ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಅವರ ಜನಪ್ರಿಯತೆ ಸಾರ್ವಕಾಲಿಕ ಕನಿಷ್ಠ ಮಟ್ಟಕ್ಕೆ ಕುಸಿದಿದ್ದು, ಮುಂದಿನ ತಿಂಗಳು ನಡೆಯಲಿರುವ ಮಧ್ಯಂತರ ಚುನಾವಣೆಗಳಲ್ಲಿ ಆಡಳಿತಾರೂಢ ರಿಪಬ್ಲಿಕನ್‌ ಪಕ್ಷಕ್ಕೆ ಭಾರಿ ಹಿನ್ನಡೆಯಾಗುವ ಸಾಧ್ಯತೆ ದಟ್ಟವಾಗಿದೆ.
ಟ್ರಂಪ್ ಅವರ ಕಾರ್ಯವೈಖರಿಗೆ ಕೇವಲ ಶೇ. 31ರಷ್ಟು ಅಮೆರಿಕನ್ನರು ಮಾತ್ರ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಎಂದು ರಾಯಿಟರ್ಸ್‌/ಇಪ್ಸೋಸ್‌ (Reuters/Ipsos) ಸಮೀಕ್ಷೆ ತಿಳಿಸಿದೆ. ಟ್ರಂಪ್ ಅವರ ಎರಡು ಅಧ್ಯಕ್ಷೀಯ ಅವಧಿಗಳಲ್ಲೂ ಇಷ್ಟು ಕಡಿಮೆ ಜನಪ್ರಿಯತೆ ದಾಖಲಾಗಿರಲಿಲ್ಲ ಎಂಬುದು ಗಮನಾರ್ಹ.
ಅಮೆರಿಕದ ಕಾಂಗ್ರೆಸ್‌ ಚುನಾವಣೆಯು ಈಗಲೇ ನಡೆದರೆ ಯಾವ ಪಕ್ಷಕ್ಕೆ ಮತ ನೀಡುತ್ತೀರಿ ಎಂಬ ಪ್ರಶ್ನೆಗೆ ಶೇ. 47ರಷ್ಟು ಜನರು ಡೆಮಾಕ್ರಟಿಕ್‌ ಪಕ್ಷವನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಟ್ರಂಪ್ ಅವರ ರಿಪಬ್ಲಿಕನ್‌ ಪಕ್ಷಕ್ಕೆ ಶೇ. 35ರಷ್ಟು ಜನರು ಮಾತ್ರ ಬೆಂಬಲ ಸೂಚಿಸಿದ್ದಾರೆ. ಈ ಅಂಕಿಅಂಶಗಳು ನವೆಂಬರ್‌ 3ರಂದು ನಡೆಯಲಿರುವ ಚುನಾವಣೆಯಲ್ಲಿ ಡೆಮಾಕ್ರಟಿಕ್‌ ಪಕ್ಷವು ಕಾಂಗ್ರೆಸ್‌ನ ಕೆಳಮನೆ ಪ್ರತಿನಿಧಿಗಳ ಸಭೆ (ಹೌಸ್‌ ಆಫ್‌ ರೆಪ್ರೆಸೆಂಟೇಟಿವ್ಸ್‌) ಮತ್ತು ಮೇಲ್ಮನೆ ಸೆನೆಟ್‌ ಎರಡರಲ್ಲೂ ಬಹುಮತ ಗಳಿಸಬಹುದು ಎಂಬ ನಿರೀಕ್ಷೆಗೆ ಬಲ ನೀಡಿವೆ.
ಪ್ರಸ್ತುತ ಕಾಂಗ್ರೆಸ್‌ನ ಎರಡೂ ಸದನಗಳಲ್ಲಿ ರಿಪಬ್ಲಿಕನ್‌ ಪಕ್ಷ ಅಲ್ಪ ಬಹುಮತ ಹೊಂದಿದೆ. ಮಧ್ಯಂತರ ಚುನಾವಣೆಯಲ್ಲಿ ಪಕ್ಷವು ಯಾವುದಾದರೂ ಒಂದು ಸದನದ ನಿಯಂತ್ರಣ ಕಳೆದುಕೊಂಡರೂ ಟ್ರಂಪ್ ತಮ್ಮ ಆಡಳಿತದ ಪ್ರಮುಖ ಕಾರ್ಯಸೂಚಿಗಳನ್ನು ಜಾರಿಗೆ ತರುವುದು ಕಷ್ಟವಾಗಬಹುದು.
ಆರ್ಥಿಕ ನಿರ್ವಹಣೆ ಬಗ್ಗೆ ಶೇ. 68ರಷ್ಟು ಜನರಿಗೆ ಅಸಮಾಧಾನ
ಟ್ರಂಪ್ ಅವರ ಜನಪ್ರಿಯತೆ ಕುಸಿಯಲು ಆರ್ಥಿಕ ಪರಿಸ್ಥಿತಿ ಪ್ರಮುಖ ಕಾರಣವಾಗಿದೆ. ಅಮೆರಿಕದ ಆರ್ಥಿಕತೆಯನ್ನು ನಿರ್ವಹಿಸುವಲ್ಲಿ ಅಧ್ಯಕ್ಷ ಟ್ರಂಪ್ ವಿಫಲರಾಗಿದ್ದಾರೆ ಎಂದು ಶೇ. 68ರಷ್ಟು ಅಮೆರಿಕನ್ನರು ಅಭಿಪ್ರಾಯಪಟ್ಟಿದ್ದಾರೆ. ಈ ಪೈಕಿ ಶೇ. 37ರಷ್ಟು ಮಂದಿ ರಿಪಬ್ಲಿಕನ್‌ ಪಕ್ಷದ ಬೆಂಬಲಿಗರಾಗಿರುವುದು ಆಡಳಿತ ಪಕ್ಷಕ್ಕೆ ಎಚ್ಚರಿಕೆಯ ಸಂಕೇತವಾಗಿದೆ.
ದೇಶದ ಜನರನ್ನು ಕಾಡುತ್ತಿರುವ ಜೀವನ ವೆಚ್ಚದ ಹೆಚ್ಚಳ ಸೇರಿದಂತೆ ಪ್ರಮುಖ ಸಮಸ್ಯೆಗಳ ಬಗ್ಗೆ ಟ್ರಂಪ್ ಸಾಕಷ್ಟು ಗಮನ ಹರಿಸುತ್ತಿಲ್ಲ ಎಂಬ ಅಭಿಪ್ರಾಯ ಮತದಾರರಲ್ಲಿ ಇದೆ ಎಂದು ವಿವಿಧ ಸಮೀಕ್ಷೆಗಳು ಪದೇಪದೆ ಸೂಚಿಸಿವೆ. ದಿನಬಳಕೆಯ ವಸ್ತುಗಳ ಬೆಲೆ ಹೆಚ್ಚಳ, ಇಂಧನ ಬೆಲೆ ಏರಿಕೆ ಮತ್ತು ಗೃಹ ಸಾಲದ ಬಡ್ಡಿದರ ಹೆಚ್ಚಳದಂತಹ ವಿಷಯಗಳು ಜನರ ಅಸಮಾಧಾನವನ್ನು ಹೆಚ್ಚಿಸಿವೆ.
2024ರ ಅಧ್ಯಕ್ಷೀಯ ಚುನಾವಣಾ ಪ್ರಚಾರದ ಸಂದರ್ಭದಲ್ಲಿ ಒಂದು ಗ್ಯಾಲನ್‌ ಪೆಟ್ರೋಲ್‌ ಬೆಲೆಯನ್ನು ಎರಡು ಡಾಲರ್‌ಗಿಂತಲೂ ಕಡಿಮೆ ಮಟ್ಟಕ್ಕೆ ಇಳಿಸುವುದಾಗಿ ಟ್ರಂಪ್ ಭರವಸೆ ನೀಡಿದ್ದರು. ಆದರೆ, ಪ್ರಸ್ತುತ ಅಮೆರಿಕದಲ್ಲಿ ಒಂದು ಗ್ಯಾಲನ್‌ ಪೆಟ್ರೋಲ್‌ನ ಸರಾಸರಿ ಬೆಲೆ 4.29 ಡಾಲರ್‌ (ಸುಮಾರು 3.22 ಪೌಂಡ್‌) ಇದೆ. ಇದು ಅವರು ನೀಡಿದ್ದ ಭರವಸೆಗೂ ವಾಸ್ತವ ಸ್ಥಿತಿಗೂ ಇರುವ ಅಂತರವನ್ನು ತೋರಿಸುತ್ತದೆ.
ಅದೇ ರೀತಿ, ಗೃಹ ಸಾಲದ ಬಡ್ಡಿದರವನ್ನು ಶೇ. 2ಕ್ಕೆ ಇಳಿಸುವುದಾಗಿಯೂ ಟ್ರಂಪ್ ಹೇಳಿದ್ದರು. ಆದರೆ, ಪ್ರಸ್ತುತ 30 ವರ್ಷಗಳ ಸ್ಥಿರ ಬಡ್ಡಿದರದ ಗೃಹ ಸಾಲದ ಸರಾಸರಿ ಬಡ್ಡಿದರ ಶೇ. 7.4ರಷ್ಟಿದೆ. ಈ ವ್ಯತ್ಯಾಸವೂ ಜನರ ನಿರೀಕ್ಷೆಗಳನ್ನು ಈಡೇರಿಸುವಲ್ಲಿ ಆಡಳಿತ ವಿಫಲವಾಗಿದೆ ಎಂಬ ಟೀಕೆಗೆ ಕಾರಣವಾಗಿದೆ.
