ಬೆಂಗಳೂರಿನ ಸ್ಫೋಟ ಪ್ರಕರಣ ಭೇದಿಸಿದ ಪೊಲೀಸರು: ವೈಯಕ್ತಿಕ ದ್ವೇಷವೇ ಕೃತ್ಯಕ್ಕೆ ಕಾರಣ ; ಮೂವರ ಬಂಧನ

ಬೆಂಗಳೂರು: ನಗರದ ಪುಲಕೇಶಿನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿರುವ ನಿರ್ಮಾಣ ಹಂತದ ಮನೆಯೊಂದರಲ್ಲಿ ಕಳೆದ ವಾರ ಸಂಭವಿಸಿದ ಬಾಂಬ್ ಸ್ಫೋಟ ಪ್ರಕರಣವನ್ನು ಬೆಂಗಳೂರು ನಗರ ಪೊಲೀಸರು ಭೇದಿಸಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ. ವೈಯಕ್ತಿಕ ದ್ವೇಷವೇ ಸ್ಫೋಟಕ್ಕೆ ಕಾರಣವಾಗಿದ್ದು, ಈ ಘಟನೆಯ ಹಿಂದೆ ಯಾವುದೇ ಭಯೋತ್ಪಾದಕ ಉದ್ದೇಶವಿಲ್ಲ ಎಂದು ಬೆಂಗಳೂರು ನಗರ ಪೊಲೀಸ್ ಆಯುಕ್ತರು ತಿಳಿಸಿದ್ದಾರೆ.
ದಸರಾ ಹಬ್ಬದ ಕೊನೆಯ ದಿನದ ಹಿಂದಿನ ರಾತ್ರಿ ಸಂಭವಿಸಿದ್ದ ಈ ಸ್ಫೋಟ ಪ್ರಕರಣದ ತನಿಖೆಯನ್ನು ಪೊಲೀಸರು ಅತ್ಯಂತ ಗಂಭೀರವಾಗಿ ಕೈಗೊಂಡಿದ್ದರು. ಆರಂಭದಲ್ಲಿ ಕೃತ್ಯದ ಹಿಂದಿನ ಉದ್ದೇಶ ಅಥವಾ ಆರೋಪಿಗಳ ಸುಳಿವು ಲಭ್ಯವಾಗಿರಲಿಲ್ಲ. ಆದರೆ, ವಿವಿಧ ಆಯಾಮಗಳಲ್ಲಿ ತನಿಖೆ ನಡೆಸಿದ ಪೊಲೀಸರು ಮೂವರು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಪ್ರಕರಣದ ತನಿಖೆಯ ವಿವರಗಳನ್ನು ಸುದ್ದಿಗೋಷ್ಠಿಯಲ್ಲಿ ಹಂಚಿಕೊಂಡ ಪೊಲೀಸ್ ಆಯುಕ್ತ ಸೀಮಂತಕುಮಾರ ಸಿಂಗ್, ಆರಂಭಿಕ ಹಂತದಲ್ಲಿ ಯಾವುದೇ ಸ್ಪಷ್ಟ ಸುಳಿವು ಇರಲಿಲ್ಲ. ದಸರಾ ಹಬ್ಬದ ಕೊನೆಯ ದಿನದ ಮುನ್ನಾದಿನವೇ ಸ್ಫೋಟ ಸಂಭವಿಸಿದ್ದರಿಂದ ಎಲ್ಲ ಆಯಾಮಗಳಲ್ಲೂ ತನಿಖೆ ನಡೆಸಲಾಯಿತು. ಅಂತಿಮವಾಗಿ ಇದು ವೈಯಕ್ತಿಕ ದ್ವೇಷದ ಹಿನ್ನೆಲೆಯಲ್ಲಿ ನಡೆಸಿದ ಉದ್ದೇಶಿತ ದಾಳಿ ಎಂಬುದು ದೃಢಪಟ್ಟಿದೆ ಎಂದು ತಿಳಿಸಿದರು.

ನಿರ್ಮಾಣ ಹಂತದ ಮನೆಯ ಸ್ಥಳದಲ್ಲಿದ್ದ ಭದ್ರತಾ ಸಿಬ್ಬಂದಿಗೆ ಆರೋಪಿಗಳು ಪಾರ್ಸೆಲ್ ತಲುಪಿಸಿದ್ದರು. ತನಿಖೆಯ ಪ್ರಾಥಮಿಕ ಮಾಹಿತಿಯ ಪ್ರಕಾರ, ಆ ಭದ್ರತಾ ಸಿಬ್ಬಂದಿಯೇ ಆರೋಪಿಗಳ ನಿಜವಾದ ಗುರಿಯಾಗಿದ್ದರು. ಆದರೆ, ಆತನ ಜೊತೆಯಲ್ಲಿದ್ದ ಮತ್ತೊಬ್ಬ ಕಾರ್ಮಿಕ ಪಾರ್ಸೆಲ್ ತೆರೆದಿದ್ದರಿಂದ ಸ್ಫೋಟ ಸಂಭವಿಸಿ, ಆ ಕಾರ್ಮಿಕನಿಗೆ ಗಂಭೀರ ಗಾಯಗಳಾಗಿವೆ.
