ಬೆಂಗಳೂರು : ವಿಶೇಷ ಸಮಗ್ರಪರಿಷ್ಕರಣೆ (Special Intensive Revision – SIR) ಪ್ರಕ್ರಿಯೆ ಪೂರ್ಣಗೊಂಡ ಬಳಿಕ ಚುನಾವಣಾ ಆಯೋಗವು ಕರ್ನಾಟಕದ ಕರಡು ಮತದಾರರ ಪಟ್ಟಿಯನ್ನು ಭಾನುವಾರ ಪ್ರಕಟಿಸಿದ್ದು, ಜೂನ್ 16ರ ವೇಳೆಗೆ ರಾಜ್ಯದಲ್ಲಿ ದಾಖಲಾಗಿದ್ದ 5.54 ಕೋಟಿ ಮತದಾರರ ಪೈಕಿ 4.46 ಕೋಟಿ ಮತದಾರರ ಹೆಸರುಗಳು ಕರಡು ಪಟ್ಟಿಯಲ್ಲಿ ಸೇರಿವೆ.
ರಾಜ್ಯ ಮುಖ್ಯ ಚುನಾವಣಾಧಿಕಾರಿ (CEO) ವಿ. ಅನ್ಬುಕುಮಾರ ಅವರು ಸುದ್ದಿಗೋಷ್ಠಿಯಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ್ದು, ಒಟ್ಟು 5,54,32,314 ಮತದಾರರ ಪೈಕಿ 4,46,35,975 ಎಣಿಕೆ ನಮೂನೆಗಳು (Enumeration Forms) ಡಿಜಿಟಲೀಕರಣಗೊಂಡಿವೆ. ಇದು ಹಿಂದಿನ ಮತದಾರರ ಪಟ್ಟಿಯ ಶೇ.80.52ರಷ್ಟು ಭಾಗವನ್ನು ಒಳಗೊಂಡಿದೆ ಎಂದು ಹೇಳಿದರು.
ಉಳಿದ 1,07,96,339 ಮತದಾರರನ್ನು ಎಎಸ್ಡಿಡಿಒ (ASDDO) ವರ್ಗಕ್ಕೆ ಸೇರಿಸಲಾಗಿದೆ. ಈ ವರ್ಗದಲ್ಲಿ ಗೈರುಹಾಜರಿರುವವರು (Absent), ಶಾಶ್ವತವಾಗಿ ಸ್ಥಳಾಂತರಗೊಂಡವರು (Shifted), ಮೃತಪಟ್ಟವರು (Dead), ಬೇರೆಡೆ ಈಗಾಗಲೇ ಮತದಾರರಾಗಿ ನೋಂದಾಯಿಸಿಕೊಂಡವರು (Duplicate/Already Enrolled) ಹಾಗೂ ಇತರೆ ಕಾರಣಗಳು (Other) ಒಳಗೊಂಡಿವೆ.
1.07 ಕೋಟಿ ಮತದಾರರು ಎಎಸ್ಡಿಡಿಒ ವರ್ಗದಲ್ಲಿ
ಎಎಸ್ಡಿಡಿಒ ವರ್ಗಕ್ಕೆ ಸೇರಿರುವವರಲ್ಲಿ:
65,45,679 ಮತದಾರರು (ಶೇ.11.81) ಶಾಶ್ವತವಾಗಿ ಸ್ಥಳಾಂತರಗೊಂಡವರು,
16,39,864 (ಶೇ.2.96) ಮೃತಪಟ್ಟವರು,
15,17,042 (ಶೇ.2.74) ಗೈರುಹಾಜರಿರುವವರು,
7,09,870 (ಶೇ.1.28) ಬೇರೆಡೆ ಈಗಾಗಲೇ ನೋಂದಾಯಿಸಿಕೊಂಡವರು,
3,83,884 (ಶೇ.0.69) ಇತರೆ ಕಾರಣಗಳಿಗೆ ಸೇರಿದ್ದಾರೆ.
ಬೆಂಗಳೂರಿನಲ್ಲಿ ರಾಜ್ಯ ಸರಾಸರಿಗಿಂತ ಹೆಚ್ಚಿನ ಪ್ರಮಾಣ
ರಾಜ್ಯದ ಸರಾಸರಿಗಿಂತ ಬೆಂಗಳೂರು ನಗರ ಜಿಲ್ಲೆಗಳಲ್ಲಿ ಎಎಸ್ಡಿಡಿಒ ವರ್ಗದ ಮತದಾರರ ಪ್ರಮಾಣ ಗಮನಾರ್ಹವಾಗಿ ಹೆಚ್ಚಿದೆ.
