ಪುರಿ: ಭಾರತದ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಅವರ ಸಹೋದರ ಸ್ನೇಹಶಿಶ್ ಗಂಗೂಲಿ ಮತ್ತು ಅವರ ಪತ್ನಿ ಅರ್ಪಿತಾ ಇದ್ದ ಸ್ಪೀಡ್ ಬೋಟ್ ಒಡಿಶಾದ ಸಮುದ್ರದಲ್ಲಿ ಭಾನುವಾರ ಮಗುಚಿ ಬಿದ್ದಿದೆ. ಅವರು ಸ್ವಲ್ಪದರಲ್ಲೇ ಅಪಾಯದಿಂದ ಪಾರಾಗಿದ್ದು, ಅವರನ್ನು ರಕ್ಷಣಾ ಗಾರ್ಡ್ಗಳು ರಕ್ಷಿಸಿದ್ದಾರೆ.
ಪುರಿಯಲ್ಲಿ ರಜೆಯಲ್ಲಿದ್ದ ಗಂಗೂಲಿ ದಂಪತಿ ಕಡಲತೀರದಲ್ಲಿ ಆನಂದಿಸುತ್ತಿದ್ದಾಗ ಈ ಘಟನೆ ಸಂಭವಿಸಿದೆ. ಜೀವರಕ್ಷಕರು ಪ್ರವಾಸಿಗರನ್ನು ರಕ್ಷಿಸಲು ಪ್ರಯತ್ನಿಸುತ್ತಿರುವಾಗ ಸ್ಪೀಡ್ ಬೋಟ್ ಭಾರಿ ಸಮುದ್ರದ ಅಲೆಗೆ ಸಿಲುಕಿ ಸಮುದ್ರದ ನೀರಿನಲ್ಲಿ ತಲೆಕೆಳಗಾಗಿ ಬಿದ್ದಿರುವುದನ್ನು ವೈರಲ್ ಆಗಿರುವ ವೀಡಿಯೊ ತೋರಿಸುತ್ತದೆ. ಅಧಿಕಾರಿಗಳು ಅವರನ್ನು ರಕ್ಷಿಸಲು ರಬ್ಬರ್ ಫ್ಲೋಟ್ಗಳನ್ನು ಬಳಸಿದರು.
ದೋಣಿಯಲ್ಲಿ ಪ್ರಯಾಣಿಕರ ಸಾಮರ್ಥ್ಯ ಕಡಿಮೆ ಇದ್ದ ಕಾರಣ ದೋಣಿ ಹಗುರವಾಗಿತ್ತು, ಇದರಿಂದಾಗಿ ಅದು ಪಲ್ಟಿಯಾಗಿದೆ ಎಂದು ಅರ್ಪಿತಾ ಗಂಗೂಲಿ ಆರೋಪಿಸಿದ್ದಾರೆ.
“ಸಮುದ್ರವು ತುಂಬಾ ಪ್ರಕ್ಷುಬ್ಧವಾಗಿತ್ತು. ದೋಣಿ 10 ಜನರ ಸಾಮರ್ಥ್ಯವನ್ನು ಹೊಂದಿತ್ತು, ಆದರೆ ಹಣದ ದುರಾಸೆಯಿಂದಾಗಿ, ಅವರು ಕೇವಲ ಮೂರರಿಂದ ನಾಲ್ಕು ಜನರಿಗೆ ಮಾತ್ರ ಬೋಟಿನಲ್ಲಿ ಅವಕಾಶ ನೀಡಿದರು. ಇದು ಆ ದಿನ ಸಮುದ್ರಕ್ಕೆ ಹೋಗಲು ಕೊನೆಯ ದೋಣಿಯಾಗಿತ್ತು. ಸಮುದ್ರಕ್ಕೆ ಹೋಗುವ ಬಗ್ಗೆ ನಾವು ಕಳವಳ ವ್ಯಕ್ತಪಡಿಸಿದ್ದೆವು, ಆದರೆ ನಿರ್ವಾಹಕರು ಎಲ್ಲವೂ ಸರಿ ಇದೆ ಎಂದು ನಮಗೆ ತಿಳಿಸಿದರು” ಎಂದು ಶ್ರೀಮತಿ ಗಂಗೂಲಿ ಹೇಳಿದ್ದಾರೆ. ಅವರು ಸಮುದ್ರಕ್ಕೆ ಹೋದ ತಕ್ಷಣ, ಒಂದು ದೊಡ್ಡ ಅಲೆ ದೋಣಿಗೆ ಅಪ್ಪಳಿಸಿದ್ದರಿಂದ ಅದು ಮಗುಚಿತು ಎಂದು ಅವರು ಹೇಳಿದರು.
