ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಎನ್‌ಡಿಎ ಅಧಿಕಾರಕ್ಕೆ ಬಂದ 2014-15ರ ಭಾರತದ ತಲಾ ಆದಾಯವು 1,72,000 ರೂ.ಗಳಿಗೆ ದ್ವಿಗುಣಗೊಂಡಿದೆ. ಆದರೆ ಆದಾಯದ ಅಸಮಾನ ಹಂಚಿಕೆಯು ಸವಾಲಾಗಿಯೇ ಉಳಿದಿದೆ ಎಂದು ವರದಿಯೊಂದು ಹೇಳಿದೆ.
ನ್ಯಾಷನಲ್ ಸ್ಟ್ಯಾಟಿಸ್ಟಿಕಲ್ ಆಫೀಸ್ (NSO) ಪ್ರಕಾರ, ಪ್ರಸ್ತುತ ಬೆಲೆಗಳಲ್ಲಿ ವಾರ್ಷಿಕ ತಲಾ (ನಿವ್ವಳ ರಾಷ್ಟ್ರೀಯ ಆದಾಯ) 2022-23 ರಲ್ಲಿ 1,72,000 ರೂ.ಗಳು ಎಂದು ಅಂದಾಜಿಸಲಾಗಿದೆ, 2014-15 ರಲ್ಲಿ 86,647 ರೂ.ಗಳಿಂದ ಇದು 1,72,000 ರೂ.ಗಳಿಗೆ ಹೆಚ್ಚಳವಾಗಿದೆ. ಇದು 99%ರಷ್ಟು ಹೆಚ್ಚಳವನ್ನು ಸೂಚಿಸುತ್ತದೆ. ಅಂದರೆ ಬಹುತೇಕ ದ್ವಿಗುಣಗೊಂಡಿದೆ.
ನೈಜ ಪರಿಭಾಷೆಯಲ್ಲಿ (ಸ್ಥಿರ ಬೆಲೆಗಳು), ತಲಾ ಆದಾಯವು 2014-15 ರಲ್ಲಿ 72,805 ರೂ.ಗಳಿದ್ದಿದ್ದು 2022-23 ರಲ್ಲಿ 98,118 ರೂ.ಗಳಿಗೆ ಏರಿದೆ. ಅಂದರೆ ಸುಮಾರು 35% ರಷ್ಟು ಹೆಚ್ಚಾಗಿದೆ. ಆದರೆ ಆದಾಯದ ಅಸಮಾನ ವಿತರಣೆಯು ಸವಾಲಾಗಿಯೇ ಉಳಿದಿದೆ
ನೀವು ಪ್ರಸ್ತುತ ಬೆಲೆಗಳಲ್ಲಿ ಜಿಡಿಪಿಯನ್ನು ನೋಡುತ್ತಿದ್ದೀರಿ, ಆದರೆ ನೀವು ಹಣದುಬ್ಬರವನ್ನು ಲೆಕ್ಕ ಹಾಕಿದರೆ, ಹೆಚ್ಚಳವು ತುಂಬಾ ಕಡಿಮೆ ಎಂದು ಅಭಿವೃದ್ಧಿ ಅರ್ಥಶಾಸ್ತ್ರಜ್ಞರಾದ ಜಯತಿ ಘೋಷ್ ತಲಾ ಆದಾಯವನ್ನು ದ್ವಿಗುಣಗೊಂಡ ಬಗ್ಗೆ ಹೇಳಿದರು. ಈ ಆದಾಯದ ಹೆಚ್ಚಳದ ಬಹುಪಾಲು ಜನಸಂಖ್ಯೆಯ ಟಾಪ್‌ 10%ಕ್ಕೆ ಸೇರಿದೆ. ಇದಕ್ಕೆ ವಿರುದ್ಧವಾಗಿ, ಸರಾಸರಿ ವೇತನಗಳು ಕುಸಿಯುತ್ತಿವೆ ಮತ್ತು ಬಹುಶಃ ನೈಜ ಪರಿಭಾಷೆಯಲ್ಲಿ ಇನ್ನೂ ಕಡಿಮೆಯಾಗಿರಬಹುದು ಎಂದು ಮಾಜಿ ಜೆಎನ್‌ಯು ಪ್ರೊಫೆಸರ್ ಹೇಳಿದ್ದಾರೆ.
ಎನ್‌ಎಸ್‌ಒ (NSO) ಡೇಟಾದ ಪ್ರಕಾರ, ಕೋವಿಡ್ ಅವಧಿಯಲ್ಲಿ ತಲಾ ಆದಾಯವು ನೋಮಿನಲ್‌ ಆಗಿ ಕುಸಿದಿದೆ. ಆದಾಗ್ಯೂ, ಇದು 2021-22 ಮತ್ತು 2022-23 ರಲ್ಲಿ ಏರಿಕೆ ಕಂಡಿದೆ.
