ರಷ್ಯಾ ಸೈನಿಕರಿಂದ ಅತ್ಯಾಚಾರದಿಂದ ತಪ್ಪಿಸಿಕೊಳ್ಳಲು ತಮ್ಮ ಕೂದಲನ್ನು ಚಿಕ್ಕದಾಗಿ ಕತ್ತರಿಸಿಕೊಳ್ಳುತ್ತಿರುವ ಉಕ್ರೇನಿಯನ್ ಯುವತಿಯರು: ಅಧಿಕಾರಿ

ಕೀವ್‌ (ಉಕ್ರೇನ್)‌ : ರಾಜಧಾನಿ ಕೀವ್‌ನಿಂದ ಸುಮಾರು 50 ಮೈಲುಗಳಷ್ಟು ದೂರದಲ್ಲಿರುವ ಉಕ್ರೇನಿಯನ್ ಪಟ್ಟಣವಾದ ಇವಾನ್‌ಕಿವ್‌ನಲ್ಲಿ, ಯುವತಿಯರು ರಷ್ಯಾದ ಸೈನಿಕರಿಂದ ಅತ್ಯಾಚಾರಕ್ಕೊಳಗಾಗುವುದನ್ನು ತಪ್ಪಿಸಿಕೊಳ್ಳಲು ತಮ್ಮ ಕೂದಲನ್ನು ಕತ್ತರಿಸಿಕೊಳ್ಳುತ್ತಿದ್ದಾರೆ..!
ತಾವು ಆಕರ್ಷಕವಾಗಿ ಕಾಣದಿರುವಂತೆ ಮಾಡಲು ತಮ್ಮ ಕೂದಲನ್ನು ಚಿಕ್ಕದಾಗಿ ಕತ್ತರಿಸಿ ರಷ್ಯಾದ ಸೈನಿಕರಿಂದ ಅತ್ಯಾಚಾರಕ್ಕೊಳಗಾಗುವುದನ್ನು ತಪ್ಪಿಸಿಕೊಳ್ಳುವುದಕ್ಕೆ ಪ್ರಯತ್ನಿಸುತ್ತಿದ್ದಾರೆ ಎಂದು ಉಪ ಮೇಯರ್ ಮರಿನಾ ಬೆಸ್ಚಾಸ್ಟ್ನಾ ಹೇಳಿದ್ದಾರೆ.
ಮಾರ್ಚ್ 30 ರಂದು ರಷ್ಯಾದ ಪಡೆಗಳು ಒಂದು ತಿಂಗಳಿಗಿಂತ ಹೆಚ್ಚು ಕಾಲ ಆಕ್ರಮಿಸಿಕೊಂಡ ನಂತರ ಈಗ ಪಟ್ಟಣವನ್ನು ಸ್ವತಂತ್ರಗೊಳಿಸಲಾಗಿದೆ.
ಆಕ್ರಮಣದ ಅವಧಿಯಲ್ಲಿ, ಮಹಿಳೆಯರನ್ನು ಅವರ ಕೂದಲನ್ನು ನೋಡಿ ನೆಲಮಾಳಿಗೆಯಿಂದ ಹೊರಗೆಳೆಯಲಾಯಿತು. ಹೀಗಾಗಿ ಹುಡುಗಿಯರು ಕಡಿಮೆ ಆಕರ್ಷಕವಾಗಿ ಕಾಣಲು ತಮ್ಮ ಕೂದಲನ್ನು ಚಿಕ್ಕದಾಗಿ ಕತ್ತರಿಸಲು ಪ್ರಾರಂಭಿಸಿದರು ಎಂದು ಅವರು ಹೇಳಿದ್ದಾರೆ.
ಐಟಿವಿ ನ್ಯೂಸ್‌ನೊಂದಿಗೆ ಮಾತನಾಡಿದ ಅವರು, ಸಮೀಪದ ಹಳ್ಳಿಯೊಂದರಲ್ಲಿ 15 ಮತ್ತು 16 ವರ್ಷ ವಯಸ್ಸಿನ ಇಬ್ಬರು ಸಹೋದರಿಯರ ಮೇಲೆ ರಷ್ಯಾದ ಸೈನಿಕರು ಅತ್ಯಾಚಾರವೆಸಗಿರುವ ಘಟನೆಯನ್ನು ವಿವರಿಸಿದರು.

