ಇಲ್ಲೊಬ್ಬರು ಶತಾಯುಷಿ ಕೊರೊನಾ ಯುದ್ಧದಲ್ಲಿ ಗೆದ್ದು ಬಂದಿದ್ದಾರೆ. ನೂರರ ಸಮೀಪದಲ್ಲಿರುವ ಅವರ ಪತ್ನಿಯೂ ಕೊರೊನಾದೊಂದಿಗಿನ ಹೋರಾಟದಲ್ಲಿ ಜಯಶಾಲಿಯಾಗಿದ್ದಾರೆ.
105 ವರ್ಷದ ಧೇನು ಚವಾಣ್ ಮತ್ತು 95 ವರ್ಷದ ಅವರ ಪತ್ನಿ ಮೋಟಾಬಾಯಿ ದಂಪತಿಯೇ ಕೊರೋನಾ ವಿರುದ್ಧ ಹೋರಾಡಿ ಗೆದ್ದುಬಂದ ವಯೋವೃದ್ಧರು.
ಈ ವೃದ್ಧ ದಂಪತಿ ಮಹಾರಾಷ್ಟ್ರ ರಾಜ್ಯದ ಲಾತೂರು ಸಮೀಪದ ಕಟಕ ತಾಂಡಾದವರು.ಇವರಿಗೆ ಕೊರೊನಾ ಸೋಂಕು ಕಾಣಿಸಿಕೊಂಡಿದೆ. ಆಗ ಗ್ರಾಮಸ್ಥರೆಲ್ಲ ಇಷ್ಟೊಂದು ವಯಸ್ಸಾದವರನ್ನು ಆಸ್ಪತ್ರೆಗೆ ಒಯ್ದರೆ ಮರಳಿ ಬರುವುದು ಅನುಮಾನ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ. ಆದರೂ ಅವರ ಮಗ ಸುರೇಶ ಚವ್ಹಾಣ ಅವರು ಈ ವೃದ್ಧ ದಂಪತಿಯನ್ನು ಅಸ್ಪತ್ರೆಗೆ ಸೇರಿಸಲು ಹುಡುಕಾಡಿದ್ದಾರೆ. ಕೊನೆಗೆ ಲಾತೂರ್ ನ ದೇಶ್ ಮುಖ್ ಇನ್ಸ್ ಟ್ಯೂಟ್ ಆಫ್ ಮೆಡಿಕಲ್ ಸೈನ್ಸ್ ನಲ್ಲಿ ಈ ವೃದ್ಧ ದಂಪತಿಯನ್ನು ದಾಖಲಿಸಿದ್ದಾರೆ. ಬರೋಬ್ಬರಿ ಒಂಭತ್ತು ದಿನಗಳ ಕಾಲ ಐಸಿಯುವಿನಲ್ಲಿದ್ದ 105 ವರ್ಷದ ಧೇನು ಚವಾಣ್ ಮತ್ತು 95 ವರ್ಷದ ಅವರ ಪತ್ನಿ ಮೋಟಾಬಾಯಿ ಕೊರೋನಾ ವಿರುದ್ಧ ಹೋರಾಡಿ ಜಯಿಸಿ ಬಂದಿದ್ದಾರೆ.
ನಮ್ಮದು ಅವಿಭಕ್ತ ಕುಟುಂಬ, ತಂದೆ – ತಾಯಿ ಅಲ್ಲದೆ ಮನೆಯಲ್ಲಿದ್ದ ಮೂವರ ಮಕ್ಕಳಿಗೂ ಸೋಂಕು ಕಾಣಿಸಿಕೊಂಡಿತ್ತು. ಅವರು ಭಯಭೀತರಾಗಿದ್ದರು. ಈ ಸಂದರ್ಭದಲ್ಲಿ ಅವರನ್ನು ಮನೆಯಲ್ಲಿ ಇಟ್ಟುಕೊಳ್ಳುವುದು ಸೂಕ್ತವಲ್ಲವೆಂದು ನಿರ್ಧರಿಸಿ ಆಸ್ಪತ್ರೆಗೆ ದಾಖಲಿಸಿದೆ ಎಂದು ಸುರೇಶ್ ಚವಾಣ್ ಮಾಧ್ಯಮಗಳಿಗೆ ಹೇಳಿದ್ದಾರೆ.
ಇಬ್ಬರೂ ವೃದ್ಧರಾದ ಕಾರಣ ಚಿಕಿತ್ಸೆಗೆ ಹೇಗೆ ಸ್ಪಂದಿಸುತ್ತಾರೆಂಬ ಕಳವಳವಿತ್ತು, ಆಕ್ಸಿಜನ್ ಬೆಂಬಲದಲ್ಲಿಯೇ ಇದ್ದರು ಮತ್ತು 5 ಆಂಟಿವೈರಸ್ ರೆಮಿಡಿಸಿವರ್ ಚುಚ್ಚುಮದ್ದು ನೀಡಲಾಯಿತು ಎಂದು ದಂಪತಿಗೆ ಚಿಕಿತ್ಸೆ ನೀಡಿದ ವೈದ್ಯ ಗಜಾನನ ಹೇಳಿದ್ದಾರೆ. ಏಪ್ರಿಲ್ 5 ರಂದು ಧೇನು ಹಾಗೂ ಎರಡು ದಿನದ ಬಳಿಕ ಅವರ ಪತ್ನಿ ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾರೆ.
9 ದಿನ ಐಸಿಯುನಲ್ಲಿದ್ದ ಬಳಿಕ ಈಗ ಸೋಂಕು ಮುಕ್ತರಾಗಿ ಕಾಣಿಸಿಕೊಂಡಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