ವಾಷಿಂಗ್ಟನ್ : ಇರಾನ್ನ ತೈಲ ಮತ್ತು ಪೆಟ್ರೋಕೆಮಿಕಲ್ ವ್ಯಾಪಾರಕ್ಕೆ ಸಂಬಂಧಿಸಿದ ಚಟುವಟಿಕೆಗಳಲ್ಲಿ ಭಾಗಿಯಾಗಿದ್ದಾರೆ ಎಂಬ ಆರೋಪದ ಮೇಲೆ ಅಮೆರಿಕವು ಭಾರತ ಮೂಲದ ನಾಲ್ಕು ಕಂಪನಿಗಳು ಹಾಗೂ ಮೂವರು ಭಾರತೀಯ ಪ್ರಜೆಗಳ ವಿರುದ್ಧ ನಿರ್ಬಂಧಗಳನ್ನು (Sanctions) ವಿಧಿಸಿದೆ. ಇರಾನ್ ಆಡಳಿತಕ್ಕೆ ಹಣಕಾಸು ಒದಗಿಸುವ ಆದಾಯ ಮೂಲಗಳನ್ನು ಕಡಿತಗೊಳಿಸುವ ಉದ್ದೇಶದಿಂದ ಅಮೆರಿಕ ಆರಂಭಿಸಿರುವ “ಆಪರೇಷನ್ ಎಕನಾಮಿಕ್ ಔಟ್ಕಾಸ್ಟ್” (Operation Economic Outcast) ಅಭಿಯಾನದ ಭಾಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ.
ಅಮೆರಿಕದ ವಿದೇಶಾಂಗ ಇಲಾಖೆ (State Department) ಬಿಡುಗಡೆ ಮಾಡಿದ ಮಾಹಿತಿಯ ಪ್ರಕಾರ, ನಿರ್ಬಂಧಕ್ಕೆ ಒಳಗಾದ ಭಾರತ ಮೂಲದ ಕಂಪನಿಗಳು ಪೋರ್ಟೀಸ್ ಪಾರ್ಟ್ನರ್ಸ್ LLP (Portease Partners LLP), ಸದಾಶಿವ ಓವರ್ಸೀಸ್ ಲಿಮಿಟೆಡ್ (Sadashiva Overseas Ltd), ಪಿಪಿ ಸಾಫ್ಟ್ಟೆಕ್ ಪ್ರೈವೇಟ್ ಲಿಮಿಟೆಡ್ (PP Softtech Pvt Ltd) ಹಾಗೂ ಪ್ರಕೃತೀಸ್ ಇನ್ಫ್ರಾ ಇಂಪೆಕ್ಸ್ ಇಂಡಿಯಾ ಪ್ರೈವೇಟ್ ಲಿಮಿಟೆಡ್ (Prakrutees Infra Impex India Pvt Ltd) ಆಗಿವೆ.
ಇದೇ ವೇಳೆ, ಹರೀಶ ರಾಮಚಂದ್ರ ರಂಗಿ, ಇಂದ್ರಿಸ್ ಮಿಯಾ ಅಶ್ರಫ್ಮಿಯಾ ಶೇಖ್ ಹಾಗೂ ಪ್ರಶಾಂತ ಗರ್ಗ್ ಎಂಬ ಮೂವರು ಭಾರತೀಯರ ಹೆಸರನ್ನೂ ಅಮೆರಿಕ ತನ್ನ ನಿರ್ಬಂಧ ಪಟ್ಟಿಯಲ್ಲಿ ಸೇರಿಸಿದೆ. ಹರೀಶ ರಾಮಚಂದ್ರ ರಂಗಿ ಮತ್ತು ಇಂದ್ರಿಸ್ಮಿಯಾ ಅಶ್ರಫ್ಮಿಯಾ ಶೇಖ್ ಅವರು ಪೋರ್ಟೀಸ್ ಪಾರ್ಟ್ನರ್ಸ್ ಎಲ್ಎಲ್ಪಿ(LLP)ಯ ನಾಮನಿರ್ದೇಶಿತ ಪಾಲುದಾರರು (Designated Partners) ಆಗಿದ್ದು, ಪ್ರಶಾಂತ ಗರ್ಗ್ ಅವರು ಪಿಪಿ ಸಾಫ್ಟ್ಟೆಕ್ಗೆ ಸಂಬಂಧಿಸಿದವರಾಗಿದ್ದಾರೆ.
