ಪ್ರಯಾಗರಾಜ್: ಉತ್ತರ ಪ್ರದೇಶದ ಪ್ರಯಾಗರಾಜ್‌ನಲ್ಲಿರುವ ಬಿಷಪ್ ಜಾನ್ಸನ್ ಗರ್ಲ್ಸ್ ಹೈಸ್ಕೂಲ್ನ ಪ್ರಾಂಶುಪಾಲೆ ಪಾರುಲ್ ಸೊಲೊಮನ್ ಅವರನ್ನು ಆಡಳಿತ ಮಂಡಳಿಯು ಬಲವಂತವಾಗಿ ಅವರ ಕಚೇರಿಯಿಂದ ಹೊರದಬ್ಬಿದ ವೀಡಿಯೊ ಸಾಮಾಜಿಕ ಮಾಧ್ಯಮದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.
ವೈರಲ್ ಆದ ವೀಡಿಯೊದಲ್ಲಿ ಪ್ರಾಂಶುಪಾಲೆ ಪಾರುಲ್ ಅವರನ್ನು ಕುರ್ಚಿಯಿಂದ ಬಲವಂತದಿಂದ ಎಳೆದುಹಾಕಿ ಅದೇ ಸ್ಥಾನಕ್ಕೆ ಹೊಸ ಪ್ರಾಂಶುಪಾಲರನ್ನು ಕೂಡ್ರಿಸಿರುವುದು ಕಂಡುಬಂದಿದೆ.
ಸಂಸ್ಥೆಯ ಅಧ್ಯಕ್ಷರ ನೇತೃತ್ವದಲ್ಲಿ ಶಾಲಾ ಸಿಬ್ಬಂದಿಯ ಗುಂಪು, ಪ್ರಾಂಶುಪಾಲರ ಕಚೇರಿ ಪ್ರವೇಶಿಸಿ, ಕುರ್ಚಿಯನ್ನು ತಕ್ಷಣವೇ ಖಾಲಿ ಮಾಡುವಂತೆ ಅವರನ್ನು ಒತ್ತಾಯಿಸುತ್ತದೆ. ಇದನ್ನು ಪ್ರಾಂಶುಪಾಲೆ ಪಾರುಲ್ ವಿರೋಧಿಸುತ್ತಾರೆ. ಮಾತಿನ ಚಕಮಕಿಯ ನಂತರ ಅವರನ್ನು ಬಲವಂತವಾಗಿ ಕುರ್ಚಿಯಿಂದ ಎಳೆದುಹಾಕಲಾಗುತ್ತದೆ. ತರುವಾಯ, ಹೊಸದಾಗಿ ನೇಮಕಗೊಂಡ ಪ್ರಾಂಶುಪಾಲರನ್ನು ಅವರ ಸ್ಥಾನದಲ್ಲಿ ಕೂಡ್ರಿಸಲಾಯಿತು, ಅಲ್ಲಿದ್ದವರು ಚಪ್ಪಾಳೆಯೊಂದಿಗೆ ಹೊಸ ಪ್ರಾಂಶುಪಾಲರನ್ನು ಸ್ವಾಗತಿಸಿದ್ದಾರೆ.
ಸುಮಾರು 2 ನಿಮಿಷ-20 ಸೆಕೆಂಡುಗಳ ಕ್ಲಿಪ್ ಈಗ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿದ್ದು, ಕೋಲಾಹಲಕ್ಕೆ ಕಾರಣವಾಗಿದೆ. ಉತ್ತರ ಪ್ರದೇಶದ ಪ್ರಯಾಗರಾಜ್‌ನಲ್ಲಿರುವ ಬಿಷಪ್ ಜಾನ್ಸನ್ ಬಾಲಕಿಯರ ಶಾಲೆಯಲ್ಲಿ ಈ ನಾಟಕೀಯ ದೃಶ್ಯಗಳನ್ನು ರೆಕಾರ್ಡ್ ಮಾಡಲಾಗಿದೆ. ಪರೀಕ್ಷೆಯೊಂದರ ಪ್ರಶ್ನೆ ಪತ್ರಿಕೆ ಸೋರಿಕೆಗೆ ಸಂಬಂಧಿಸಿದ ಹಗರಣವೇ ವಿವಾದದ ಕೇಂದ್ರಬಿಂದುವಾಗಿದೆ.
