ಮುಂಬೈ : ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ನ ಚಿನ್ನದ ಮೀಸಲು ಅಥವಾ ಕಾಯ್ದಿಟ್ಟ ಚಿನ್ನ ಮೊದಲ ಬಾರಿಗೆ 100 ಶತಕೋಟಿ ಡಾಲರ್ (ಸುಮಾರು $102.365 ಬಿಲಿಯನ್) ಗಡಿಯನ್ನು ದಾಟಿದೆ. ಇತ್ತೀಚಿನ ಆರ್ಬಿಐ ದತ್ತಾಂಶದ ಪ್ರಕಾರ, ಅಕ್ಟೋಬರ್ 10 ರಂದು ಕೊನೆಗೊಂಡ ವಾರದಲ್ಲಿ ದೇಶದ ಒಟ್ಟಾರೆ ವಿದೇಶಿ ವಿನಿಮಯ ಮೀಸಲು (Forex Reserves) $697.784 ಶತಕೋಟಿ ಡಾಲರ್ಗೆ ತಲುಪಿದೆ.
ಆರ್ಬಿಐನ ಚಿನ್ನದ ಸಂಗ್ರಹದ ಮೌಲ್ಯವು $3.595 ಶತಕೋಟಿ ಡಾಲರ್ಗಳಷ್ಟು ಹೆಚ್ಚಾಗಿ $102.365 ಶತಕೋಟಿ ಡಾಲರ್ಗೆ ತಲುಪಿದೆ. ಜಾಗತಿಕವಾಗಿ ಚಿನ್ನದ ಬೆಲೆ ಪ್ರತಿ ಔನ್ಸ್ಗೆ $4,300 ಡಾಲರ್ಗೂ ಅಧಿಕವಾಗಿ ಸಾರ್ವಕಾಲಿಕ ಗರಿಷ್ಠ ಮಟ್ಟದಲ್ಲಿರುವ ಹಿನ್ನೆಲೆಯಲ್ಲಿ ಈ ಗಣನೀಯ ಏರಿಕೆ ಕಂಡುಬಂದಿದೆ.
ವರ್ತಕರನ್ನು ಉಲ್ಲೇಖಿಸಿದ ರಾಯಿಟರ್ಸ್ ವರದಿ ಪ್ರಕಾರ, ಭಾರತದ ಒಟ್ಟು ಕಾಯ್ದಿಟ್ಟ ಚಿನ್ನದ ಪಾಲು ಶೇ. 14.7ಕ್ಕೆ ಏರಿದ್ದು, ಇದು 1996-97 ರ ನಂತರದ ಅತ್ಯಧಿಕ ಮಟ್ಟವಾಗಿದೆ. ಕಳೆದ ದಶಕದಲ್ಲಿ ಚಿನ್ನದ ಪಾಲು ಶೇ. 7 ಕ್ಕಿಂತ ಕಡಿಮೆ ಇತ್ತು. ಪ್ರಸ್ತುತ, ಕೇಂದ್ರ ಬ್ಯಾಂಕ್ನ ಸ್ಥಿರ ಚಿನ್ನದ ಸಂಗ್ರಹ ಮತ್ತು ಜಾಗತಿಕ ಗಟ್ಟಿ ಚಿನ್ನದ ಬೆಲೆಗಳ ಏರಿಕೆಯಿಂದಾಗಿ ಅದರ ಪಾಲು ದ್ವಿಗುಣಗೊಂಡು ಶೇ. 15 ರ ಸನಿಹ ತಲುಪಿದೆ.
ಆದಾಗ್ಯೂ, ಈ ವರ್ಷ ಆರ್ಬಿಐನ ಚಿನ್ನದ ಖರೀದಿ ನಿಧಾನಗೊಂಡಿದ್ದರೂ ಸಹ, ಈ $100 ಶತಕೋಟಿ ಡಾಲರ್ ಮೈಲಿಗಲ್ಲು ತಲುಪಿರುವುದು ಗಮನಾರ್ಹ. ವರ್ಲ್ಡ್ ಗೋಲ್ಡ್ ಕೌನ್ಸಿಲ್ (WGC) ದತ್ತಾಂಶದ ಪ್ರಕಾರ, 2024 ರಲ್ಲಿ ಪ್ರತಿ ತಿಂಗಳು ಚಿನ್ನವನ್ನು ಖರೀದಿಸುತ್ತಿದ್ದ ಆರ್ಬಿಐ, 2025 ರ ಮೊದಲ ಒಂಬತ್ತು ತಿಂಗಳುಗಳಲ್ಲಿ ಕೇವಲ ನಾಲ್ಕು ತಿಂಗಳು ಮಾತ್ರ ಚಿನ್ನವನ್ನು ಖರೀದಿಸಿದೆ. ಜನವರಿಯಿಂದ ಸೆಪ್ಟೆಂಬರ್ವರೆಗಿನ ಒಟ್ಟು ಖರೀದಿ ಕೇವಲ 4 ಟನ್ಗಳಷ್ಟಿದ್ದು, ಹಿಂದಿನ ವರ್ಷ ಇದೇ ಅವಧಿಯಲ್ಲಿ ಖರೀದಿಸಿದ್ದ 50 ಟನ್ಗಳಿಗೆ ಹೋಲಿಸಿದರೆ ತೀವ್ರವಾಗಿ ಕಡಿಮೆಯಾಗಿದೆ.