ಉದ್ದೇಶಿತ ಗುರಿಯಾಗಿದ್ದ ಭದ್ರತಾ ಸಿಬ್ಬಂದಿಗೂ ಸಣ್ಣಪುಟ್ಟ ಗಾಯಗಳಾಗಿವೆ. ಪಾರ್ಸೆಲ್ ತೆರೆದ ಮತ್ತೊಬ್ಬ ಕಾರ್ಮಿಕನಿಗೆ ತೀವ್ರವಾದ ಗಾಯಗಳಾಗಿದ್ದು, ಸದ್ಯ ಅವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ಆಯುಕ್ತರು ವಿವರಿಸಿದರು.
ಅಸ್ಸಾಂನ ಒಂದೇ ಗ್ರಾಮದವರು; ಹಣ, ಜಮೀನು ಮತ್ತು ಕೌಟುಂಬಿಕ ವಿಚಾರವಾಗಿ ದ್ವೇಷ
ಬಂಧಿತ ಮೂವರು ಆರೋಪಿಗಳು ಹಾಗೂ ದಾಳಿಗೆ ಗುರಿಯಾಗಿದ್ದ ವ್ಯಕ್ತಿ ಅಸ್ಸಾಂ ರಾಜ್ಯದ ಒಂದೇ ಗ್ರಾಮದ ಮೂಲದವರು ಎಂಬುದು ತನಿಖೆಯಲ್ಲಿ ಪತ್ತೆಯಾಗಿದೆ. ಈ ಮಾಹಿತಿಯನ್ನು ಅಸ್ಸಾಂ ಪೊಲೀಸರ ಸಹಕಾರದೊಂದಿಗೆ ಪರಿಶೀಲಿಸಿ ಖಚಿತಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸ್ ಆಯುಕ್ತರು ತಿಳಿಸಿದರು.
ಆರೋಪಿಗಳು ತಮ್ಮ ಊರಿನಲ್ಲಿ ಹಣಕಾಸಿನ ವ್ಯವಹಾರ, ಜಮೀನು ಸಂಬಂಧಿತ ವಿವಾದಗಳು ಹಾಗೂ ಕುಟುಂಬದೊಳಗಿನ ವೈಯಕ್ತಿಕ ಕೌಟುಂಬಿಕ ವಿಚಾರವೊಂದಕ್ಕೆ ಸಂಬಂಧಿಸಿದಂತೆ ಗುರಿಯಾಗಿದ್ದ ವ್ಯಕ್ತಿಯೊಂದಿಗೆ ದ್ವೇಷ ಹೊಂದಿದ್ದರು. ಕುಟುಂಬದ ಖಾಸಗಿ ವಿಚಾರವಾಗಿರುವುದರಿಂದ ಅದರ ಹೆಚ್ಚಿನ ವಿವರಗಳನ್ನು ಸಾರ್ವಜನಿಕವಾಗಿ ಬಹಿರಂಗಪಡಿಸಲು ಸಾಧ್ಯವಿಲ್ಲ ಎಂದು ಆಯುಕ್ತರು ಹೇಳಿದರು.
ಈ ವೈಯಕ್ತಿಕ ದ್ವೇಷವನ್ನು ಮನಸ್ಸಿನಲ್ಲಿಟ್ಟುಕೊಂಡು, ಆರೋಪಿಗಳಲ್ಲಿ ಒಬ್ಬನಿಗೆ ವ್ಯಕ್ತಿಯೊಂದಿಗೆ ಇದ್ದ ವೈಷಮ್ಯವನ್ನು ಬಳಸಿಕೊಂಡು ಮೂವರೂ ಸೇರಿ ದಾಳಿ ನಡೆಸಲು ಸಂಚು ರೂಪಿಸಿದ್ದರು. ಅದರಂತೆ, ಇಬ್ಬರು ಸ್ಥಳೀಯವಾಗಿ ನೆರವು ನೀಡಿದರೆ, ಪ್ರಮುಖ ಆರೋಪಿ ಸ್ಫೋಟಕ ಸಾಧನವನ್ನು ಸಿದ್ಧಪಡಿಸಿ ಕೃತ್ಯ ಎಸಗಿದ್ದಾನೆ ಎಂದು ತನಿಖೆಯಿಂದ ತಿಳಿದುಬಂದಿದೆ.

