ಇತ್ತೀಚೆಗೆ ಪ್ಯಾರಿಸ್‌ನ ಲೌವ್ರೆ ಮ್ಯೂಸಿಯಂಗೆ (Louvre Museum) ನುಗ್ಗಿದ ಕಳ್ಳರು ಕೆಲವೇ ನಿಮಿಷಗಳಲ್ಲಿ ಅಪಾರ ಮೌಲ್ಯದ ನೆಪೋಲಿಯನ್ ಆಭರಣಗಳನ್ನು ಕದ್ದು ಪರಾರಿಯಾಗಿದ್ದಾರೆ. ಆದರೆ, ಒಂದು ಕುತೂಹಲಕಾರಿ ಬೆಳವಣಿಗೆಯಲ್ಲಿ, ಅವರು 60 ಮಿಲಿಯನ್ ಡಾಲರ್ ಮೌಲ್ಯದ ‘ದಿ ರೀಜೆಂಟ್ ಡೈಮಂಡ್’ (The Regent Diamond) ಅನ್ನು ಹಾಗೆಯೇ ಬಿಟ್ಟು ಹೋಗಿದ್ದಾರೆ. ಈ ವಜ್ರವು ಯುರೋಪಿನಲ್ಲಿ ಅತಿ ದೊಡ್ಡದಾಗಿದ್ದು, ನೂರಾರು ವರ್ಷಗಳ ಹಿಂದೆ ಭಾರತದಲ್ಲಿ ಪತ್ತೆಯಾಗಿತ್ತು.
ದಿ ರೀಜೆಂಟ್ ವಜ್ರದ ಬಗ್ಗೆ :
ಈ ಕುಶನ್ ಕಟ್ (cushion cut) ವಜ್ರವು ತಿಳಿ ನೀಲಿ-ಹಸಿರು ಬಣ್ಣವನ್ನು ಹೊಂದಿದ್ದು, 140.6 ಕ್ಯಾರೆಟ್ ತೂಕವಿದೆ. ಪ್ರಸಿದ್ಧ ‘ಕೋಹಿನೂರ್’ ವಜ್ರವು 105.6 ಕ್ಯಾರೆಟ್ ತೂಕವಿದೆ.
ಈ ರೀಜೆಂಟ್ ವಜ್ರವು 1887 ರಲ್ಲಿ ಲೂವ್‌ರ್ ಮ್ಯೂಸಿಯಂಗೆ ಬರುವ ಮೊದಲು ಫ್ರೆಂಚ್ ರಾಜಮನೆತನದ ಆಭರಣ ಸಂಗ್ರಹದ ಭಾಗವಾಗಿತ್ತು.
ಭಾರತದ ನಂಟು:
ಈ ಅಮೂಲ್ಯ ವಜ್ರವು 1698 ರಲ್ಲಿ ಆಂಧ್ರಪ್ರದೇಶದ ಗೋಲ್ಕೊಂಡಾ (Golconda) ಗಣಿಯಲ್ಲಿ ಪತ್ತೆಯಾಗಿತ್ತು. ಆಗ ಇದರ ತೂಕ 426 ಕ್ಯಾರೆಟ್ ಇತ್ತು. ವಜ್ರವನ್ನು ಕಂಡುಕೊಂಡ ವ್ಯಕ್ತಿಯೊಬ್ಬ ಅದನ್ನು ಕಳ್ಳಸಾಗಣೆ ಮಾಡಲು ತನ್ನ ಕಾಲಿಗೆ ಗಾಯ ಮಾಡಿಕೊಂಡು ಅದರೊಳಗೆ ಅಡಗಿಸಿ ಇಟ್ಟಿದ್ದ ಎಂಬ ದಂತಕಥೆಯಿದೆ. ಆದರೆ, ಆ ವ್ಯಕ್ತಿಯು ದೇಶದಿಂದ ತಪ್ಪಿಸಿಕೊಳ್ಳಲು ಸಹಾಯ ಮಾಡಿದ ನಾವಿಕನೇ ಮೋಸ ಮಾಡಿ, ಲಾಭಕ್ಕಾಗಿ ಆತನನ್ನು ಕೊಂದು ಹಾಕಿದ ಎಂದು ‘ಮ್ಯಾರಿ ಕ್ಲೇರ್’ ವರದಿಯೊಂದು ಹೇಳಿದೆ.