ಬೆಂಗಳೂರು ನಗರ ಜಿಲ್ಲೆ: 40.21 ಲಕ್ಷ ಮತದಾರರ ಪೈಕಿ 17,17,416 ಮಂದಿ (ಶೇ.42.71)
ಬಿಬಿಎಂಪಿ ಉತ್ತರ: 23.33 ಲಕ್ಷ ಮತದಾರರ ಪೈಕಿ 10,52,536 ಮಂದಿ (ಶೇ.45.12)
ಬಿಬಿಎಂಪಿ ಕೇಂದ್ರ: 18.90 ಲಕ್ಷ ಮತದಾರರ ಪೈಕಿ 8,60,723 ಮಂದಿ (ಶೇ.45.54)
ಬಿಬಿಎಂಪಿ ದಕ್ಷಿಣ: 21.45 ಲಕ್ಷ ಮತದಾರರ ಪೈಕಿ 10,58,028 ಮಂದಿ (ಶೇ.49.33) ಎಂದು ಅಂಕಿ-ಅಂಶಗಳು ತಿಳಿಸಿವೆ.
43.81 ಲಕ್ಷ ಮತದಾರರಿಗೆ ನೋಟಿಸ್
ನಮೂನೆಗಳಲ್ಲಿ ಅಸಂಗತತೆ ಕಂಡುಬಂದಿರುವ ಅಥವಾ ಯಾವುದೇ ಮ್ಯಾಪಿಂಗ್ ಇಲ್ಲದ 43,81,335 ಮತದಾರರಿಗೆ ನೋಟಿಸ್ ನೀಡಲಾಗುತ್ತದೆ ಎಂದು ಅನ್ಬುಕುಮಾರ ತಿಳಿಸಿದರು. ಇದು ಡಿಜಿಟಲೀಕೃತ 4.46 ಕೋಟಿ ನಮೂನೆಗಳ ಪೈಕಿ ಶೇ.9.82ರಷ್ಟಾಗಿದೆ.
ಸೆಪ್ಟೆಂಬರ್ 23ರವರೆಗೆ ಆಕ್ಷೇಪಣೆ ಮತ್ತು ಹಕ್ಕು ಮಂಡನೆಗೆ ಅವಕಾಶ
ಕರಡು ಮತದಾರರ ಪಟ್ಟಿ ಪ್ರಕಟವಾಗಿದೆ ಎಂದರೆ ಹೆಸರುಗಳನ್ನು ಶಾಶ್ವತವಾಗಿ ತೆಗೆದುಹಾಕಲಾಗಿದೆ ಎಂದು ಅರ್ಥವಲ್ಲ ಎಂದು ಚುನಾವಣಾ ಇಲಾಖೆ ಸ್ಪಷ್ಟಪಡಿಸಿದೆ. ಆಗಸ್ಟ್ 24ರಿಂದ ಸೆಪ್ಟೆಂಬರ್ 23ರವರೆಗೆ ಹಕ್ಕು ಮಂಡನೆ (Claims) ಮತ್ತು ಆಕ್ಷೇಪಣೆ (Objections) ಸಲ್ಲಿಸಲು ಅವಕಾಶವಿದೆ.
ಅರ್ಹ ಮತದಾರರು ತಮ್ಮ ಹೆಸರನ್ನು ಸೇರಿಸಿಕೊಳ್ಳಲು ಅರ್ಜಿ ಸಲ್ಲಿಸಬಹುದು.
ತಪ್ಪಾಗಿ ಸೇರಿರುವ ಹೆಸರುಗಳ ವಿರುದ್ಧ ಆಕ್ಷೇಪಣೆ ಸಲ್ಲಿಸಬಹುದು.
ವಿವರ ತಿದ್ದುಪಡಿಗೆ ಫಾರಂ-8 ಬಳಸಬಹುದು.
ತಪ್ಪು ಸೇರ್ಪಡೆ ವಿರುದ್ಧ ಫಾರಂ-7 ಸಲ್ಲಿಸಬಹುದು ಎಂದು ಚುನಾವಣಾ ಆಯೋಗ ತಿಳಿಸಿದೆ.
ಅಲ್ಲದೆ, ಗೈರುಹಾಜರಿದ್ದಾರೆ ಅಥವಾ ಸ್ಥಳಾಂತರಗೊಂಡಿದ್ದಾರೆ ಎಂದು ಗುರುತಿಸಲ್ಪಟ್ಟವರು, ದೇಶದ ಬೇರೆ ಭಾಗದಲ್ಲಿ ಮತದಾರರಾಗಿ ನೋಂದಾಯಿಸಿಲ್ಲ ಎಂಬ ಘೋಷಣೆಯೊಂದಿಗೆ ಫಾರಂ-6 ಸಲ್ಲಿಸಿ ತಮ್ಮ ಪ್ರಸ್ತುತ ವಿಳಾಸದಲ್ಲಿ ಹೆಸರು ಸೇರಿಸಿಕೊಳ್ಳಬಹುದು.