ಇನ್ನೊಂದೆಡೆ, ಟ್ರಂಪ್ ಅವರ ಸಾಮಾಜಿಕ ಜಾಲತಾಣದ ಪೋಸ್ಟ್‌ಗಳು ಕೂಡ ವಿವಾದಕ್ಕೆ ಕಾರಣವಾಗುತ್ತಿವೆ. ಸೋಮವಾರ ಅವರು ಅಮೆರಿಕದ ನ್ಯೂ ಮೆಕ್ಸಿಕೊ ರಾಜ್ಯದ ಹೆಸರನ್ನು ‘ನ್ಯೂ ಅಮೆರಿಕ’ ಎಂದು ಬದಲಿಸಬೇಕು ಎಂದು ಹೇಳುವ ಮೂಲಕ ಹೊಸ ಚರ್ಚೆಗೆ ನಾಂದಿ ಹಾಡಿದ್ದಾರೆ.
ಕಾನ್ಸಾಸ್‌ನಲ್ಲಿ ನಡೆಯಲಿರುವ ರ‍್ಯಾಲಿಗೂ ಮುನ್ನ ತಮ್ಮ ‘ಟ್ರುತ್‌ ಸೋಶಿಯಲ್‌’ (Truth Social) ಖಾತೆಯಲ್ಲಿ ಪೋಸ್ಟ್‌ ಮಾಡಿದ್ದ ಟ್ರಂಪ್, “ನಾವು ಮೆಕ್ಸಿಕೊ ಅಲ್ಲ, ನಾವು ಅಮೆರಿಕ ಸಂಯುಕ್ತ ಸಂಸ್ಥಾನ!” ಎಂದು ಬರೆದಿದ್ದರು.
ಇತ್ತೀಚಿನ ದಿನಗಳಲ್ಲಿ ಹಲವು ಭೌಗೋಳಿಕ ಸ್ಥಳಗಳ ಹೆಸರುಗಳನ್ನು ಬದಲಿಸುವ ಪ್ರಯತ್ನಕ್ಕೆ ಟ್ರಂಪ್ ಮುಂದಾಗಿದ್ದಾರೆ. ಇತ್ತೀಚೆಗಷ್ಟೇ ಒಂಟಾರಿಯೊ ಸರೋವರವನ್ನು ‘ಲೇಕ್‌ ಅಮೆರಿಕ’ ಎಂದು ಕರೆಯುವಂತೆ ಅವರು ಆದೇಶಿಸಿದ್ದರು.
ಆದರೆ, ನ್ಯೂ ಮೆಕ್ಸಿಕೊ ಎಂಬ ಹೆಸರು ಅಮೆರಿಕ ಸಂಯುಕ್ತ ಸಂಸ್ಥಾನ ಅಸ್ತಿತ್ವಕ್ಕೆ ಬರುವುದಕ್ಕೂ ಮುನ್ನ, 1600ರ ದಶಕದಿಂದ ಬಳಕೆಯಲ್ಲಿದೆ. ಈ ರಾಜ್ಯದ ಹೆಸರನ್ನು ಅಧಿಕೃತವಾಗಿ ಬದಲಿಸಬೇಕಾದರೆ ರಾಜ್ಯ ಸರ್ಕಾರವೇ ಆ ನಿರ್ಧಾರ ಕೈಗೊಳ್ಳಬೇಕಾಗುತ್ತದೆ. ಅಧ್ಯಕ್ಷರ ಹೇಳಿಕೆ ರಾಜಕೀಯ ಚರ್ಚೆಗೆ ಕಾರಣವಾಗಿದ್ದರೂ, ಹೆಸರಿನ ಬದಲಾವಣೆ ಸ್ವಯಂಚಾಲಿತವಾಗಿ ಜಾರಿಗೆ ಬರಲು ಸಾಧ್ಯವಿಲ್ಲ.