78ಕ್ಕೂ ಹೆಚ್ಚು ಸಿಬ್ಬಂದಿ, 10ಕ್ಕೂ ಅಧಿಕ ತಂಡಗಳಿಂದ ತನಿಖೆ
ಪ್ರಕರಣದ ಗಂಭೀರತೆಯನ್ನು ಪರಿಗಣಿಸಿ ಪೊಲೀಸರು ವ್ಯಾಪಕ ತನಿಖೆ ಕೈಗೊಂಡಿದ್ದರು. 10ಕ್ಕೂ ಹೆಚ್ಚು ತಂಡಗಳಲ್ಲಿ ಸಹಾಯಕ ಪೊಲೀಸ್ ಆಯುಕ್ತರು, ಇನ್‌ಸ್ಪೆಕ್ಟರ್‌ಗಳು ಹಾಗೂ ವಿವಿಧ ಹಂತದ ಅಧಿಕಾರಿಗಳು ಮತ್ತು ಸಿಬ್ಬಂದಿ ಸೇರಿದಂತೆ 78ಕ್ಕೂ ಹೆಚ್ಚು ಪೊಲೀಸ್ ಸಿಬ್ಬಂದಿ ಕಾರ್ಯನಿರ್ವಹಿಸಿದ್ದರು.
ಇದರ ಜೊತೆಗೆ ಆಂತರಿಕ ಭದ್ರತಾ ವಿಭಾಗ (Internal Security Division), ಭಯೋತ್ಪಾದನಾ ನಿಗ್ರಹ ಘಟಕ (Anti-Terror Cell) ಮತ್ತು ಕೇಂದ್ರ ಅಪರಾಧ ವಿಭಾಗ (Central Crime Branch) ಸೇರಿದಂತೆ ವಿಶೇಷ ಘಟಕಗಳ ನೆರವು ಪಡೆಯಲಾಗಿತ್ತು. ಕೇಂದ್ರ ಸರ್ಕಾರದ ತನಿಖಾ ಸಂಸ್ಥೆಗಳು, ಅಸ್ಸಾಂ ಪೊಲೀಸರು ಹಾಗೂ ರಾಯಚೂರು ಪೊಲೀಸರೂ ತನಿಖೆಗೆ ಸಹಕರಿಸಿದ್ದರು.
ಪ್ರಕರಣಕ್ಕೆ ಸಂಬಂಧಿಸಿದಂತೆ ಒಟ್ಟಾರೆ ಸರಾಸರಿ ಸುಮಾರು 100 ಜನರನ್ನು ವಿಚಾರಣೆಗೆ ಒಳಪಡಿಸಲಾಗಿತ್ತು. ಅಲ್ಲದೆ, 1,500ಕ್ಕೂ ಹೆಚ್ಚು ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪರಿಶೀಲಿಸಿ, ತಾಂತ್ರಿಕ ಮಾಹಿತಿಯನ್ನೂ ವಿಶ್ಲೇಷಿಸಲಾಗಿತ್ತು. ಸಿಸಿಟಿವಿ ದೃಶ್ಯಾವಳಿಗಳು ಮತ್ತು ತಾಂತ್ರಿಕ ವಿಶ್ಲೇಷಣೆಯನ್ನು ಒಟ್ಟುಗೂಡಿಸಿದ ಪರಿಣಾಮ ಪ್ರಕರಣದ ಬಗ್ಗೆ ನಿರ್ಣಾಯಕ ತೀರ್ಮಾನಕ್ಕೆ ಬರಲು ಸಾಧ್ಯವಾಯಿತು ಎಂದು ಆಯುಕ್ತರು ತಿಳಿಸಿದರು.

ಬೆಂಗಳೂರಿನಲ್ಲಿ ಇಬ್ಬರ ಬಂಧನ, ಸ್ಫೋಟಕ ತಯಾರಿಸಿದ ಪ್ರಮುಖ ಆರೋಪಿ ಸೆರೆ
ಪ್ರಕರಣದಲ್ಲಿ ಇಬ್ಬರು ಆರೋಪಿಗಳನ್ನು ಬೆಂಗಳೂರಿನಲ್ಲೇ ಬಂಧಿಸಲಾಗಿದೆ. ಮೂರನೇ ಆರೋಪಿ ರಾಯಚೂರು ಜಿಲ್ಲೆಯ ಮಸ್ಕಿಯಿಂದ ಬೆಂಗಳೂರಿಗೆ ಬಂದು ಸ್ಫೋಟಕ ಸಾಧನವನ್ನು ಸಿದ್ಧಪಡಿಸಿ, ಅದನ್ನು ನಿಗದಿತ ಸ್ಥಳದಲ್ಲಿ ಇರಿಸಿ ಮತ್ತೆ ಮಸ್ಕಿಗೆ ಹಿಂದಿರುಗಿದ್ದ. ಆತನನ್ನು ಮಸ್ಕಿಯಲ್ಲೇ ಬಂಧಿಸಲಾಗಿದೆ ಎಂದು ಪೊಲೀಸ್ ಆಯುಕ್ತರು ಮಾಹಿತಿ ನೀಡಿದರು.
