ಖ್ಯಾತ ಹಿಂದುಸ್ತಾನೀ ಗಾಯಕಿ ಪ್ರಭಾ ಅತ್ರೆ ಇನ್ನಿಲ್ಲ

ಪುಣೆ : ಖ್ಯಾತ ಹಿಂದುಸ್ತಾನೀ ಶಾಸ್ತ್ರೀಯ ಗಾಯಕಿ ಡಾ. ಪ್ರಭಾ ಅತ್ರೆ ಅವರು ಶನಿವಾರ ಮುಂಜಾನೆ 92 ನೇ ವಯಸ್ಸಿನಲ್ಲಿ ನಿಧನರಾಗಿದ್ದಾರೆ ಎಂದು ಅವರ ನಿಕಟ ಮೂಲಗಳು ತಿಳಿಸಿವೆ.
ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತದ ಕಿರಾನಾ ಘರಾಣಾದ ಅಗ್ರ ಗಾಯಕಿಯಾಗಿದ್ದ ಪ್ರಭಾ ಅತ್ರೆ ಅವರು ತಮ್ಮ ನಿವಾಸದಲ್ಲಿ ಮಲಗಿದ್ದಾಗ ಹೃದಯ ಸ್ತಂಭನಕ್ಕೆ ಒಳಗಾದರು. ಅವರನ್ನು ನಗರದ ಕೊತ್ರುಡ್ ಪ್ರದೇಶದ ಖಾಸಗಿ ಆಸ್ಪತ್ರೆಗೆ ಸಾಗಿಸಲಾಯಿತು, ಅಲ್ಲಿ ಅವರು ಬೆಳಿಗ್ಗೆ 5:30 ಕ್ಕೆ ಮೃತಪಟ್ಟಿದ್ದಾರೆ ಎಂದು ತಿಳಿಸಲಾಯಿತು ಎಂದು ಮೂಲಗಳು ತಿಳಿಸಿವೆ.ಪ್ರಭಾ ಅವರಿಗೆ ಉಸಿರಾಟದ ಸಮಸ್ಯೆಗಳ ನಂತರ ಇಂದು ಶನಿವಾರ ಬೆಳಿಗ್ಗೆ ಖಾಸಗಿ ಆಸ್ಪತ್ರೆಗೆ ಸಾಗಿಸುವಾಗ ಹೃದಯ ಸ್ತಂಭನಕ್ಕೆ ಒಳಗಾದಾದರು.
ಅತ್ರೆ ಅವರ ಕುಟುಂಬದ ಕೆಲವು ನಿಕಟ ಸದಸ್ಯರು ವಿದೇಶದಲ್ಲಿ ನೆಲೆಸಿರುವ ಕಾರಣ, ಅವರು ಬಂದ ನಂತರ ಅವರ ಅಂತ್ಯಕ್ರಿಯೆಯನ್ನು ನೆರವೇರಿಸಲಾಗುವುದು ಎಂದು ಮೂಲಗಳು ತಿಳಿಸಿವೆ.

1932ರ ಸೆಪ್ಟೆಂಬರ್ 13ರಂದು ಜನಿಸಿದ ಅತ್ರೆ ಬಹುಮುಖ ವ್ಯಕ್ತಿತ್ವ ಎಂದು ಗುರುತಿಸಿಕೊಂಡಿದ್ದರು. ಶಾಸ್ತ್ರೀಯ ಗಾಯಕಿಯಾಗುವುದರ ಜೊತೆಗೆ, ಅವರು ಶಿಕ್ಷಣತಜ್ಞೆ, ಸಂಶೋಧಕಿ, ಸಂಯೋಜಕಿ ಮತ್ತು ಲೇಖಕರಾಗಿಯೂ ಉತ್ತಮ ಸಾಧನೆ ಮಾಡಿದ್ದಾರೆ. ವಿಜ್ಞಾನ ಮತ್ತು ಕಾನೂನು ಪದವೀಧರರಾಗಿದ್ದ ಅವರು ಸಂಗೀತದಲ್ಲಿ ಡಾಕ್ಟರೇಟ್ ಪಡೆದಿದ್ದರು.
ಭಾರತ ಸರ್ಕಾರದಿಂದ ಎಲ್ಲಾ ಮೂರು ಪದ್ಮ ಪ್ರಶಸ್ತಿಗಳಿಗೆ ಅವರು ಭಾಜನರಾಗಿದ್ದರು. ಅವರಿಗೆ ಜನವರಿ 2022 ರಲ್ಲಿ ರಾಷ್ಟ್ರದ ಎರಡನೇ ಅತ್ಯುನ್ನತ ನಾಗರಿಕ ಗೌರವವಾದ ಪದ್ಮವಿಭೂಷಣ ನೀಡಿ ಗೌರವಿಸಲಾಯಿತು. ಈ ಹಿಂದೆ ಅವರಿಗೆ 1990 ರಲ್ಲಿ ಪದ್ಮಶ್ರೀ ಪ್ರಶಸ್ತಿ ಮತ್ತು 2002 ರಲ್ಲಿ ಪದ್ಮಭೂಷಣ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿತ್ತು.
ಅಲ್ಲದೆ, ಅನೇಕ ರಾಷ್ಟ್ರೀಯ-ಅಂತಾರಾಷ್ಟ್ರೀಯ ಪುರಸ್ಕಾರಗಳಿಗೆ ಪಾತ್ರರಾಗಿದ್ದಾರೆ. ಪ್ರಭಾ ಅತ್ರೆ ಅವರು ಕಿರಾಣಾ ಘರಾಣಾ ಪದ್ಧತಿಯ ಹಿಂದುಸ್ತಾನೀ ಗಾಯಕರಾಗಿದ್ದರು. ಅಲ್ಲದೆ, ಠುಮ್ರಿಗಳು, ಗಜಲ್, ದಾದ್ರಿ, ಭಜನೆ ಮತ್ತು ನಾಟ್ಯಸಂಗೀತ ಇದರಲ್ಲಿಯೂ ನಿಷ್ಣ್ನಾತರಾಗಿದ್ದರು. ಪ್ರಭಾ ಅವರು ಸಂಗೀತದ ಬಗ್ಗೆ ಪುಸ್ತಕಗಳನ್ನು ಬರೆದಿದ್ದಾರೆ. ಅಲ್ಲದೆ ‘ಸ್ವರಂಗಿಣಿ’ ಮತ್ತು ‘ಸ್ವರಂಜನಿ’, ‘ಅಪೂರ್ವ ಕಲ್ಯಾಣ’, ‘ಮಧುರ್ ಕೌನ್ಸ್’, ‘ದರ್ಬಾರಿ ಕೌನ್ಸ್’, ‘ಪಟ್ಟದೀಪ್-ಮಲ್ಹಾರ್’, ‘ಶಿವ ಕಾಳಿ’, ತಿಲಂಗ-ಭೈರವ’ ಮತ್ತು ‘ರವಿ ಭೈರವ’.’ಮುಂತಾದ ಹೊಸ ರಾಗಗಳನ್ನು ರಚಿಸಿದ್ದಾರೆ.