ಆಗಿದ್ದೇನು..?
ಫೆಬ್ರವರಿ 11ರ ಯುಪಿಎಸ್‌ಸಿ ರಿವ್ಯೂ ಆಫೀಸರ್-ಅಸಿಸ್ಟೆಂಟ್ ರಿವ್ಯೂ ಆಫೀಸರ್ (ಆರ್‌ಒ-ಎಆರ್‌ಒ) ಪ್ರಶ್ನೆ ಪತ್ರಿಕೆಗೆ ಸೋರಿಕೆಗೆ ಸಂಬಂಧಿಸಿದಂತೆ ಶಾಲೆಯು ಹಗರಣದಲ್ಲಿ ಸಿಲುಕಿಕೊಂಡಿದೆ ಎಂದು ಲಕ್ನೋ ಡಯಾಸಿಸ್ ಪ್ರತಿನಿಧಿಸುವ ಬಿಷಪ್ ಮಾರಿಸ್ ಎಡ್ಗರ್ ಡಾನ್ ಆರೋಪಿಸಿದ್ದಾರೆ. ಪ್ರಶ್ನೆ ಪತ್ರಿಕೆ ಸೋರಿಕೆಗೆ ಸಂಬಂಧಿಸಿದಂತೆ ವಿಶೇಷ ಕಾರ್ಯಪಡೆ (ಎಸ್‌ಟಿಎಫ್) ಬಂಧಿಸಿದವರಲ್ಲಿ ವಿನೀತ್ ಜಸ್ವಂತ ಎಂಬ ಶಾಲಾ ಸಿಬ್ಬಂದಿ ಸೇರಿದ್ದಾರೆ ಎಂದು ಬಿಷಪ್ ಡಾನ್ ಹೇಳಿದ್ದಾರೆ. ಇದರಲ್ಲಿ ಪ್ರಾಂಶುಪಾಲರಾದ ಪಾರುಲ್ ಸೊಲೊಮನ್ ಅವರು ಶಾಮೀಲಾಗಿರುವುದು ಸಹ ಬೆಳಕಿಗೆ ಬಂದಿದೆ. ಪಾರುಲ್ ಸೊಲೊಮನ್ ಅವರನ್ನು ಆ ಸ್ಥಾನದಿಂದ ವಜಾಗೊಳಿಸಲಾಗಿದ್ದು, ಅದಕ್ಕೆ ಅವರು ಹಗರಣದಲ್ಲಿ ಭಾಗಿಯಾಗಿರುವುದು ಕಾರಣ ಎಂದು ಅವರು ಹೇಳಿದ್ದಾರೆ.
ಫೆಬ್ರವರಿ 11 ರಂದು ಪ್ರಯಾಗರಾಜ್‌ನಲ್ಲಿ ಪರೀಕ್ಷೆ ಪ್ರಾರಂಭವಾಗುವ ಮೊದಲು ಪ್ರಶ್ನೆ ಪತ್ರಿಕೆ ಸೋರಿಕೆಯಾಗಿತ್ತು. ಬಿಷಪ್ ಜಾನ್ಸನ್ ಬಾಲಕಿಯರ ಶಾಲೆಯ ಪರೀಕ್ಷಾ ಕೇಂದ್ರದ ನಿರ್ವಾಹಕ ವಿನೀತ್ ಯಶವಂತ ಸೇರಿದಂತೆ ಹತ್ತು ಮಂದಿಯನ್ನು ಉತ್ತರ ಪ್ರದೇಶ ಎಸ್‌ಟಿಎಫ್ ಬಂಧಿಸಿದೆ. ಬೆಳಿಗ್ಗೆ 6:30ಕ್ಕೆ ಪರೀಕ್ಷಾ ಕೇಂದ್ರದಿಂದ ಮೊಬೈಲ್‌ನಲ್ಲಿ ಫೋಟೋ ತೆಗೆದು ಪ್ರಶ್ನೆ ಪತ್ರಿಕೆ ಸೋರಿಕೆ ಮಾಡಿದ್ದಾರೆ ಎಂದು ಆರೋಪಿಸಲಾಗಿದೆ.
