ʼರಾಜ್ಯʼಗಳ ಒಪ್ಪಿಗೆಯಿಲ್ಲದೆ ʼಸಿಬಿಐʼ ಪ್ರಕರಣಗಳ ತನಿಖೆ ನಡೆಸಲು ಕಾನೂನು ಬೇಕು: ಸಂಸದೀಯ ಸಮಿತಿ

ನವದೆಹಲಿ : ಕೆಲವು ರಾಜ್ಯಗಳು ‘ಸಾಮಾನ್ಯ ಒಪ್ಪಿಗೆ’ (general consent) ಹಿಂಪಡೆದಿರುವುದು ನಿರ್ಣಾಯಕ ಪ್ರಕರಣಗಳ ತನಿಖೆಗೆ ಸಿಬಿಐನ ಅಧಿಕಾರದಲ್ಲಿ ತೀವ್ರ ಮಿತಿಗಳಿಗೆ ಕಾರಣವಾಗಿದೆ ಎಂದು ಪ್ರತಿಪಾದಿಸಿದ ಸಂಸದೀಯ ಸಮಿತಿಯು ಹೊಸ ಕಾನೂನನ್ನು ಜಾರಿಗೊಳಿಸುವ ಮತ್ತು ಸಿಬಿಐಗೆ ವ್ಯಾಪಕ ಅಧಿಕಾರ ನೀಡುವ ಅವಶ್ಯಕತೆಯಿದೆ ಎಂದು ಸೋಮವಾರ ಹೇಳಿದೆ. ಹೊಸ ಕಾನೂನು ಜಾರಿಯಾದರೆ ಸಿಬಿಐ “ರಾಜ್ಯದ ಒಪ್ಪಿಗೆ ಮತ್ತು ಹಸ್ತಕ್ಷೇಪ” ಇಲ್ಲದೆ ಪ್ರಕರಣಗಳನ್ನು ತನಿಖೆ ಮಾಡಬಹುದು ಎಂದು ಅದು ಹೇಳಿದೆ.
ಅದೇ ಸಮಯದಲ್ಲಿ, ಸಿಬಿಐನ ಕಾರ್ಯನಿರ್ವಹಣೆಯಲ್ಲಿ ವಸ್ತುನಿಷ್ಠತೆ ಮತ್ತು ನಿಷ್ಪಕ್ಷಪಾತವನ್ನು ಖಚಿತಪಡಿಸಿಕೊಳ್ಳಲು ಕೆಲವು ನಿಯಮಗಳನ್ನು ಸಹ ವಿಧಿಸಬೇಕು, ಇದರಿಂದಾಗಿ ರಾಜ್ಯಗಳು ಸಹ ತಾರತಮ್ಯವನ್ನು ಅನುಭವಿಸುವುದಿಲ್ಲ ಎಂದು ಸಮಿತಿ ಹೇಳಿದೆ.
ಸಿಬಿಐ ಕಾರ್ಯನಿರ್ವಹಣೆ ನಿಯಂತ್ರಿಸುವ ದೆಹಲಿ ವಿಶೇಷ ಪೊಲೀಸ್ ಸ್ಥಾಪನೆ (ಡಿಎಸ್‌ಪಿಇ) ಕಾಯಿದೆಯ ನಿಬಂಧನೆಗಳ ಪ್ರಕಾರ, ಕೇಂದ್ರೀಯ ತನಿಖಾ ದಳದ (ಸಿಬಿಐ) ಯಾವುದೇ ತನಿಖೆಗೆ ಅಲ್ಲಿನ ರಾಜ್ಯ ಸರ್ಕಾರದ ಸಮ್ಮತಿಯು ಪೂರ್ವಾಪೇಕ್ಷಿತವಾಗಿದೆ.

ಸೋಮವಾರ ಸಂಸತ್ತಿನಲ್ಲಿ ಸಮಿತಿಯು ಮಂಡಿಸಿದ ವರದಿಯ ಪ್ರಕಾರ, ವಿವಿಧ ಪ್ರಕರಣಗಳ ತನಿಖೆಗಾಗಿ ಸಿಬಿಐಗೆ ಒಂಬತ್ತು ರಾಜ್ಯಗಳು ಸಾಮಾನ್ಯ ಒಪ್ಪಿಗೆ(general consent)ಯನ್ನು ಹಿಂಪಡೆದಿವೆ.
ಡಿಎಸ್‌ಪಿಇ (DSPE) ಕಾಯಿದೆಯ ಸೆಕ್ಷನ್ 6 ರ ನಿಬಂಧನೆಯ ಪ್ರಕಾರ, “ನಿರ್ದಿಷ್ಟ ವರ್ಗಗಳ ವ್ಯಕ್ತಿಗಳ ವಿರುದ್ಧದ ನಿರ್ದಿಷ್ಟ ವರ್ಗದ ಅಪರಾಧಗಳ” ತನಿಖೆಗಾಗಿ ರಾಜ್ಯ ಸರ್ಕಾರಗಳು ಸಿಬಿಐ (CBI)ಗೆ ಸಾಮಾನ್ಯ ಒಪ್ಪಿಗೆಯನ್ನು ನೀಡಿವೆ.
