712 ಕೋಟಿ ರೂ. ಚೀನಾ ಹೂಡಿಕೆ ವಂಚನೆ ಪ್ರಕರಣದಲ್ಲಿ 9 ಮಂದಿಯನ್ನು ಬಂಧಿಸಿದ ಹೈದರಾಬಾದ್ ಪೊಲೀಸರು

ಹೈದರಾಬಾದ್‌ : ಚೀನಾದ ಆಪರೇಟರ್‌ಗಳ 712 ಕೋಟಿ ರೂಪಾಯಿಗಳ ಕ್ರಿಪ್ಟೋವಾಲೆಟ್ ಹೂಡಿಕೆ ವಂಚನೆಯನ್ನು ಪತ್ತೆಹಚ್ಚಿರುವುದಾಗಿ ಹೈದರಾಬಾದ್ ಪೊಲೀಸರು ಹೇಳಿದ್ದಾರೆ. ಈ ಸಂಬಂಧ ದೇಶದ ವಿವಿಧೆಡೆ ಒಂಬತ್ತು ಮಂದಿಯನ್ನು ಬಂಧಿಸಲಾಗಿದೆ.
ವಂಚನೆಯಲ್ಲಿನ ಕೆಲವು ಕ್ರಿಪ್ಟೋವಾಲೆಟ್ ವಹಿವಾಟುಗಳು ಹೆಜ್ಬೊಲ್ಲಾ ವಾಲೆಟ್‌ನೊಂದಿಗೆ (ಭಯೋತ್ಪಾದಕ ಹಣಕಾಸು ಮಾಡ್ಯೂಲ್‌ಗೆ ಸೇರಿದ ವ್ಯಾಲೆಟ್ ಎಂದು ಲೇಬಲ್ ಮಾಡಲಾಗಿದೆ) ಸಂಪರ್ಕವನ್ನು ಹೊಂದಿರುವುದು ಕಂಡುಬಂದಿದೆ ಎಂದು ಪೊಲೀಸ್ ಪ್ರಕಟಣೆ ತಿಳಿಸಿದೆ. ಹೈದರಾಬಾದ್ ನಿವಾಸಿಯೊಬ್ಬರು ನೀಡಿದ ದೂರಿನ ಆಧಾರದ ಮೇಲೆ ಸೈಬರ್ ಕ್ರೈಂ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ಮೆಸೇಜಿಂಗ್ ಆ್ಯಪ್ ಮೂಲಕ ‘ರೇಟ್ ಮತ್ತು ರಿವ್ಯೂ’ (ಕೆಲವು ಕಾರ್ಯಗಳು) ಮಾಡಲು ಅರೆಕಾಲಿಕ ಕೆಲಸವನ್ನು ನೀಡಲಾಯಿತು ಎಂದು ದೂರುದಾರರು ಹೇಳಿದ್ದಾರೆ. ಇದು ಅಸಲಿ ಎಂದು ನಂಬಿ ತಮ್ಮ ವೆಬ್‌ಸೈಟ್‌ನಲ್ಲಿ ನೋಂದಣಿ ಮಾಡಿಕೊಂಡಿದ್ದಾರೆ. ಆರಂಭದಲ್ಲಿ, 1,000 ರೂಪಾಯಿಗಳ ಸಣ್ಣ ಮೊತ್ತವನ್ನು ಹೂಡಿಕೆ ಮಾಡುವ ಮೂಲಕ ಐದು ಸ್ಟಾರ್ ರೇಟಿಂಗ್ ನೀಡಲು ಅವರಿಗೆ ಸರಳವಾದ ಕೆಲಸವನ್ನು ನೀಡಲಾಯಿತು ಮತ್ತು ಅವರು 866 ರೂಪಾಯಿಗಳನ್ನು ಗಳಿಸಿದರು. ತರುವಾಯ, ದೂರುದಾರರು 25,000 ರೂ.ಗಳನ್ನು ಹೂಡಿಕೆ ಮಾಡಿದ ನಂತರ 20,000 ರೂ.ಗಳ ಲಾಭವನ್ನು ಗಳಿಸಿದ್ದರೂ, ಅವರು ಲಾಭವನ್ನು ಹಿಂತೆಗೆದುಕೊಳ್ಳಲು ಅನುಮತಿಸಲಿಲ್ಲ. ಮತ್ತಷ್ಟು ಹಣ ಹೂಡುವಂತೆ ಮಾಡಿ ಒಟ್ಟು 28 ಲಕ್ಷ ರೂ.ಗಳನ್ನು ಹೂಡಿಕೆ ಮಾಡಿಸಿಕೊಂಡರು ಎಂದು ಹೇಳಿದ್ದಾರೆ.