ಆನ್ಲೈನ್ ಮತ್ತು ಆಫ್ಲೈನ್ ಅರ್ಜಿ ಸಲ್ಲಿಕೆ
ಅರ್ಜಿಗಳನ್ನು ಚುನಾವಣಾ ನೋಂದಣಿ ಅಧಿಕಾರಿ (ERO), ಸಹಾಯಕ ಚುನಾವಣಾ ನೋಂದಣಿ ಅಧಿಕಾರಿ (AERO) ಅಥವಾ ಬೂತ್ ಮಟ್ಟದ ಅಧಿಕಾರಿಗಳಿಗೆ (BLO) ನೇರವಾಗಿ ಸಲ್ಲಿಸಬಹುದು. ಇದಲ್ಲದೆ ಇಸಿನೆಟ್ (ECINET) ಮೊಬೈಲ್ ಅಪ್ಲಿಕೇಶನ್ ಹಾಗೂ ಚುನಾವಣಾ ಆಯೋಗದ ವೋಟರ್ ಸರ್ವಿಸ್ ಪೋರ್ಟಲ್ ಮೂಲಕ ಆನ್ಲೈನ್ನಲ್ಲಿಯೂ ಅರ್ಜಿ ಸಲ್ಲಿಸಲು ಅವಕಾಶವಿದೆ.
ನೋಟಿಸ್ ನೀಡದೆ ಹೆಸರು ಅಳಿಸುವಂತಿಲ್ಲ
ಕರಡು ಪಟ್ಟಿಯಲ್ಲಿರುವ ಮತದಾರರ ಹೆಸರನ್ನು ಯಾವುದೇ ಕಾರಣಕ್ಕೂ ನೇರವಾಗಿ ಅಳಿಸಲು ಸಾಧ್ಯವಿಲ್ಲ ಎಂದು ಮುಖ್ಯ ಚುನಾವಣಾಧಿಕಾರಿ ಸ್ಪಷ್ಟಪಡಿಸಿದರು.
ನಮೂನೆಯಲ್ಲಿ ನೀಡಿರುವ ಹಿಂದಿನ ಎಸ್ಐಆರ್ ಮತದಾರರ ಪಟ್ಟಿ ವಿವರಗಳು ಲಭ್ಯವಿಲ್ಲದಿದ್ದರೆ ಅಥವಾ ದತ್ತಾಂಶದೊಂದಿಗೆ ಹೊಂದಿಕೆಯಾಗದಿದ್ದರೆ ಸಂಬಂಧಿತ ಮತದಾರರಿಗೆ ನೋಟಿಸ್ ನೀಡಲಾಗುತ್ತದೆ. ವಿಚಾರಣೆಯ ವೇಳೆ ದಾಖಲೆಗಳನ್ನು ಸಲ್ಲಿಸಲು ಅವಕಾಶ ಕಲ್ಪಿಸಲಾಗುತ್ತದೆ.
ಇದಲ್ಲದೆ, ಇಆರ್ಒ ಅಥವಾ ಎಇಆರ್ಒಗಳಿಂದ ನೋಟಿಸ್ ನೀಡಿ, ಕಾರಣಸಹಿತ ಆದೇಶ (Speaking Order) ಹೊರಡಿಸದೆ ಯಾವುದೇ ಹೆಸರನ್ನು ಕರಡು ಪಟ್ಟಿಯಿಂದ ತೆಗೆದುಹಾಕಲು ಸಾಧ್ಯವಿಲ್ಲ ಎಂದು ಅವರು ಪುನರುಚ್ಚರಿಸಿದರು.
ಮೇಲ್ಮನವಿಗೆ ಅವಕಾಶ
ಇಆರ್ಒ ತೀರ್ಮಾನದ ವಿರುದ್ಧ ಅಸಮಾಧಾನ ಹೊಂದಿರುವ ಮತದಾರರು ಜಿಲ್ಲಾ ದಂಡಾಧಿಕಾರಿ (District Magistrate) ಅವರ ಬಳಿ ಮೇಲ್ಮನವಿ ಸಲ್ಲಿಸಬಹುದು. ಅಲ್ಲಿನ ಆದೇಶದ ವಿರುದ್ಧ 30 ದಿನಗಳೊಳಗೆ ಮುಖ್ಯ ಚುನಾವಣಾಧಿಕಾರಿ ಅವರ ಮುಂದೆ ಮತ್ತೊಂದು ಮೇಲ್ಮನವಿ ಸಲ್ಲಿಸಲು ಅವಕಾಶವಿದೆ.
