ನೋಯ್ಡಾ: ಪಬ್ ಜಿ ಆನ್ಲೈನ್ ಗೇಮ್ ಮೂಲಕ ಪರಿಚಯವಾದ ಭಾರತ ಮೂಲದ ಯುವಕನಿಗಾಗಿ ಭಾರತಕ್ಕೆ ಬಂದು ಬಂಧನಕ್ಕೀಡಾಗಿದ್ದ ಪಾಕಿಸ್ತಾನ ಮೂಲದ ಮಹಿಳೆಗೆ ಜಾಮೀನು ದೊರೆತಿದ್ದು, ಈಗ ನಾನು ಭಾರತೀಯ, ಭಾರತ ನನ್ನದು ಎಂದು ನನಗೆ ಅನುಭವವಾಗುತ್ತಿದೆ ಎಂದು ಪ್ರತಿಕ್ರಿಯೆ ನೀಡಿದ್ದಾರೆ.
ಜಾಮೀನು ಪಡೆದು ಶನಿವಾರ ಜೈಲಿನಿಂದ ಹೊರಬಂದ ಭಾರತದ ಸಚಿನ್ ಮೀನಾ ಮತ್ತು ಪಾಕಿಸ್ತಾನದ ಸೀಮಾ ಹೈದರ್ ಹೊಸ ಅಧ್ಯಾಯ ಆರಂಭಿಸಲು ಮುಂದಾಗಿದ್ದಾರೆ.
ಜುಲೈ 4 ರಂದು ಸೀಮಾ ಹೈದರ್ ತನ್ನ ಏಳು ವರ್ಷಕ್ಕಿಂತ ಕಡಿಮೆ ವಯಸ್ಸಿನ ನಾಲ್ಕು ಮಕ್ಕಳೊಂದಿಗೆ ನೇಪಾಳದ ಮೂಲಕ ವೀಸಾ ಇಲ್ಲದೆ ಭಾರತಕ್ಕೆ ಅಕ್ರಮವಾಗಿ ಪ್ರವೇಶಿಸಿದ್ದಕ್ಕಾಗಿ ಬಂಧಿಸಲಾಯಿತು. ಅಕ್ರಮ ವಲಸಿಗರಿಗೆ ಆಶ್ರಯ ನೀಡಿದ್ದಕ್ಕಾಗಿ ಸಚಿನ್ ಅವರನ್ನು ಸಹ ಬಂಧಿಸಲಾಯಿತು.
“ನನ್ನ ಪತಿ ಹಿಂದೂ, ಹೀಗಾಗಿ ನಾನು ಕೂಡ ಹಿಂದೂ. ನಾನು ಈಗ ಭಾರತೀಯ, ಭಾರತ ನನ್ನದು ಎಂದು ಭಾವಿಸುತ್ತೇನೆ” ಎಂದು ಸೀಮಾ ಹೈದರ್ ಎನ್‌ಡಿಟಿವಿ ಜೊತೆ ಮಾತನಾಡುವಾಗ ಹೇಳಿದ್ದಾರೆ.
ಈ ಜೋಡಿಯ ಪ್ರೇಮಕಥೆ ಬಾಲಿವುಡ್ ಸಿನಿಮಾದಷ್ಟೇ ಕುತೂಹಲ ಮೂಡಿಸಿದೆ. ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಅವರು ಪಬ್‌ಜಿ (PUBG) ಆನ್ಲೈನ್ ಗೇಮ್ ಆಡುವಾಗ ಪರಸ್ಪರ ಪರಿಚಯವಾದರು. ಆನ್ಲೈನ್ ಆಟದ ವೇಳೆಯೇ ಅವರ ಪ್ರೀತಿ ಶುರುವಾಯಿತು. ಇದು ಸೀಮಾ ಹೈದರ್ (೨೮) ಮತ್ತು ಸಚಿನ್ ಮೀನಾ (25) ಈ ವರ್ಷದ ಮಾರ್ಚ್‌ನಲ್ಲಿ ನೇಪಾಳದಲ್ಲಿ ವಿವಾಹವಾಗಲು ಕಾರಣವಾಯಿತು. ಇದು ಅವರ ಮೊದಲ ಭೇಟಿಯಾಗಿತ್ತು.
