ಈ ಮೊದಲಿನ ಎಲ್ಲ ದಾಖಲೆಗಳನ್ನೂ ಉಡೀಸ್‌ ಮಾಡಿದ ಏಪ್ರಿಲ್‌ ತಿಂಗಳಿನ ಜಿಎಸ್‌ಟಿ ಸಂಗ್ರಹ…!

ನವದೆಹಲಿ: ಏಪ್ರಿಲ್‌ನಲ್ಲಿ ಸರ್ಕಾರವು 1.87 ಲಕ್ಷ ಕೋಟಿ ರೂಪಾಯಿಗಳಷ್ಟು ಸರಕು ಮತ್ತು ಸೇವಾ ತೆರಿಗೆ (ಜಿಎಸ್‌ಟಿ) ಸಂಗ್ರಹಿಸಿದೆ ಎಂದು ಕೇಂದ್ರ ಹಣಕಾಸು ಸಚಿವಾಲಯವು ಮೇ 1 ರಂದು ಬಿಡುಗಡೆ ಮಾಡಿದ ಅಂಕಿಅಂಶಗಳು ತೋರಿಸಿವೆ.
ಏಪ್ರಿಲ್‌ನಲ್ಲಿ 1.87 ಲಕ್ಷ ಕೋಟಿ ರೂ.ಗಳಷ್ಟು ಜಿಎಸ್‌ಟಿ ಸಂಗ್ರಹವಾಗಿರುವುದು ಈವರೆಗಿನ ಸಾರ್ವಕಾಲಿಕ ಗರಿಷ್ಠ ಸಂಗ್ರಹವಾಗಿದೆ. ಏಪ್ರಿಲ್ 2022 ರಲ್ಲಿ ಸಂಗ್ರಹಿಸಲಾದ 1.68 ಲಕ್ಷ ಕೋಟಿ ರೂಪಾಯಿ ಒಂದು ತಿಂಗಳಲ್ಲಿ ಈವರೆಗಿನ ಗರಿಷ್ಠ ಸಂಗ್ರಹವಾಗಿತ್ತು.
ಕಳೆದ ಏಪ್ರಿಲ್‌ ತಿಂಗಳು ಸಂಗ್ರಹಿಸಲಾದ ಜಿಎಸ್‌ಟಿ (GST) 2022ರ ಏಪ್ರಿಲ್ ತಿಂಗಳಿಗೆ ಹೋಲಿಸಿದರೆ 11.6%ಹೆಚ್ಚಾಗಿದೆ. ಮಾರ್ಚ್ 2023ಕ್ಕೆ ಹೋಲಿಸಿದರೆ, ಇತ್ತೀಚಿನ GST ಸಂಗ್ರಹಣೆಗಳ ಅಂಕಿಅಂಶವು 16.8 ಶೇಕಡಾ ಹೆಚ್ಚಾಗಿದೆ.
ಕೇಂದ್ರ ಜಿಎಸ್‌ಟಿ 38,440 ಕೋಟಿ, ರಾಜ್ಯ ಜಿಎಸ್‌ಟಿ 47,412 ಕೋಟಿ, ಇಂಟಿಗ್ರೇಟೆಡ್ ಜಿಎಸ್‌ಟಿ 89,158 ಕೋಟಿ ಮತ್ತು ಪರಿಹಾರ ಸೆಸ್ 12,025 ಕೋಟಿ ರೂ.ಗಳು ಸೇರಿ ಒಟ್ಟು 1.87 ಲಕ್ಷ ಕೋಟಿ ರೂ.ಗಳಷ್ಟು ಜಿಎಸ್‌ಟಿ ಸಂಗ್ರಹವಾಗಿದೆ..

