ಚಂಡೀಗಢ: ಪಂಜಾಬ್‌ನಲ್ಲಿ ಆಡಳಿತಾರೂಢ ಆಮ್ ಆದ್ಮಿ ಪಕ್ಷವು(ಎಎಪಿ) 2027ರ ವಿಧಾನಸಭೆ ಚುನಾವಣೆಗೆ 31 ಅಭ್ಯರ್ಥಿಗಳ ತನ್ನ ಎರಡನೇ ಪಟ್ಟಿಯನ್ನು ಪ್ರಕಟಿಸಿದೆ. ಇದರೊಂದಿಗೆ ಪಕ್ಷ ಈವರೆಗೆ 71 ಅಭ್ಯರ್ಥಿಗಳನ್ನು ಘೋಷಿಸಿದಂತಾಗಿದೆ.
ಅಕ್ಟೋಬರ್ 31ರಂದು ಮೊದಲ ಪಟ್ಟಿಯಲ್ಲಿ 40 ಅಭ್ಯರ್ಥಿಗಳನ್ನು ಪ್ರಕಟಿಸಿತ್ತು. ಮೊದಲ ಪಟ್ಟಿಯಲ್ಲಿ ಮುಖ್ಯಮಂತ್ರಿ ಭಗವಂತ ಮಾನ್ ಸೇರಿದಂತೆ ಹಾಲಿ ಶಾಸಕರಿಗಷ್ಟೇ ಟಿಕೆಟ್ ನೀಡಲಾಗಿತ್ತು. ಆದರೆ ಎರಡನೇ ಪಟ್ಟಿಯಲ್ಲಿ ಹಲವು ಹೊಸ ಮುಖಗಳು, ಪಕ್ಷದ ಕಾರ್ಯಕರ್ತರು ಹಾಗೂ ಸ್ಥಳೀಯ ನಾಯಕರಿಗೆ ಅವಕಾಶ ಕಲ್ಪಿಸಲಾಗಿದೆ. ಇದೇ ವೇಳೆ ಹಲವು ಹಾಲಿ ಶಾಸಕರಿಗೆ ಟಿಕೆಟ್ ನಿರಾಕರಿಸುವ ಮೂಲಕ ಪಕ್ಷ ಮಹತ್ವದ ಬದಲಾವಣೆಗಳನ್ನೂ ಮಾಡಿದೆ.
ಮೊದಲ ಅಭ್ಯರ್ಥಿಗಳ ಪಟ್ಟಿ ಪ್ರಕಟವಾದ ಬೆನ್ನಲ್ಲೇ ಎಎಪಿಯ ಮೂವರು ಶಾಸಕರು ಪಕ್ಷ ತೊರೆದಿದ್ದರು. ಇದರಿಂದ ಸಮಾನಾ, ಸನೌರ್ ಮತ್ತು ಅಮೃತಸರ ಉತ್ತರ ಕ್ಷೇತ್ರಗಳಿಗೆ ಹೊಸ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿತ್ತು.
ಸಚಿವ ಗುರ್ಮೀತ್ ಖುಡ್ಡಿಯಾನ್‌ಗೆ ಟಿಕೆಟ್ ನಿರಾಕರಣೆ
ಎರಡನೇ ಪಟ್ಟಿಯಲ್ಲಿನ ಅಚ್ಚರಿಯ ನಿರ್ಧಾರಗಳಲ್ಲಿ ಲಂಬಿ ಕ್ಷೇತ್ರವೂ ಒಂದು. ಹಾಲಿ ಶಾಸಕ ಹಾಗೂ ಸಂಪುಟ ಸಚಿವ ಗುರ್ಮೀತ್ ಸಿಂಗ್ ಖುಡ್ಡಿಯಾನ್ ಬದಲಿಗೆ ರಣಧೀರ್ ಸಿಂಗ್ ಧೀರಾ ಖುಡ್ಡಿಯಾನ್ ಅವರಿಗೆ ಪಕ್ಷ ಟಿಕೆಟ್ ನೀಡಿದೆ. 2022ರ ವಿಧಾನಸಭೆ ಚುನಾವಣೆಯಲ್ಲಿ ಗುರ್ಮೀತ್ ಸಿಂಗ್ ಖುಡ್ಡಿಯಾನ್ ಅವರು ಮಾಜಿ ಮುಖ್ಯಮಂತ್ರಿ ಪ್ರಕಾಶ ಸಿಂಗ್ ಬಾದಲ್ ಅವರನ್ನು ಸೋಲಿಸಿ ಭಾರಿ ರಾಜಕೀಯ ಸಂಚಲನ ಮೂಡಿಸಿದ್ದರು. ಅಂತಹ ಪ್ರಭಾವಿ ನಾಯಕನಿಗೇ ಈ ಬಾರಿ ಟಿಕೆಟ್ ನಿರಾಕರಿಸಿರುವುದು ಪಕ್ಷದ ಎರಡನೇ ಪಟ್ಟಿಯ ಪ್ರಮುಖ ಬೆಳವಣಿಗೆಯಾಗಿದೆ.
