ಬೆಂಗಳೂರು: ಸಿಲಿಕಾನ್ ಸಿಟಿಯ ಐಟಿ ಉದ್ಯೋಗಿಗಳಾದ ದಾನಿಶ್ ಅಬ್ದಿ ಮತ್ತು ವೃಶಾಲಿ ಪ್ರಸಾದೆ ಅವರು ಐತಿಹಾಸಿಕ ಸಾಧನೆ ಮಾಡಿದ್ದಾರೆ. ಇವರು ಶ್ರೀಲಂಕಾದಿಂದ ಭಾರತಕ್ಕೆ ರಾಮಸೇತು ಮಾರ್ಗದ ಮೂಲಕ ‘ಸೈಡ್-ಬೈ-ಸೈಡ್’ (ಜೊತೆಜೊತೆಯಾಗಿ) ಈಜುವ ಮೂಲಕ ಈ ಸಾಧನೆ ಮಾಡಿದ ಮೊದಲ ದಂಪತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಮೇ 7 ರಂದು ಮುಂಜಾನೆ ಸುಮಾರು 4:30ಕ್ಕೆ ಶ್ರೀಲಂಕಾದ ತಲೈಮನ್ನಾರ್ನಿಂದ ತಮ್ಮ ಈಜು ಆರಂಭಿಸಿದ ಈ ದಂಪತಿ, ಸುಮಾರು 32 ಕಿಲೋಮೀಟರ್ ದೂರದ ಪಾಕ್ ಜಲಸಂಧಿಯನ್ನು (Palk Strait) ಯಶಸ್ವಿಯಾಗಿ ದಾಟಿದ್ದಾರೆ. ಅವರು ಅದೇ ದಿನ ಮಧ್ಯಾಹ್ನ ಸುಮಾರು 3:15ಕ್ಕೆ ತಮಿಳುನಾಡಿನ ಧನುಷ್ಕೋಡಿ ತಲುಪುವ ಮೂಲಕ ಈ ಸಾಹಸವನ್ನು ಪೂರೈಸಿದ್ದಾರೆ. ಈ ಸುದೀರ್ಘ ಪಯಣಕ್ಕೆ ದಂಪತಿ ಒಟ್ಟು 10 ಗಂಟೆ 45 ನಿಮಿಷಗಳನ್ನು ತೆಗೆದುಕೊಂಡಿದ್ದಾರೆ.
ಪ್ರತಿಕೂಲ ಹವಾಮಾನದ ನಡುವೆ ಸಾಹಸ
ಸಮುದ್ರದ ಬಲಿಷ್ಠ ಅಲೆಗಳು, ವೇಗವಾಗಿ ಬೀಸುವ ಗಾಳಿ ಮತ್ತು ನೀರಿನ ಪ್ರವಾಹವು ಇವರನ್ನು ಹಲವು ಬಾರಿ ದಾರಿತಪ್ಪಿಸಲು ಪ್ರಯತ್ನಿಸಿದವು. ಆದರೂ ಧೃತಿಗೆಡದ ದಾನಿಶ್ ಮತ್ತು ವೃಶಾಲಿ ಸತತವಾಗಿ ಈಜಿ ದಡ ಸೇರಿದ್ದಾರೆ. ಸೂರ್ಯೋದಯಕ್ಕೂ ಮುನ್ನವೇ ಕತ್ತಲ ನೀರಿನಲ್ಲಿ ಈಜಲು ಸಿದ್ಧರಾಗುತ್ತಿರುವ ದೃಶ್ಯಗಳು ಮತ್ತು ಅಲೆಗಳ ವಿರುದ್ಧ ಸೆಣಸಾಡುತ್ತಿರುವ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿವೆ.
ಈ ಸಾಹಸದ ಉದ್ದಕ್ಕೂ ಕಟ್ಟುನಿಟ್ಟಿನ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳಲಾಗಿತ್ತು. ದಂಪತಿ ಜೊತೆಗೆ ಸಹಾಯ ನೌಕೆಗಳು (Support boats), ವೈದ್ಯಕೀಯ ಸಿಬ್ಬಂದಿ ಮತ್ತು ಭಾರತೀಯ ಕೋಸ್ಟ್ ಗಾರ್ಡ್ ಸಿಬ್ಬಂದಿ ನಿಯೋಜನೆಗೊಂಡಿದ್ದರು.
ತರಬೇತಿ ಮತ್ತು ಸ್ಫೂರ್ತಿ
“ನಾವು ಶ್ರೀಲಂಕಾದಿಂದ ಭಾರತಕ್ಕೆ ಈಜಿ ಈ ಸಾಧನೆ ಮಾಡಿದ ಮೊದಲ ದಂಪತಿಯಾಗುತ್ತಿದ್ದೇವೆ! ನಮ್ಮ ಇಷ್ಟು ದಿನಗಳ ಕಠಿಣ ತರಬೇತಿ ಮತ್ತು ಶ್ರಮಕ್ಕೆ ಇಂದು ಪರೀಕ್ಷೆಯ ಕಾಲ” ಎಂದು ದಾನಿಶ್ ಈಜುವ ಮುನ್ನ ಇನ್ಸ್ಟಾಗ್ರಾಮ್ನಲ್ಲಿ ಬರೆದುಕೊಂಡಿದ್ದರು. ವಿಶೇಷವೆಂದರೆ, ಇವರಿಬ್ಬರೂ ಐಟಿ ಕ್ಷೇತ್ರದಲ್ಲಿ ವೃತ್ತಿ ಮಾಡುತ್ತಿದ್ದು, ಕೇವಲ ನಾಲ್ಕು ವರ್ಷಗಳ ಹಿಂದಷ್ಟೇ ಗಂಭೀರವಾಗಿ ಈಜು ತರಬೇತಿಯನ್ನು ಆರಂಭಿಸಿದ್ದರು ಎಂಬುದು ಗಮನಾರ್ಹ.
ಸಾಹಸ ಪ್ರಿಯರು ಮತ್ತು ಕ್ರೀಡಾಪಟುಗಳಿಗೆ ಸ್ಫೂರ್ತಿ ತುಂಬುವ ಉದ್ದೇಶದಿಂದ ಇಡೀ ಸಾಹಸವನ್ನು ಅವರು ಸಾಮಾಜಿಕ ಜಾಲತಾಣಗಳಲ್ಲಿ ದಾಖಲಿಸಿದ್ದಾರೆ. ಮುಕ್ತ-ನೀರಿನ ಈಜು (Open-water swimming) ಕ್ಷೇತ್ರದಲ್ಲಿ ಈ ದಂಪತಿ ಸಾಧನೆ ಹೊಸ ಮೈಲಿಗಲ್ಲಾಗಿ ಮೂಡಿಬಂದಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