ಅಕ್ಟೋಬರ್ 14, ಶನಿವಾರದಂದು ನಡೆದ ಐಒಸಿ (IOC) ಅಧಿವೇಶನ 2023 ರ ಉದ್ಘಾಟನಾ ಸಮಾರಂಭದಲ್ಲಿ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರು 2036 ರ ಒಲಿಂಪಿಕ್ ಕ್ರೀಡಾಕೂಟವನ್ನು ಆಯೋಜಿಸುವ ಭಾರತದ ಸಂಭಾವ್ಯ ಬಿಡ್ ಅನ್ನು ದೃಢಪಡಿಸಿದ್ದಾರೆ. ಮೋದಿ ಅವರು ಮುಂಬೈನಲ್ಲಿ 141 ನೇ ಐಒಸಿ (IOC) ಅಧಿವೇಶನವನ್ನು ಉದ್ಘಾಟಿಸಿದರು ಮತ್ತುಮೊಟ್ಟಮೊದಲ ಒಲಿಂಪಿಕ್ ಕ್ರೀಡಾಕೂಟಗಳ ಆತಿಥ್ಯ ವಹಿಸುವ ಭಾರತದ ಪ್ರಯತ್ನದ ಹಿಂದೆ ಸರ್ಕಾರದ ಸಂಪೂರ್ಣ ಬೆಂಬಲವನ್ನು ಬಹಿರಂಗಪಡಿಸಿದರು.
ಮುಂಬೈನಲ್ಲಿ 40 ವರ್ಷಗಳ ನಂತರ ಅಕ್ಟೋಬರ್ 14 ರಿಂದ 16ರ ವರೆಗೆ ಭಾರತವು ಎರಡನೇ ಬಾರಿಗೆ 141 ನೇ ಐಒಸಿ (IOC) ಅಧಿವೇಶನವನ್ನು ಆಯೋಜಿಸುತ್ತಿದೆ. ಕ್ರೀಡಾ ವಿಭಾಗಗಳ ಸೇರ್ಪಡೆ ಮತ್ತು ಹೊರಗಿಡುವಿಕೆ ಸೇರಿದಂತೆ ವಿವಿಧ ನಿರ್ಧಾರಗಳನ್ನು ಸೆಷನ್ ಸಭೆಗಳಲ್ಲಿ ತೆಗೆದುಕೊಳ್ಳಲಾಗುತ್ತದೆ. 2028ರ ಲಾಸ್ ಏಂಜಲೀಸ್ ಒಲಿಂಪಿಕ್ಸ್‌ನಲ್ಲಿ ಕ್ರಿಕೆಟ್ ಮತ್ತು ಇತರ ನಾಲ್ಕು ಕ್ರೀಡಾ ವಿಭಾಗಗಳನ್ನು ಸೇರಿಸುವ ಶಿಫಾರಸನ್ನೂ ಐಒಸಿ ಕಾರ್ಯಕಾರಿ ಮಂಡಳಿ ಶುಕ್ರವಾರ ಅನುಮೋದಿಸಿದೆ ಮತ್ತು ಸೋಮವಾರ ನಿರ್ಧಾರವನ್ನು ಅಂತಿಮಗೊಳಿಸಲು ಮತದಾನವ ನಡೆಸಲಾಗುತ್ತದೆ.
ಮೋದಿ ಅವರು ನೀತಾ ಮುಖೇಶ ಅಂಬಾನಿ ಸಾಂಸ್ಕೃತಿಕ ಕೇಂದ್ರದಲ್ಲಿ ಅಧಿವೇಶನ ಉದ್ಘಾಟಿಸಿದರು ಮತ್ತು ಐಒಸಿ ಅಧ್ಯಕ್ಷ ಥಾಮಸ್ ಬಾಚ್ ಸೇರಿದಂತೆ ಸಮಿತಿಯ ಸದಸ್ಯರನ್ನು ಉದ್ದೇಶಿಸಿ ಮಾತನಾಡಿದರು. ಒಲಿಂಪಿಕ್ಸ್‌ಗೆ ಆತಿಥ್ಯ ವಹಿಸುವ ಭಾರತದ ಪ್ರಯತ್ನವನ್ನು ಮೋದಿ ದೃಢಪಡಿಸಿದರು ಮತ್ತು ಇದು 2029 ಯೂತ್ ಒಲಿಂಪಿಕ್ಸ್‌ಗೆ ಸಹ ಬಿಡ್ ಮಾಡಲಿದೆ ಎಂದು ಹೇಳಿದರು.
