ಭಾರತದ ಮೂಲದ ದಂಪತಿ, ಹದಿಹರೆಯದ ಮಗಳು ಅಮೆರಿಕದ ಮ್ಯಾಸಚೂಸೆಟ್ಸ್‌ನ ಲಕ್ಸುರಿ ಮನೆಯಲ್ಲಿ ಶವವಾಗಿ ಪತ್ತೆ

ನವದೆಹಲಿ : ಭಾರತೀಯ ಮೂಲದ ಶ್ರೀಮಂತ ದಂಪತಿ ಮತ್ತು ಅವರ ಹದಿಹರೆಯದ ಮಗಳು ಅಮೆರಿಕದ ಮ್ಯಾಸಚೂಸೆಟ್ಸ್‌ನ ಅತ್ಯಂತ ಲಕ್ಸುರಿ ಎನ್‌ಕ್ಲೇವ್‌ನಲ್ಲಿರುವ ಅವರ ಭವನದಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ.
ರಾಕೇಶ ಕಮಲ್ (57), ಅವರ ಪತ್ನಿ ಟೀನಾ (54) ಮತ್ತು ಅವರ 18 ವರ್ಷದ ಮಗಳು ಅರಿಯಾನಾ ಗುರುವಾರ ಸಂಜೆ ಶವವಾಗಿ ಪತ್ತೆಯಾಗಿದ್ದಾರೆ ಎಂದು ನಾರ್ಫೋಕ್ ಜಿಲ್ಲಾ ಅಟಾರ್ನಿ (ಡಿಎ) ಮೈಕೆಲ್ ಮೊರಿಸ್ಸೆ ತಿಳಿಸಿದ್ದಾರೆ. ಪ್ರಾಥಮಿಕ ತನಿಖೆಯು “ಗೃಹ ಹಿಂಸೆಯ ಮಾರಣಾಂತಿಕ ಘಟನೆ” ಎಂದು ಅಂದಾಜಿಸಿದ್ದು, ಯಾವುದೇ ಹೊರಗಿನ ಒಳಗೊಳ್ಳುವಿಕೆಯನ್ನು ಸೂಚಿಸುವುದಿಲ್ಲ ಎಂದು ಅಧಿಕಾರಿಗಳು ಹೇಳುತ್ತಾರೆ.
ಕಮಲ್ ಕುಟುಂಬದವರು ಮೂಲತಃ ಭಾರತದಿಂದ ಬಂದವರು, ಅಮೆರಿಕದಲ್ಲಿ ಟೆಕ್ ಉದ್ಯಮದಲ್ಲಿ ತಮ್ಮನ್ನು ತಾವು ಸ್ಥಾಪಿಸಿಕೊಂಡಿದ್ದರು ಮತ್ತು ಎಡುನೋವಾ ಎಂಬ ಶಿಕ್ಷಣ ಸಲಹಾ ಕಂಪನಿ ನಡೆಸುತ್ತಿದ್ದರು. ಕಂಪನಿಯು ಈಗ ನಿಷ್ಕ್ರಿಯವಾಗಿದೆ.

ಮಿಲಿಯನೇರ್ ಇಂದ ಹಿಡಿದು ದಿವಾಳಿ ವರೆಗೆ…
ರಾಕೇಶ ಕಮಲ್ ಅವರು, ಬೋಸ್ಟನ್ ವಿಶ್ವವಿದ್ಯಾಲಯ, ಎಂಐಟಿ (MIT) ಸ್ಲೋನ್ ಸ್ಕೂಲ್ ಆಫ್ ಮ್ಯಾನೇಜ್‌ಮೆಂಟ್ ಮತ್ತು ಸ್ಟ್ಯಾನ್‌ಫೋರ್ಡ್ ವಿಶ್ವವಿದ್ಯಾಲಯದ ಹಳೆಯ ವಿದ್ಯಾರ್ಥಿಯಾಗಿದ್ದು, 2016 ರಲ್ಲಿ ಅವರ ಪತ್ನಿಯೊಂದಿಗೆ ಎಡ್-ಟೆಕ್ ಕಂಪನಿಯನ್ನು ಪ್ರಾರಂಭಿಸಿದರು.