ಗುರುವಾರ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಸ್ಪಾಟ್ ಚಿನ್ನದ ಬೆಲೆ ಮೊದಲ ಬಾರಿಗೆ ಪ್ರತಿ ಔನ್ಸ್ಗೆ $4,300 ಡಾಲರ್ ಗಡಿ ದಾಟಿತ್ತು. ಅಮೆರಿಕ ಮತ್ತು ಚೀನಾ ನಡುವಿನ ಹೊಸ ವ್ಯಾಪಾರ ಉದ್ವಿಗ್ನತೆ ಮತ್ತು ಅಮೆರಿಕ ಬಡ್ಡಿದರ ಕಡಿತದ ನಿರೀಕ್ಷೆಗಳ ನಡುವೆ ಈ ವಾರವೊಂದರಲ್ಲೇ ಶೇ. 7.6 ರಷ್ಟು ಏರಿಕೆ ಕಂಡಿದೆ.
ಒಟ್ಟಾರೆ ವಿದೇಶಿ ವಿನಿಮಯ ಮೀಸಲು ಇಳಿಕೆ
ಆದರೆ, ಒಟ್ಟಾರೆಯಾಗಿ ವಿದೇಶಿ ವಿನಿಮಯ ಮೀಸಲು ಪ್ರಮಾಣವು ಇಳಿಕೆ ಕಂಡಿದೆ. ಅಕ್ಟೋಬರ್ 10 ರಂದು ಕೊನೆಗೊಂಡ ವಾರದಲ್ಲಿ ಒಟ್ಟು ಮೀಸಲು $2.176 ಶತಕೋಟಿ ಡಾಲರ್ಗಳಷ್ಟು ಕುಸಿದು $697.784 ಶತಕೋಟಿ ಡಾಲರ್ಗೆ ಇಳಿಕೆಯಾಗಿದೆ. ಹಿಂದಿನ ವಾರದಲ್ಲಿಯೂ ಮೀಸಲು $276 ಮಿಲಿಯನ್ ಡಾಲರ್ಗಳಷ್ಟು ಇಳಿದು $699.96 ಶತಕೋಟಿ ಡಾಲರ್ಗೆ ತಲುಪಿತ್ತು.
2023 ರಲ್ಲಿ, ಭಾರತವು ತನ್ನ ವಿದೇಶಿ ವಿನಿಮಯ ಮೀಸಲಿಗೆ ಸುಮಾರು $58 ಶತಕೋಟಿ ಡಾಲರ್ಗಳನ್ನು ಸೇರಿಸಿತ್ತು, ಇದು 2022 ರಲ್ಲಿ ಕಂಡ $71 ಶತಕೋಟಿ ಡಾಲರ್ಗಳ ಒಟ್ಟು ಕುಸಿತಕ್ಕೆ ವ್ಯತಿರಿಕ್ತವಾಗಿದೆ. 2024 ರಲ್ಲಿ, ಮೀಸಲು $20 ಶತಕೋಟಿ ಡಾಲರ್ಗಳಿಗಿಂತ ಸ್ವಲ್ಪ ಹೆಚ್ಚು ಏರಿಕೆ ಕಂಡಿತ್ತು.
2025 ರಲ್ಲಿ, ಈವರೆಗೆ ವಿದೇಶಿ ವಿನಿಮಯ ನಿಧಿ ಒಟ್ಟಾರೆಯಾಗಿ ಸುಮಾರು $47.8 ಶತಕೋಟಿ ಡಾಲರ್ಗಳಷ್ಟು ಹೆಚ್ಚಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