ಇರಾನ್‌ ಮೇಲಿನ ದಾಳಿ ಬಳಿಕ ಜನಪ್ರಿಯತೆಗೆ ಹೊಡೆತ
ಫೆಬ್ರವರಿಯಲ್ಲಿ ಇರಾನ್‌ ಮೇಲೆ ಸೇನಾ ದಾಳಿ ನಡೆಸಲು ಟ್ರಂಪ್ ಆದೇಶಿಸಿದ ಬಳಿಕ ಅವರ ಜನಪ್ರಿಯತೆಗೆ ಹಿನ್ನಡೆಯಾಗಿದೆ ಎಂದು ವರದಿ ಹೇಳಿದೆ. ಈ ಬೆಳವಣಿಗೆಯ ನಂತರ ಇಂಧನ ಬೆಲೆಗಳು ಮತ್ತು ಸಾಲದ ವೆಚ್ಚದಲ್ಲಿ ಏರಿಕೆಯಾಗಿದೆ. ಈಗಾಗಲೇ ಜೀವನ ವೆಚ್ಚದ ಹೆಚ್ಚಳದಿಂದ ತೊಂದರೆ ಅನುಭವಿಸುತ್ತಿರುವ ಜನರ ಮೇಲೆ ಇವುಗಳು ಮತ್ತಷ್ಟು ಒತ್ತಡ ಉಂಟುಮಾಡಿವೆ.
ಹೀಗಾಗಿ, ಆರ್ಥಿಕ ನಿರ್ವಹಣೆ, ಇಂಧನ ಬೆಲೆ ಮತ್ತು ಗೃಹ ಸಾಲದ ಬಡ್ಡಿದರದಂತಹ ವಿಚಾರಗಳು ಮುಂಬರುವ ಮಧ್ಯಂತರ ಚುನಾವಣೆಯಲ್ಲಿ ಪ್ರಮುಖ ಚರ್ಚೆಯ ವಿಷಯಗಳಾಗುವ ಸಾಧ್ಯತೆಯಿದೆ. ಟ್ರಂಪ್ ಅವರ ಆಡಳಿತದ ಬಗ್ಗೆ ಜನರ ಅಭಿಪ್ರಾಯವನ್ನು ಅಳೆಯುವ ಚುನಾವಣೆಯಾಗಿ ಇದನ್ನು ರಾಜಕೀಯ ವಲಯಗಳು ಪರಿಗಣಿಸುತ್ತಿವೆ.
ಕಾಂಗ್ರೆಸ್‌ ನಿಯಂತ್ರಣಕ್ಕಾಗಿ ನಿರ್ಣಾಯಕ ಸಮರ
ಅಮೆರಿಕದ ಅಧ್ಯಕ್ಷರ ನಾಲ್ಕು ವರ್ಷಗಳ ಅಧಿಕಾರಾವಧಿಯ ಮಧ್ಯದಲ್ಲಿ ನಡೆಯುವ ಚುನಾವಣೆಗಳನ್ನು ಮಧ್ಯಂತರ ಚುನಾವಣೆಗಳು ಎಂದು ಕರೆಯಲಾಗುತ್ತದೆ.
ಪ್ರಸ್ತುತ ಪ್ರತಿನಿಧಿಗಳ ಸಭೆಯಲ್ಲಿ ರಿಪಬ್ಲಿಕನ್‌ ಪಕ್ಷವು 218 ಸ್ಥಾನಗಳನ್ನು ಹೊಂದಿದ್ದರೆ, ಡೆಮಾಕ್ರಟಿಕ್‌ ಪಕ್ಷವು 214 ಸ್ಥಾನಗಳನ್ನು ಹೊಂದಿದೆ. ಸೆನೆಟ್‌ನಲ್ಲಿ ರಿಪಬ್ಲಿಕನ್‌ ಪಕ್ಷದ ಬಲ 53 ಆಗಿದ್ದರೆ, ಡೆಮಾಕ್ರಟಿಕ್‌ ಪಕ್ಷವು 47 ಸ್ಥಾನಗಳನ್ನು ಹೊಂದಿದೆ. ಹೀಗಾಗಿ, ಎರಡೂ ಸದನಗಳಲ್ಲಿ ರಿಪಬ್ಲಿಕನ್‌ ಪಕ್ಷದ ಬಹುಮತದ ಅಂತರ ಕಡಿಮೆಯಾಗಿದೆ.