ಅಕ್ಟೋಬರ್ 27ಕ್ಕೆ ಅಂತಿಮ ಮತದಾರರ ಪಟ್ಟಿ
ಎಸ್ಐಆರ್ ಎಣಿಕೆ ಕಾರ್ಯವನ್ನು ಜೂನ್ 30ರಿಂದ ಆಗಸ್ಟ್ 17ರವರೆಗೆ ಬೂತ್ ಮಟ್ಟದ ಅಧಿಕಾರಿಗಳು ಮನೆ-ಮನೆಗೆ ತೆರಳಿ ನಡೆಸಿದ್ದರು.
ಕರಡು ಪಟ್ಟಿ ಪ್ರಕಟಣೆ: ಆಗಸ್ಟ್ 24
ಹಕ್ಕು ಮಂಡನೆ ಮತ್ತು ಆಕ್ಷೇಪಣೆ ಅವಧಿ: ಸೆಪ್ಟೆಂಬರ್ 23ರವರೆಗೆ
ನೋಟಿಸ್ ಮತ್ತು ಪ್ರಕರಣಗಳ ವಿಲೇವಾರಿ: ಅಕ್ಟೋಬರ್ 22ರವರೆಗೆ
ಅಂತಿಮ ಮತದಾರರ ಪಟ್ಟಿ ಪ್ರಕಟಣೆ: ಅಕ್ಟೋಬರ್ 27
ಅಕ್ಟೋಬರ್ 1, 2026 ಅನ್ನು ಅರ್ಹತಾ ದಿನಾಂಕವಾಗಿ ಪರಿಗಣಿಸಲಾಗಿದೆ.
ಮತಗಟ್ಟೆಗಳ ಸಂಖ್ಯೆಯೂ ಹೆಚ್ಚಳ
ಎಸ್ಐಆರ್ ಮೊದಲು ರಾಜ್ಯದಲ್ಲಿ 59,050 ಮತಗಟ್ಟೆಗಳಿದ್ದರೆ, ಕರಡು ಪಟ್ಟಿ ವೇಳೆ ಅವುಗಳ ಸಂಖ್ಯೆ 60,923ಕ್ಕೆ ಏರಿಕೆಯಾಗಿದೆ. ಅಂದರೆ 1,873 ಹೊಸ ಮತಗಟ್ಟೆಗಳು ಸೇರಿವೆ.
ಕರಡು ಪಟ್ಟಿಯಲ್ಲಿ ಹೆಸರು ಸೇರದ ಎಎಸ್ಡಿಡಿಒ ವರ್ಗದ ಮತದಾರರ ಬೂತ್ವಾರು ಪಟ್ಟಿಗಳು ಹಾಗೂ ಹೆಸರು ಸೇರದಿರುವ ಸಂಭವನೀಯ ಕಾರಣಗಳನ್ನು ಸಂಬಂಧಿತ ಇಆರ್ಒ ಕಚೇರಿಗಳಲ್ಲಿ ಮತ್ತು ಕರ್ನಾಟಕ ಮುಖ್ಯ ಚುನಾವಣಾಧಿಕಾರಿಗಳ ವೆಬ್ಸೈಟ್ನಲ್ಲಿ ಲಭ್ಯವಾಗುವಂತೆ ಮಾಡಲಾಗಿದೆ ಎಂದು ಅನ್ಬುಕುಮಾರ್ ತಿಳಿಸಿದರು.
ಯುವ ಮತದಾರರ ಸಂಖ್ಯೆ
ಕರಡು ಮತದಾರರ ಪಟ್ಟಿಯಲ್ಲಿ:
18-19 ವರ್ಷ ವಯೋಮಾನದ 3,70,341 ಯುವ ಮತದಾರರು,
20-29 ವರ್ಷ ವಯೋಮಾನದ 83,87,880 ಮತದಾರರು,
5,55,691 ಅಂಗವಿಕಲ ಮತದಾರರು,
85 ವರ್ಷ ಮೇಲ್ಪಟ್ಟ 3,92,302 ಹಿರಿಯ ನಾಗರಿಕ ಮತದಾರರು,
951 ವಿದೇಶಿ ಮತದಾರರು,
44,176 ಸೇವಾ ಮತದಾರರು ಸೇರಿದ್ದಾರೆ ಎಂದು ಚುನಾವಣಾ ಇಲಾಖೆ ಮಾಹಿತಿ ನೀಡಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