ಇಬ್ಬರು ಸಂಸದರಿಗೆ ಟಿಕೆಟ್
ಹಾಲಿ ಇಬ್ಬರು ಸಂಸದರೂ ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಲಿದ್ದಾರೆ. ಸಂಗ್ರೂರ್ ಲೋಕಸಭಾ ಕ್ಷೇತ್ರದ ಸಂಸದ ಗುರ್ಮೀತ್ ಸಿಂಗ್ ಮೀತ್‌ ಹಾಯರ್‌ ಅವರಿಗೆ ಅವರ ಹಿಂದಿನ ಕ್ಷೇತ್ರವಾದ ಬರ್ನಾಲಾದಿಂದ ಟಿಕೆಟ್ ನೀಡಲಾಗಿದೆ. 2024ರ ಉಪಚುನಾವಣೆಯಲ್ಲಿ ಈ ಕ್ಷೇತ್ರವನ್ನು ಕಾಂಗ್ರೆಸ್ ಗೆದ್ದುಕೊಂಡಿತ್ತು. ಅದೇ ರೀತಿ ಹೋಶಿಯಾರ್‌ಪುರ ಲೋಕಸಭಾ ಕ್ಷೇತ್ರದ ಸಂಸದ ಡಾ. ರಾಜಕುಮಾರ ಚಬ್ಬೇವಾಲ್ ಅವರಿಗೆ ಫಗ್ವಾರಾ ಕ್ಷೇತ್ರದಿಂದ ಟಿಕೆಟ್ ನೀಡಲಾಗಿದೆ. ಆದಂಪುರ ಕ್ಷೇತ್ರದಿಂದ ಪವನಕುಮಾರ ಟಿನು ಅವರನ್ನೂ ಕಣಕ್ಕಿಳಿಸಲಾಗಿದೆ.
ಹಲವು ಹಾಲಿ ಶಾಸಕರಿಗೆ ಕೊಕ್
ಎರಡನೇ ಪಟ್ಟಿಯಲ್ಲಿ ಹಲವು ಕ್ಷೇತ್ರಗಳ ಹಾಲಿ ಶಾಸಕರ ಬದಲಿಗೆ ಹೊಸ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಲಾಗಿದೆ. ಚಮ್ಕೌರ್ ಸಾಹಿಬ್ ಕ್ಷೇತ್ರದಲ್ಲಿ ಹಾಲಿ ಶಾಸಕ ಡಾ. ಚರಣಜೀತ್ ಸಿಂಗ್ ಬದಲಿಗೆ ಜಸ್ವೀರ್ ಸಿಂಗ್ ಗರ್ಹಿ ಅವರಿಗೆ ಟಿಕೆಟ್ ನೀಡಲಾಗಿದೆ. ಪಂಜಾಬ್ ಪರಿಶಿಷ್ಟ ಜಾತಿಗಳ ಆಯೋಗದ ಅಧ್ಯಕ್ಷ ಸ್ಥಾನಕ್ಕೆ ರಾಜೀನಾಮೆ ನೀಡಿರುವ ಗರ್ಹಿ, ಕಾಂಗ್ರೆಸ್ ನಾಯಕ ಚರಣಜೀತ್ ಸಿಂಗ್ ಚನ್ನಿ ಅವರನ್ನು ಎದುರಿಸಲಿದ್ದಾರೆ.