“ರಕ್ಷಣಾ ಗಾರ್ಡ್ಗಳೂ ಬರದಿದ್ದರೆ, ನಾವು ಬದುಕುಳಿಯುತ್ತಿರಲಿಲ್ಲ. ನಾನು ಇನ್ನೂ ಆಘಾತದಲ್ಲಿದ್ದೇನೆ…ಇಂತಹದ್ದನ್ನು ಎಂದಿಗೂ ಎದುರಿಸಿಲ್ಲ. ದೋಣಿಯಲ್ಲಿ ಹೆಚ್ಚಿನ ಜನರಿದ್ದರೆ, ಬಹುಶಃ ಅದು ಪಲ್ಟಿಯಾಗುತ್ತಿರಲಿಲ್ಲವೇನೋ” ಎಂದು ಅವರು ಹೇಳಿದರು. “ಅಧಿಕಾರಿಗಳು ಇಲ್ಲಿ ಈ ಕ್ರೀಡೆಗಳನ್ನು ನಿಷೇಧಿಸಬೇಕು. ಪುರಿ ಬೀಚ್ ತುಂಬಾ ಒರಟಾದ ಸಮುದ್ರವನ್ನು ಹೊಂದಿದೆ. ನಾನು ಕೋಲ್ಕತ್ತಾಗೆ ಹಿಂತಿರುಗಿದ ನಂತರ ಪೊಲೀಸ್ ವರಿಷ್ಠಾಧಿಕಾರಿ ಮತ್ತು ಮುಖ್ಯಮಂತ್ರಿಗೆ ಪತ್ರ ಬರೆಯುತ್ತೇನೆ, ಇಲ್ಲಿ ಜಲಕ್ರೀಡೆಗಳನ್ನು ನಿಲ್ಲಿಸುವಂತೆ ಮನವಿ ಮಾಡುತ್ತೇನೆ” ಎಂದು ಅವರು ಹೇಳಿದರು.
ಈ ಭೀಕರ ಘಟನೆಯ ಪ್ರತ್ಯಕ್ಷದರ್ಶಿಗಳಾದ ಸ್ಥಳೀಯರು, ಬೃಹತ್ ಅಲೆ ಅಪ್ಪಳಿಸಿದ್ದರಿಂದ ಸ್ಪೀಡ್ ಬೋಟ್ ಸಮತೋಲನ ಕಳೆದುಕೊಂಡು ಮಗುಚಿ ಬಿದ್ದಿದೆ ಎಂದು ಹೇಳಿದರು.
ಉತ್ತರ ಬಂಗಾಳಕೊಲ್ಲಿಯಲ್ಲಿ ಕಡಿಮೆ ಒತ್ತಡದ ಪ್ರದೇಶವು ರೂಪುಗೊಳ್ಳುವ ಸಾಧ್ಯತೆಯಿರುವುದರಿಂದ ಒಡಿಶಾದ ಕರಾವಳಿಯಲ್ಲಿ ಭಾರೀ ಮಳೆಯಾಗುವ ನಿರೀಕ್ಷೆಯಿದೆ ಎಂದು ಭಾರತ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ. ಮಂಗಳವಾರ ಗಂಜಾಂ, ಗಜಪತಿ, ರಾಯಗಡ, ಕಲಹಂಡಿ, ಕಂಧಮಲ್ ಮತ್ತು ಕೊರಾಪುಟ್ ಜಿಲ್ಲೆಗಳಲ್ಲಿ ಮತ್ತು ಬುಧವಾರ ಪುರಿ, ಖುರ್ದಾ, ಗಂಜಾಂ, ಗಜಪತಿ, ರಾಯಗಡ, ಕೊರಾಪುಟ್ ಮತ್ತು ಮಲ್ಕಂಗಿರಿ ಜಿಲ್ಲೆಗಳಲ್ಲಿ ಮಳೆಯಾಗುವ ನಿರೀಕ್ಷೆಯಿದೆ.
ಒಡಿಶಾ ಕರಾವಳಿಯಲ್ಲಿ ಗಂಟೆಗೆ 45 ಕಿ.ಮೀ.ಗಿಂತ ಹೆಚ್ಚಿನ ವೇಗದಲ್ಲಿ ಗಾಳಿ ಬೀಸಬಹುದು ಎಂದು ಪ್ರಾದೇಶಿಕ ಹವಾಮಾನ ಕಚೇರಿ ಮುನ್ಸೂಚನೆ ನೀಡಿದೆ. ಬುಧವಾರದಿಂದ ಒಡಿಶಾ ಕರಾವಳಿಯಲ್ಲಿ ಆಳ ಸಮುದ್ರಕ್ಕೆ ಇಳಿಯದಂತೆ ಮೀನುಗಾರರಿಗೆ ಸೂಚಿಸಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