ನವ ದೆಹಲಿ: 18 ವರ್ಷ ಮೇಲ್ಪಟ್ಟವರ ಕೊರೊನಾ ಲಸಿಕಾ ನೋಂದಣಿಗೆ ಕ್ಷಣಗಣನೇ ಆರಂಭವಾಗಿದ್ದು, ಏಪ್ರಿಲ್ 28ರಿಂದ ಪ್ರಕ್ರಿಯೆ ಆರಂಭವಾಗಲಿದೆ ಎಂದು ರಾಷ್ಟ್ರೀಯ ಆರೋಗ್ಯ ಪ್ರಾಧಿಕಾರ (ಎನ್ಎಚ್ಎ)ದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಆರ್.ಎಸ್. ಶರ್ಮಾ ಅವರು ಗುರುವಾರ ತಿಳಿಸಿದ್ದಾರೆ.
ಹದಿನೆಂಟು ವರ್ಷ ಮೇಲ್ಪಟ್ಟವರು ಸರ್ಕಾರದ ಕೋವಿನ್ (COWIN.GOV.IN) ವೆಬ್ಸೈಟ್ನಲ್ಲಿ ಏಪ್ರಿಲ್ 24ರಿಂದ ನೋಂದಣಿ ಮಾಡಿಕೊಳ್ಳಬಹುದು. ಲಸಿಕಾ ಪ್ರಕ್ರಿಯೆ ಮತ್ತು ದಾಖಲಾತಿಗಳು ಒಂದೇ ಆಗಿರುತ್ತವೆ. ಕೋವಾಕ್ಸಿನ್ ಮತ್ತು ಕೋವಿಶೀಲ್ಡ್ ದೇಶಿ ಲಸಿಕೆಗಳ ಜತೆಯಲ್ಲಿ ರಷ್ಯಾದ ಸ್ಪುಟ್ನಿಕ್ ವಿ ಸಹ ಕೆಲವೊಂದು ಕೇಂದ್ರಗಳಲ್ಲಿ ಲಸಿಕೆಯ ಮತ್ತೊಂದು ಆಯ್ಕೆ ಆಗಿರಲಿದೆ ಎಂದು ಅವರು ಹೇಳಿದ್ದಾರೆ
ಕೊರೊನಾ ಲಸಿಕೆಗೆ ಅರ್ಹ ಫಲಾನುಭವಿಗಳು ಕೋವಿನ್ ವೆಬ್ಸೈಟ್ ಅಥವಾ ಆರೋಗ್ಯ ಸೇತು ಅಪ್ಲಿಕೇಶನ್ ಮೂಲಕ ಲಸಿಕೆಗೆ ನೋಂದಣಿ ಮಾಡಿಕೊಳ್ಳಬಹುದು.
ಕೋವಿನ್ ಅಪ್ಲಿಕೇಶನ್ನಲ್ಲಿ ಲಸಿಕೆ ನೋಂದಣಿ: ಕೋವಿನ್ ವೆಬ್ಸೈಟ್ ಓಪನ್ ಮಾಡಿ ಸೈನ್ ಇನ್ ಆಗಿ. ಮೊಬೈಲ್ ಸಂಖ್ಯೆ ನಮೂದಿಸಿ. ನಂತರ ನಿಮಗೆ ಬಂದ ಒಟಿಪಿಯನ್ನ ಟೈಪ್ ಮಾಡಿ ಅದನ್ನು ಸರಿಯಾಗಿ ಪರಿಶೀಲಿಸಿ ಕ್ಲಿಕ್ ಮಾಡಿ.
ರಿಜಿಸ್ಟರ್ ಫಾರ್ ವ್ಯಾಕ್ಸಿನೇಷನ್ ಪೇಜ್ನಲ್ಲಿ ಹೆಸರು ಕೇಳುತ್ತದೆ, ಆಗ ಹೆಸರು, ಜನ್ಮ ದಿನಾಂಕ, ಫೋಟೋ ಸೇರಿದಂತೆ ಎಲ್ಲಾ ಮಾಹಿತಿಗಳನ್ನ ನಮೂದಿಸಿ. ರಿಜಿಸ್ಟರ್ ಆಯ್ಕೆ ಮೇಲೆ ಕ್ಲಿಕ್ ಮಾಡಬೇಕು.