ಬಟಿಂಡಾ ಗ್ರಾಮೀಣ ಕ್ಷೇತ್ರದಲ್ಲಿ ಅಮಿತ್ ರತ್ತನ್ ಕೊಟ್ಫಟ್ಟಾ ಬದಲಿಗೆ ಗೋಪಾಲ ಸಿಂಗ್ ಅವರಿಗೆ ಟಿಕೆಟ್ ನೀಡಲಾಗಿದೆ. ಪಟ್ಟಿ ಕ್ಷೇತ್ರದಲ್ಲಿ ಹಾಲಿ ಶಾಸಕ ಲಲ್ಜಿತ್ ಸಿಂಗ್ ಭುಲ್ಲರ್ ಬದಲಿಗೆ ಜಸ್ಕನ್ವರ್ ಸಿಂಗ್ ಗಿಲ್ ಅವರಿಗೆ ಅವಕಾಶ ಕಲ್ಪಿಸಲಾಗಿದೆ. ಜಸ್ಕನ್ವರ್ ಸಿಂಗ್ ಅವರು ‘ಜಸ್ಸಾ ಪಟ್ಟಿ’ ಎಂದೇ ಜನಪ್ರಿಯರಾಗಿದ್ದಾರೆ. ಖರಾರ್ ಕ್ಷೇತ್ರದಲ್ಲಿ ಅನ್ಮೋಲ್ ಗಗನ್ ಮಾನ್ ಬದಲಿಗೆ ಪರ್ಮಿಂದರ್ ಸಿಂಗ್ ಗೋಲ್ಡಿ ಅವರನ್ನು ಅಭ್ಯರ್ಥಿಯನ್ನಾಗಿ ಆಯ್ಕೆ ಮಾಡಲಾಗಿದೆ. ಅನ್ಮೋಲ್ ಗಗನ್ ಮಾನ್ ಅವರು 2025ರ ಜುಲೈನಲ್ಲಿ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.
ಜಲಂಧರ ಸೆಂಟ್ರಲ್ ಕ್ಷೇತ್ರದಲ್ಲಿ ರಮಣ ಅರೋರಾ ಬದಲಿಗೆ ನಿತಿನ್ ಕೊಹ್ಲಿ ಅವರಿಗೆ ಟಿಕೆಟ್ ನೀಡಲಾಗಿದೆ. ಅಮೃತಸರ ಉತ್ತರ ಕ್ಷೇತ್ರದಲ್ಲಿ ಮಾಜಿ ಐಪಿಎಸ್ ಅಧಿಕಾರಿ ಕುನ್ವರ್ ವಿಜಯ ಪ್ರತಾಪ ಸಿಂಗ್ ಪಕ್ಷ ತೊರೆದ ಹಿನ್ನೆಲೆಯಲ್ಲಿ ಕರಮಜೀತ್ ಸಿಂಗ್ ರಿಂಟು ಅವರನ್ನು ಅಭ್ಯರ್ಥಿಯನ್ನಾಗಿ ಘೋಷಿಸಲಾಗಿದೆ.
2022ರಲ್ಲಿ ಸೋತ ಬಹುತೇಕ ನಾಯಕರಿಗೆ ಮತ್ತೆ ಟಿಕೆಟ್ ಇಲ್ಲ
2022ರ ವಿಧಾನಸಭೆ ಚುನಾವಣೆಯಲ್ಲಿ ಸೋತಿದ್ದ ಪ್ರಮುಖ ನಾಯಕರ ಪೈಕಿ ಬಹುತೇಕರಿಗೆ ಈ ಬಾರಿ ಎಎಪಿ ಮತ್ತೊಂದು ಅವಕಾಶ ನೀಡಿಲ್ಲ.
ಪಠಾಣಕೋಟ್ ಕ್ಷೇತ್ರದಲ್ಲಿ ವಿಭೂತಿ ಶರ್ಮಾ ಬದಲಿಗೆ ರೋಹಿತ್ ಸಿಯಾಲ್, ಖಾದಿಯಾನ್ ಕ್ಷೇತ್ರದಲ್ಲಿ ಜಗರೂಪ್ ಸಿಂಗ್ ಸೆಖ್ವಾನ್ ಬದಲಿಗೆ ಗುರಿಕ್ಬಾಲ್ ಸಿಂಗ್ ಮಹಲ್ ಹಾಗೂ ಫತೇಗಢ್ ಚುರಿಯನ್ ಕ್ಷೇತ್ರದಲ್ಲಿ ಬಲ್ಬೀರ್ ಸಿಂಗ್ ಪನ್ನು ಬದಲಿಗೆ ಜೋಬನ್ ರಾಂಧವಾ ಅವರಿಗೆ ಟಿಕೆಟ್ ನೀಡಲಾಗಿದೆ.
