ವರ್ಕಲಾ (ಕೇರಳ):ಸಂಕಷ್ಟದಲ್ಲಿರುವ ಜೀವಿಗಳಿಗೆ ಮಾನವೀಯತೆಯ ಸಹಾಯ ಮಾಡಲು ಜನರು ಒಗ್ಗೂಡಿದಾಗ ಸುಂದರ ಫಲಿತಾಂಶ ದೊರೆಯುತ್ತದೆ. ಇಂತಹ ಹೃದಯಸ್ಪರ್ಶಿ ಘಟನೆಯು ಇತ್ತೀಚೆಗೆ ಕೇರಳದ ವರ್ಕಲಾ ಕಡಲತೀರದಲ್ಲಿ ನಡೆದಿದೆ. ದಡಕ್ಕೆ ಬಂದು ಸಿಲುಕಿದ್ದ ಒಂದು ಬೃಹತ್ ತಿಮಿಂಗಿಲ ಶಾರ್ಕ್ಗೆ (Whale Shark) ಸ್ಥಳೀಯರು ಮತ್ತು ಪ್ರವಾಸಿಗರ ಗುಂಪೊಂದು ಯಶಸ್ವಿಯಾಗಿ ನೆರವು ನೀಡಿ, ಅದನ್ನು ಮರಳಿ ಸಮುದ್ರಕ್ಕೆ ಕಳುಹಿಸುವಲ್ಲಿ ಯಶಸ್ವಿಯಾಗಿದೆ.
ಮೀನುಗಾರರ ಬಲೆಗೆ ಸಿಲುಕಿದ್ದ ಈ ಶಾರ್ಕ್ ಅನ್ನು ಆಳವಾದ ನೀರಿಗೆ ತಳ್ಳಲು ಸುಮಾರು ಮೂರು ಗಂಟೆಗಳ ಸಾಮೂಹಿಕ ಪ್ರಯತ್ನ ನಡೆಯಿತು.
ಈ ರಕ್ಷಣಾ ಕಾರ್ಯದ ಬಗ್ಗೆ ವ್ಯಾಪಕವಾಗಿ ವಿಡಿಯೋ ಹಂಚಿಕೊಳ್ಳಲಾಗಿದೆ. ನಾವು ಒಂದು ಜೀವವನ್ನು ಉಳಿಸಿದೆವು. ಸರ್ಫಿಂಗ್ ತರಗತಿಗೆ ಹೋಗುವ ದಾರಿಯಲ್ಲಿ, ಈ ತಿಮಿಂಗಿಲ ಶಾರ್ಕ್ ಮೀನು ಕಡಲತೀರದಲ್ಲಿ ಸಿಲುಕಿಕೊಂಡಿರುವುದನ್ನು ನಾವು ನೋಡಿದೆವು. ಕೆಲವು ಸ್ಥಳೀಯರು ಮತ್ತು ಪ್ರವಾಸಿಗರು ಅದಕ್ಕೆ ಸಹಾಯ ಮಾಡಲು ಪ್ರಯತ್ನಿಸುತ್ತಿದ್ದರು ಎಂದು ತಿಳಿಸಿದ್ದಾರೆ. ಶಾರ್ಕ್ ಮೀನುಗಾರರ ಬಲೆಗೆ ಸಿಕ್ಕಿ ಕಡಲತೀರಕ್ಕೆ ಎಳೆಯಲ್ಪಟ್ಟಿತ್ತು. ಅನೇಕರು, ಅದನ್ನು ರಕ್ಷಿಸಲು ಮೂರು ಗಂಟೆಗಳಿಗೂ ಹೆಚ್ಚು ಕಾಲ ಶ್ರಮಿಸಿದರು. ಅದು ಈಜಲು ಸಾಧ್ಯವಾಗುವಷ್ಟು ಆಳಕ್ಕೆ ಅದನ್ನು ತಳ್ಳಲು ಅವರಿಗೆ ಸಾಧ್ಯವಾಯಿತು. ಆದರೆ, ಅದು ಸಂಪೂರ್ಣವಾಗಿ ಆಳ ಸಮುದ್ರಕ್ಕೆ ಹೋಗಲು ಸಾಧ್ಯವಾಗಲಿಲ್ಲ. ಅದು ಅಲೆಯ ರಭಸಕ್ಕೆ ಮತ್ತೆ ದಡಕ್ಕೆ ಬಂದಿತ್ತು. ಆದರೆ ಜನರು ಪ್ರಯತ್ನ ಬಿಡಲಿಲ್ಲ.ಶಾರ್ಕ್ ದೊಡ್ಡ ಗಾತ್ರದದ್ದಾಗಿದ್ದರೂ ಸೌಮ್ಯ ಸ್ವಭಾವ ಹೊಂದಿದ್ದುದಾಗಿ ಹೇಳಲಾಗಿದ್ದು, ಜನರು ಅದನ್ನು ಎಚ್ಚರಿಕೆಯಿಂದ ಆಳ ನೀರಿನ ಕಡೆಗೆ ಕರೆದೊಯ್ಯಲು ಶ್ರಮಿಸಿದರು.
ಮೂರು ಗಂಟೆಗಳ ನಿರಂತರ ಪ್ರಯತ್ನದ ನಂತರ, ಎರಡು ರಕ್ಷಣಾ ದೋಣಿಗಳು ಶಾರ್ಕ್ ಬಳಿಗೆ ತಲುಪಿ, ಅದರ ಬಾಲಕ್ಕೆ ಹಗ್ಗ ಕಟ್ಟಿ, ನಿಧಾನವಾಗಿ ಆಳವಾದ ನೀರಿಗೆ ಎಳೆದೊಯ್ದವು. ಈ ತಿಮಿಂಗಿಲ ಶಾರ್ಕ್ನ ಮರಳು ಕಾಗದದಂತಹ ಒರಟು ಚರ್ಮದಿಂದಾಗಿ ಅನೇಕರಿಗೆ ಸಣ್ಣಪುಟ್ಟ ಗಾಯಗಳು ಮತ್ತು ಕಡಿತಗಳಾಗಿದ್ದರೂ, ಅದರ ಜೀವ ಉಳಿಸಲು ಅವರು ಹಿಂಜರಿಯಲಿಲ್ಲ.
ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ, ಪರಿಚಯವಿಲ್ಲದ ಜನರ ಈ ಗುಂಪು ಒಗ್ಗೂಡಿ ತಿಮಿಂಗಿಲ ಶಾರ್ಕ್ನ ಜೀವ ಉಳಿಸಿದ್ದಕ್ಕೆ ಸಾಮಾಜಿಕ ಜಾಲತಾಣಗಳ ಬಳಕೆದಾರರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