ಒಪ್ಪಿಗೆಯಲ್ಲಿ ಒಳಗೊಂಡಿರದ ಅಂತಹ ರಾಜ್ಯದ ಯಾವುದೇ ವಿಷಯದ ತನಿಖೆಗಾಗಿ, ರಾಜ್ಯದಲ್ಲಿ ಸಿಬಿಐ ತನಿಖೆ ನಡೆಸಲು ರಾಜ್ಯ ಸರ್ಕಾರದ ನಿರ್ದಿಷ್ಟ ಒಪ್ಪಿಗೆಯ ಅಗತ್ಯವಿದೆ ಮತ್ತು ಸಂಸ್ಥೆಯು ಕೇಸ್-ಬೈ-ಕೇಸ್ ಆಧಾರದ ಮೇಲೆ ಅಂತಹ ಒಪ್ಪಿಗೆ ಪಡೆಯುತ್ತದೆ.
“ಇದನ್ನು ಉಲ್ಲೇಖಿಸಿ ಸಮಿತಿಯು ಈವರೆಗೆ, ಒಂಬತ್ತು ರಾಜ್ಯಗಳು ಪ್ರಕರಣಗಳ ತನಿಖೆಗಾಗಿ ಸಿಬಿಐಗೆ ನೀಡಿದ್ದ ಸಾಮಾನ್ಯ ಒಪ್ಪಿಗೆ (general consent)ಯನ್ನು ಹಿಂಪಡೆದಿವೆ ಎಂದು ಪುನರುಚ್ಚರಿಸುತ್ತದೆ. ಇದು ನಿರ್ಣಾಯಕ ಪ್ರಕರಣಗಳನ್ನು ನಿಷ್ಪಕ್ಷಪಾತವಾಗಿ ಮತ್ತು ವಸ್ತುನಿಷ್ಠವಾಗಿ ತನಿಖೆ ಮಾಡುವ ಸಿಬಿಐನ ಅಧಿಕಾರದ ಮೇಲೆ ʼತೀವ್ರ ಮಿತಿʼಗಳಿಗೆ ಕಾರಣವಾಗಿದೆ. ಇದು ರಾಜ್ಯಗಳಲ್ಲಿ ಭ್ರಷ್ಟಾಚಾರ ಮತ್ತು ಸಂಘಟಿತ ಅಪರಾಧಗಳಿಗೆ ಕಾರಣವಾಗುತ್ತದೆ ಎಂದು ಅದು ಹೇಳಿದೆ.

ಆದ್ದರಿಂದ, ಈ ಹಿಂದೆ ಶಿಫಾರಸು ಮಾಡಿದಂತೆ, ಡಿಎಸ್‌ಪಿಇ ಕಾಯಿದೆ, 1946 ರ ಹೊರತಾಗಿ, ಹೊಸ ಕಾನೂನನ್ನು ಜಾರಿಗೊಳಿಸುವ ಮತ್ತು ಸ್ಥಿತಿ ಮತ್ತು ಕಾರ್ಯಗಳನ್ನು ವ್ಯಾಖ್ಯಾನಿಸುವ ಮತ್ತು ರಾಜ್ಯದ ಒಪ್ಪಿಗೆ ಮತ್ತು ಹಸ್ತಕ್ಷೇಪದ ಅಗತ್ಯವಿಲ್ಲದೆ ಅಂತಹ ನಿರ್ಣಾಯಕ ಪ್ರಕರಣಗಳನ್ನು ತನಿಖೆ ಮಾಡಲು ಸಿಬಿಐಗೆ ವ್ಯಾಪಕ ಅಧಿಕಾರವನ್ನು ನೀಡುವ ಅವಶ್ಯಕತೆಯಿದೆ ಎಂದು ಸಮಿತಿ ಹೇಳಿದೆ.
ರಾಜಕೀಯ ಪ್ರತಿಸ್ಪರ್ಧಿಗಳನ್ನು ಗುರಿಯಾಗಿಸಲು ಕೇಂದ್ರವು ತನ್ನ ತನಿಖಾ ಏಜೆನ್ಸಿಗಳನ್ನು ದುರುಪಯೋಗಪಡಿಸಿಕೊಳ್ಳುತ್ತಿದೆ ಎಂದು ಆರೋಪಿಸಿ ಕೆಲವು ರಾಜ್ಯಗಳಲ್ಲಿನ ಎನ್‌ಡಿಎಯೇತರ ಸರ್ಕಾರಗಳು ಸಿಬಿಐಗೆ ʼಸಾಮಾನ್ಯ ಒಪ್ಪಿಗೆʼಯನ್ನು ಹಿಂಪಡೆದಿರುವ ಹಿನ್ನೆಲೆಯಲ್ಲಿ ಸಮಿತಿಯ ವರದಿಯು ಬಂದಿದೆ.