ನಂತರ ಈ ವಜ್ರವು ಅಂದಿನ ಮದ್ರಾಸ್ ಗವರ್ನರ್ ಥಾಮಸ್ ಪಿಟ್ (Thomas Pitt) ಅವರ ಗಮನಕ್ಕೆ ಬಂತು. 1704 ಮತ್ತು 1706 ರ ನಡುವೆ ಇಂಗ್ಲೆಂಡ್‌ನಲ್ಲಿ ಇದನ್ನು ಕತ್ತರಿಸಲಾಯಿತು ಮತ್ತು 1717 ರಲ್ಲಿ ಫ್ರಾನ್ಸ್‌ನ ರೀಜೆಂಟ್ ಫಿಲಿಪ್ ಡಿ’ಓರ್ಲಿಯನ್ಸ್ (Regent Philippe d’Orleans) ಅವರ ಕೋರಿಕೆಯ ಮೇರೆಗೆ ಫ್ರಾನ್ಸ್ ಇದನ್ನು ಖರೀದಿಸಿತು.
ಆ ಸಮಯದಲ್ಲಿ, ರೀಜೆಂಟ್ ವಜ್ರವು ಪಶ್ಚಿಮ ದೇಶಗಳಲ್ಲಿ ತಿಳಿದಿರುವ ಅತ್ಯಂತ ಸುಂದರವಾದ ವಜ್ರವಾಯಿತು ಮತ್ತು ಗುಣಮಟ್ಟ ಹಾಗೂ ಕಟ್ ವಿಷಯದಲ್ಲಿ ಅತ್ಯುತ್ತಮವಾದುದು ಎಂದು ಇಂದಿಗೂ ಪರಿಗಣಿಸಲ್ಪಟ್ಟಿದೆ. 1719 ರ ಹೊತ್ತಿಗೆ, ಇದರ ಮೌಲ್ಯವು ಖರೀದಿಸಿದ ಬೆಲೆಗಿಂತ ಮೂರು ಪಟ್ಟು ಹೆಚ್ಚಾಗಿತ್ತು.
ವಜ್ರವನ್ನು ಕತ್ತರಿಸಿದ ನಂತರ ಉಳಿದ ಕೆಲವು ಸಣ್ಣ ತುಣುಕುಗಳನ್ನು ರಷ್ಯಾದ ತ್ಸಾರ್ ಪೀಟರ್ ದಿ ಗ್ರೇಟ್ ಅವರಿಗೆ ಮಾರಲಾಯಿತು.
ವಿವಿಧ ರಾಜಮನೆತನದ ಕಿರೀಟಗಳಲ್ಲಿ …
ರೀಜೆಂಟ್ ವಜ್ರವು ಎಲ್ಲಾ ರಾಜರ ಆಭರಣವಾಗಿ ಸೇವೆ ಸಲ್ಲಿಸಿದೆ. ಲೂಯಿಸ್ XV (Louis XV) ಇದನ್ನು 1721 ರಲ್ಲಿ ಒಂದು ಸ್ವಾಗತ ಸಮಾರಂಭದಲ್ಲಿ ಧರಿಸಿದ್ದರು ಮತ್ತು ನಂತರ 1722 ರಲ್ಲಿ ಅವರ ಪಟ್ಟಾಭಿಷೇಕದ ಕಿರೀಟದ ಮೇಲೆ ತಾತ್ಕಾಲಿಕವಾಗಿ ಧರಿಸಿದ್ದರು. 1725 ರಿಂದ, ಅವರು ತಮ್ಮ ಆಳ್ವಿಕೆ ಕೊನೆಗೊಳ್ಳುವವರೆಗೂ (1774) ಇದನ್ನು ತಮ್ಮ ಟೋಪಿಯ ಮೇಲೆ ಧರಿಸುವ ಅಭ್ಯಾಸ ಮಾಡಿಕೊಂಡಿದ್ದರು.
ನಂತರ ಈ ವಜ್ರವು 1775 ರಲ್ಲಿ ಲೂಯಿಸ್ XVI (Louis XVI) ಅವರ ಕಿರೀಟದಲ್ಲಿ ಮತ್ತು ನಂತರ ಅವರ ಟೋಪಿಯ ಮೇಲೆ ತನ್ನ ಸ್ಥಾನವನ್ನು ಪಡೆಯಿತು.