ಅತ್ಯಾಚಾರದ ವರದಿಗಳು
ಅತ್ಯಾಚಾರದ ವರದಿಗಳು ಹೊರಹೊಮ್ಮಿದ ಉಕ್ರೇನ್‌ನ ಏಕೈಕ ಭಾಗ ಇವಾನ್ಕಿವ್ ಅಲ್ಲ. ಒಂದು ನಿದರ್ಶನದಲ್ಲಿ, ಉಕ್ರೇನಿಯನ್ ಮಹಿಳೆಯೊಬ್ಬರು ತನ್ನ ಪತಿಯನ್ನು ಗುಂಡಿಕ್ಕಿ ಕೊಂದ ಕೆಲವೇ ಕ್ಷಣಗಳಲ್ಲಿ ರಷ್ಯಾದ ಸೈನಿಕರು ತನ್ನ ಮೇಲೆ ಅತ್ಯಾಚಾರವೆಸಗಿದ್ದಾರೆಂದು ಹೇಳಿದರು, ಆಗ ಭಯಭೀತರಾದ ನಾಲ್ಕು ವರ್ಷದ ಮಗ ಮುಂದಿನ ಕೋಣೆಯಲ್ಲಿ ಅಳುತ್ತಿದ್ದನು ಎಂದು ಹೇಳಿದ್ದಾರೆ.
ಫೆಬ್ರವರಿ 24 ರಂದು ರಷ್ಯಾ ಉಕ್ರೇನ್ ಮೇಲೆ ಆಕ್ರಮಣ ಮಾಡಿತು ಮತ್ತು ಅಂದಿನಿಂದ ದೇಶದಾದ್ಯಂತ ದಾಳಿಗಳನ್ನು ನಡೆಸುತ್ತಿದೆ. ಯುದ್ಧದಲ್ಲಿ ಸಾವಿರಾರು ನಾಗರಿಕರು ಮತ್ತು ಸೈನಿಕರು ಪ್ರಾಣ ಕಳೆದುಕೊಂಡಿದ್ದಾರೆ ಮತ್ತು ನಲವತ್ತು ಲಕ್ಷ ಜನರು ಸ್ಥಳಾಂತರಗೊಂಡಿದ್ದಾರೆ.
ಉಕ್ರೇನ್‌ನ ಪೂರ್ವ ಭಾಗಗಳ ಮೇಲೆ ಕೇಂದ್ರೀಕರಿಸಲು ರಷ್ಯಾ ರಾಜಧಾನಿ ಕೀವ್‌ನ ಸುತ್ತಮುತ್ತಲಿನ ಪ್ರದೇಶಗಳಿಂದ ರಷ್ಯನ ಪಡೆಗಳು ಹಿಂದೆ ಸರಿದಿದೆ. ಅಲ್ಲಿಂದ ಹಿಂದಕ್ಕೆ ಹೋದರೂ ಅವರು ಬುಚಾ ಮತ್ತು ಬೊರೊಡಿಯಾಂಕಾದಂತಹ ಸ್ಥಳಗಳಲ್ಲಿ ವಿನಾಶದ ಕುರುಹನ್ನು ಬಿಟ್ಟಿವೆ.

ಪ್ರಮುಖ ಸುದ್ದಿ :-   ಕೋಟಿಗಟ್ಟಲೆ ಬೆಲೆಗೆ ಮಾರಾಟವಾಗಿ ನೂತನ ದಾಖಲೆ ನಿರ್ಮಿಸಿದ ಭಾರತದ ಮೂಲದ ಈ ತಳಿಯ ಹಸು..! ಬೆಲೆ ಕೇಳಿದ್ರೆ ದಂಗಾಗ್ತೀರಾ...!!

5 / 5. 2

ಶೇರ್ ಮಾಡಿ :

ನಿಮ್ಮ ಕಾಮೆಂಟ್ ಬರೆಯಿರಿ

advertisement