ನವದೆಹಲಿ: ಇಂಡಿಯಾ ಗೇಟ್ನಲ್ಲಿ ವಾಯು ಮಾಲಿನ್ಯದ ಕುರಿತ ಪ್ರತಿಭಟನೆಗಳ ವೇಳೆ ‘ಪೆಪ್ಪರ್ ಸ್ಪ್ರೇ’ (Pepper Spray) ಬಳಸಿದ್ದಾರೆಂಬ ಆರೋಪದ ಮೇಲೆ ಬಂಧಿತರಾಗಿದ್ದ 11 ಮಹಿಳೆಯರು ಸೇರಿದಂತೆ 17 ಆರೋಪಿಗಳಿಗೆ ದೆಹಲಿಯ ಪಟಿಯಾಲ ಹೌಸ್ ನ್ಯಾಯಾಲಯ ಸೋಮವಾರ ಮೂರು ದಿನಗಳ ನ್ಯಾಯಾಂಗ ಬಂಧನ ವಿಧಿಸಿದೆ. ನ್ಯಾಯಾಲಯವು ಇತರ ಐದು ಆರೋಪಿಗಳನ್ನು ಎರಡು ದಿನಗಳ ನ್ಯಾಯಾಂಗ ಬಂಧನಕ್ಕೆ ಕಳುಹಿಸಿದೆ. ಅಲ್ಲದೆ, ನ್ಯಾಯಾಂಗ ಮ್ಯಾಜಿಸ್ಟ್ರೇಟ್ ಅವರು ಒಬ್ಬ ವ್ಯಕ್ತಿಯ ವಯಸ್ಸನ್ನು ಪರಿಶೀಲಿಸುವವರೆಗೆ ಆತನನ್ನು ವೀಕ್ಷಣಾ ಗೃಹಕ್ಕೆ (Observation home) ಕಳುಹಿಸಿದ್ದಾರೆ.
ಭಾನುವಾರ ಪ್ರತಿಭಟನೆಯ ವೇಳೆ ಆರೋಪಿಗಳು ಮೆಣಸಿನ ಸ್ಪ್ರೇ ಬಳಸಿದ್ದಲ್ಲದೆ ಮಾವೋವಾದಿ ನಾಯಕ ಮಾದ್ವಿ ಹಿದ್ಮಾ ಪರ ಘೋಷಣೆಗಳನ್ನು ಕೂಗಿದ್ದರಿಂದ ಪೊಲೀಸರು ಮಧ್ಯಪ್ರವೇಶಿಸಬೇಕಾಯಿತು. ಇದರ ನಂತರ 22 ಆರೋಪಿಗಳನ್ನು ಬಂಧಿಸಲಾಯಿತು.
ತುರ್ತು ವಾಹನಗಳು ಸಿಲುಕಿಕೊಂಡಿವೆ ಮತ್ತು ಅವುಗಳಿಗೆ ದಾರಿಯ ಅಗತ್ಯವಿದೆ ಎಂದು ನಾವು ಅವರಿಗೆ ಮನವರಿಕೆ ಮಾಡಲು ಪ್ರಯತ್ನಿಸಿದೆವು, ಆದರೆ ಅವರು ಅಲ್ಲಿಂದ ಸ್ಥಳಾಂತರಗೊಳ್ಳಲು ನಿರಾಕರಿಸಿದರು. ನಂತರ ಪರಿಸ್ಥಿತಿಯು ಘರ್ಷಣೆಗೆ ತಿರುಗಿತು, ಮತ್ತು ಕೆಲವು ಪ್ರತಿಭಟನಾಕಾರರು ನಮ್ಮ ಸಿಬ್ಬಂದಿಯ ಮೇಲೆ ಮೆಣಸಿನ ಪುಡಿಯನ್ನು ಎರಚಿದರು (Pepper Spray), ಇದು ಅಸಾಮಾನ್ಯ ಮತ್ತು ವಿರಳ” ಎಂದು ಅಧಿಕಾರಿಯೊಬ್ಬರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಮಾವೋವಾದಿ ಕಮಾಂಡರ್ಗಳಲ್ಲಿ ಅತ್ಯಂತ ಬೇಕಾದ ವ್ಯಕ್ತಿಗಳಲ್ಲಿ ಒಬ್ಬನಾಗಿದ್ದ ಹಿದ್ಮಾ (51) ನವೆಂಬರ್ 18 ರಂದು ಆಂಧ್ರಪ್ರದೇಶದ ಅಲ್ಲೂರಿ ಸೀತಾರಾಮರಾಜು ಜಿಲ್ಲೆಯಲ್ಲಿ ನಡೆದ ಎನ್ಕೌಂಟರ್ನಲ್ಲಿ ಐದು ಮಂದಿ ಇತರರೊಂದಿಗೆ ಹತ್ಯೆಯಾಗಿದ್ದ.
ಪೊಲೀಸರು ತಿಳಿಸಿರುವಂತೆ, ಆರೋಪಿಗಳ ವಿರುದ್ಧ ಇದೀಗ ಭಾರತೀಯ ನ್ಯಾಯ ಸಂಹಿತೆ ಸಂಬಂಧಿತ ಸೆಕ್ಷನ್ಗಳಾದ 74 (ಮಹಿಳೆಯ ನಮ್ರತೆಯನ್ನು ಕೆರಳಿಸುವ ಉದ್ದೇಶದಿಂದ ಅವರ ಮೇಲೆ ಹಲ್ಲೆ ಅಥವಾ ಕ್ರಿಮಿನಲ್ ಬಲ ಪ್ರಯೋಗ), 115(2) (ಸ್ವಯಂಪ್ರೇರಿತವಾಗಿ ಗಾಯಪಡಿಸುವುದು), 221 (ಕರ್ತವ್ಯ ನಿರ್ವಹಣೆಯಲ್ಲಿ ಸಾರ್ವಜನಿಕ ಸೇವಕರಿಗೆ ಅಡ್ಡಿಪಡಿಸುವುದು) ಮತ್ತು 223 (ಸಾರ್ವಜನಿಕ ಸೇವಕರಿಂದ ಕಾನೂನುಬದ್ಧ ಆದೇಶಕ್ಕೆ ಅವಿಧೇಯತೆ) ಅಡಿಯಲ್ಲಿ ಪ್ರಥಮ ಮಾಹಿತಿ ವರದಿ (ಎಫ್ಐಆರ್) ದಾಖಲಿಸಲಾಗಿದೆ.
ಮತ್ತೊಂದೆಡೆ, ಪರಿಸರ ಅವನತಿಗೆ ಕಾರಣವಾಗಿ, ನಗರದಲ್ಲಿ ಮಾಲಿನ್ಯ ಉಂಟುಮಾಡುತ್ತಿರುವ ಪ್ರಸ್ತುತ ಅಭಿವೃದ್ಧಿ ಮಾದರಿಯ ವಿರುದ್ಧ ತಾವು ಪ್ರತಿಭಟಿಸುತ್ತಿದ್ದೇವೆ ಎಂದು ಕಾರ್ಯಕರ್ತರು ಹೇಳಿದ್ದಾರೆ. ಇಂತಹ ವಿಷಯಗಳ ಬಗ್ಗೆ ಕಾರ್ಯಕರ್ತರು ಕಾಳಜಿ ವ್ಯಕ್ತಪಡಿಸಿದಾಗಲೆಲ್ಲಾ ಸರ್ಕಾರವು “ದಮನಕಾರಿ” ರೀತಿಯಲ್ಲಿ ಪ್ರತಿಕ್ರಿಯಿಸುತ್ತದೆ ಎಂದು ಅವರು ಟೀಕಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