1792 ರಲ್ಲಿ ಕಳುವಾಗಿತ್ತು. ನಂತರ 1793 ರಲ್ಲಿ ಒಂದು ಫ್ರೇಮ್‌ನಲ್ಲಿ ಅಡಗಿಸಿ ಇಟ್ಟಿದ್ದಾಗ ಪತ್ತೆಯಾಯಿತು. ಡೈರೆಕ್ಟರಿ (Directory) ಮತ್ತು ನಂತರ ಕಾನ್ಸುಲೇಟ್ (Consulate) ಕಾಲದಲ್ಲಿ ಇದನ್ನು ಹಲವಾರು ಬಾರಿ ಅಡವಿಡಲಾಯಿತು.
1801 ರಲ್ಲಿ ನೆಪೋಲಿಯನ್ ಬೋನಪಾರ್ಟೆ (Napoleon Bonaparte) ಇದನ್ನು ಅಂತಿಮವಾಗಿ ಮರಳಿ ಪಡೆದರು. ಇದು ಮೊದಲು ಪ್ರಥಮ ಕಾನ್ಸಲ್‌ನ ಕತ್ತಿಯನ್ನು ಅಲಂಕರಿಸಿತು, ನಂತರ 1812 ರಲ್ಲಿ ಚಕ್ರವರ್ತಿ ನೆಪೋಲಿಯನ್ I ರ ಕತ್ತಿಯ ಪ್ರಮುಖ ಆಭರಣಗಳಲ್ಲಿ ಒಂದಾಯಿತು.
ರಾಜಕೀಯ ವ್ಯವಸ್ಥೆಗಳು ಬದಲಾದಂತೆ, ರೀಜೆಂಟ್ ವಜ್ರವು ಲೂಯಿಸ್ XVIII, ಚಾರ್ಲ್ಸ್ X ಮತ್ತು ನೆಪೋಲಿಯನ್ III ರ ಕಿರೀಟಗಳ ಮೇಲೆ ಕಾಣಿಸಿಕೊಂಡಿತು ಮತ್ತು ನಂತರ ನೆಪೋಲಿಯನ್ III ರ ಪತ್ನಿ ಸಾಮ್ರಾಜ್ಞಿ ಯುಜೀನಿ (Empress Eugenie) ಅವರ ಗ್ರೀಕ್ ಡೈಡೆಮ್ (Greek diadem) ನಲ್ಲಿ ಸೇರಿಕೊಂಡಿತು.
ಇದು ಶಾಪಗ್ರಸ್ತ ವಜ್ರವೇ..?
ಕಳ್ಳರು ಗ್ಯಾಲರಿ ಡಿ’ಅಪೋಲನ್ (Galerie d’Apollon) ನಿಂದ ಕದ್ದ ಒಂಬತ್ತು ಆಭರಣಗಳಲ್ಲಿ ರೀಜೆಂಟ್ ವಜ್ರ ಏಕೆ ಇರಲಿಲ್ಲ ಎಂಬುದು ಒಂದು ರಹಸ್ಯ ಎಂದು ಪ್ಯಾರಿಸ್ ಪ್ರಾಸಿಕ್ಯೂಟರ್ ಲಾರೆ ಬೆಕ್ಕುಯೋ (Laure Beccuau) ಹೇಳಿದ್ದಾರೆ.
ವಜ್ರವನ್ನು ಕದಿಯದಿರಲು ಹಲವು ಸಿದ್ಧಾಂತಗಳು ಹೊರಹೊಮ್ಮಿವೆ. ಅವುಗಳಲ್ಲಿ ಒಂದು, ಈ ವಜ್ರವು ಶಾಪಗ್ರಸ್ತವಾಗಿರಬಹುದು ಎಂಬುದು.
ಗೋಲ್ಕೊಂಡಾ ಗಣಿಯಿಂದ ಅದನ್ನು ಕದ್ದು ಸಾಗಿಸಿದ ವ್ಯಕ್ತಿ ಕೊಲ್ಲಲ್ಪಟ್ಟ, ಮತ್ತು ವಜ್ರವನ್ನು ಹೊಂದಿದ್ದ ಕೆಲವು ಫ್ರೆಂಚ್ ರಾಜರು ಮತ್ತು ಚಕ್ರವರ್ತಿಗಳು ಕೆಟ್ಟ ಅಂತ್ಯವನ್ನು ಕಂಡರು. ಕಿಂಗ್ ಲೂಯಿಸ್ XVI ಮತ್ತು ಮೇರಿ ಆಂಟೊನೆಟ್ (Marie Antoinette) ಅವರು ಫ್ರೆಂಚ್ ಕ್ರಾಂತಿಯ ಸಮಯದಲ್ಲಿ ಗಿಲೋಟಿನ್‌ನಿಂದ ಕೊಲ್ಲಲ್ಪಟ್ಟರು. ನೆಪೋಲಿಯನ್ ಬೋನಪಾರ್ಟೆ ಅವರನ್ನು ಫ್ರಾನ್ಸ್‌ನಿಂದ ದೂರದ ಸೇಂಟ್ ಹೆಲೆನಾ ದ್ವೀಪಕ್ಕೆ ಗಡೀಪಾರು ಮಾಡಲಾಯಿತು, ಅಲ್ಲಿ 1821 ರಲ್ಲಿ ನಿಧನರಾದರು.