ವರ್ಲ್ಡ್ ಡೆವಲಪ್‌ಮೆಂಟ್ ಇಂಡಿಕೇಟರ್ ಡೇಟಾ ಬೇಸ್ ಪ್ರಕಾರ, 2014 ರಿಂದ 2019 ರವರೆಗಿನ ಅವಧಿಯಲ್ಲಿ ಭಾರತದ ತಲಾ ಆದಾಯದ ಸರಾಸರಿ ಬೆಳವಣಿಗೆಯು ವಾರ್ಷಿಕ ಶೇ 5.6 ರಷ್ಟಿದೆ ಎಂದು ಪ್ರೀಮಿಯರ್ ಆರ್ಥಿಕ ಸಂಶೋಧನಾ ಸಂಸ್ಥೆಯ ಮಾಜಿ ನಿರ್ದೇಶಕ ಪಿನಾಕಿ ಚಕ್ರವರ್ತಿ ಹೇಳಿದ್ದಾರೆ
ಈ ಬೆಳವಣಿಗೆ ಗಮನಾರ್ಹವಾಗಿದೆ. ಆರೋಗ್ಯ, ಶಿಕ್ಷಣ ಮತ್ತು ಆರ್ಥಿಕ ಮತ್ತು ಸಾಮಾಜಿಕ ಚಲನಶೀಲತೆಗೆ ಸಂಬಂಧಿಸಿದ ಫಲಿತಾಂಶಗಳಲ್ಲಿ ನಾವು ಸುಧಾರಣೆಗಳನ್ನು ಕಂಡಿದ್ದೇವೆ. ಕೋವಿಡ್ ನಮ್ಮ ಮೇಲೆ ಕೆಟ್ಟ ಪರಿಣಾಮ ಬೀರಿದೆ. ಆದಾಗ್ಯೂ, ಕೋವಿಡ್ ನಂತರ ನಾವು ಗಮನಾರ್ಹ ಆರ್ಥಿಕ ಚೇತರಿಕೆ ಕಂಡಿದ್ದೇವೆ ಎಂದು ಅವರು ಹೇಳಿದ್ದಾರೆ.
ಸೂಕ್ತ ಪುನರ್‌ ವಿತರಣಾ ನೀತಿಗಳೊಂದಿಗೆ ವಾರ್ಷಿಕ ತಲಾ ಆದಾಯದ ಬೆಳವಣಿಗೆಯನ್ನು 5 ರಿಂದ 6 ಪ್ರತಿಶತದಷ್ಟು ಉಳಿಸಿಕೊಂಡರೆ ಈ ವೇಗವನ್ನು ಉಳಿಸಿಕೊಳ್ಳಲು ಸಹಾಯವಾಗುತ್ತದೆ. ಸಮತೋಲಿತ ಪ್ರಾದೇಶಿಕ ಅಭಿವೃದ್ಧಿಯು ಹೆಚ್ಚಿನ ಬೆಳವಣಿಗೆಗೆ ವೇಗವರ್ಧಕವಾಗಿ ಕಾರ್ಯನಿರ್ವಹಿಸುತ್ತದೆ ಎಂದು ಅವರು ಹೇಳಿದ್ದಾರೆ.
ಮೋದಿ ಸರ್ಕಾರವು ಬಡವರ ಪರವಾದ ಹಲವಾರು ಉಪಕ್ರಮಗಳನ್ನು ಕೈಗೊಂಡಿದೆ ಮತ್ತು ಸರ್ಕಾರದ ಯೋಜನೆಗಳ ಪ್ರಯೋಜನಗಳನ್ನು ನೇರವಾಗಿ ಅಗತ್ಯವಿರುವ ಜನರಿಗೆ ತಲುಪಿಸಲು ಪ್ರಯತ್ನಿಸುತ್ತಿದೆ. ಈ ಕ್ರಮಗಳು ಜನಧನ್ ಖಾತೆಗಳನ್ನು ತೆರೆಯುವುದು ಮತ್ತು ಮುದ್ರಾ ಸಾಲ ಯೋಜನೆಗಳಂತಹ ಮೆಗಾ ಹಣಕಾಸು ಸೇರ್ಪಡೆ ಅಭಿಯಾನ, ಡಿಜಿಟಲೀಕರಣದ ಮೇಲೆ ಒತ್ತು ಮತ್ತು ಆಹಾರದ ಹಕ್ಕು ಕಾರ್ಯಕ್ರಮದ ಅಡಿಯಲ್ಲಿ ಉಚಿತ ಪಡಿತರ ವಿತರಣೆಯನ್ನು ಒಳಗೊಂಡಿವೆ.
