ರಾಜಸ್ಥಾನದಲ್ಲಿ ನಡೆದ ವಿಲಕ್ಷಣ ಘಟನೆಯೊಂದರಲ್ಲಿ ಸರ್ಕಾರಿ ಅಧಿಕಾರಿಯೊಬ್ಬರು ಅವರ ಮನೆಯ ಮೇಲೆ ದಾಳಿ ನಡೆಸಲು ಭ್ರಷ್ಟಾಚಾರ ನಿಗ್ರಹ ದಳದ (ಎಸಿಬಿ) ಅಧಿಕಾರಿಗಳು ಬಂದಿದ್ದಾರೆ ಎಂದು ಗೊತ್ತಾದ ಕೂಡಲೇ ಅಡುಗೆಮನೆಯಲ್ಲಿ ಸುಮಾರು 20 ಲಕ್ಷ ರೂ.ಮೌಲ್ಯದ ನೋಟುಗಳನ್ನು ಸುಟ್ಟು ಹಾಕಿದ ಘಟನೆ ವರದಿಯಾಗಿದೆ.
ಎಸಿಬಿ ತಹಶೀಲ್ದಾರ್ ಕಲ್ಪೇಶ್ ಜೈನ್ ಮತ್ತು ಕಂದಾಯ ನಿರೀಕ್ಷಕ ಪರ್ಬತ್ ಸಿಂಗ್ ರಜಪೂತ್ ವಿರುದ್ಧ ಹಲವಾರು ಆರೋಪಗಳನ್ನು ದಾಖಲಿಸಿದ ನಂತರ ತನಿಖೆ ಎಸಿಬಿ ಆರಂಭಿಸಿತ್ತು. ಟೆಂಡರಿಗಾಗಿ 1 ಲಕ್ಷ ರೂ.ಗಳ ಲಂಚ ತೆಗೆದುಕೊಂಡ ರಜಪೂತ್ ಅವರನ್ನು ಎಸಿಬಿ ರೆಡ್ ಹ್ಯಾಂಡ್ ಆಗಿ ಹಿಡಿದಿತ್ತು, ನಂತರ ಟೆಂಡರ್ ಅನುಮೋದನೆಗಾಗಿ ತಹಶೀಲ್ದಾರ್ ಒಟ್ಟು 5 ಲಕ್ಷ ರೂಪಾಯಿ ಲಂಚ ಕೇಳಿದ್ದಾರೆ ಎಂದು ಅವರು ಬಹಿರಂಗ ಪಡಿಸಿದ್ದರು.
ಇದರ ಬೆನ್ನಲ್ಲೇ ಎಸಿಬಿ ಅಧಿಕಾರಿಗಳು ಬುಧವಾರ ಸಂಜೆ ಕಲ್ಪೇಶ್ ಜೈನ್ ನಿವಾಸಕ್ಕೆ ಆಗಮಿಸಿದ್ದರು. ಅಧಿಕಾರಿಗಳನ್ನು ನೋಡಿದ ಜೈನ್ ತನ್ನ ಬಾಗಿಲು ಮುಚ್ಚಿ, ಅಡುಗೆಮನೆಯಲ್ಲಿನ ಗ್ಯಾಸ್ ಬರ್ನರ್ ಮೇಲೆ 500 ರೂ. ಕರೆನ್ಸಿ ನೋಟುಗಳ ಕಟ್ಟುಗಳನ್ನು ತನ್ನ ಹೆಂಡತಿಯ ಸಹಾಯದಿಂದ ಸುಡಲು ಪ್ರಾರಂಭಿಸಿದ. ಹೊರಗಡೆ ಕಾಯುತ್ತಿದ್ದ ಅಧಿಕಾರಿಗಳಿಗೆ ತಾನು ಚಹಾ ತಯಾರಿಸುತ್ತಿದ್ದೇನೆ ಎಂದು ಹೇಳಿದ್ದಾರೆ, ಆದರೆ ಅಧಿಕಾರಿಗಳು ನಿಜವಾಗಿ ಏನಾಗುತ್ತಿದೆ ಎಂದು ಕಿಟಕಿಯ ಮೂಲಕ ನೋಡಿದರು. ಅಧಿಕಾರಿಗಳು ಜೈನ್ ಈ ಕೃತ್ಯವನ್ನು ಕಿಟಕಿಯ ಮೂಲಕ ದಾಖಲಿಸಿದ್ದಾರೆ.