ಮಾಧ್ಯಮಿಕ ಶಾಲೆ, ಪ್ರೌಢಶಾಲೆ ಮತ್ತು ಕಾಲೇಜಿನಲ್ಲಿ ವಿದ್ಯಾರ್ಥಿಗಳ ಶ್ರೇಣಿಗಳನ್ನು ಸುಧಾರಿಸಲು ವಿನ್ಯಾಸಗೊಳಿಸಿದ ‘ವಿದ್ಯಾರ್ಥಿ ಯಶಸ್ಸಿನ ವ್ಯವಸ್ಥೆ’ಯುಳ್ಳ ಎಡುನೋವಾ ಶೀಕ್ಷಣ ವ್ಯವಸ್ಥೆಯ ಕಂಪನಿಯನ್ನು ಅವರು ಸ್ಥಾಪಿಸಿದರು” ಎಂದು ಬೋಸ್ಟನ್ ಗ್ಲೋಬ್ ಪತ್ರಿಕೆ ವರದಿ ಮಾಡಿದೆ.
ಕಂಪನಿಯು ಆರಂಭದಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಿತು, ಇದರ ಪರಿಣಾಮವಾಗಿ ಕಮಲ್‌ ಅವರು ಸರ್ಕಾರಿ ದಾಖಲೆಗಳ ಪ್ರಕಾರ 2019 ರಲ್ಲಿ $4 ಮಿಲಿಯನ್‌ಗೆ 19,000-ಚದರ-ಅಡಿ ಎಸ್ಟೇಟ್ ಖರೀದಿಸಿದರು. ಇದು 11 ಮಲಗುವ ಕೋಣೆಗಳನ್ನು ಹೊಂದಿದೆ.
ಆದರೆ ಕಂಪನಿಯನ್ನು ಡಿಸೆಂಬರ್ 2021 ರಲ್ಲಿ ವಿಸರ್ಜಿಸಲಾಯಿತು ಎಂದು ದಾಖಲೆಗಳು ತೋರಿಸುತ್ತವೆ. ರಿಕ್ ಮತ್ತು ಟೀನಾ ದಂಪತಿ ಆರ್ಥಿಕ ಬಿಕ್ಕಟ್ಟು ಎದುರಿಸುತ್ತಿದ್ದರು.
ಅವರ ವಿಸ್ತಾರವಾದ ಲಕ್ಸುರಿ ಮಹಲು ಒಂದು ವರ್ಷದ ಹಿಂದೆ ಮ್ಯಾಸಚೂಸೆಟ್ಸ್ ಮೂಲದ ವಿಲ್ಸಂಡೇಲ್ ಅಸೋಸಿಯೇಟ್ಸ್ LLC ಗೆ $3 ಮಿಲಿಯನ್‌ಗೆ ಮಾರಾಟವಾಯಿತು. ಎಸ್ಟೇಟ್ ಮಾರಾಟವಾದಾಗ $5.45 ಮಿಲಿಯನ್ ಮೌಲ್ಯದ್ದಾಗಿದೆ ಎಂದು ಅಂದಾಜಿಸಲಾಗಿದೆ.
ಹಾರ್ವರ್ಡ್ ವಿಶ್ವವಿದ್ಯಾನಿಲಯ ಮತ್ತು ದೆಹಲಿ ವಿಶ್ವವಿದ್ಯಾನಿಲಯದ ಹಳೆಯ ವಿದ್ಯಾರ್ಥಿಯಾಗಿರುವ ಟೀನಾ ಕಮಲ್ ಅವರು ಸೆಪ್ಟೆಂಬರ್ 2022 ರಲ್ಲಿ ದಿವಾಳಿತನಕ್ಕೆ ಅರ್ಜಿ ಸಲ್ಲಿಸಿದರು, ಇದು ದಂಪತಿ ಎದುರಿಸುತ್ತಿರುವ ಆರ್ಥಿಕ ಸಂಕಷ್ಟವನ್ನು ಮತ್ತಷ್ಟು ಎತ್ತಿ ತೋರಿಸುತ್ತದೆ.

ಗುರುವಾರ ಏನಾಯಿತು…?
ದಿನಗಳಿಂದ ಫೋನ್‌ ಕರೆಗೆ ಉತ್ತರಿಸಿದ ಕಾರಣ ಕಮಲ್ ಕುಟುಂಬದ ಸಂಬಂಧಿಯೊಬ್ಬರು ಪರಿಶೀಲಸಲು ಬಂದಾಗ ಇದು ಬೆಳಕಿಗೆ ಬಂದಿದೆ. ಸಂಬಂಧಿಯಿಂದ ಗುರುವಾರ ಸಂಜೆ 7:24 ಕ್ಕೆ ಪೊಲೀಸರಿಗೆ ಕರೆ ಬಂದಿತು.