ಒಮ್ಮೆ ನೋಂದಣಿ ಕಾರ್ಯ ಮುಗಿಯುತ್ತಿದ್ದಂತೆಯೇ ನಿಮಗೆ ದಿನಾಂಕ ನಿಗದಿ ಆಯ್ಕೆ ನಿಮಗೆ ಸಿಗಲಿದೆ.ನಿಮ್ಮ ಪಿನ್ ಕೋಡನ್ನು ಎಂಟರ್ ಮಾಡಿ ಸರ್ಚ್ ಕೊಡಬೇಕು. ಈ ಪಿನ್ ಕೊಡ್ ವ್ಯಾಪ್ತಿಯಲ್ಲಿ ಬರುವ ಎಲ್ಲಾ ಲಸಿಕಾ ಕೇಂದ್ರಗಳು ಮೊಬೈಲ್ ಅಥವಾ ಕಂಪ್ಯೂಟರ್ ಸ್ಕ್ರೀನ್ ಮೇಲೆ ಕಾಣುತ್ತವೆ. ಆಗ ದಿನಾಂಕ ಹಾಗೂ ಸಮಯ ಕ್ಲಿಕ್ ಮಾಡಿ ಅದನ್ನು ದೃಢಪಡಿಸಿಕೊಂಡು ಆಯ್ಕೆ ಕ್ಲಿಕ್ ಮಾಡಬೇಕು.
ಒಮ್ಮೆ ಲಾಗಿನ್ ಆದರೆ ನೀವು 4 ಮಂದಿಯನ್ನ ಲಸಿಕೆಗೆ ನೋಂದಾಯಿಸಬಹುದಾಗಿದೆ. ನೋಂದಣಿ ದಿನಾಂಕವನ್ನೂ ನೀವು ಸುಲಭವಾಗಿ ಬದಲಾಯಿಸಿಕೊಳ್ಳಲು ಅವಕಾಶವಿದೆ.
ಆರೋಗ್ಯ ಸೇತು ಅಪ್ಲಿಕೇಶನ್:
ಆರೋಗ್ಯ ಸೇತು ಅಪ್ಲಿಕೇಶನ್ನಲ್ಲಿ ಕೋವಿನ್ ಟ್ಯಾಬ್ ಮೇಲೆ ಕ್ಲಿಕ್ ಮಾಡಬೇಕು. ವ್ಯಾಕ್ಸಿನ್ ನೋಂದಣಿ (ರಿಜಿಸ್ಟ್ರೇಷನ್) ಆಯ್ಕೆ ಮಾಡಿ – ಫೋನ್ ನಂಬರ್ ನಮೂದಿಸಿ – ಒಟಿಪಿ ಟೈಪ್ ಮಾಡಬೇಕು. ನಂತರ ಸರಿಯಾಗಿ ಪರಿಶೀಲಿಸಿ ಅದರ ಮೇಲೆ ಕ್ಲಿಕ್ ಮಾಡಬೇಕು – ಈಗ ನೀವು ರಿಜಿಸ್ಟ್ರೇಷನ್ ವ್ಯಾಕ್ಸಿನೇಷನ್ ಪೇಜ್ಗೆ ಬಂದಿರುವುದನ್ನು ಹೇಳುತ್ತದೆ.
ನಂತರ ಮುಂದಿನ ಆಯ್ಕೆಗಳನ್ನ ಕ್ಲಿಕ್ ಮಾಡುತ್ತಾ ಹೋಗಬೇಕು. ಪ್ರತಿಯೊಬ್ಬರೂ ಕೊರೊನಾ ಲಸಿಕೆಯ ಎರಡು ಡೋಸ್ಗಳನ್ನ ಪಡೆಯಬೇಕು. ಕೋವ್ಯಾಕ್ಸಿನ್ ಲಸಿಕೆಯ ಮೊದಲ ಡೋಸ್ ಪಡೆದ 28 ರಿಂದ 42 ದಿನಗಳ ಒಳಗೆ ಎರಡನೇ ಡೋಸ್ ಪಡೆಯಬೇಕು.
ಕೋವಿ ಶೀಲ್ಡ್ ಮೊದಲ ಡೋಸ್ ಪಡೆದವರು 28 ರಿಂದ 56 ದಿನಗಳ ಒಳಗೆ ಎರಡನೇ ಡೋಸ್ ಹಾಕಿಸಿಕೊಳ್ಳಬೇಕು ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ತಿಳಿಸಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