ಗಿಜಿಗುಡುವ ರಸ್ತೆಯ ಮೂಲೆಯಲ್ಲಿರುವ ದೋಸೆ ಅಂಗಡಿಗೆ ದಿನಾಲೂ ಒಬ್ಬ ಅತ್ಯಂತ ಅನಿರೀಕ್ಷಿತ ಆದರೆ ನಿಯಮಿತವಾಗಿ ಗ್ರಾಹಕನೊಬ್ಬ ಬರುತ್ತಾನೆ. ಅದು ಬೇರೆ ಯಾರೂ ಅಲ್ಲ, ಒಂದು ಗೂಳಿ ! ಪ್ರತಿದಿನವೂ ಅತ್ಯಂತ ಶಾಂತವಾಗಿ ನಡೆದುಕೊಂಡು ಬರುವ ಈ ಮೂಕಪ್ರಾಣಿ, ತನಗೆ ಹೋಟೆಲ್ನ ಮೆನು ಕಾರ್ಡ್ ಪೂರ್ತಿ ನೆನಪಿದೆ ಎಂಬಂತೆ ದೋಸೆ ಕಾವಲಿನ ಮುಂದೆ ಶಾಂತವಾಗಿ ಕಾಯುತ್ತಾ ನಿಲ್ಲುತ್ತದೆ. ಸಾಮಾನ್ಯವಾಗಿ ಇಂತಹ ಸಂದರ್ಭಗಳಲ್ಲಿ ಪ್ರಾಣಿಗಳನ್ನು ಓಡಿಸುವವರೇ ಹೆಚ್ಚು. ಆದರೆ ಈ ದೋಸೆ ವ್ಯಾಪಾರಿಯ ಕರುಣೆಯ ಕೆಲಸವೀಗ ಇಡೀ ಇಂಟರ್ನೆಟ್ ಲೋಕದ ಜನರ ಹೃದಯ ಗೆದ್ದಿದೆ.
ತನ್ನ ಅಂಗಡಿಗೆ ಬರುವ ಉಳಿದ ಗ್ರಾಹಕರಿಗೆ ಎಷ್ಟು ಪ್ರೀತಿ-ಗೌರವದಿಂದ ದೋಸೆ ನೀಡುತ್ತಾನೋ, ಅದೇ ಕಾಳಜಿಯಿಂದ ಈ ವ್ಯಾಪಾರಿ ಆ ಮೂಕಪ್ರಾಣಿಗೂ ಬಿಸಿಬಿಸಿ, ಗರಿಗರಿಯಾದ ದೋಸೆಯನ್ನು ಸಿದ್ಧಪಡಿಸಿ, ಅಚ್ಚುಕಟ್ಟಾಗಿ ಮಡಚಿ ಉಣಬಡಿಸುತ್ತಾನೆ. ಆ ಎತ್ತು ಆತ ಬಿಸಿಬಿಸಿ ದೋಸೆ ತಯಾರಿಸುವವರೆಗೂ ಮಾನವರಂತೆ ಕಾದು ನಿಂತು ತಿಂದುಕೊಂಡು ಹೋಗುತ್ತದೆ. ಇದು ದಿನ ನಿತ್ಯದ ಪರಿಪಾಠ.
ಈ ಅಪೂರ್ವ ಕ್ಷಣವೀಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ. ಕಾದ ಕಾವಲಿಯಿಂದ ದೋಸೆ ಬೇಯುವ ಸದ್ದು ಬರುತ್ತಿದ್ದರೆ, ಅದರ ಪಕ್ಕದಲ್ಲೇ ಈ ಪ್ರಾಣಿ ಅತ್ಯಂತ ತಾಳ್ಮೆಯಿಂದ ಕಾಯುತ್ತಿರುವ ದೃಶ್ಯ ವಿಡಿಯೊದಲ್ಲಿ ಸೆರೆಯಾಗಿದೆ. ವ್ಯಾಪಾರಿ ಮನುಷ್ಯರಿಗೆ ಕೊಡುವಂತೆ ದೋಸೆಗೆ ಎಲ್ಲ ಮಸಾಲೆ, ಪಲ್ಯ ಇತ್ಯಾದಿ ಎಲ್ಲವನ್ನೂ ಹಾಕಿ ಪ್ಲೇಟ್ನಲ್ಲಿಟ್ಟು ಅದಕ್ಕೆ ನೀಡುತ್ತಾನೆ.
ಸ್ಥಳೀಯರಿಗಂತೂ ಈ ಎತ್ತು ಈಗ ಅಂಗಡಿಯ ಒಂದು ಭಾಗವೇ ಆಗಿಹೋಗಿದೆ. ಇನ್ನು ಕೆಲವು ಗ್ರಾಹಕರಂತೂ ಕೇವಲ ಈ ದಿನನಿತ್ಯದ ಅಪರೂಪದ ದೃಶ್ಯವನ್ನು ಕಣ್ಣಾರೆ ವೀಕ್ಷಿಸಲೆಂದೇ ಇಲ್ಲಿಗೆ ಬರುತ್ತಾರೆ. ಇದರ ಪರಿಣಾಮವಾಗಿ ಆ ಪುಟ್ಟ ದೋಸೆ ಅಂಗಡಿ ಈಗ ಒಂದು ಮಿನಿ ಪ್ರವಾಸಿ ತಾಣದಂತಾಗಿ ಮಾರ್ಪಟ್ಟಿದೆ. ಕೇವಲ ಮಾನವೀಯತೆಯಿಂದ ಆರಂಭವಾದ ಒಂದು ಸಣ್ಣ ನಡೆ, ಇಂದು ಜಾಲತಾಣದಲ್ಲಿ ಇತಿಹಾಸ ಸೃಷ್ಟಿಸಿದೆ. ಆಹಾರ ಕೇವಲ ಮನುಷ್ಯರನ್ನಷ್ಟೇ ಅಲ್ಲ, ಮೂಕಪ್ರಾಣಿಗಳನ್ನೂ ಹೇಗೆ ಬೆಸೆಯುತ್ತದೆ ಹಾಗೂ ಹೇಗೆ ಕಾಯುವಂತೆ ಮಾಡುತ್ತದೆ ಎಂಬುದಕ್ಕೆ ಇದುವೇ ಸಾಕ್ಷಿ.
ನಿಮ್ಮ ಕಾಮೆಂಟ್ ಬರೆಯಿರಿ