ಅಮೆರಿಕದ ಆರೋಪದ ಪ್ರಕಾರ, ಕಸ್ಟಮ್ಸ್ ಬ್ರೋಕರ್ ಆಗಿ ಕಾರ್ಯನಿರ್ವಹಿಸುತ್ತಿರುವ ಪೋರ್ಟೀಸ್ ಪಾರ್ಟ್ನರ್ಸ್ ಎಲ್ಎಲ್ಪಿ ಸಂಸ್ಥೆ ಇರಾನ್ನ ಪೆಟ್ರೋಕೆಮಿಕಲ್ ಉತ್ಪನ್ನಗಳ ಸಾಗಣೆಗಳನ್ನು ಭಾರತಕ್ಕೆ ಆಮದು ಮಾಡಿಸಲು ನೆರವು ನೀಡಿದೆ.
ಅದೇ ರೀತಿ, ಸದಾಶಿವ ಓವರ್ಸೀಸ್ ಸಂಸ್ಥೆ ವಿವಿಧ ಕಂಪನಿಗಳ ಮೂಲಕ ಸುಮಾರು 6.9 ಕೋಟಿ ಅಮೆರಿಕನ್ ಡಾಲರ್ (69 ಮಿಲಿಯನ್ ಡಾಲರ್) ಮೌಲ್ಯದ ಇರಾನ್ ಮೂಲದ ಪೆಟ್ರೋಲಿಯಂ ಉತ್ಪನ್ನಗಳನ್ನು ಆಮದು ಮಾಡಿಕೊಂಡಿದೆ ಎಂದು ಅಮೆರಿಕ ಆರೋಪಿಸಿದೆ.
ಇನ್ನೊಂದೆಡೆ, ಪಿಪಿ ಸಾಫ್ಟ್ಟೆಕ್ ಮತ್ತು ಪ್ರಕೃತೀಸ್ ಇನ್ಫ್ರಾ ಇಂಪೆಕ್ಸ್ ಸಂಸ್ಥೆಗಳು ತಲಾ ಸುಮಾರು 2.5 ಕೋಟಿ ಅಮೆರಿಕನ್ ಡಾಲರ್ (25 ಮಿಲಿಯನ್ ಡಾಲರ್) ಮೌಲ್ಯದ ಇರಾನ್ ಮೂಲದ ಪೆಟ್ರೋಲಿಯಂ ಉತ್ಪನ್ನಗಳನ್ನು ಆಮದು ಮಾಡಿಕೊಂಡಿವೆ ಎಂದು ವಿದೇಶಾಂಗ ಇಲಾಖೆ ಹೇಳಿದೆ.
ಈ ವ್ಯಕ್ತಿಗಳು ಮತ್ತು ಸಂಸ್ಥೆಗಳು ಇರಾನ್ನ ಪೆಟ್ರೋಕೆಮಿಕಲ್ ಉತ್ಪನ್ನಗಳ ಖರೀದಿ, ಸ್ವಾಧೀನ, ಮಾರಾಟ, ಸಾಗಣೆ ಅಥವಾ ಮಾರುಕಟ್ಟೆಗೊಳಿಸುವಿಕೆಗೆ ಸಂಬಂಧಿಸಿದ ಮಹತ್ವದ ವ್ಯವಹಾರಗಳಲ್ಲಿ ತಿಳಿದೇ ಭಾಗವಹಿಸಿದ್ದರಿಂದ ಅವರ ವಿರುದ್ಧ ನಿರ್ಬಂಧ ಕ್ರಮ ಕೈಗೊಳ್ಳಲಾಗಿದೆ ಎಂದು ಅಮೆರಿಕ ಸ್ಪಷ್ಟಪಡಿಸಿದೆ.