“ಇದು ತುಂಬಾ ದೀರ್ಘವಾದ ಮತ್ತು ಕಠಿಣ ಪ್ರಯಾಣವಾಗಿತ್ತು. ನನಗೂ ತುಂಬಾ ಭಯವಾಯಿತು. ನಾನು ಮಕ್ಕಳೊಂದಿಗೆ ಮೊದಲು ಕರಾಚಿಯಿಂದ ದುಬೈಗೆ ಹೋದೆ, ಅಲ್ಲಿ ನಾವು 11 ಗಂಟೆಗಳ ಕಾಲ ಕಾಯುತ್ತಿದ್ದೆವು ಮತ್ತು ನಿದ್ರೆ ಮಾಡಲು ಸಾಧ್ಯವಾಗಲಿಲ್ಲ. ನಂತರ ನಾವು ನೇಪಾಳಕ್ಕೆ ವಿಮಾನದಲ್ಲಿ ಬಂದೆವು, ಅಂತಿಮವಾಗಿ ಪೋಖರಾಗೆ ಬರುವ ಮೊದಲು, ಅಲ್ಲಿ ನಾನು ಸಚಿನ್ ಅವರನ್ನು ಭೇಟಿಯಾದೆ ಎಂದು ಸೀಮಾ ಹೇಳಿದ್ದಾರೆ.
ನಂತರ ಆಕೆ ಪುನಃ ಪಾಕಿಸ್ತಾನಕ್ಕೆ ಹೋದಳು ಮತ್ತು ಸಚಿನ್ ಭಾರತಕ್ಕೆ ಮರಳಿದರು. ಮನೆಗೆ ಹಿಂತಿರುಗಿದ ನಂತರ ತನ್ನ ಪತಿಯೊಂದಿಗೆ ಭಿನ್ನಾಭಿಪ್ರಾಯದ ಬಗ್ಗೆ ಹೇಳಿಕೊಂಡ ಸೀಮಾ, 12 ಲಕ್ಷ ಪಾಕಿಸ್ತಾನಿ ರೂಪಾಯಿ ಒಂದು ಪ್ಲಾಟ್ ಅನ್ನು ಮಾರಾಟ ಮಾಡಿದರು ಮತ್ತು ತನಗೆ ಮತ್ತು ತನ್ನ ನಾಲ್ಕು ಮಕ್ಕಳಿಗೆ ವಿಮಾನ ಟಿಕೆಟ್ ಮತ್ತು ನೇಪಾಳ ವೀಸಾವನ್ನು ವ್ಯವಸ್ಥೆ ಮಾಡಿಕೊಂಡರು.