ಲೌವ್ರೆ ಮ್ಯೂಸಿಯಂನಲ್ಲಿರುವ ಮತ್ತೊಂದು ಗೋಲ್ಕೊಂಡಾ ವಜ್ರ :
ಈ ಕಳ್ಳತನದಲ್ಲಿ, ಕಳ್ಳರು 21.32 ಕ್ಯಾರೆಟ್‌ನ ಗುಲಾಬಿ ಬಣ್ಣದ ‘ಹಾರ್ಟೆನ್ಸಿಯಾ ವಜ್ರ’ (Hortensia diamond) ವನ್ನೂ ಸಹ ಬಿಟ್ಟು ಹೋಗಿದ್ದಾರೆ. ಲೂಯಿಸ್ XIV ಖರೀದಿಸಿದ ಈ ವಜ್ರವೂ ಸಹ 1792 ರಲ್ಲಿ ಫ್ರೆಂಚ್ ಕ್ರಾಂತಿಯ ಸಮಯದಲ್ಲಿ ಕಳುವಾಗಿತ್ತು.
ವಜ್ರ ಮರಳಿ ಸಿಕ್ಕ ನಂತರ ನೆಪೋಲಿಯನ್ I ಅದನ್ನು ಧರಿಸಿದ್ದರು, ನಂತರ ಅದು ಡಚ್ ರಾಣಿ ಹಾರ್ಟೆನ್ಸ್ ಡಿ ಬ್ಯೂಹರ್ನೈಸ್ (Hortense de Beauharnais) ಅವರ ಸ್ವಾಧೀನಕ್ಕೆ ಬಂದಿತು.1830 ರಲ್ಲಿ ಇದು ಮತ್ತೊಮ್ಮೆ ಕಳುವಾಗಿತ್ತು, ನಂತರ ಮತ್ತೆ ಪತ್ತೆಯಾಗಿ ಗ್ಯಾಲರಿ ಡಿ’ಅಪೋಲನ್‌ನಲ್ಲಿ ಇಡಲಾಯಿತು.
ಲೌವ್ರೆಯಲ್ಲಿರುವ ಇತರೆ ಅಮೂಲ್ಯ ವಸ್ತುಗಳು..
ಲಿಯೊನಾರ್ಡೋ ಡಾ ವಿಂಚಿಯವರ ‘ಮೋನಾಲಿಸಾ’ (Mona Lisa), ತೋಳಿಲ್ಲದ ವೀನಸ್ ಡಿ ಮಿಲೋ (Venus de Milo), ವಿಂಗ್ಡ್ ವಿಕ್ಟರಿ ಆಫ್ ಸಮೋಥ್ರೇಸ್ (Winged Victory of Samothrace), ಹಮ್ಮುರಾಬಿ ಸಂಹಿತೆ (Code of Hammurabi), ಡೆಲಾಕ್ರೊಯಿಕ್ಸ್‌ನ ಲಿಬರ್ಟಿ ಲೀಡಿಂಗ್ ದಿ ಪೀಪಲ್ (Delacroix’s Liberty Leading the People) ಮತ್ತು ಗೆರಿಕಾಲ್ಟ್‌ನ ದಿ ರಾಫ್ಟ್ ಆಫ್ ದಿ ಮೆಡೂಸಾ (Géricault’s The Raft of the Medusa) ಸೇರಿದಂತೆ ವಿಶ್ವದ ಅತ್ಯಂತ ಅಮೂಲ್ಯ ಕಲಾಕೃತಿಗಳು ಲೌವ್ರೆ ಮ್ಯೂಸಿಯಂನಲ್ಲಿವೆ.
ನಿಮ್ಮ ಕಾಮೆಂಟ್ ಬರೆಯಿರಿ