ಸೋಮವಾರ ಅಮೆರಿಕದ ಖಜಾನೆ ಇಲಾಖೆ (US Treasury Department) ವಿಧಿಸಿದ ಸಮಕಾಲೀನ ನಿರ್ಬಂಧ ಕ್ರಮಗಳಲ್ಲಿ ಸೇರಿದ್ದ 60 ವ್ಯಕ್ತಿಗಳು, ಸಂಸ್ಥೆಗಳು ಹಾಗೂ ಹಡಗುಗಳ ಪಟ್ಟಿಯಲ್ಲಿ ಈ ಭಾರತೀಯ ಕಂಪನಿಗಳು ಮತ್ತು ವ್ಯಕ್ತಿಗಳೂ ಸೇರಿದ್ದಾರೆ.
ಇರಾನ್ ವಿರುದ್ಧ ಅಮೆರಿಕದ ಆರ್ಥಿಕ ಒತ್ತಡ
ಇರಾನ್ನ ಆರ್ಥಿಕತೆಯನ್ನು ದುರ್ಬಲಗೊಳಿಸುವ ಉದ್ದೇಶದಿಂದ ಅಮೆರಿಕ ಈ ವಾರದ ಆರಂಭದಲ್ಲೇ ಇರಾನ್ನೊಂದಿಗೆ ವ್ಯಾಪಾರ ಸಂಬಂಧ ಮುಂದುವರಿಸುವ ದೇಶಗಳ ವಿರುದ್ಧ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಕೆ ನೀಡಿತ್ತು. ಆದರೆ ತಕ್ಷಣವೇ ದಂಡಾತ್ಮಕ ಕ್ರಮಗಳನ್ನು ಜಾರಿಗೆ ತರಲಾಗುವುದಿಲ್ಲ ಎಂದು ತಿಳಿಸಿತ್ತು.
ಇದರ ನಡುವೆಯೇ, ಇರಾನ್ನೊಂದಿಗೆ ಉಂಟಾಗಿದ್ದ ಉದ್ವಿಗ್ನತೆಯ ಹಿನ್ನೆಲೆಯಲ್ಲಿ ಮಧ್ಯಪ್ರಾಚ್ಯದ ಕೆಲವು ರಾಯಭಾರಿ ಕಚೇರಿಗಳಿಂದ ಹಿಂತೆಗೆದುಕೊಳ್ಳಲಾಗಿದ್ದ ಅಥವಾ ಸಿಬ್ಬಂದಿ ಸಂಖ್ಯೆಯನ್ನು ಕಡಿತಗೊಳಿಸಲಾಗಿದ್ದ ಅಮೆರಿಕದ ರಾಜತಾಂತ್ರಿಕ ಸಿಬ್ಬಂದಿಯನ್ನು ಮತ್ತೆ ನಿಯೋಜಿಸುವ ಪ್ರಕ್ರಿಯೆ ಆರಂಭವಾಗಿದೆ ಎಂದು ರಾಯಿಟರ್ಸ್ ವರದಿ ತಿಳಿಸಿದೆ.
ಈ ಕ್ರಮವು ಸಮೀಪದ ಭವಿಷ್ಯದಲ್ಲಿ ಇರಾನ್ನೊಂದಿಗಿನ ಸಂಘರ್ಷ ಮತ್ತಷ್ಟು ಉಲ್ಬಣಗೊಳ್ಳುವ ಅಪಾಯ ಕಡಿಮೆಯಾಗಿದೆ ಎಂದು ವಾಷಿಂಗ್ಟನ್ ಅಂದಾಜಿಸುತ್ತಿರುವುದನ್ನು ಸೂಚಿಸುತ್ತದೆ. ಆದಾಗ್ಯೂ, ಕೆಲವು ರಾಯಭಾರಿ ಕಚೇರಿಗಳು ಆರಂಭಿಕ ಹಂತದಲ್ಲಿ ಪೂರ್ಣ ಸಾಮರ್ಥ್ಯಕ್ಕಿಂತ ಕಡಿಮೆ ಸಿಬ್ಬಂದಿಯೊಂದಿಗೆ ಕಾರ್ಯನಿರ್ವಹಿಸಲಿವೆ ಎಂದು ವರದಿಯಲ್ಲಿ ಹೇಳಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