ಹೈದರಾಬಾದ್: ತೆಲಂಗಾಣದಲ್ಲಿ ಬೀದಿ ನಾಯಿಗಳ ಸಾಮೂಹಿಕ ಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ತನಿಖೆಯನ್ನು ಚುರುಕುಗೊಳಿಸಿದ್ದಾರೆ. ಹನುಮಕೊಂಡ ಮತ್ತು ಕಾಮಾರೆಡ್ಡಿ ಜಿಲ್ಲೆಗಳ ಏಳು ಮಂದಿ ಗ್ರಾಮ ಪಂಚಾಯt ಅಧ್ಯಕ್ಷರು (ಸರಪಂಚ್ಗಳು) ಸೇರಿದಂತೆ ಒಟ್ಟು 15 ಜನರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗಿದೆ.
ಹೊಸ ವರ್ಷದ ಮೊದಲ ಎರಡು ವಾರಗಳಲ್ಲಿ ಕನಿಷ್ಠ 500 ನಾಯಿಗಳಿಗೆ ವಿಷ ಹಾಕಿ ಕೊಲ್ಲಲಾಗಿದ್ದು, ಪ್ರಾಣಿ ಹಿಂಸೆ ತಡೆ ಕಾಯ್ದೆಯಡಿ ರಾಜ್ಯದ ಇತಿಹಾಸದಲ್ಲೇ ಇದು ಅತಿದೊಡ್ಡ ಕಾರ್ಯಾಚರಣೆಯಾಗಿದೆ.
ಚುನಾವಣಾ ಭರವಸೆ ಈಡೇರಿಸಲು ಹತ್ಯೆ?
ಬೀದಿ ನಾಯಿಗಳ ಹಾವಳಿಯಿಂದ ಮುಕ್ತಿ ನೀಡುವುದಾಗಿ ಸ್ಥಳೀಯ ಗ್ರಾಮ ಪಂಚಾಯತ ಚುನಾವಣೆ ವೇಳೆ ಅಭ್ಯರ್ಥಿಗಳು ನೀಡಿದ್ದ ವಿವಾದಾತ್ಮಕ ಭರವಸೆಯನ್ನು ಈಡೇರಿಸಲು ಈ ಮಾರಣಹೋಮ ನಡೆಸಲಾಗಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಬೀದಿ ನಾಯಿಗಳ ದಾಳಿಯಿಂದ ಬೇಸತ್ತಿದ್ದ ಜನರಿಗೆ “ನಾಯಿ ಮುಕ್ತ ಗ್ರಾಮ” ಮಾಡುವ ಭರವಸೆಯನ್ನು ಅಭ್ಯರ್ಥಿಗಳು ನೀಡಿದ್ದರು ಎನ್ನಲಾಗಿದೆ.
ವಿಷದ ಇಂಜೆಕ್ಷನ್ ನೀಡಿ ಕ್ರೌರ್ಯ
ಜಗತಿಯಾಲ ಜಿಲ್ಲೆಯ ಧರ್ಮಪುರಿ ಪುರಸಭೆಯಲ್ಲಿ ವ್ಯಕ್ತಿಯೊಬ್ಬ ನಾಯಿಗೆ ವಿಷಕಾರಿ ಇಂಜೆಕ್ಷನ್ ನೀಡುತ್ತಿರುವ ಭೀಕರ ವೀಡಿಯೊ ವೈರಲ್ ಆಗಿದೆ. ಇಂಜೆಕ್ಷನ್ ನೀಡಿದ ಕೇವಲ ಒಂದು ನಿಮಿಷದಲ್ಲಿ ನಾಯಿ ಕುಸಿದು ಬಿದ್ದು ಸಾವಿಗೀಡಾಗಿದೆ. ಹನುಮಕೊಂಡದ ಶಾಯಂಪೇಟೆಯಲ್ಲಿ ಈಗಾಗಲೇ 110 ನಾಯಿಗಳ ಮೃತದೇಹಗಳನ್ನು ಹೂತುಹಾಕಿದ ಜಾಗದಿಂದ ಹೊರತೆಗೆಯಲಾಗಿದ್ದು, ಮರಣೋತ್ತರ ಪರೀಕ್ಷೆ ನಡೆಸಲಾಗಿದೆ.
ಹತ್ಯೆಗೆ ಆದೇಶ ನೀಡಿದ ಆರೋಪದ ಮೇಲೆ 7 ಮಂದಿ ಸರಪಂಚ್ಗಳು (ಅಧ್ಯಕ್ಷರು), ಸಹಕರಿಸಿದ ಪಂಚಾಯತ ಕಾರ್ಯದರ್ಶಿಗಳು ಮತ್ತು ನಾಯಿ ಹಿಡಿಯಲು ನೇಮಕಗೊಂಡಿದ್ದ 3 ಖಾಸಗಿ ಕಾಂಟ್ರಾಕ್ಟರ್ಗಳ ವಿರುದ್ಧ ಪ್ರಕರಣ ದಾಖಲಾಗಿದೆ.
ಭಾರತೀಯ ನ್ಯಾಯ ಸಂಹಿತೆಯ (BNS) ಸೆಕ್ಷನ್ 325 (ಪ್ರಾಣಿಗಳನ್ನು ಕೊಲ್ಲುವುದು ಅಥವಾ ವಿಷ ಹಾಕುವುದು) ಮತ್ತು ಪ್ರಾಣಿ ಹಿಂಸೆ ತಡೆ ಕಾಯ್ದೆಯಡಿ ಎಫ್ಐಆರ್ ದಾಖಲಿಸಲಾಗಿದೆ.
“ಕಾನೂನಿನ ಅರಿವಿಲ್ಲದಿರುವುದು ಕ್ಷಮಾರ್ಹವಲ್ಲ” ಎಂದು ಪೊಲೀಸರು ತಿಳಿಸಿದ್ದಾರೆ. ಕೇಂದ್ರ ಸರ್ಕಾರದ ಪ್ರಾಣಿ ಜನನ ನಿಯಂತ್ರಣ (ABC) ನಿಯಮಗಳನ್ನು ಮೀರುವ ಅಧಿಕಾರ ಸ್ಥಳೀಯ ಸಂಸ್ಥೆಗಳಿಗಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
ಈ ಘಟನೆಯ ಬೆನ್ನಲ್ಲೇ ತೆಲಂಗಾಣ ಸರ್ಕಾರವು ಎಲ್ಲಾ ಜಿಲ್ಲಾಧಿಕಾರಿಗಳಿಗೆ ನೋಟಿಸ್ ನೀಡಿದ್ದು, ನಾಯಿಗಳ ಹತ್ಯೆ ಮಾಡುವಂತಿಲ್ಲ ಮತ್ತು 2023ರ ABC ನಿಯಮಗಳಂತೆ ಕೇವಲ ಸಂತಾನಶಕ್ತಿ ಹರಣ ಚಿಕಿತ್ಸೆ ಹಾಗೂ ಲಸಿಕೆ ಹಾಕುವುದಕ್ಕೆ ಮಾತ್ರ ಆದ್ಯತೆ ನೀಡಬೇಕು ಎಂದು ಸೂಚಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