ದೃಶ್ಯಾವಳಿಗಳಲ್ಲಿ, ಬಿಷಪ್ ಸೇರಿದಂತೆ ಹಲವಾರು ವ್ಯಕ್ತಿಗಳು ಪ್ರಾಂಶುಪಾಲರ ಕಚೇರಿಗೆ ನುಗ್ಗಿ ಪಾರುಲ್ ಸೊಲೊಮನ್ ಅವರ ಮೊಬೈಲ್ ಫೋನ್ ಅನ್ನು ಕಸಿದುಕೊಳ್ಳಲು ಪ್ರಯತ್ನಿಸುತ್ತಿರುವುದು ಕಂಡುಬಂದಿದೆ. ಪಾರುಲ್ ಸೊಲೊಮನ್, “ಟಚ್‌ ಮಾಡಬೇಡಿ, ಮುಟ್ಟಬೇಡಿ” ಎಂದು ಮನವಿ ಮಾಡುವುದನ್ನು ಕೇಳಬಹುದು. ವೀಡಿಯೊದ ಇನ್ನೊಂದು ಭಾಗದಲ್ಲಿ, ಮಹಿಳಾ ಶಿಕ್ಷಕಿಯೊಬ್ಬರು ಪಾರುಲ್ ಸೊಲೊಮನ್ ಅವರ ಫೋನ್ ಅನ್ನು ಕಿತ್ತುಕೊಳ್ಳುತ್ತಾರೆ. ತರುವಾಯ, ಇತರ ಸಿಬ್ಬಂದಿ ಸದಸ್ಯರು ದೊಡ್ಡ ಟೇಬಲ್ ಅನ್ನು ಸರಿಸುತ್ತಾರೆ ಮತ್ತು ಅವರ ಕುರ್ಚಿಯನ್ನು ತಳ್ಳಲು ಪ್ರಾರಂಭಿಸುತ್ತಾರೆ. ಅಂತಿಮವಾಗಿ, ಪಾರುಲ್ ಸೊಲೊಮನ್ ಅವರನ್ನು ಕಚೇರಿಯಿಂದ ತೆಗೆದುಹಾಕಲಾಗುತ್ತದೆ ಮತ್ತು ಹೊಸ ಪ್ರಾಂಶುಪಾಲರಾದ ಶೆರ್ಲಿನ್ ಮಾಸ್ಸಿ ಅವರು ಸಿಬ್ಬಂದಿಯ ಚಪ್ಪಾಳೆಗಳ ಮಧ್ಯೆ ಕರ್ಚಿಗಳ ಮಧ್ಯೆ ಕುಳಿತುಕೊಳ್ಳುತ್ತಾರೆ.
ಬಿಷಪ್ ಡ್ಯಾನ್ ಪ್ರಕಾರ, ಪಾರುಲ್ ಸೊಲೊಮನ್ ಅವರನ್ನು ವಜಾಗೊಳಿಸಿದ ನಂತರ ಶೆರ್ಲಿ ಮಾಸ್ಸೆ ಅವರನ್ನು ಹೊಸ ಪ್ರಾಂಶುಪಾಲರನ್ನಾಗಿ ನೇಮಿಸಲಾಯಿತು. ನೇಮಿಸಲಾಯಿತು. ಶೆರ್ಲಿ ಮಾಸ್ಸಿ ಶಾಲೆಗೆ ಆಗಮಿಸಿದ ನಂತರ, ಪಾರುಲ್ ಸೊಲೊಮನ್ ಅವರು ಒಳಗಿನಿಂದಲೇ ಪ್ರಿನ್ಸಿಪಾಲ್ ಕಚೇರಿಯಲ್ಲಿ ತಮ್ಮನ್ನು ಲಾಕ್ ಮಾಡಿಕೊಂಡರು. ನಂತರ ಬಲವಂತವಾಗಿ ಬಾಗಿಲು ತೆರೆದಾಗ, ಕೆಲವು ಶಿಕ್ಷಕರು ಪಾರುಲ್ ಸೊಲೊಮನ್ ಅವರನ್ನು ಕುರ್ಚಿಯಿಂದ ಎಳೆದುಹಾಕಿದರು.