ಮೇ ತಿಂಗಳಲ್ಲಿ ಸೀಮಾ ಹೈದರ್ ದುಬೈ ಮೂಲಕ ಪುನಃ ನೇಪಾಳವನ್ನು ತಲುಪಿದರು ಮತ್ತು ಹಿಮಾಲಯ ರಾಷ್ಟ್ರದ ಪ್ರವಾಸಿ ನಗರವಾದ ಪೋಖರಾದಲ್ಲಿ ಸ್ವಲ್ಪ ಸಮಯ ಕಳೆದರು. ನಂತರ ಆಕೆ ಕಠ್ಮಂಡುವಿನಿಂದ ದೆಹಲಿಗೆ ಬಸ್ ಹಿಡಿದು ಮೇ 13 ರಂದು ಭಾರತಕ್ಕೆ ಪ್ರವೇಶಿಸಿ ಗ್ರೇಟರ್ ನೋಯ್ಡಾಗೆ ತನ್ನ ಮಕ್ಕಳೊಂದಿಗೆ ತಲುಪಿದಳು, ಅಲ್ಲಿ ಸಚಿನ್ ಈ ಮಹಿಳೆಯ ಪಾಕಿಸ್ತಾನಿ ಗುರುತನ್ನು ಬಹಿರಂಗಪಡಿಸದೆ ಬಾಡಿಗೆ ವಸತಿಗೃಹದಲ್ಲಿ ಇರಲು ವ್ಯವಸ್ಥೆ ಮಾಡಿದ್ದ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜುಲೈ 4 ರಂದು ಅವರನ್ನು ಬಂಧಿಸಿ ಜೈಲಿಗೆ ಹಾಕಿದ್ದರಿಂದ ಅವರ ಗಡಿಯಾಚೆಗಿನ ಪ್ರೇಮಕಥೆಯು ಅಂತ್ಯಗೊಂಡಿತು. ಸೀಮಾ ವಿರುದ್ಧ ಅಕ್ರಮವಾಗಿ ಭಾರತಕ್ಕೆ ಪ್ರವೇಶಿಸಿದ ಆರೋಪ ಹೊರಿಸಿದ್ದರೆ, ಸಚಿನ್ ಅಕ್ರಮ ವಲಸಿಗರಿಗೆ ಆಶ್ರಯ ನೀಡಿದ ಆರೋಪ ಹೊರಿಸಲಾಗಿತ್ತು.
ನಿನ್ನೆ, ಸೀಮಾ ಹೈದರ್ ಅವರಿಗೆ ಜಾಮೀನು ನೀಡಲಾಯಿತು ಮತ್ತು ಈಗ ಅವರು ಭಾರತದಲ್ಲಿ ಅಧಿಕೃತವಾಗಿ ಇರುವ ಬಗ್ಗೆ ದಾಖಲೆಗಳಿಗಾಗಿ ಪ್ರಯತ್ನಿಸಲಿದ್ದಾರೆ.
ಜೈಲಿನಿಂದ ತನ್ನ ಬಿಡುಗಡೆಯ ಕುರಿತು ಮಾತನಾಡಿದ ಸೀಮಾ, “ಸುದ್ದಿ ಕೇಳಿದಾಗ ನಾನು ಸಂತೋಷದಿಂದ ಕೂಗಿದೆ, ನಾನು ತಿಂಗಳುಗಟ್ಟಲೆ ಜೈಲಿನಲ್ಲಿ ಇರುತ್ತೇನೆ ಎಂದು ಭಾವಿಸಿದ್ದೆ” ಎಂದು ಹೇಳಿದ್ದಾಳೆ.
ಸೌದಿ ಅರೇಬಿಯಾದಿಂದ ವೀಡಿಯೊ ಸಂದೇಶದಲ್ಲಿ, ಸೀಮಾ ಪತಿ ಗುಲಾಮ್ ಹೈದರ್ ತಮ್ಮ ಪತ್ನಿಯೊಂದಿಗೆ ಮತ್ತೆ ಒಂದಾಗಲು ಸಹಾಯ ಮಾಡುವಂತೆ ಭಾರತ ಸರ್ಕಾರವನ್ನು ಒತ್ತಾಯಿಸಿದ್ದಾರೆ. ಆದರೆ, ಗುಲಾಮ್ ಹೈದರ್ ಬಳಿಗೆ ಹಿಂತಿರುಗಲು ಬಯಸುವುದಿಲ್ಲ ಎಂದು ಸೀಮಾ ಸುದ್ದಿಗಾರರಿಗೆ ತಿಳಿಸಿದರು ಮತ್ತು ಪಾಕಿಸ್ತಾನಕ್ಕೆ ಹಿಂತಿರುಗಿದರೆ ತನಗೆ ಜೀವ ಬೆದರಿಕೆ ಎಂದು ಹೇಳಿದ್ದಾಳೆ.
ನಿಮ್ಮ ಕಾಮೆಂಟ್ ಬರೆಯಿರಿ