ರಾಷ್ಟ್ರದ ಭದ್ರತೆ ಮತ್ತು ಸಮಗ್ರತೆಗೆ ಧಕ್ಕೆ ತರುವಂತಹ ಪ್ರಕರಣಗಳಲ್ಲಿ ಮಾತ್ರ ‘ರಾಜ್ಯದ ಒಪ್ಪಿಗೆಯ ಷರತ್ತು’ ತೆಗೆದುಹಾಕಬೇಕು ಮತ್ತು ಸಿಬಿಐನಿಂದ ಅಂತಹ ಪ್ರಕರಣಗಳ ತನಿಖೆಯಲ್ಲಿ ಆಗುವ ಯಾವುದೇ ವಿಳಂಬವು ದೇಶದ ನಾಗರಿಕರಲ್ಲಿ ಸಾಮಾನ್ಯ ಅಸಮಾಧಾನಕ್ಕೆ ಕಾರಣವಾಗಬಹುದು ಎಂದು ಸಿಬ್ಬಂದಿ, ಸಾರ್ವಜನಿಕ ಕುಂದುಕೊರತೆಗಳು, ಕಾನೂನು ಮತ್ತು ನ್ಯಾಯಕ್ಕೆ ಸಂಬಂಧಿಸಿದ ಸಂಸದೀಯ ಸ್ಥಾಯಿ ಸಮಿತಿಯ ಇಲಾಖೆಯ 135 ನೇ ವರದಿ ಹೇಳಿದೆ.

ಸಿಬಿಐ ಇತ್ತೀಚೆಗೆ ಇನ್ಸ್‌ಪೆಕ್ಟರ್ ಸೇರಿದಂತೆ ತನ್ನ ವಿವಿಧ ಹುದ್ದೆಗಳಿಗೆ ನೇಮಕಾತಿ ನಿಯಮಗಳಲ್ಲಿ ಸೂಕ್ತ ತಿದ್ದುಪಡಿಗಳನ್ನು ಪ್ರಸ್ತಾಪಿಸಿದೆ ಎಂದು ಅದು ಹೇಳಿದೆ. ಅದರಂತೆ, ಫೆಡರಲ್ ಏಜೆನ್ಸಿಯು ಇನ್ಸ್‌ಪೆಕ್ಟರ್‌ಗಳ ಶೇಕಡಾ 60 ರಷ್ಟು ಹುದ್ದೆಗಳನ್ನು “ಬಡ್ತಿ” ಮೂಲಕ ಮತ್ತು ಶೇಕಡಾ 40 ರಷ್ಟು “ನಿಯೋಜನೆ ಆಧಾರದ ಮೇಲೆ ಭರ್ತಿ ಮಾಡಲು ಪ್ರಸ್ತಾಪಿಸಿದೆ ಎಂದು ವರದಿ ತಿಳಿಸಿದೆ. ಅಸ್ತಿತ್ವದಲ್ಲಿರುವ ನೇಮಕಾತಿ ವಿಧಾನವು ಈ ಪೋಸ್ಟ್‌ಗಳನ್ನು ಭರ್ತಿ ಮಾಡಲು “50:50″ ಸೂತ್ರವನ್ನು ಅನುಸರಿಸುತ್ತದೆ.
ಮೇಲಿನ ಪ್ರಸ್ತಾವನೆಯು ಈಗಾಗಲೇ ಪರಿಗಣನೆಯಲ್ಲಿದೆ. ಆದಾಗ್ಯೂ, ಉದ್ದೇಶಿತ ತಿದ್ದುಪಡಿಯು ಕ್ರಿಯಾತ್ಮಕ ಅವಶ್ಯಕತೆಗಳನ್ನು ಪೂರೈಸದಿದ್ದಲ್ಲಿ ಸ್ಥಾನವನ್ನು ಪರಿಶೀಲಿಸಲಾಗುತ್ತದೆ” ಎಂದು ವರದಿ ಹೇಳಿದೆ.
ಸಿಬಿಐನಲ್ಲಿ ಕಳೆದ ವರ್ಷವೊಂದರಲ್ಲೇ 308 ಹುದ್ದೆಗಳನ್ನು (ಜಂಟಿ ಡೈರೆಕ್ಟರ್, ಡೆಪ್ಯುಟಿ ಇನ್ಸ್‌ಪೆಕ್ಟರ್ ಜನರಲ್, ಪೊಲೀಸ್ ಸೂಪರಿಂಟೆಂಡೆಂಟ್, ಇತ್ಯಾದಿ) ಭರ್ತಿ ಮಾಡಲಾಗಿದೆ ಎಂದು ಸಮಿತಿಗೆ ತಿಳಿಸಲಾಗಿದೆ.