ಪಾರುಲ್ ಸೊಲೊಮನ್ ತನ್ನ ಮೇಲೆ ದೌರ್ಜನ್ಯ ನಡೆಸಲಾಗಿದೆ ಎಂದು ಹಲವರ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ ಎಂದು ಬಿಷಪ್ ಡಾನ್ ಹೇಳಿದ್ದಾರೆ. ಪಾರುಲ್ ಸೊಲೊಮನ್ ಅವರ ಹಕ್ಕುಗಳ ಹೊರತಾಗಿಯೂ, ವೀಡಿಯೊ ಮತ್ತು ಸಿಸಿಟಿವಿ (CCTV) ಫೂಟೇಜ್ ದೈಹಿಕವಾಗಿ ಅವರನ್ನು ಮುಟ್ಟವುದನ್ನು ತೋರಿಸುವುದಿಲ್ಲ ಎಂದು ಅವರು ವಾದಿಸುತ್ತಾರೆ.
ಬಿಷಪ್ ಡಾನ್ ಅವರು ಅಧಿಕಾರಿಗಳಿಗೆ ಹೆಚ್ಚುವರಿ ವೀಡಿಯೊಗಳನ್ನು ಒದಗಿಸಿದ್ದಾರೆ. ಪ್ರಾಂಶುಪಾಲೆ ಪಾರುಲ್ ಸೊಲೊಮನ್ ಅವರ ದೌರ್ಜನ್ಯದ ವೀಡಿಯೊಗಳನ್ನು ಇನ್ನೂ ಸಾರ್ವಜನಿಕವಾಗಿ ಬಿಡುಗಡೆ ಮಾಡಲಾಗಿಲ್ಲ.
ಪಾರುಲ್ ಸೊಲೊಮನ್ ಅವರ ದೂರಿನ ನಂತರ, ಎನ್‌ಎಲ್ ಡಾನ್, ಬಿಷಪ್ ಮಾರಿಸ್ ಎಡ್ಗರ್ ಡಾನ್, ವಿನಿತಾ ಇಸುಬಿಯಸ್, ಸಂಜೀತ ಲಾಲ, ವಿಶಾಲ್ ನಾವೆಲ್ ಸಿಂಗ್, ಆರ್‌ಕೆ ಸಿಂಗ್, ಅರುಣ ಮೋಜ್ಸ್, ತರುಣ ವ್ಯಾಸ್, ಅಭಿಷೇಕ ವ್ಯಾಸ್ ಮತ್ತು ಇತರರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಏತನ್ಮಧ್ಯೆ, ಆರೋಪಿಗಳು ವೀಡಿಯೋಗಳನ್ನು ಪೊಲೀಸರಿಗೆ ಸಲ್ಲಿಸಿದ್ದಾರೆ, ಅವರು ಪ್ರಸ್ತುತ ಈ ಬಗ್ಗೆ ತನಿಖೆ ನಡೆಸುತ್ತಿದ್ದಾರೆ.
ಪಾರುಲ್ ಸೊಲೊಮನ್ ಅವರು ಪ್ರಾಂಶುಪಾಲರಾಗಿದ್ದ ಅವಧಿಯಲ್ಲಿ ಶಾಲೆಗೆ ₹ 2.40 ಕೋಟಿ ವಂಚಿಸಿದ್ದಾರೆ ಎಂದು ಬಿಷಪ್ ಡಾನ್ ಅವರು ಆರೋಪಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