ಬೆಂಗಳೂರು: ಎರಡನೇ ಅಲೆ ಪ್ರಾರಂಭವಾದಾಗಿನಿಂದ ಕರ್ನಾಟಕದ ಕೋವಿಡ್‌-19 ಸಂಖ್ಯೆಗಳು ಸ್ಥಿರವಾಗಿ ಏರುತ್ತಿವೆ. ಏಪ್ರಿಲ್ 20ರ ವರೆಗೆ ಕರ್ನಾಟಕ ಸರ್ಕಾರ ರಾತ್ರಿ ಕರ್ಫ್ಯೂ ವಿಧಿಸಿರುವಂತೆ, ತಾಂತ್ರಿಕ ಸಲಹಾ ಸಮಿತಿ (ಟಿಎಸಿ) ಪ್ರಕರಣಗಳ ಸಂಖ್ಯೆಯನ್ನು ನಿಗ್ರಹಿಸಲು ಕರ್ಫ್ಯೂ ಸೇರಿದಂತೆ ಹೆಚ್ಚಿನ ನಿರ್ಬಂಧಗಳನ್ನು ಹೇರಲು ಸಲಹೆ ನೀಡಿದೆ ಎನ್ನಲಾಗಿದೆ.
ಟಿಎಸಿಯ ಇಬ್ಬರು ಸದಸ್ಯರು ಸಾರ್ವಜನಿಕ ಸ್ಥಳಗಳಲ್ಲಿ ಜನರ ಸಂಪರ್ಕ ತಡೆಯಲು ಪದೇ ಪದೇ ಶಿಫಾರಸು ಮಾಡಿದ್ದಾರೆ ಮತ್ತು ಸರ್ಕಾರವು ಸೆಕ್ಷನ್ 144 ಅನ್ನು ವಿಧಿಸಬೇಕೆಂದು ಬಯಸಿದೆ. ಬೆಂಗಳೂರಿನಲ್ಲಿ ಏಪ್ರಿಲ್ 18ರಂದು ಸರ್ವಪಕ್ಷ ಸಭೆ ನಡೆದ ನಂತರವೇ ಸರ್ಕಾರ ನಿರ್ಧಾರ ತೆಗೆದುಕೊಳ್ಳುವ ಸಾಧ್ಯತೆಯಿದೆ ಎಂದು ಮೂಲಗಳು ದೃಢಪಡಿಸಿದೆ ಎಂದು ನ್ಯೂಸ್ ಮಿನಿಟ್‌ ವರದಿ ಮಾಡಿದೆ.
ಈಗ ನೆರೆಯ ರಾಜ್ಯವಾದ ಮಹಾರಾಷ್ಟ್ರವು ಹದಿನೈದು ದಿನಗಳ ಕಾಲ ರಾಜ್ಯದಾದ್ಯಂತ ಕರ್ಫ್ಯೂ ಘೋಷಿಸುವ ಮೊದಲೇ, ಕರ್ನಾಟಕ ಸರ್ಕಾರಕ್ಕೆ ಸಲಹೆ ನೀಡಿರುವ ತಜ್ಞರ ತಂಡ ವ್ಯವಹಾರಗಳನ್ನು ಮುಂದುವರಿಸಲು ಅವಕಾಶ ನೀಡುತ್ತಲೇ ಹೆಚ್ಚಿನ ನಿರ್ಬಂಧಗಳನ್ನುಹೇರಲು ತಿಳಿಸಿದೆ
ತಾಂತ್ರಿಕ ಸಲಹಾ ಸಮಿತಿ (ಟಿಎಸಿ) ಪ್ರಮುಖ ಸದಸ್ಯರೊಬ್ಬರು ಒಟ್ಟು ಲಾಕ್ಡೌನ್ ಕೇಳದಿದ್ದರೂ, ಇತರ ಎಲ್ಲ ಆಯ್ಕೆಗಳನ್ನು ಅನ್ವೇಷಿಸಬೇಕು ಎಂದು ಅವರು ತಮ್ಮ ಸಲಹೆಯಲ್ಲಿ ಸರ್ವಾನುಮತದಿಂದ ಹೇಳಿದ್ದಾರೆ. ರಾಜಕೀಯ ಸಮಾವೇಶಗಳು ಸೇರಿದಂತೆ ಗುಂಪು ಸೇರುವುದನ್ನು ತಡೆಯಲು ಸೆಕ್ಷನ್ 144 ಸಹಾಯ ಮಾಡುತ್ತದೆ ಎಂದು ಸಮಿತಿ ಹೇಳಿದೆ. “ಯಾವುದೇ ಆರ್ಥಿಕ ಚಟುವಟಿಕೆಗಳು ಸ್ಥಗಿತಗೊಳ್ಳಲು ನಾವು ಬಯಸುವುದಿಲ್ಲ. ಮಾಲ್‌ಗಳನ್ನು ಮುಚ್ಚಲು ಸಹ ಯಾವುದೇ ಶಿಫಾರಸು ಮಾಡಿಲ್ಲ. ಎಲ್ಲಿಯವರೆಗೆ ಸಾಮಾಜಿಕ ಅಂತರದ ನಿಯಮಗಳನ್ನು ಅನುಸರಿಸಲಾಗುತ್ತದೆ ಮತ್ತು ಜನರು ಮಾಸ್ಕ್‌ಗಳನ್ನು ಧರಿಸುತ್ತಾರೆ ಈ ಚಟುವಟಿಕೆಗಳು ಮುಂದುವರಿಯಬಹುದು, ಎಂದು ಸದಸ್ಯ ಹೇಳಿದ್ದಾರೆ ಎಂದು ನ್ಯೂಸ್ ಮಿನಿಟ್‌ ವರದಿ ಮಾಡಿದೆ.
ಏತನ್ಮಧ್ಯೆ, ಮುಖ್ಯಮಂತ್ರಿ ಯಡಿಯೂರಪ್ಪ ಸೇರಿದಂತೆ ಕರ್ನಾಟಕ ಸಚಿವ ಸಂಪುಟದ ಹೆಚ್ಚಿನ ಮಂತ್ರಿಗಳು ಹೆಚ್ಚಿದ ನಿರ್ಬಂಧಗಳ ಪರ ಇಲ್ಲ. ಲಾಕ್ ಡೌನ್ ಅಥವಾ ವ್ಯವಹಾರಗಳನ್ನು ನಿಧಾನಗೊಳಿಸುವುದರಿಂದ ರಾಜ್ಯದ ಆರ್ಥಿಕತೆಯ ಮೇಲೆ ಉಂಟಾಗುವ ಭಾರಿ ಪರಿಣಾಮದ ಬಗ್ಗೆ ಅವರಿಗೆ ಚಿಂತೆ ಇದೆ. ನಾಗರಿಕರು ಭಯಭೀತರಾಗುವುದರ ಬಗ್ಗೆಯೂ ಸರ್ಕಾರವು ಚಿಂತಿತವಾಗಿದೆ ಎಂದು ಮುಖ್ಯಮಂತ್ರಿ ಕಚೇರಿ ಮೂಲ ತಿಳಿಸಿದೆ. ಆರೋಗ್ಯ ಸಚಿವ ಡಾ.ಕೆ.ಸುಧಾಕರ್ ಅವರನ್ನು ಹೊರತುಪಡಿಸಿ ಹೆಚ್ಚಿನ ಕ್ಯಾಬಿನೆಟ್ ಮಂತ್ರಿಗಳು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರಿಗೆ ಇದೇ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ ಎಂದು ವರದಿ ಹೇಳಿದೆ.
ಏಪ್ರಿಲ್ 14 ರಂದು ಕರ್ನಾಟಕದಲ್ಲಿ 11,265 ಹೊಸ ಕೊರೊನಾ ವೈರಸ್‌ ಸೋಂಕುಗಳು ವರದಿಯಾಗಿದ್ದು, ಅದರಲ್ಲಿ 8155 ರೋಗಿಗಳು ಬೆಂಗಳೂರು ನಗರದಲ್ಲಿಯೇ ವರದಿಯಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