2022ರಲ್ಲಿ ಸೋತಿದ್ದವರ ಪೈಕಿ ಕೇವಲ ಮೂವರಿಗೆ ಮಾತ್ರ ಮತ್ತೆ ಅವಕಾಶ ನೀಡಲಾಗಿದೆ. ಗುರದಾಸ್‌ಪುರದಿಂದ ರಮಣ ಬಹಲ್, ದೀನಾನಗರದಿಂದ ಶಂಶೇರ್ ಸಿಂಗ್ ಮತ್ತು ದಖಾದಿಂದ ಡಾ. ಕೆ.ಎನ್.ಎಸ್. ಕಾಂಗ್ ಅವರಿಗೆ ಮತ್ತೊಮ್ಮೆ ಟಿಕೆಟ್ ನೀಡಲಾಗಿದೆ.
ಹೊಸ ಮುಖಗಳಿಗೆ ಅವಕಾಶ
ಎರಡನೇ ಪಟ್ಟಿಯಲ್ಲಿ ಹಲವು ಹೊಸ ಮುಖಗಳಿಗೂ ಎಎಪಿ ಮಣೆ ಹಾಕಿದೆ. ನಟಿ ಸೋನಿಯಾ ಮಾನ್ ಅವರಿಗೆ ರಾಜಾ ಸಾನ್ಸಿ ಕ್ಷೇತ್ರದಿಂದ ಟಿಕೆಟ್ ನೀಡಲಾಗಿದೆ. ಕಪುರ್ತಲಾ ಕ್ಷೇತ್ರದಿಂದ ದವೀಂದರ್ ಪಾಲ್ ಸಿಂಗ್ ರಂಗಾ ಹಾಗೂ ನವಾನ್‌ ಶಹರ್ ಕ್ಷೇತ್ರದಿಂದ ರಾಬಿ ಕಾಂಗ್ ಅವರನ್ನು ಕಣಕ್ಕಿಳಿಸಲಾಗಿದೆ.
ಹೊಸ ಅಭ್ಯರ್ಥಿಗಳಲ್ಲಿ ಬಹುತೇಕರು ಆಯಾ ಕ್ಷೇತ್ರಗಳ ಪಕ್ಷದ ಉಸ್ತುವಾರಿಗಳಾಗಿದ್ದಾರೆ. ಜಲಂಧರ ಮೇಯರ್ ವನೀತ್ ಧೀರ್ ಅವರಿಗೆ ಜಲಂಧರ ಉತ್ತರ ಕ್ಷೇತ್ರದಿಂದ ಟಿಕೆಟ್ ನೀಡಲಾಗಿದೆ. ಉದ್ಯಮಿ ನಿತಿನ್ ಕೊಹ್ಲಿ ಜಲಂಧರ್ ಸೆಂಟ್ರಲ್ ಕ್ಷೇತ್ರದಿಂದ ಹಾಗೂ ಪಕ್ಷದ ಪ್ರಧಾನ ಕಾರ್ಯದರ್ಶಿ ದೀಪಕ್ ಬಾಲಿ ಜಲಂಧರ ಕಂಟೋನ್ಮೆಂಟ್ ಕ್ಷೇತ್ರದಿಂದ ಸ್ಪರ್ಧಿಸಲಿದ್ದಾರೆ.
ಒಟ್ಟಿನಲ್ಲಿ, 2027ರ ಪಂಜಾಬ್ ವಿಧಾನಸಭೆ ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಎಎಪಿ ಎರಡನೇ ಪಟ್ಟಿಯಲ್ಲಿ ಹೊಸ ಮುಖಗಳಿಗೆ ಹೆಚ್ಚಿನ ಆದ್ಯತೆ ನೀಡುವುದರ ಜೊತೆಗೆ ಹಲವು ಹಾಲಿ ಶಾಸಕರನ್ನು ಬದಲಿಸಿದೆ. ಸಂಸದರು, ಸ್ಥಳೀಯ ನಾಯಕರು, ಉದ್ಯಮಿಗಳು, ನಟಿ ಹಾಗೂ ಇತರ ಪಕ್ಷಗಳಿಂದ ಬಂದ ನಾಯಕರಿಗೆ ಅವಕಾಶ ನೀಡುವ ಮೂಲಕ ಚುನಾವಣಾ ಕಣಕ್ಕೆ ಹೊಸ ತಂಡವನ್ನು ಸಿದ್ಧಪಡಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