2023-24ರ ಬಜೆಟ್‌ನ ಪ್ರಕಾರ, ಪ್ರಸಕ್ತ ಹಣಕಾಸು ವರ್ಷದಲ್ಲಿ ತನ್ನ ಜಿಎಸ್‌ಟಿ ಸಂಗ್ರಹಗಳು ಶೇಕಡಾ 12 ರಷ್ಟು ಹೆಚ್ಚಾಗುವ ನಿರೀಕ್ಷೆಯನ್ನು ಕೇಂದ್ರ ಹೊಂದಿದೆ. ಏಪ್ರಿಲ್ 20 ರಂದು ಒಂದೇ ದಿನದಲ್ಲಿ ಅತಿ ಹೆಚ್ಚು ತೆರಿಗೆ ಸಂಗ್ರಹವಾಗಿದೆ ಎಂದು ಹಣಕಾಸು ಸಚಿವಾಲಯ ಹೇಳಿಕೆಯಲ್ಲಿ ತಿಳಿಸಿದೆ. 2023 ರ ಏಪ್ರಿಲ್ 20 ರಂದು 9.8 ಲಕ್ಷ ವಹಿವಾಟುಗಳ ಮೂಲಕ 68,228 ಕೋಟಿ ರೂಪಾಯಿಗಳಷ್ಟನ್ನು ಒಂದೇ ದಿನದಲ್ಲಿ ಪಾವತಿಸಲಾಗಿದೆ. ಕಳೆದ ವರ್ಷ (ಇದೇ ದಿನಾಂಕದಂದು) 9.6 ಲಕ್ಷ ವಹಿವಾಟುಗಳ ಮೂಲಕ 57,846 ಕೋಟಿ ರೂಪಾಯಿಗಳ ಗರಿಷ್ಠ ಏಕ ದಿನದ ಪಾವತಿಯಾಗಿತ್ತು” ಎಂದು ಸಚಿವಾಲಯ ತಿಳಿಸಿದೆ.
ಏಪ್ರಿಲ್‌ನಲ್ಲಿ ಅನೇಕ ರಾಜ್ಯಗಳು ತಮ್ಮ ಜಿಎಸ್‌ಟಿ ಸಂಗ್ರಹಣೆಯಲ್ಲಿ ಶೇಕಡಾ 20-ಪ್ಲಸ್ ಬೆಳವಣಿಗೆಯನ್ನು ದಾಖಲಿಸಿದರೆ, 14 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳು ತಮ್ಮ ಆದಾಯದಲ್ಲಿ ಶೇಕಡಾ 14 ಕ್ಕಿಂತ ಕಡಿಮೆ ಬೆಳವಣಿಗೆಯನ್ನು ದಾಖಲಿಸಿವೆ. ಇವುಗಳಲ್ಲಿ ಚಂಡೀಗಢ (2 ಪ್ರತಿಶತ), ಒಡಿಶಾ (3 ಪ್ರತಿಶತ), ಗುಜರಾತ್ (4 ಪ್ರತಿಶತ), ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳು (5 ಪ್ರತಿಶತ), ದಾದ್ರಾ ಮತ್ತು ನಗರ ಹವೇಲಿ ಮತ್ತು ದಮನ್ ಮತ್ತು ದಿಯು (5 ಪ್ರತಿಶತ), ರಾಜಸ್ಥಾನ (5 ಪ್ರತಿಶತ), ಆಂಧ್ರ ಪ್ರದೇಶಗಳು ಸೇರಿವೆ. (6 ಶೇಕಡಾ), ಮೇಘಾಲಯ (6 ಶೇಕಡಾ), ಪುದುಚೇರಿ (6 ಶೇಕಡಾ), ದೆಹಲಿ (8 ಶೇಕಡಾ), ಬಿಹಾರ (11 ಶೇಕಡಾ), ಮತ್ತು ಕೇರಳ (12 ಶೇಕಡಾ) ಸೇರಿವೆ. ಕಳೆದ ವರ್ಷದ ಇದೇ ತಿಂಗಳಿಗೆ ಹೋಲಿಸಿದರೆ ಲಕ್ಷದ್ವೀಪದ ಸಂಗ್ರಹವು ಶೇಕಡಾ 7 ರಷ್ಟು ಕುಸಿದಿದೆ.