ತನಿಖೆಯ ಸಂದರ್ಭದಲ್ಲಿ, ಕಳೆದುಕೊಂಡಿದ್ದ 28 ಲಕ್ಷ ರೂಪಾಯಿಯನ್ನು ಆರು ಖಾತೆಗಳಿಗೆ ವರ್ಗಾಯಿಸಲಾಗಿದೆ ಮತ್ತು ಅಲ್ಲಿಂದ ಹಣವನ್ನು ವಿವಿಧ ಭಾರತೀಯ ಬ್ಯಾಂಕ್ ಖಾತೆಗಳಿಗೆ ಮತ್ತು ಅಂತಿಮವಾಗಿ ದುಬೈನಲ್ಲಿನ ಖಾತೆಗಳಿಗೆ ವರ್ಗಾಯಿಸಲಾಗಿದೆ ಎಂದು ಕಂಡುಬಂದಿದೆ. ವಂಚನೆಯ ಹಣವನ್ನು ಕ್ರಿಪ್ಟೋಕರೆನ್ಸಿ ಖರೀದಿಸಲು ಬಳಸಲಾಗಿದೆ.
ಬಹುಪದರದ ವಂಚನೆಯಲ್ಲಿ ಬಂಧಿತ ವ್ಯಕ್ತಿಗಳಲ್ಲಿ ಒಬ್ಬ ಕೆಲವು ಚೀನಾದ ನಾಗರಿಕರೊಂದಿಗೆ ಸಂಬಂಧ ಹೊಂದಿದ್ದಾನೆ ಎಂದು ಕಂಡುಬಂದಿದೆ. ಆತ ಭಾರತೀಯ ಬ್ಯಾಂಕ್ ಖಾತೆಗಳ ಮಾಹಿತಿಯನ್ನು ಹಂಚಿಕೊಳ್ಳುವ ಮೂಲಕ ಅವರೊಂದಿಗೆ ಸಮನ್ವಯ ಸಾಧಿಸುತ್ತಾನೆ ಮತ್ತು ರಿಮೋಟ್‌ ಅಪ್ಲಿಕೇಶನ್‌ಗಳ ಮೂಲಕ ದುಬೈ/ಚೀನಾದಿಂದ ಈ ಖಾತೆಗಳನ್ನು ನಿರ್ವಹಿಸಲು OTP ಗಳನ್ನು ಹಂಚಿಕೊಳ್ಳುತ್ತಾನೆ ಎಂದು ಪ್ರಕಟಣೆ ತಿಳಿಸಿದೆ.
ಬಂಧಿತ ವ್ಯಕ್ತಿಗಳಲ್ಲಿ ಒಬ್ಬ 65 ಕ್ಕೂ ಹೆಚ್ಚು ಖಾತೆಗಳನ್ನು ಚೀನಾದ ನಾಗರಿಕರಿಗೆ ಹಂಚಿಕೊಂಡಿದ್ದಾನೆ, ಇದರಲ್ಲಿ 128 ಕೋಟಿ ರೂಪಾಯಿಗಳ ವಹಿವಾಟು ನಡೆದಿದೆ.
ವಂಚನೆಯ ಹಣವನ್ನು ಯುನೈಟೆಡ್ ಸ್ಟೇಟ್ಸ್ ಡಿಪಾರ್ಟ್ಮೆಂಟ್ ಆಫ್ ಟ್ರೆಷರಿಗೆ (ಯುಎಸ್‌ಡಿಟಿ ಕ್ರಿಪ್ಟೋ ಕರೆನ್ಸಿ) ಪರಿವರ್ತಿಸಿದ ಇತರ ಖಾತೆಗಳ ಮೌಲ್ಯ 584 ಕೋಟಿ ರೂಪಾಯಿಗಳಾಗಿದ್ದು, ಒಟ್ಟು 712 ಕೋಟಿ ರೂಪಾಯಿಗಳನ್ನು ವಂಚಕರು ವಂಚಿಸಿದ್ದಾರೆ ಎಂದು ಪ್ರಕಟಣೆ ತಿಳಿಸಿದೆ.