕನಸನ್ನು ಹೊಂದಿದ್ದಾನೆ. ನಾವು ಒಟ್ಟಿಗೆ ಇದ್ದು ಮೂರು ವರ್ಷಗಳಾಗಿವೆ. ಮತ್ತು ಇಂದು ಅವನ ಸಂಪೂರ್ಣ ಒಪ್ಪಿಗೆಯೊಂದಿಗೆ ಎಂಟು ತಿಂಗಳ ಜೀವನವು ಅವನ ಹೊಟ್ಟೆಯಲ್ಲಿ ಚಲಿಸುತ್ತಿದೆ ಎಂದು ಜಿಯಾ ಪೋಸ್ಟ್‌ನ ಶೀರ್ಷಿಕೆಯಲ್ಲಿ ಬರೆದಿದ್ದಾರೆ.
ಅವರಿಬ್ಬರೂ ತಮ್ಮ ಲಿಂಗ ಪರಿವರ್ತನೆಯ ಪ್ರಕ್ರಿಯೆಯ ಭಾಗವಾಗಿ ಹಾರ್ಮೋನ್ ಚಿಕಿತ್ಸೆಗೆ ಒಳಗಾಗಿದ್ದಾರೆ. ಆದರೆ, ಪುರುಷನಾಗಲು ಸ್ಥಿತ್ಯಂತರಗೊಳ್ಳುತ್ತಿದ್ದ ಜಹದ್, ಗರ್ಭಧರಿಸಬೇಕೆಂಬ ಕಾರಣಕ್ಕೆ ಅದನ್ನು ಸ್ಥಗಿತಗೊಳಿಸಿದ್ದಾನೆ.
“ಮೂರು ವರ್ಷಗಳ ಹಿಂದೆ ನಾವು ಒಟ್ಟಿಗೆ ವಾಸಿಸಲು ಪ್ರಾರಂಭಿಸಿದಾಗ, ನಮ್ಮ ಜೀವನವು ಇತರ ತೃತೀಯಲಿಂಗಿಗಳಿಗಿಂತ ಭಿನ್ನವಾಗಿರಬೇಕು ಎಂದು ನಾವು ಭಾವಿಸಿದ್ದೆವು. ಹೆಚ್ಚಿನ ತೃತೀಯ ಲಿಂಗಿ ದಂಪತಿಗಳನ್ನು ಸಮಾಜ ಮತ್ತು ಅವರ ಕುಟುಂಬಗಳು ಬಹಿಷ್ಕರಿಸುತ್ತವೆ. ನಮ್ಮ ನಂತರವೂ ಒಬ್ಬ ವ್ಯಕ್ತಿ ಇರಬೇಕೆಂದು ನಾವು ಮಗುವನ್ನು ಬಯಸಿದ್ದೇವೆ ಎಂದು ಜಿಯಾ ಹೇಳಿದ್ದಾರೆ.
ಜಹಾದ್ ಸ್ತನ ತೆಗೆಯುವ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು, ಆದರೆ ಅದನ್ನು ಗರ್ಭಧಾರಣೆಗಾಗಿ ನಿಲ್ಲಿಸಲಾಯಿತು. ಸ್ಥಳೀಯ ಮಾಧ್ಯಮ ವರದಿಗಳ ಪ್ರಕಾರ, ದಂಪತಿ ಮಗುವನ್ನು ದತ್ತು ತೆಗೆದುಕೊಳ್ಳಲು ಯೋಜಿಸಿದ್ದರು ಮತ್ತು ಇದರ ಪ್ರಕ್ರಿಯೆಯ ಬಗ್ಗೆ ವಿಚಾರಿಸಿದ್ದಾರೆ. ಆದರೆ ಅವರು ತೃತೀಯ ಲಿಂಗಿ ದಂಪತಿಯಾಗಿವುದರಿಂದ ಕಾನೂನು ಪ್ರಕ್ರಿಯೆಗಳು ಅವರಿಗೆ ಸವಾಲಾಗಿತ್ತು.
ಪಾವಲ್ ತನ್ನ ಕುಟುಂಬ ಮತ್ತು ವೈದ್ಯರ ಬೆಂಬಲಕ್ಕಾಗಿ ಧನ್ಯವಾದ ಹೇಳಿದ್ದಾರೆ. ಮುಂದಿನ ತಿಂಗಳು ಮಗುವಿಗೆ ಜನ್ಮ ನೀಡಿದ ನಂತರ ಜಹದ್ ಪುರುಷನಾಗುವ ತನ್ನ ಪ್ರಯಾಣವನ್ನು ಮುಂದುವರಿಸುತ್ತಾನೆ ಎಂದು ಹೇಳಿದ್ದಾರೆ.
“ಜಹಾದ್ ಎರಡೂ ಸ್ತನಗಳನ್ನು ತೆಗೆದುಹಾಕಿರುವುದರಿಂದ, ವೈದ್ಯಕೀಯ ಕಾಲೇಜಿನ ಎದೆ ಹಾಲಿನ ಬ್ಯಾಂಕ್‌ನಿಂದ ಮಗುವಿಗೆ ಹಾಲುಣಿಸಬಹುದು ನಾವು ಭಾವಿಸುತ್ತೇವೆ” ಎಂದು ಜಿಯಾ ಹೇಳಿದರು.
ನಿಮ್ಮ ಕಾಮೆಂಟ್ ಬರೆಯಿರಿ