ಪ್ರಮುಖ ಆರೋಪಿಯೇ ಮಸ್ಕಿಯಲ್ಲಿ ಸ್ಫೋಟಕ ಸಾಧನವನ್ನು ತಯಾರಿಸಿದ್ದ. ಬೆಂಗಳೂರಿನಲ್ಲಿದ್ದ ಇತರ ಇಬ್ಬರು ಆರೋಪಿಗಳು ಆತನಿಗೆ ಸ್ಥಳೀಯವಾಗಿ ನೆರವು ನೀಡಿದ್ದರು. ಸ್ಫೋಟಕ ಸಾಧನವನ್ನು ಇರಿಸಬೇಕಾದ ಸ್ಥಳಕ್ಕೆ ಮಾರ್ಗದರ್ಶನ ನೀಡುವುದು, ಅಲ್ಲಿಗೆ ತಲುಪಲು ದಾರಿ ತೋರಿಸುವುದು ಹಾಗೂ ಗುರಿಯಾಗಿದ್ದ ವ್ಯಕ್ತಿ ಪಾರ್ಸೆಲ್ ಸ್ವೀಕರಿಸಿ ತೆರೆಯುವಂತೆ ಮನವೊಲಿಸುವುದು ಅವರ ಪಾತ್ರವಾಗಿತ್ತು ಎಂದು ತನಿಖೆಯಲ್ಲಿ ತಿಳಿದುಬಂದಿದೆ.
ವಿದ್ಯುತ್ ಕೆಲಸ ಮಾಡುತ್ತಿದ್ದ ಆರೋಪಿ; ಸಾಮಾನ್ಯ ವಸ್ತುಗಳಿಂದ ಸ್ಫೋಟಕ ತಯಾರಿ
ಪ್ರಮುಖ ಆರೋಪಿ ವಿದ್ಯುತ್ ಕೆಲಸ ಮಾಡುತ್ತಿದ್ದ ವ್ಯಕ್ತಿಯಾಗಿದ್ದು, ಆತನ ಮನೆಯಿಂದ ಸ್ಫೋಟಕ ಸಾಧನ ತಯಾರಿಸಲು ಬಳಸಿದ ಹಲವು ವಸ್ತುಗಳನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಸಾಧನದ ಪ್ರತಿಯೊಂದು ಬಿಡಿಭಾಗವನ್ನು ಎಲ್ಲಿಂದ ಖರೀದಿಸಲಾಗಿತ್ತು ಎಂಬುದನ್ನೂ ಪತ್ತೆಹಚ್ಚಲಾಗಿದೆ ಎಂದು ಆಯುಕ್ತರು ತಿಳಿಸಿದರು.
ಆರೋಪಿಯು ಅತ್ಯಂತ ಸರಳ ಹಾಗೂ ಮೂಲಭೂತ ತಂತ್ರಜ್ಞಾನ ಬಳಸಿ ಸ್ಫೋಟಕ ಸಾಧನವನ್ನು ಸಿದ್ಧಪಡಿಸಿದ್ದನು. ಅದರಲ್ಲಿ ಲೋಹದ ಉಂಡೆಗಳು (ಪೆಲೆಟ್‌ಗಳು), ಬ್ಯಾಟರಿಗಳು ಹಾಗೂ ಸಾಮಾನ್ಯ ಪಟಾಕಿಗಳಿಂದ ತೆಗೆದ ಗನ್‌ಪೌಡರ್ ಬಳಸಲಾಗಿತ್ತು. ಪುಶ್ ಬಟನ್ ಮೂಲಕ ಕಾರ್ಯನಿರ್ವಹಿಸುವ ವಿದ್ಯುತ್ ಸರ್ಕ್ಯೂಟ್‌ವೊಂದನ್ನು ಆತ ರೂಪಿಸಿದ್ದನು.
ಈ ಕಾರಣದಿಂದಲೇ ಪಾರ್ಸೆಲ್ ಸ್ವೀಕರಿಸಿದ ವ್ಯಕ್ತಿಗೆ ಬಟನ್ ಒತ್ತುವಂತೆ ಪದೇಪದೇ ಹೇಳಲಾಗಿತ್ತು. ಬಟನ್ ಒತ್ತಿದಾಗ ವಿದ್ಯುತ್ ಸರ್ಕ್ಯೂಟ್ ಪೂರ್ಣಗೊಂಡು ಸ್ಫೋಟ ಸಂಭವಿಸಿತ್ತು ಎಂದು ಪೊಲೀಸ್ ಆಯುಕ್ತರು ವಿವರಿಸಿದರು.