ಹಣ ಸಂಗ್ರಹಕ್ಕೆ  54,000 ಕೋಟಿ ರೂ. ಆಸ್ತಿ ಗುರುತಿಸಿದ ರೈಲ್ವೆ

ನವ ದೆಹಲಿ: ರೈಲ್ವೆ ಸಚಿವಾಲಯವು 54,344 ಕೋಟಿ ರೂ.ಗಳ ಸಂಭಾವ್ಯ ಮೌಲ್ಯದೊಂದಿಗೆ ವಿತ್ತೀಯಗೊಳಿಸಬಹುದಾದ ಸ್ವತ್ತುಗಳ ಆರಂಭಿಕ ಪಟ್ಟಿ ಸಿದ್ಧಪಡಿಸಿದೆ ಎಂದು ತಿಳಿದುಬಂದಿದೆ.
ಸರ್ಕಾರದ ಮೂಲಗಳ ಪ್ರಕಾರ, ಕಳೆದ ವಾರ ಕಾರ್ಯದರ್ಶಿಗಳ ಗುಂಪಿನೊಂದಿಗೆ (ಜಿಒಎಸ್‌) ನಡೆದ ಸಭೆಯಲ್ಲಿ, ಖಾಸಗಿ ರೈಲು ಆಪರೇಟರ್ ಯೋಜನೆಗಳು, ಬಹುಕ್ರಿಯಾತ್ಮಕ ಸಂಕೀರ್ಣಗಳು, ರೈಲ್ವೆ ವಸಾಹತುಗಳು ಮತ್ತು ಆಯ್ದ ರೈಲು ಭೂ ಕಂದಕಗಳನ್ನು ಒಳಗೊಂಡ ಆರಂಭಿಕ ‘ಆಸ್ತಿ ಹಣಗಳಿಕೆ ಪೈಪ್‌ಲೈನ್’ ಪಟ್ಟಿಯನ್ನು ಸಚಿವಾಲಯ ಗುರುತಿಸಿದೆ.
ನೀತಿ ಆಯೋಗದ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಮಿತಾಬ್ ಕಾಂತ್ ಅಧ್ಯಕ್ಷತೆಯಲ್ಲಿ ನಡೆದ ಈ ಸಭೆಯಲ್ಲಿ ರೈಲ್ವೆ ಮಂಡಳಿಯ ಅಧ್ಯಕ್ಷ ಸುನೀತ್ ಶರ್ಮಾ ಮತ್ತು ಆರ್ಥಿಕ ವ್ಯವಹಾರಗಳ ಇಲಾಖೆ ಕಾರ್ಯದರ್ಶಿ ತರುಣ್ ಬಜಾಜ್ ಇತರರು ಭಾಗವಹಿಸಿದ್ದರು. ಆಸ್ತಿಯಿಂದ ಹಣಗಳಿಸುವಿಕೆಯು ಸಾರ್ವಜನಿಕ ಸ್ವತ್ತುಗಳಲ್ಲಿ ಮಾಡಿದ ಹೂಡಿಕೆಯ ಮೌಲ್ಯ ಹೊರತೆಗೆಯುವ ಪ್ರಕ್ರಿಯೆಯನ್ನು ಸೂಚಿಸುತ್ತದೆ, ಅದು ಇಲ್ಲಿಯವರೆಗೆ ಸಾಕಷ್ಟು ಲಾಭವನ್ನು ನೀಡಿಲ್ಲ.
ರೈಲ್ವೆಯ ಆಸ್ತಿ ಹಣ ಗಳಿಕೆ ಪಟ್ಟಿಯು ಸರ್ಕಾರದಹೂಡಿಕೆಯ ಕಾರ್ಯಸೂಚಿಯ ಒಂದು ಭಾಗವಾಗಿದೆ, ಇದಕ್ಕಾಗಿ ಸುಮಾರು 30 ಯೋಜನೆಗಳು ಮತ್ತು ಹಣ ಕ್ರೋಡೀಕರಣಕ್ಕಾಗಿ ಸ್ವತ್ತುಗಳನ್ನು ಶಾರ್ಟ್‌ಲಿಸ್ಟ್ ಮಾಡಲಾಗಿದ್ದು, ಇದನ್ನು ಹಣಕಾಸು ಸಚಿವ ನಿರ್ಮಲಾ ಸೀತಾರಾಮನ್ ತಮ್ಮ ಬಜೆಟ್ ಭಾಷಣದಲ್ಲಿ ಪ್ರಕಟಿಸಿದ್ದಾರೆ.
ಹಣಗಳಿಕೆಗಾಗಿ ಗುರುತಿಸಲಾದ ಯೋಜನೆಗಳ ಪಟ್ಟಿಯನ್ನು ಮುಂದಿನ ವಾರದೊಳಗೆ ನೀತಿ ಆಯೋಗಕ್ಕೆ ಸಲ್ಲಿಸಲಾಗುವುದು ಎನ್ನಲಾಗಿದ್ದು, ಇದನ್ನು ತ್ವರಿತವಾಗಿ ಕೈಗೆತ್ತಿಕೊಳ್ಳುವಂತೆ ರೈಲ್ವೆ ಸಚಿವಾಲಯಕ್ಕೆ ಜಿಒಎಸ್‌ ತಿಳಿಸಿದೆ ಎನ್ನಲಾಗಿದೆ.