ಈ ಬಾರಿಯ ಮಧ್ಯಂತರ ಚುನಾವಣೆಯಲ್ಲಿ ನವೆಂಬರ್‌ 3ರಂದು ಅಮೆರಿಕನ್ನರು ಪ್ರತಿನಿಧಿಗಳ ಸಭೆಯ 435 ಮತದಾನದ ಹಕ್ಕು ಹೊಂದಿರುವ ಎಲ್ಲ ಸದಸ್ಯರು ಹಾಗೂ 100 ಸದಸ್ಯ ಬಲದ ಸೆನೆಟ್‌ನ 35 ಸದಸ್ಯರನ್ನು ಆಯ್ಕೆ ಮಾಡಲು ಸುಮಾರು ಈ ಬಾರಿ ಒಟ್ಟಾರೆ 10 ಕೋಟಿಗೂ ಹೆಚ್ಚು ಜನರು ಮತ ಚಲಾಯಿಸುವ ನಿರೀಕ್ಷೆಯಿದೆ. ಆಯ್ಕೆಯಾಗುವ ಈ ಸದಸ್ಯರು ಒಟ್ಟಾಗಿ ಅಮೆರಿಕದ 120ನೇ ಕಾಂಗ್ರೆಸ್‌ ರಚಿಸಲಿದ್ದಾರೆ.
ಅಧ್ಯಕ್ಷೀಯ ಚುನಾವಣೆ ನಡೆದು ಎರಡು ವರ್ಷಗಳ ಬಳಿಕ ನಡೆಯುವ ಮಧ್ಯಂತರ ಚುನಾವಣೆಗಳು ಸಾಮಾನ್ಯವಾಗಿ ದೇಶದ ಮತದಾರರ ಮನೋಭಾವವನ್ನು ಅಳೆಯುವ ಪರೀಕ್ಷೆಯಾಗಿ ಪರಿಗಣಿಸಲ್ಪಡುತ್ತವೆ. ಇಂತಹ ಚುನಾವಣೆಗಳಲ್ಲಿ ಸಾಮಾನ್ಯವಾಗಿ ಹಾಲಿ ಅಧ್ಯಕ್ಷರ ಪಕ್ಷಕ್ಕೆ ಹಿನ್ನಡೆಯಾಗುವ ಸಾಧ್ಯತೆ ಹೆಚ್ಚಿರುತ್ತದೆ. ಪ್ರಸ್ತುತ ಚುನಾವಣಾ ಮುನ್ಸೂಚನೆಗಳ ಪ್ರಕಾರ, ಪ್ರತಿನಿಧಿಗಳ ಸಭೆಯಲ್ಲಿ ಡೆಮಾಕ್ರಟಿಕ್‌ ಪಕ್ಷ ಬಹುಮತ ಗಳಿಸುವ ಸಾಧ್ಯತೆ ಹೆಚ್ಚಿದೆ. ಇತ್ತ ಸೆನೆಟ್‌ನಲ್ಲಿನ ಸ್ಪರ್ಧೆಯೂ ತೀವ್ರ ಪೈಪೋಟಿಯ ಹಂತಕ್ಕೆ ತಲುಪಿದೆ.
ಈ ಚುನಾವಣೆಯಲ್ಲಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್ ಮತ್ತು ಉಪಾಧ್ಯಕ್ಷರು ನೇರವಾಗಿ ಚುನಾವಣೆಗೆ ಸ್ಪರ್ಧಿಸುತ್ತಿಲ್ಲ. ಆದರೂ, ಮಧ್ಯಂತರ ಚುನಾವಣೆಗಳನ್ನು ಸಾಮಾನ್ಯವಾಗಿ ಹಾಲಿ ಆಡಳಿತದ ಕಾರ್ಯವೈಖರಿಯ ಕುರಿತ ಜನಾಭಿಪ್ರಾಯ ಸಂಗ್ರಹದಂತೆ ಪರಿಗಣಿಸಲಾಗುತ್ತದೆ. ಹೀಗಾಗಿ, ಈ ಚುನಾವಣೆಯ ಫಲಿತಾಂಶ ಟ್ರಂಪ್ ಆಡಳಿತದ ಮುಂದಿನ ರಾಜಕೀಯ ಹಾದಿಯ ಮೇಲೆ ಮಹತ್ವದ ಪರಿಣಾಮ ಬೀರಬಹುದು.
ಈ ಚುನಾವಣೆಯಲ್ಲಿ ರಿಪಬ್ಲಿಕನ್‌ ಪಕ್ಷ ತನ್ನ ಬಹುಮತವನ್ನು ಉಳಿಸಿಕೊಳ್ಳುತ್ತದೆಯೇ ಅಥವಾ ಡೆಮಾಕ್ರಟಿಕ್‌ ಪಕ್ಷ ಕಾಂಗ್ರೆಸ್‌ನ ನಿಯಂತ್ರಣವನ್ನು ತನ್ನದಾಗಿಸಿಕೊಳ್ಳುತ್ತದೆಯೇ ಎಂಬುದು ನಿರ್ಧಾರವಾಗಲಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