ಮಂಗಳವಾರ ರಾಯಲ್ ಮಲೇಷಿಯನ್ ನೌಕಾದಳ(ಟಿಎಲ್‌ಡಿಎಂ)ವು ಪರೇಡ್‌ ನಡೆಸುತ್ತಿದ್ದಾಗ ಎರಡು ಹೆಲಿಕಾಪ್ಟರ್‌ಗಳು ಆಕಾಶದಲ್ಲಿ ಡಿಕ್ಕಿ ಹೊಡೆದುಕೊಂಡ ನಂತರ ಹತ್ತು ಜನರು ಸಾವಿಗೀಡಾಗಿದ್ದಾರೆ ಎಂದು ಮಲೇಷಿಯನ್ ನೌಕಾಪಡೆ ಹೇಳಿಕೆಯಲ್ಲಿ ತಿಳಿಸಿದೆ.
ಪಶ್ಚಿಮ ರಾಜ್ಯ ಪೆರಾಕ್‌ನ ಲುಮುಟ್ ನೌಕಾನೆಲೆಯಲ್ಲಿ ಮಂಗಳವಾರ ಬೆಳಗ್ಗೆ (0132 GMT) 9:32 ಗಂಟೆಗೆ ಸಂಭವಿಸಿದ ಅಪಘಾತದಲ್ಲಿ ಹೆಲಿಕಾಪ್ಟರ್‌ಗಳಲ್ಲಿದ್ದ ಎಲ್ಲಾ 10 ಮಂದಿ ಸಿಬ್ಬಂದಿ ಸಾವಿಗೀಡಾಗಿದ್ದಾರೆ ಎಂದು ನೌಕಾಪಡೆ ತಿಳಿಸಿದೆ.
“ಎಲ್ಲರೂ ಘಟನಾ ಸ್ಥಳದಲ್ಲಿ ಸಾವಿಗೀಡಾಗಿದ್ದಾರೆ ಎಂದು ದೃಢಪಡಿಸಲಾಗಿದೆ ಮತ್ತು ಗುರುತು ಪತ್ತೆ ಹಚ್ಚಲು ಲುಮುಟ್ ಸೇನಾ ಮೂಲ ಆಸ್ಪತ್ರೆಗೆ ಕಳುಹಿಸಲಾಗಿದೆ” ಎಂದು ನೌಕಾಪಡೆ ತಿಳಿಸಿದೆ.
ಎರಡು ಹೆಲಿಕಾಪ್ಟರ್‌ಗಳು ಡಿಕ್ಕಿಯಾಗುವ ಮೊದಲು ಸುಮಾರು 9:03 ಗಂಟೆಗೆ ಪಡಂಗ್ ಸಿಟಿಯಾವಾನ್‌ನಿಂದ ಹೊರಟವು, AW139 ಹೆಲಿಕಾಪ್ಟರ್ ಲುಮುಟ್ ಬೇಸ್‌ನ ಸ್ಟೇಡಿಯಂನ ಮೆಟ್ಟಿಲುಗಳ ಮೇಲೆ ಅಪ್ಪಳಿಸಿತು ಮತ್ತು ಮತ್ತೊಂದು ಹೆಲಿಕಾಪ್ಟರ್ ಬೇಸ್‌ನ ಕ್ರೀಡಾ ಸಂಕೀರ್ಣದ ಈಜುಕೊಳಕ್ಕೆ ಬಿದ್ದಿತು.
ಡಿಕ್ಕಿಯ ದೃಶ್ಯಾವಳಿಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಅದರಲ್ಲಿ ಒಂದು ಹೆಲಿಕಾಪ್ಟರ್ ಮತ್ತೊಂದು ಹೆಲಿಕಾಪ್ಟರಿನ ರೋಟರ್‌ಗೆ ಬಡಿದಿರುವುದು ಅಪಘಾತಕ್ಕೆ ಕಾರಣವಾಗಿದೆ. ಒಂದು ಹೆಲಿಕಾಪ್ಟರ್ ರನ್ನಿಂಗ್ ಟ್ರ್ಯಾಕ್‌ಗೆ ಅಪ್ಪಳಿಸಿತು ಮತ್ತು ಇನ್ನೊಂದು ಈಜುಕೊಳಕ್ಕೆ ಅಪ್ಪಳಿಸಿತು.
ಎರಡು ಹೆಲಿಕಾಪ್ಟರ್‌ಗಳಲ್ಲಿ ಒಂದು ಯುರೋಕಾಪ್ಟರ್ AS555SN ಫೆನೆಕ್ ಮತ್ತು ಮತ್ತೊಂದು ಅಗಸ್ಟಾವೆಸ್ಟ್‌ಲ್ಯಾಂಡ್ AW139 ಎಂದು ರಕ್ಷಣಾ ಸಂಸ್ಥೆ ತಿಳಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