ದೆಹಲಿಯಲ್ಲಿ ಕೋವಿಡ್ ಸಾವುಗಳು : ಹೆಚ್ಚಿನವರು ಹೃದಯ, ಮೂತ್ರಪಿಂಡದ ಕಾಯಿಲೆ ರೋಗಿಗಳು

ನವದೆಹಲಿ: ಜನವರಿ 12-ಫೆಬ್ರವರಿ 7 ರ ಅವಧಿಯಲ್ಲಿ ದೆಹಲಿಯಲ್ಲಿನ ಒಟ್ಟು ಕೋವಿಡ್ ಸಾವುಗಳ ಪೈಕಿ, ಹೆಚ್ಚಿನವರು ಹೃದ್ರೋಗಗಳು ಅಥವಾ ಮೂತ್ರಪಿಂಡದ ಕಾಯಿಲೆಗಳಂತಹ ಸಹ-ಅಸ್ವಸ್ಥತೆ ಹೊಂದಿದ್ದರು ಎಂದು ವರದಿಯೊಂದು ತಿಳಿಸಿದೆ.
ಅಧಿಕೃತ ಮೂಲಗಳು ಹಂಚಿಕೊಂಡಿರುವ ಕೋವಿಡ್‌-19 ಸಾವುಗಳ ವಿಶ್ಲೇಷಣೆಯ ವರದಿಯ ಪ್ರಕಾರ, ಈ ಅವಧಿಯಲ್ಲಿ ಲೆಕ್ಕಪರಿಶೋಧನೆ ಮಾಡಲಾದ 853 ಸಾವುಗಳಲ್ಲಿ, 779 ಅಥವಾ 91% ರಷ್ಟು ಸಾವಿಗೀಡಾದರಲ್ಲಿ ಸಹ-ಅಸ್ವಸ್ಥತೆಗಳನ್ನು ಹೊಂದಿದ್ದರು ಎಂಬುದು ಕಂಡುಬಂದಿದೆ.
ಕೊರೊನಾ ವೈರಸ್ ಸೋಂಕಿನ ನಂತರ ಮೃತಪಟ್ಟವರಲ್ಲಿ ಮತ್ತು ಸಹ-ಅಸ್ವಸ್ಥ ಪರಿಸ್ಥಿತಿಗಳಿಂದ ಬಳಲುತ್ತಿರುವವರಲ್ಲಿ, ಹೃದ್ರೋಗ ಹೊಂದಿರುವ ರೋಗಿಗಳು ಶೇಕಡಾ 20 ರಷ್ಟು ಮತ್ತು ಮೂತ್ರಪಿಂಡದ ಕಾಯಿಲೆ ಇರುವವರು ಶೇಕಡಾ 19ರಷ್ಟಿದ್ದಾರೆ ಎಂದು ವರದಿ ತಿಳಿಸಿದೆ.
ನಾವು ತಜ್ಞರ ಸಮಿತಿಯನ್ನು ಹೊಂದಿದ್ದೇವೆ ಮತ್ತು ಕೋವಿಡ್‌ನ ವಿಶಿಷ್ಟವಾದ ನ್ಯುಮೋನಿಯಾದ ಮಾದರಿ ಇದೆಯೇ ಎಂದು ನೋಡಲು ವಿಶ್ಲೇಷಣೆ ಮಾಡಲಾಗಿದೆ, ಆದರೆ ಕೊನೆಯ ಹಂತದ ರೋಗಿಗಳಲ್ಲಿ ಸಾವುಗಳು ಸಂಭವಿಸಿವೆ ಎಂದು ಕಂಡುಬಂದಿದೆ. ಅಧಿಕೃತ ಅಂಕಿಅಂಶಗಳ ಪ್ರಕಾರ ಜನವರಿ ತಿಂಗಳಲ್ಲಿ ದೆಹಲಿಯಲ್ಲಿ ಕೋವಿಡ್‌ನಿಂದಾಗಿ 750ಕ್ಕೂ ಹೆಚ್ಚು ಸಾವುಗಳು ವರದಿಯಾಗಿವೆ.
ಸಾಂಕ್ರಾಮಿಕ ರೋಗದ ಪ್ರಾರಂಭದಿಂದಲೂ ಕೊರೊನಾ ವೈರಸ್ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿರುವ ಅನೇಕ ವೈದ್ಯಕೀಯ ತಜ್ಞರು ಮತ್ತು ವೈದ್ಯರು, ಮೂರನೇ ಅಲೆಯಲ್ಲಿ ಸಾವುಗಳು ಹೆಚ್ಚಾಗಿ ರೋಗಿಗಳ ಸಹ-ಅಸ್ವಸ್ಥ ಪರಿಸ್ಥಿತಿಗಳಿಂದಾಗುತ್ತಿವೆ ಮತ್ತು ಪ್ರಾಥಮಿಕವಾಗಿ ಓಮಿಕ್ರಾನ್ ರೂಪಾಂತರದಿಂದಲ್ಲ ಎಂದು ಹೇಳಿದರು.
ಕಳೆದ ಕೆಲವು ದಿನಗಳಲ್ಲಿ ಕೋವಿಡ್‌ನಿಂದಾಗಿ ದೈನಂದಿನ ಪ್ರಕರಣಗಳು ಮತ್ತು ಸಾವಿನ ಸಂಖ್ಯೆಯೂ ಕಡಿಮೆಯಾಗಿದೆ.
ನಗರ ಆರೋಗ್ಯ ಇಲಾಖೆ ಹಂಚಿಕೊಂಡ ಮಾಹಿತಿಯ ಪ್ರಕಾರದೆಹಲಿಯಲ್ಲಿ ಬುಧವಾರ 1,317 ಹೊಸ ಕೋವಿಡ್‌-19 ಪ್ರಕರಣಗಳು 2.11 ಶೇಕಡಾ ಧನಾತ್ಮಕತೆಯೊಂದಿಗೆ ವರದಿಯಾಗಿದೆ, ಆದರೆ 13 ಜನರು ವೈರಲ್ ಕಾಯಿಲೆಗೆ ಮೃತಪಟ್ಟಿದ್ದಾರೆ.