ನೋಟುಗಳನ್ನು ಸುಡುವುದನ್ನು ನಿಲ್ಲಿಸುವಂತೆ ಎಸಿಬಿ ಅಧಿಕಾರಿಗಳು ಜೈನ್ ಅವರನ್ನು ಕೇಳುತ್ತಲೇ ಇದ್ದರು. ಆದರೆ ಅವರು ನೋಟುಗಳನ್ನು ಸುಡುತ್ತಲೇ ಇದ್ದರು. ಆಗ ಬೇರೆ ದಾರಿಯಿಲ್ಲದೆ, ಅಧಿಕಾರಿಗಳು ಸ್ಥಳೀಯ ಪೊಲೀಸ್ ಅಧಿಕಾರಿಗಳ ಸಹಾಯದಿಂದ ಬಾಗಿಲು ಮುರಿದು, ನೋಟುಗಳ ಕಟ್ಟುಗಳನ್ನು ಸುಡುವುದನ್ನು ನಿಲ್ಲಿಸಿದರು. ಭಾಗಶಃ ಸುಟ್ಟ ನೋಟುಗಳ ಹಲವಾರು ಕಟ್ಟುಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ ಮತ್ತು ಅವರ ಪ್ರಕಾರ, ತಹಶೀಲ್ದಾರ್ ಕಮಲೇಶ್ ಜೈನ್ ಅವರು ನಾಶಪಡಿಸಲು ಯತ್ನಿಸಿದ ಸುಮಾರು 20 ಲಕ್ಷ ರೂ. ಭಾಗಶಃ ಸುಟ್ಟ ನೋಟುಗಳನ್ನು ಅಧಿಕಾರಿಗಳು ಗ್ಯಾಸ್ ಬರ್ನರ್ ಜೊತೆಗೆ ವಶಪಡಿಸಿಕೊಂಡಿದ್ದಾರೆ.
ಮನೆಯಲ್ಲಿ ನಡೆದ ದಾಳಿಯ ಸಮಯದಲ್ಲಿ, ಎಸಿಬಿ ಸುಮಾರು 2.5 ಲಕ್ಷ ರೂ., ಹಲವಾರು ಆಸ್ತಿಗಳ ದಾಖಲೆಗಳು, ಬ್ಯಾಂಕ್ ಲಾಕರ್‌ಗಳ ದಾಖಲೆಗಳು ಮತ್ತು ಜೈನ ಹೆಂಡತಿಯ ಹೆಸರಿನಲ್ಲಿ 16 ಕ್ಕೂ ಹೆಚ್ಚು ಬ್ಯಾಂಕ್ ಖಾತೆಗಳನ್ನು ವಶಪಡಿಸಿಕೊಂಡಿದೆ. ಎಲ್ಲಾ ಬ್ಯಾಂಕುಗಳ ಬ್ಯಾಂಕ್ ಸ್ಟೇಟ್‌ಮೆಂಟ್‌ಗಳು ಇನ್ನೂ ಬಂದಿಲ್ಲವಾದರೂ, ಪ್ರಾಥಮಿಕ ತನಿಖೆಯ ಪ್ರಕಾರ, ಕನಿಷ್ಠ 20 ಲಕ್ಷ ರೂ. ಬ್ಯಾಂಕ್ ಲಾಕರ್‌ಗಳಲ್ಲಿ ಭ್ರಷ್ಟಾಚಾರದ ಮೂಲಕ ಪಡೆದ ನಗದು ಮತ್ತು ಆಭರಣಗಳಿವೆ ಎಂದು ಶಂಕಿಸಲಾಗಿದೆ. ಎಸಿಬಿ ಎಲ್ಲಾ ಬ್ಯಾಂಕ್ ಖಾತೆಗಳನ್ನು ಸ್ಥಗಿತಗೊಳಿಸಿದೆ.
ಜೈನ್ ಮತ್ತು ರಜಪೂತ್ ಇಬ್ಬರನ್ನೂ ಬಂಧಿಸಿ ಅವರನ್ನು ಶುಕ್ರವಾರ ವಿಶೇಷ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಯಿತು,
ನಿಮ್ಮ ಕಾಮೆಂಟ್ ಬರೆಯಿರಿ