‘ದೇಶದಲ್ಲಿ ಒಲಿಂಪಿಕ್ಸ್ ಆತಿಥ್ಯ ವಹಿಸಲು ಭಾರತ ಉತ್ಸುಕವಾಗಿದೆ’ ಎಂದು ನರೇಂದ್ರ ಮೋದಿ ಹೇಳಿದರು. 2036ರ ಒಲಿಂಪಿಕ್ಸ್‌ನ ಯಶಸ್ವಿ ಆಯೋಜನೆಗೆ ಭಾರತ ಯಾವುದೇ ಪ್ರಯತ್ನವನ್ನೂ ಬಿಡುವುದಿಲ್ಲ, ಇದು 140 ಕೋಟಿ ಭಾರತೀಯರ ಕನಸು. 2029ರಲ್ಲಿ ನಡೆಯುವ ಯೂತ್ ಒಲಿಂಪಿಕ್ಸ್‌ಗೂ ಭಾರತ ಆತಿಥ್ಯ ವಹಿಸಲು ಉತ್ಸುಕವಾಗಿದೆ. ಕ್ರೀಡೆಯು ಎಲ್ಲರಿಗೂ ಸೇರಿದೆ. ಇದು ಚಾಂಪಿಯನ್‌ಗಳನ್ನು ಸಿದ್ಧಪಡಿಸುವುದು ಮಾತ್ರವಲ್ಲದೆ ಶಾಂತಿ, ಪ್ರಗತಿ ಮತ್ತು ಸ್ವಾಸ್ಥ್ಯವನ್ನು ಉತ್ತೇಜಿಸುತ್ತದೆ. ಆದ್ದರಿಂದ, ಕ್ರೀಡೆಯು ಜಗತ್ತನ್ನು ಒಂದುಗೂಡಿಸುವ ಮತ್ತೊಂದು ಮಾಧ್ಯಮವಾಗಿದೆ ಎಂದು ಅವರು ಹೇಳಿದರು.
ಐಒಸಿ ಅಧ್ಯಕ್ಷ ಥಾಮಸ್ ಬಾಚ್ ಅವರು ನಮಸ್ತೆ ಮೂಲಕ ಪ್ರಧಾನಿ ಮೋದಿಯನ್ನು ಸ್ವಾಗತಿಸಿದರು ಮತ್ತು ಏಷ್ಯನ್ ಗೇಮ್ಸ್ 2023 ರಲ್ಲಿ ಭಾರತದ ಇತ್ತೀಚಿನ ಯಶಸ್ಸನ್ನು ಶ್ಲಾಘಿಸಿದರು. ಭಾರತವು ಹ್ಯಾಂಗ್‌ಝೌ ಏಶಿಯನ್‌ ಗೇಮ್ಸ್‌ನಲ್ಲಿ ಅಭೂತಪೂರ್ವ 28 ಚಿನ್ನ ಸೇರಿದಂತೆ ದಾಖಲೆಯ 107 ಪದಕಗಳನ್ನು ಗಳಿಸಿದೆ. ಏಷ್ಯನ್ ಕ್ರೀಡಾಕೂಟವು ಒಲಿಂಪಿಕ್ಸ್‌ಗೆ ರಾಷ್ಟ್ರದ ಸಾಮರ್ಥ್ಯ ಮತ್ತು ಭರವಸೆಯ ಬಿಡ್‌ಗೆ ಪ್ರಮುಖ ಕಾರಣವಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