ಇಂಡಸ್ಟ್ರಿಯಲ್ ಡೆವಲಪ್‌ಮೆಂಟ್ ಇನ್‌ಸ್ಟಿಟ್ಯೂಟ್ ಫಾರ್ ಸ್ಟಡೀಸ್ (ಐಎಸ್‌ಐಡಿ) ನಿರ್ದೇಶಕ ನಾಗೇಶಕುಮಾರ ಅವರ ಪ್ರಕಾರ, ತಲಾ ಆದಾಯವು ನೈಜ ಪರಿಭಾಷೆಯಲ್ಲಿ ಹೆಚ್ಚಾಗಿದೆ ಮತ್ತು ಅವು ಹೆಚ್ಚುತ್ತಿರುವ ಸಮೃದ್ಧಿಯನ್ನು ಪ್ರತಿಬಿಂಬಿಸುತ್ತವೆ. ಆದಾಗ್ಯೂ, ಗಮನಿಸಬೇಕಾದ ಅಂಶವೆಂದರೆ ತಲಾ ಆದಾಯವು ಭಾರತೀಯರ ಸರಾಸರಿ ಆದಾಯವಾಗಿದೆ. ಆದರೆ ಈ ಸರಾಸರಿ ಆದಾಯಗಳು ಹೆಚ್ಚುತ್ತಿರುವ ಅಸಮಾನತೆಗಳನ್ನು ಮರೆಮಾಚುತ್ತವೆ ಎಂದು ಹೇಳಿದ್ದಾರೆ.
ಹೆಚ್ಚಿನ ಮಟ್ಟದಲ್ಲಿ ಆದಾಯವು ಕೇಂದ್ರೀಕೃತವಾಗಿ ಆದಾಯದ ಏಣಿಯ ಕೆಳಗಿನ ಹಂತದಲ್ಲಿರುವವರ ಆದಾಯದಲ್ಲಿ ಬಹಳಷ್ಟು ಬದಲಾವಣೆಯಾಗದೇ ಇರಬಹುದು ಎಂದೂ ಅವರು ಹೇಳಿದ್ದಾರೆ.
ವಿಶ್ವ ಆರ್ಥಿಕತೆಯಲ್ಲಿ ಭಾರತವು ಉಜ್ವಲ ತಾಣವಾಗಿ ಮುಂದುವರಿದಿದೆ ಎಂದು ಅವರು ಹೇಳಿದರು. ಉಕ್ರೇನ್ ಯುದ್ಧ ಮತ್ತು ಇತರ ಅನಿಶ್ಚಿತತೆಗಳಿಂದ ಉಂಟಾದ ಅಡೆತಡೆಗಳ ಹೊರತಾಗಿಯೂ ಭಾರತವು ಮಧ್ಯಮ ಅವಧಿಯಲ್ಲಿ ವೇಗವಾಗಿ ಬೆಳೆಯುತ್ತಿರುವ ಪ್ರಮುಖ ಆರ್ಥಿಕತೆಯಾಗಿ ಉಳಿಯಲು ಸಜ್ಜಾಗಿದೆ, ಏಕೆಂದರೆ ವಿಶ್ವದ ಅನೇಕ ದೇಶಗಳು ಆರ್ಥಿಕ ಹಿಂಜರಿತದ ಹಿಡಿತದಲ್ಲಿವೆ ಮತ್ತು ಇತರ ಅನೇಕ ದೇಶಗಳು ಉಕ್ರೇನ್ ಯುದ್ಧ, ಕೋವಿಡ್ ನಂತರದ ಸಾಲದ ಬಿಕ್ಕಟ್ಟಿನ ಅಡಿಯಲ್ಲಿ ತತ್ತರಿಸುತ್ತಿವೆ ಎಂದು ಅವರು ಹೇಳಿದರು.
ಐಎಂಎಫ್‌ (IMF) ಪ್ರಕ್ಷೇಪಗಳ ಪ್ರಕಾರ, ಭಾರತವು ಬ್ರಿಟನ್‌ ಅನ್ನು ಹಿಂದಿಕ್ಕಿ ವಿಶ್ವದ ಐದನೇ ಅತಿದೊಡ್ಡ ಆರ್ಥಿಕತೆಯಾಗಿದೆ ಮತ್ತು ಈಗ ಅಮೆರಿಕ, ಚೀನಾ, ಜಪಾನ್ ಮತ್ತು ಜರ್ಮನಿಗಿಂತ ಹಿಂದೆ ಇದೆ. ಒಂದು ದಶಕದ ಹಿಂದೆ, ಭಾರತವು ದೊಡ್ಡ ಆರ್ಥಿಕತೆ ಶಕ್ತಿಗಳಲ್ಲಿ 11ನೇ ಸ್ಥಾನದಲ್ಲಿದ್ದರೆ ಬ್ರಿಟನ್‌ ಐದನೇ ಸ್ಥಾನದಲ್ಲಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