ಆ ಸಮಯದಲ್ಲಿ ಕಮಲ್ ಕುಟುಂಬದ ಮೂವರು ಸದಸ್ಯರು ಮಾತ್ರ ಭವನದಲ್ಲಿ ವಾಸಿಸುತ್ತಿದ್ದರು ಎಂದು ಅಧಿಕಾರಿಗಳು ಹೇಳಿದರು, ಈ ಪ್ರದೇಶವು ಅಮೆರಿಕದ ಅತ್ಯಂತ ಶ್ರೀಮಂತ ಪ್ರದೇಶಗಳಲ್ಲಿ ಒಂದಾಗಿದೆ. ಪೊಲೀಸರು ಸ್ಥಳಕ್ಕೆ ಬಂದಾಗ ಮನೆಯೊಳಗೆ ರಾಕೇಶ್, ಟೀನಾ ಮತ್ತು ಅರಿಯಾನ ಶವಗಳು ಪತ್ತೆಯಾಗಿವೆ ಎಂದು ಹೇಳಿದರು.
ನಾರ್ಫೋಕ್ ಡಿಸ್ಟ್ರಿಕ್ಟ್ ಅಟಾರ್ನಿ ಅವರು “ಭಯಾನಕ ದುರಂತ” ಕ್ಕೆ ಕಾರಣ ಮತ್ತು ಏನಾಯಿತು ಎಂಬುದನ್ನು ಕಂಡುಹಿಡಿಯಲು ಇನ್ನೂ ತನಿಖೆ ನಡೆಯುತ್ತಿದೆ ಎಂದು ಹೇಳಿದರು. ವೈದ್ಯಕೀಯ ಪರೀಕ್ಷೆಯ ನಂತರವೇ ಘಟನೆಯನ್ನು ಆತ್ಮಹತ್ಯೆಯೋ ಅಥವಾ ಕೊಲೆಯೋ ಎಂಬ ಬಗ್ಗೆ ನಿರ್ಧರಿಸಲು ಸಾಧ್ಯವಾಗುತ್ತದೆ ಎಂದು ಅವರು ಹೇಳಿದರು. ಆದರೆ ರಾಕೇಶ ಕಮಲ್ ಶವದ ಬಳಿ ಬಂದೂಕು ಪತ್ತೆಯಾಗಿದೆ ಎಂದು ಹೇಳಿದ್ದಾರೆ.
“ಆವರಣದಲ್ಲಿ ಗನ್ ಇತ್ತು ಎಂದು ನಾನು ನಿಮಗೆ ಹೇಳಬಲ್ಲೆ, ಮತ್ತು ಕುಟುಂಬದ ಎಲ್ಲಾ ಮೂವರು ಸದಸ್ಯರು ಮೃತಪಟ್ಟಿದ್ದರು ಎಂದು ಒಳಗೆ ಹೋದ ಎಲ್ಲರಿಗೂ ಸ್ಪಷ್ಟವಾಗಿತ್ತು” ಎಂದು ಮೊರಿಸ್ಸೆ ಹೇಳಿದರು.
18 ವರ್ಷದ ಅರಿಯಾನಾ ಮಿಡಲ್‌ಬರಿ ಕಾಲೇಜ್‌ನಲ್ಲಿ ವಿದ್ಯಾರ್ಥಿಯಾಗಿದ್ದಳು, ವರ್ಮೊಂಟ್‌ನಲ್ಲಿ ವರ್ಷಕ್ಕೆ $64,800 ಶುಲ್ಕದ ಖಾಸಗಿ ಲಿಬರಲ್ ಆರ್ಟ್ಸ್ ಶಾಲೆಯಲ್ಲಿ ಅವಳು ನರವಿಜ್ಞಾನವನ್ನು ಅಧ್ಯಯನ ಮಾಡುತ್ತಿದ್ದಳು ಎಂದು ಅವಳ ಲಿಂಕ್ಡ್‌ಇನ್ ತಿಳಿಸಿದೆ.
2020 ರಿಂದ ಡೋವರ್‌ನಲ್ಲಿ ನರಹತ್ಯೆ ವರದಿಯಾಗಿಲ್ಲ ಮತ್ತು ಇದು ಅತ್ಯಂತ ಆಘಾತಕಾರಿ ಘಟನೆಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.